Efiku laJehova otali ka nyaneka shike pomutenya?
‘Efiku lOmwene otali ke uya ngaashi omulunga, nedu noilongwanima yomulo otai ka hololwa.’ — 2 PET. 3:10, yelekanifa NW.
1, 2. (a) Onghalelo ei yoinima youkolokoshi otai ka xula po ngahelipi? (b) Ohatu ka kundafana kombinga yomapulo elipi?
ONGHALELO ei yoinima youkolokoshi oya dikwa kekanghameno loipupulu olo kutya ovanhu otava dulu okupangela edu nomupondo va manguluka ko kuJehova. (Eps. 2:2, 3) Ndele mbela ope na ngoo oshinima shoipupulu tashi dulu okukalelela? Hasho nandenande! Ndele nande ongaho, katu na okuteelela ounyuni waSatana u hanauke po kuo vene. Ponhele yaasho, otau ka hanaunwa po kuKalunga peufwafimbo laye nopahalo laye. Onghatu oyo Kalunga ta ka katukila ounyuni ou woukolokoshi otai ka ulika ouyuki nosho yo ohole yaye monghedi ya wanenena. — Eps. 92:8; Omayel. 2:21, 22.
2 Omuyapostoli Petrus okwa ti: “Efiku lOmwene otali ke uya ngaashi omulunga, opo tuu eulu tali nyonauka po [nomipwalakato] dinene noihovelitungifo otai dilukifwa komundjene, nedu noilongwanima otai [ka hololwa, NW].” (2 Pet. 3:10) ‘Eulu nedu’ oyo ya tumbulwa momushangwa oo otai ulike kushike? ‘Oihovelitungifo’ oyo tai ka dilukifwa otai ulike kushike? Petrus okwa li a hala okutya shike eshi a ti ‘edu noilongwanima otai ka hololwa’? Ngeenge otwa shiiva omanyamukulo omapulo oo, otashi ke tu kwafela tu kale twe lilongekidila oiningwanima itilifa oyo tai ka ningwa monakwiiwa i li popepi.
Eulu nedu olo tali ka xula po
3. “Eulu” olo la tumbulwa mu 2 Petrus 3:10 otali faneke shike, notali ka xula po ngahelipi?
3 Luhapu ngeenge outumbulilo “eulu” wa longifwa mOmbibeli meityo lopafaneko, otau ulike kwaavo ve na eenghonopangelo, ovo ve li peendodo dopombada nohava pangele vakwao. (Jes. 14:13, 14; Eh. 21:1, 2) ‘Eulu olo tali ka nyonauka po’ otali faneke omapangelo oo taa pangele oulikumwe wovanhu vehe na Kalunga. Okuxula po kweulu olo ‘nomipwalakato’ dinene ile “okukumba kunene,” ngaashi etoloko limwe la ti, otaku ulike kehanauno la endelela olo tali ka hanga eulu olo.
4. ‘Edu’ otali faneke shike, notali ka hanaunwa po ngahelipi?
4 ‘Edu’ otali faneke ounyuni wovanhu ovo ve liteeka Kalunga. Ounyuni wa tya ngaho owa li ko yo nopefimbo laNoa, nowa li wa hanaunwa po kuKalunga nEyelu. Ombibeli oya ti: “Eulu lopaife nedu eli ola tuvikililwa omundilo okeendjovo tuu odo fiyo kefiku letokolo nolekano lovanhu ve he na Kalunga.” (2 Pet. 3:7) Mepingafano nEyelu olo la li la hanauna po ovakolokoshi aveshe pefimbo limwe, ehanauno olo tali ke uya otali ka ningwa kanini nakanini pefimbo ‘loudjuu munene.’ (Eh. 7:14, NW) Pehovelo loudjuu oo, Kalunga ote ke linyengifa ovapangeli vopapolotika vounyuni ou va hanaune po “Babilon shinene” opo a ulike kutya oku tonde ombwada oyo yopalongelokalunga. (Eh. 17:5, 16; 18:8) Opo nee poita yaHarmagedon, oshitukulwa shaxuuninwa shoudjuu oo munene, Jehova ota ka hanauna po oshixupe shounyuni waSatana. — Eh. 16:14, 16; 19:19-21.
