Omolwashike ovanhu hava ningilwa oinima ii nokumona oixuna?

Ngeenge pa holoka omaupyakadi, oshi li paushitwe komunhu a pule kutya, “Omolwashike ndi na okumona oixuna ngaha?” Inatu hafa tuu eshi Ombiibeli ya nyamukula epulo olo monghedi ya yela!

1. Satana okwa ninga po shike, opo mounyuni mu kale mu na oinima ii?

Satana Ondiaboli okwa tukululila Kalunga oshibofa. Okwa li a hala okupangela ovanhu, onghee okwa li a nwefa mo ovanhu votete, Adam naEva, ve mu waimine mounashibofa waye. Okwa ninga ngaho eshi a lombwela Eva oipupulu. (Genesis 3:1-5) Okwa ningifa Eva a diladile kutya Jehova ine mu halela oshinima shonhumba shiwa. Okwa ti kutya ovanhu otava ka kala va hafa, ngeenge inava dulika kuKalunga. Okwa popya oipupulu yotete eshi a lombwela Eva kutya ita ka fya. Nomolwaasho Ombiibeli ya ifana Satana kutya “omunaipupulu naxe yayo.”— Johannes 8:44.

2. Adam naEva ova li va hoolola okuninga shike?

Jehova okwa li a pa Adam naEva keshe shimwe. Okwa ti kutya otava dulu okulya komiti adishe domoshikunino shaEden, kakele kuumwe. (Genesis 2:15-17) Ashike ova li va tokola okulya komuti oo wa dilikwa. Eva “okwa kufa oiimati yao ndele ta li.” Lwanima, Adam naye “okwa lya.” (Genesis 3:6) Aveshe inava dulika kuKalunga. Molwaashi Adam naEva ova li va wanenena, ova li tava dulu okulonga osho shi li mondjila. Ashike kava li va dulika kuKalunga, ova li va nyona nova ekelashi ounamapangelo waye. Etokolo olo ola li le va etela okumona oixuna kuhapu.— Genesis 3:16-19.

3. Etokolo laAdam naEva ole tu kuma ngahelipi?

Eshi Adam naEva va nyona, kava li vali va wanenena, noludalo lavo alishe ola fyuulula okuhawanenena kwavo. Ombiibeli oya popya shi na sha naAdam ya ti: “Oulunde owe uya mounyuni okupitila momunhu umwe, nefyo ole uya omolwoulunde, onghee ovanhu aveshe ohava fi.”— Ovaroma 5:12.

Ohatu mono oixuna omolwomatomheno a yoolokafana. Omafimbo amwe ohatu mono oixuna omolwomatokolo mai oo twa ninga. Peemhito dimwe, ohatu mono oixuna omolwomatokolo mai avamwe. Nomafimbo amwe ohatu mono oixuna omolwoiningwanima yombadilila.— Lesha Omuudifi 9:11.

KONAKONA MOULE

4. Omunhu oo ha etifa okumona oixuna kwetu

Ovanhu vahapu ova itavela kutya Kalunga oye ta pangele ounyuni aushe. Mbela osho oshoshili? Dana OKAVIDIO.

OKAVIDIO: Olyelye ta pangele ounyuni? (1:24)

Lesha Jakob 1:13 nosho yo 1 Johannes 5:19, ndele tamu kundafana epulo tali shikula:

• Mbela Kalunga oye ha etifa okumona oixuna nosho yo owii?

5. Konakona oidjemo oyo ya etifwa po eshi Satana a hovela okupangela

OKAVIDIO: Omolwashike Kalunga a efa okumona oixuna ku kale po?— Okatukulwa kaxupi (3:07)

Lesha Genesis 3:1-6, ndele tamu kundafana omapulo taa shikula:

• Oipupulu ilipi Satana a popya?— Tala ovelishe 4 nosho yo 5.

• Ongahelipi Satana a lundila Jehova kutya ka li a halela ovanhu ouwa wonhumba?

• Satana okwe shi ulika ngahelipi kutya okwa li a hala okutya ovanhu inava pumbwa epangelo laJehova, opo va kale va hafa?

Lesha Omuudifi 8:9, ndele tamu kundafana epulo tali shikula:

• Okutala kefimbo olo ounyuni wa kala itau pangelwa kuJehova, oshike sha ningwa po?

