7, 8. Ongahelipi eenghatu odo da katukwa kovalumenhu vavali ovo va li va wanenena da etifa oidjemo ya yoolokafana?

⁷ Jehova okwa ninga po elongekido lopahole opo ovanhu va dule okumangululwa moulunde oo va fyuulula. Paulus okwa li a yelifa kutya ovanhu otava dulu okumangululwa moulunde tashi ningwa okupitila momunhu umwe oo naye a wanenena, noitya imwe, Adam omutivali. (1 Kor. 15:45) Ashike eenghatu odo da katukwa kovalumenhu vavali ovo va li va wanenena oda etifa oidjemo ya yoolokafana filufilu. Ngahelipi mbela? — Lesha Ovaroma 5:15, 16.

⁸ Paulus okwa ti: “Oshalinghenda inashi fa enyono.” Adam okwa li a nyona nokwa li a pewa ehandukilo lefyo li fike penyono laye. Ndele nande ongaho, haye aeke a li ta ka hangwa kefyo. Ombibeli oya ti: “Omolwenyono laumwe vahapu ova fya.” Ehandukilo li li pauyuki olo Adam a li a pewa ola kuma yo oludalo laye alishe inali wanenena, nafye twa kwatelwa mo. Ashike ohatu dulu okuhekelekwa molwaashi otu shii kutya omulumenhu a wanenena, Jesus, ota dulu okweetifa po oidjemo iwa. Oidjemo oilipi mbela? Paulus okwa nyamukula epulo olo eshi a ti kutya ota etele ‘ovanhu aveshe eyukipalifo lomwenyo.’ — Rom. 5:18.

9. Omeityo lilipi Kalunga ha tale ko ovanhu ovayuki ngaashi sha tumbulwa mOvaroma 5:16, 18?

⁹ Mbela outumbulilo wOshigreka oo wa tolokwa “eyukipalifo” otau yandje ediladilo lilipi? Omutoloki umwe wOmbibeli okwa ti outumbulilo oo ou li: “Omupopyofano oo tau ulike koinima yopaveta. Otau ulike kokulundulula kwaKalunga etaleko laye li na sha nomunhu, ndele itau ulike kokulundulula kwomunhu oikala yaye yomutima . . . Omupopyofano oo otau faneke kuKalunga e li onga omutokoli oo a mona kutya omutamanekwa oo a etwa komhangu yaye yopafaneko ta tamanekelwa okuhenouyuki ke na ondjo. Onghee hano, Kalunga okwa mangulula omutamanekwa oo.”

14, 15. Ondjabi ilipi tai ka pewa ovanhu vamwe ovo Kalunga a valulila ouyuki, ndele oshike osho va pumbwa okuninga natango?

¹⁴ Diladila ashike shi na sha noshali oyo Omunaenghono adishe a yandja opo a dule okudimina po ovanhu omanyono oo hava ningi omolwoufyuululwalunde nomolwomapuko avo! Kape na oo ta dulu okuvalula omanyono oo a ningwa koohandimwe ofimbo inava ninga Ovakriste, ndele nande ongaho, Kalunga ota dulu oku va dimina po omatimba avo aeshe pakanghameno lekulilo. Paulus okwa ti: “Oshalinghenda otai eta eyukipalifo momanyono mahapu.” (Rom. 5:16) Ovayapostoli nosho yo ovanhu vamwe ovo va pewa oshali oyo yopahole (va talwa ko ovayuki) ova li tava ka twikila okulongela Kalunga kashili meitavelo. Mbela otava ka pewa ondjabi yashike monakwiiwa? Paulus okwa ti: “Ava tava tambula ouyadi wonghenda nowoshali youyuki otava ka pangela mokukalamwenyo taku uya omolwaau umwe, Jesus Kristus.” Onghee hano, oshali oyo tava ka pewa omolwoilonga yavo youyuki oyo omwenyo waalushe. — Rom. 5:17; lesha Lukas 22:28-30.