‘Oihovelitungifo otai ka dilukifwa’
5. Oihovelitungifo yopafaneko oya kwatela mo shike?
5 ‘Oihovelitungifo oyo tai ka dilukifwa’ otai ulike kushike? ‘Oihovelitungifo’ oyo ya tumbulwa kuPetrus otai ulike koinima oyo hai nwefa mo ovanhu va kale ve na omaukwatya, oikala, elihumbato nosho yo omalalakano opaunyuni. ‘Oihovelitungifo’ oyo oya kwatela mo “omhepo younyuni,” oyo ‘tai longo paife movana vokuhadulika.’ (1 Kor. 2:12; lesha Ovaefeso 2:1-3.) Omhepo ya tya ngaho oi li apeshe mounyuni waSatana. Omhepo ya tya ngaho ohai ningifa ovanhu va kale tava diladila, tava ningi omatokolo, tava popi notava katuka eenghatu odo tadi ulike oikala ya fa yaSatana, oo e na ounhwa noku li ‘omupangeli weenghonopangelo domhepo’ omunashibofa.
6. Omhepo younyuni ohai limonikila ngahelipi?
6 Ovanhu ovo va nwefwa mo komhepo younyuni ova efa omadiladilo nomitima davo di nwefwe mo kuSatana, ndele tava kala tava diladila nokuulika oikala ya fa yaye, kutya nee ove shi didilika ile inave shi didilika. Oshidjemo, ohava ningi ngaashi va hala, nopehe na okudiladila okulonga ehalo laKalunga. Ngeenge ve li meenghalo donhumba ohava ulike oikala younhwa ile yokuliholamwene, hava tukululile eenghonopangelo ounashibofa nohave liyandje ‘kokahalu kombelela nosho yo kokahalu komesho.’ — Lesha 1 Johannes 2:15-17.
7. Omolwashike tu na ‘okwaamena omitima detu’?
7 Osha fimana ‘okwaamena omitima detu’ mokuninga omatokolo e li pandunge oo e likolelela komifikamhango odo twa hongwa kuKalunga ngeenge tashi uya pokuhoolola ookaume, oinima oyo hatu lesha, omalihafifo nosho yo okulongifa o-Internet. (Omayel. 4:23) Omuyapostoli Paulus okwa ti: “Lungameni, pa ha kale umwe te mu yuulifa ounongo wovanhu nomapukifo ongaho, te likwatelele meenghedinghulu nomoihovelanghono younyuni, hamuKristus.” (Kol. 2:8) Oshipango osho osha fimanenena molwaashi efiku laJehova ola ehena popepi, ‘noupyu’ walo wa hanya otau ka dilukifa ‘oihovelitungifo’ aishe yonghalelo ei yaSatana, novanhu itava ka dula okuxupa moupyu wehandu laKalunga. Osho otashi tu dimbulukifa eendjovo odo di li muMalakia 4:1, odo tadi ti: “Tala, osheshi efiku tali uya, ndee tali xwama ngaashi ediko. Opo ovanangateli aveshe, naaveshe ava hava longo owii, tava ka ninga oihati. Mefiku olo tali uya, tali ke va lungwinifa po.”
‘Edu noilongwanima otai ka hololwa’
8. Edu noilongwanima otai ka “hololwa” ngahelipi?
8 Petrus okwa li a hala okutya shike eshi a ti kutya ‘edu noilongwanima otai ka hololwa’? Outumbulilo “hololwa” otau dulu yo okutolokwa “sha monika” ile “sha nyanekwa pomutenya.” Petrus okwa li a hala okutya pefimbo loudjuu munene, Jehova ota ka nyaneka pomutenya ounyuni waSatana kutya ou li omhinge naYe nosho yo nOuhamba waye, nokungaho, owa wana okuhanaunwa po. Jesaja 26:21 okwa popya paxunganeko shi na sha nefimbo olo, a ti: “Omwene ta ka fikama a dje monhele yaye nonghone, a ka pule oilonga ii yoonakukala kombada yedu, nedu eli la pona ohonde otali i holola, ndele itali tuvike vali oonakudipawa vavo.”
9. (a) Otu na okuhenuka shike, nomolwashike? (b) Otu na okukulika omaukwatya elipi, nomolwashike?
9 Mefiku laJehova, ovo va nwefwa mo kounyuni nosho yo komhepo yao ii, otava ka ulika oikala yavo yashili, tava ka dipaafana nokuli. Omalihafifo mahapu elongifo leenghono oo e li apeshe kunena otaa nwefa mo omadiladilo ovanhu vahapu omolwefimbo olo eshi ovanhu tava ‘ka yelulilafana omake.’ (Sak. 14:13) Onghee hano, osha fimana okuhenuka oinima ngaashi, eefilima, omambo, omaudano eevidio nosho tuu, oyo tai dulu oku tu ningifa tu kulike omaukwatya oo Kalunga e tonde, ngaashi ounhwa nosho yo elongifo leenghono. (2 Sam. 22:28; Eps. 11:5) Natu kulikeni oiimati yomhepo iyapuki yaKalunga, molwaashi otai ke tu kwafela tu xupe mefiku laJehova loupyuhandu. — Gal. 5:22.
