Omapulo a dja kovaleshi

Okoolyelye Paulus ta ulike mo 2 Ovakorinto 6:14 eshi a longifa outumbulilo ‘ava ve he neitavelo’?

Ohatu lesha mo 2 Ovakorinto 6:14, taku ti: “Inamu humbata ondjoko imwe pamwe naava ve he neitavelo.” Ngeenge otwa tale moshitukulwa ashishe omo mwa dja omushangwa oo, osha yela kutya Paulus ota popi shi na sha noohandimwe ovo ve he fi oshitukulwa sheongalo lopaKriste. Eudeko la tya ngaho otali yambididwa keevelishe dikwao dOmbibeli omo Paulus a longifa outumbulilo ‘ou e he fi omwiitaveli’ ile ‘ava ve he neitavelo.’

Pashihopaenenwa, mo 1 Ovakorinto 6:6, Paulus okwa londwela Ovakriste va ha hokololife vakwao meemhangu “moipafi yaava ve he neitavelo.” Apa ovo ve he neitavelo ova li ovatokoli ovo va li hava longo momhangu yomuKorinto. Monhumwafo yaye onhivali, Paulus okwa ti kutya ‘ava ve he neitavelo, eendunge davo oda twikifwa’ kuSatana. Omesho aavo ve he neitavelo okwa ‘uvikwa’ va ha minikilwe konghundana iwa. Ovanhu va tya ngaho ve he neitavelo kava li va holola ohokwe yokulongela Jehova, molwaashi Paulus okwa yelifa metetekelo a ti: “Omitima davo ngenge de liameka kOmwene, oshituviko otashi kufwa po.”—2 Ovakorinto 3:16; 4:4.

Vamwe ovo ve he neitavelo ohava kufa ombinga moilonga youkolokoshi ile mokulongela oikalunga. (2 Ovakorinto 6:15, 16) Ndele haaveshe vomuvo hava pataneke ovapiya vaJehova. Vamwe ohava ulike kutya ova hokwa oshili. Vamwe ove na ookaume kopahombo ovo ve li Ovakriste nova hafa okukala pamwe navo. (1 Ovakorinto 7:12-14; 10:27; 14:22-25; 1 Petrus 3:1, 2) Paulus okwa longifa alushe outumbulilo ‘ou e he fi omwiitaveli’ e u yukifa koohandimwe ovo, ngaashi sha popiwa metetekelo, ve he fi oshitukulwa sheongalo lopaKriste, olo la fikama po ‘mwaavo va itavela Omwene.’—Oilonga 2:41; 5:14; 8:12, 13.

Efinamhango olo li li mo 2 Ovakorinto 6:14 oli li ewiliko la fimana kOvakriste meembinga adishe dokukalamwenyo nola kala hali tofwa mo luhapu molwokuyandja omayele opandunge kOvakriste ovo tava kongo ookaume kopahombo. (Mateus 19:4-6) Omukriste e liyapulila Kalunga nokwa ninginifwa oha katuka pandunge a ha konge kaume kopahombo mokati kaavo ve he fi ovaitaveli, molwaashi omifikamhango dopaenghedi, omalalakano nosho yo osho sha itavelwa kwaavo ve he fi ovaitaveli oya yooloka ko kwaayo yOmukriste washili.

Ndele ongahelipi koohandimwe ovo hava konakona Ombibeli nohava endafana neongalo lopaKriste? Ongahelipi kwaavo ve li ovaudifi inava ninginifwa? Mbela ovaheneitavelo? Hasho. Oohandimwe ovo va tambula ko oshili yonghundana iwa notava ningi exumokomesho liwa tali twala keninginifo kave na okwiifanwa ovaheneitavelo. (Ovaroma 10:10; 2 Ovakorinto 4:13) Fimbo Kornelius ina ninginifwa, okwa li a ifanwa “omuyuki, ha tila Kalunga.”—Oilonga 10:2.

Ndele mbela otashi ka kala ngoo shi li pandunge kOmukriste e liyapulila Kalunga a lalakanene eendelafano nokuhombola omunhu e li omuudifi ina ninginifwa, molwaashi paulelalela omayele aPaulus oo e li mo 2 Ovakorinto 6:14 itaa ulike komunhu a tya ngaho kutya omuheneitavelo? Hasho. Omolwashike mbela? Omolwomayele aPaulus a yukilila oo a yandja kovafiyekadi Ovakriste. Paulus okwa shanga a ti: ‘Ye a manguluka a hombolwe kuou a hala, shimha tashi ningilwa ashike mOmwene.’ (1 Ovakorinto 7:39, yelekanifa NW.) Metwokumwe nomayele oo, Ovakriste ve liyapulila Kalunga otava kumaidwa va konge ashike ookaume kopahombo mokati kaavo ve li “mOmwene.”