1. Adam naEva ova li va wanenena nova li mOparadisa. Ashike ova li va pwilikina kuSatana, ndele tava tukululile Jehova oshibofa

2. Konima younashibofa oo, mounyuni omwa kala mu yadi oulunde, okumona oixuna nefyo

3. Jehova ota ka xulifa po oulunde, okumona oixuna nefyo. Ovanhu otava ka kala vali va wanenena notava ka kala mOparadisa

6. Jehova oha kala e na ko nasha nafye, ngeenge hatu mono oixuna

Mbela Kalunga oha kala ngoo e na ko nasha nafye, ngeenge hatu mono oixuna? Tala osho ohamba David nomuyapostoli Petrus va shanga. Lesha Epsalme 31:7 nosho yo 1 Petrus 5:7, ndele tamu kundafana epulo tali shikula:

• Ou udite ngahelipi, eshi u shii kutya Jehova oha kala e na ko nasha nafye nohe shi didilike, ngeenge hatu mono oixuna?

ENGONGO

Satana Ondiaboli nosho yo ovanhu vavali votete ovo unene va etifa oinima ii mounyuni. Jehova oha kala e na ko nasha nafye, ngeenge hatu mono oixuna, note ke i xulifa po mafiku.

Eendululo

• Oipupulu ilipi Satana Ondiaboli a lombwela Eva?

• Ounashibofa waAdam naEva owe tu kuma ngahelipi?

• Otu shi shii ngahelipi kutya Jehova oha kala e na ko nasha nafye, ngeenge hatu mono oixuna?

TALA OUYELELE WA WEDWA PO

Lihonga osho Ombiibeli ya popya kombinga youlunde.

“Oulunde oshike?” (Oshitukulwa shi li ko jw.org)

Lihonga shihapu kombinga yomhata oyo ya etifwa po kuSatana Ondiaboli moshikunino shaEden.

“Omolwashike Kalunga a efa okumona oixuna ku kale po?” (Oshungonangelo, 1 Januali 2014)

Konakona omanyamukulo taa hekeleke epulo olo lidjuun.

“Omolwashike oiponga inyanyalifi hai ningwa? Omolwashike Kalunga ihe i kelele?” (Oshitukulwa shi li ko jw.org)

Tala osho omulumenhu umwe e lihonga kombinga yokumona oixuna oko a mona momudingonoko waye.

Kandi li vali aame andike (5:09)

Ohatu nyono, hatu mono oixuna nohatu fi omolwokuhadulika kwovalihomboli votete, Adam naEva.a Ashike natango otu na eteelelo. Jehova okwa ninga elongekido, opo e tu xupife moulunde nefyo okupitila mOmona waye, Jesus Kristus. Ombiibeli otai hongo kutya Jesus okwa yandja ekuliloyambo okupitila mefyo laye. Ekulilo ofuto oyo hai futwa okumangulula umwe. Ofuto oyo ya futwa kuJesus oyo ongushu yomwenyo waye wopanhu wa wanenena. (Lesha Mateus 20:28.) Eshi Jesus a yandja omwenyo waye nehalo liwa, okwe tu yeululila omhito yoku ka mona omwenyo waalushe oo wa kanifwa kuAdam naEva. Jesus okwe tu ulikila kutya ye naJehova ove tu hole neenghono. Oshileshwa eshi otashi ku kwafele u kale u na olupandu li na sha nefyo laJesus.

1. Ouwa ulipi hatu mono kunena omolwefyo laJesus?

Molwaashi otu li ovalunde, ohatu ningi oinima ihapu oyo tai nyemateke Jehova. Ashike ngeenge otwe livele ombedi shili omolwomatimba etu nokupula Jehova e tu dimine po okupitila muJesus Kristus, ndele hatu ningi ngaashi hatu dulu tuha endulule omapuko a tya ngaho, ohatu ka hafela ekwatafano lopofingo naKalunga. (1 Johannes 2:1) Ombiibeli oya ti: “Kristus okwa fya palumwe, opo a mangulule moulunde ovo vehe fi ovayuki noku va ehenifa popepi naKalunga.”— 1 Petrus 3:18.

2. Efyo laJesus otali ke tu etela ouwa ulipi monakwiiwa?

Jehova okwa tuma Jesus a yandje po omwenyo waye wopanhu, ‘opo keshe ou ta itavele Jesus aha hanaunwe po, ndele a ka mone omwenyo waalushe.’ (Johannes 3:16) Omolwekuliloyambo laJesus, mafiku Jehova ota ka xulifa po oinima aishe ii oyo ya etifwa kokuhadulika kwaAdam. Osho osha hala kutya ngeenge otu na eitavelo tali longo mekuliloyambo laJesus ohatu ka mona omhito, opo tu ka hafele omwenyo fiyo alushe moparadisa kombada yedu.— Jesaja 65:21-23.

KONAKONA MOULE

3. Efyo laJesus ole tu mangulula ko koulunde nefyo

OKAVIDIO: Omolwashike Jesus a fya?— Oshitukulwa 1 (2:01)

• Adam okwa xutwifa omhito ilipi eshi ina dulika kuKalunga?

Lesha Ovaroma 5:12, ndele tamu kundafana epulo tali shikula:

• Okunyona kwaAdam okwa kuma ngahelipi onghalamwenyo yoye?

Lesha Johannes 3:16, ndele tamu kundafana epulo tali shikula:

• Omolwashike Jehova a li a tuma Omona waye kombada yedu?

1. Adam okwa li omunhu a wanenena, oo a li ina dulika kuKalunga nokwa etela ovanhu oulunde nefyo

2. Jesus okwa li omunhu a wanenena, a dulika kuKalunga nokwa pa ovanhu omhito, opo va kale va wanenena nokukala nomwenyo fiyo alushe

4. Efyo laJesus otali dulu okweetela ovanhu aveshe ouwa

OKAVIDIO: Omolwashike Jesus a fya?— Oshitukulwa 2 (2:00)

• Ongahelipi efyo lomulumenhu umwe tali dulu okweetela ovanhu aveshe ouwa?

Lesha 1 Timoteus 2:5, 6, ndele tamu kundafana epulo tali shikula:

• Adam okwa li a wanenena, ndele molwaashi okwa nyona, okwa etela ovanhu aveshe oulunde nefyo. Jesus naye okwa li a wanenena ngaashi ashike Adam. Ndele ongahelipi a dula okuyandja “oikulila ya yeleka”?

5. Ekuliloyambo oli li oshali oyo wa pewa kuJehova

Ookaume kaJehova ova tala ko ekuliloyambo li li oshali oyo va pewa pauhandimwe. Pashihopaenenwa, lesha Ovagalati 2:20, ndele tamu kundafana epulo tali shikula:

• Omuyapostoli Paulus okwa li a ulika ngahelipi kutya okwa tala ko ekuliloyambo li li oshali oyo a pewa pauhandimwe?

Eshi Adam a nyona, ye noludalo laye alishe ova li va tokolelwa efyo. Ndele Jehova okwa tuma Omona waye a fye, opo u dule okumona omhito yoku ka kala nomwenyo fiyo alushe.

Eshi to lesha eevelishe tadi landula, diladila nghee Jehova a li e udite, eshi Omona waye a li ta mono oixuna. Lesha Johannes 19:1-7, 16-18, ndele tamu kundafana epulo tali shikula:

• Ou uditile ngahelipi osho Jehova naJesus ve ku ningila?

ENGONGO

Efyo laJesus ole shi ningifa tashi shiiva, opo Jehova a dime po omatimba etu; ole tu pa yo omhito yoku ka kala nomwenyo fiyo alushe.

Eendululo

• Omolwashike Jesus a file?

• Omolwashike omwenyo waJesus wopanhu wa wanenena u li oikulila ya yeleka?

• Ongahelipi efyo laJesus tali dulu oku ku etela ouwa?

TALA OYELELE WA WEDWA PO

Lihonga kutya omolwashike omwenyo waJesus wopanhu wa wanenena tau ifanwa ekulilo.

“Ongahelipi eyambo laJesus li li ‘ekulilo lavahapu?’” (Oshitukulwa shi li ko jw.org)

Tala kutya oshike twa pumbwa okuninga, opo tu xupifwe.

“Ongahelipi Jesus e li omuxupifi?” (Oshitukulwa shi li ko jw.org)

Jehova ota dulu ngoo oku tu dimina po omanyono oo a kwata moiti?

“Omapulo opaMbiibeli a nyamukulwa” (Oshungonangelo, 1 Mei 2013)

Tala nghee okulihonga kombinga yekuliloyambo laKristus kwa kwafela omulumenhu umwe a lundulule omaukwatya aye.

“Kandi fi vali omupika wominyonena” (Oshitukulwa shi li ko jw.org)