Outumbulilo “mOmwene” nosho yo mukwao we u pamba “muKristus” owa hala okutya ngahelipi? Paulus okwa popya shi na sha noohandimwe ovo va li “muKristus” ile “mOmwene” mOvaroma 16:8-10 nosho yo mOvakolossi 4:7. Ngeenge owa lesha eevelishe odo, oto ka mona kutya ovanhu va tya ngaho ova li ‘ovalongi pamwe,’ ‘va dula omayeleko,’ ‘ovamwaxe ovaholike,’ ‘ovalongi ovadiinini’ nosho yo ‘ovapiya vakwao.’

Onaini omunhu ha ningi ‘omupiya mOmwene’? Osho ohashi ningwa ngeenge omunhu ta longo nehalo liwa osho omupiya e na okuninga nokukala e lixupula ye mwene. Jesus okwa yelifa a ti: “Ngenge ku na ou a hala okushikula nge, oye ne lixupule ye mwene, ne litwike [omuti womahepeko, NW] waye, ye na shikule nge.” (Mateus 16:24) Omunhu oha hovele okushikula Kristus nokuliyandja filufilu ye mwene a longe ehalo laKalunga ngeenge e liyapulila Kalunga. Konima yaasho ohe liyandje a ninginifwe nokuninga omukalele a yapulwa e na omufika wa hokiwa kuJehova Kalunga.a Onghee hano, ‘okuhombola mOmwene’ otaku ti okuhombola omunhu oo a holola kutya ye oku li omwiitaveli washili, “omupiya waKalunga nowOmwene Jesus Kristus” e liyapulila Kalunga.—Jakob 1:1.

Omunhu oo ta konakona Ombibeli nEendombwedi daJehova nota ningi exumokomesho liwa lopamhepo oku shii okupandulwa. Ndelenee ine liyapulila Jehova natango noine liyandja opo okukalamwenyo kwaye ku ninge kwoilonga yeliyambo. Ota ningi natango omalunduluko oo a pumbiwa. Okwa pumbwa okumana okuninga omalunduluko manene mwa kwatela okuliyapulila Kalunga nokuninga Omukriste a ninginifwa, ofimbo ina lalakanena elunduluko likwao linene, ngaashi ohombo.

Mbela otashi ka kala ngoo pandunge okuhovela eendelafano nomunhu oo ta monika ta xumu komesho nawa mekonakonombibeli laye fimbo wa teelela a ninginifwe opo nee tamu hombola? Hasho. Omalinyengotomheno omukonakonimbibeli otaa dulu okukala a ngwangwanifwa ngeenge oku shi shii kutya Omukriste e liyapulila Kalunga okwa hala oku mu hombola ndele ite ke shi ninga ofimbo ye ina ninginifwa.

Luhapu, omunhu oha kala ashike omuudifi ina ninginifwa oule wokafimbo, fiyo a ninga exumokomesho fiyo oposhitwa shokuninginifwa. Onghee hano omayele oo a tumbulwa metetekelo okuhombola ashike mOmwene kae fi omayele e he li pandunge. Ongahelipi ngeenge omunhu oo a fika pomido dokuya mohombo okwa tekulwa moukwaneumbo wopaKriste nokwa kala e lipyakidila meongalo oule womido dihapu noku li yo omuudifi ina ninginifwa? Ngeenge osho ngaho, oshike she mu imba a yapulile Jehova okukalamwenyo kwaye? Omolwashike ta ongaonga? Mbela oku li momalimbililo? Nonande ke fi omuheneitavelo, itaku dulu okutiwa kutya oku li “mOmwene.”

Omayele aPaulus e na sha nohombo otae tu etele omauwa. (Jesaja 48:17) Ngeenge ovalikongi ove liyapulila Jehova aveshe, etokolotoko lavo lokudiininafana mohombo oli na ekanghameno lopamhepo la kola. Ohava dulika komifikamhango dopaenghedi da faafana nove na omalalakano a faafana. Osho ohashi dana onghandangala inene mokukaleka po ohombo i na elao. Kakele kaasho, ‘mokuhombola mOmwene’ omunhu ota ulike oudiinini waye kuJehova naasho otashi dulu okweetifa omanangeko noupuna taa kalelele, molwaashi “kwaao e li omudiinini [Jehova ota] kala yo omudiinini.”—Epsalme 18:25, NW.

[Omashangelo opedu]