“Eulu lipe nedu lipe”
10, 11. “Eulu lipe nedu lipe” otali faneke shike?
10 Lesha 2 Petrus 3:13. “Eulu lipe” olo Ouhamba waKalunga womeulu, oo wa dikwa po mo 1914 eshi “omaufwafimbo oiwana” a xula po. (Luk. 21:24, NW) Epangelo olo ola fikama po muKristus Jesus nosho yo ovapangeli pamwe naye 144 000, ovo vahapu vomuvo va pewa nale ondjabi yavo yomeulu. Ovahoololwa ovo ova popiwa pafaneko membo lEhololo ve li “oshilando shiyapuki, Jerusalem Shipe, sha kulukila pedu, sha dja meulu kuKalunga, sha wapalekwa ngaashi omuvalekwa a djalekelwa omulumenhu waye.” (Eh. 21:1, 2, 22-24) Ngaashi ashike muJerusalem shokombada yedu muIsrael shonale omo mwa li oshipangelapundi, Jerusalem Shipe nosho yo Omuvaleki washo nasho oshi li epangelo lipe longhalelo ei yoinima. Oshilando osho shomeulu ‘otashi ka kulukila pedu okudja meulu,’ sha hala kutya, otashi ka pangela ombada yedu.
11 ‘Edu lipe’ otali faneke oulikumwe mupe wovanhu kombada yedu ovo va ulika kutya ova hala oku ka kala ovapangelwa vOuhamba waKalunga. ‘Mounyuni muwa oo tau uya,’ oshiwana shaKalunga otashi ka kala tashi hafele oparadisa yopamhepo oyo tashi hafele kunena nopehe na omapiyaaneko asha. (Heb. 2:5) Ndele mbela ongahelipi hatu dulu oku ka kala oshitukulwa shonghalelo oyo ipe?
Lilongekidila efiku linene laJehova
12. Omolwashike okuuya kwefiku laJehova taku ka halukifa ovanhu mounyuni?
12 Paulus naPetrus ova popya kutya efiku laJehova otali ke uya “ngaashi omulunga,” sha hala okutya, tali uya ombadilila noinashi teelelwa. (Lesha 1 Ovatessaloniki 5:1, 2.) Nokuli nOvakriste vashili ovo va teelela efiku olo, otava ka kala va kumwa kokuuya kwalo ombadilila. (Mat. 24:44) Ndele ounyuni otau ka kala wa kumwa neenghono. Paulus okwa ti: “Fimbo [ovo ve liteeka Jehova] tava ti: Ombili [neameno, NW], kape na nande ombili, opo nee ehanauno tali va vakele, ngaashi omufimba ta hangwa koshifeta, ndee kave na apa tava i onhapo.” — 1 Tes. 5:3.
13. Ongahelipi hatu dulu okuhenuka okupukifwa keingido “ombili neameno”?
13 Eingido “ombili neameno” otali ka kala imwe yomoipupulu oyo tai xumifwa komesho keendemoni, ndele nande ongaho, itai ka pukifa ovapiya vaJehova. Paulus okwa ti: “Kamu li momulaulu, efiku olo li he mu hange ngeno ngaashi omulunga; osheshi onye amushe ovana vouyelele novana vomutenya.” (1 Tes. 5:4, 5) Onghee hano, natu kaleni mouyelele, tu li kokule nomilaulu dounyuni waSatana. Petrus okwa ti: “Ovaholike, eshi mwe shi shiiva fimbo inashi uya, kaleni mwa londoka, mu ha twalwaatwalwe komapukifo eembwada [ovahongi ovanaipupulu ovo va li meongalo lopaKriste], nye mu ha we mo mekanghameno leni la pama.” — 2 Pet. 3:17.
14, 15. (a) Jehova okwe tu fimaneka ngahelipi? (b) Eendjovo da nwefwa mo dilipi tu na okukaleka momadiladilo?
14 Didilika kutya Jehova ine tu lombwela ashike kutya ‘natu kale twa londoka’ ndele hatu kala twa mwena itatu ningi po sha. Ponhele yaasho, okwe tu fimaneka moku tu pa pahole ‘eshiivo’ lokushiiva oinima oyo tai ka ningwa monakwiiwa.
15 Ndele shinyikifa oluhodi, vamwe kave na ko nasha ile hava kembaula nokuli omadimbulukifo oo hatu pewa e na sha nokukala oupafi. Otashi dulika va tye: ‘Omadimbulukifo a tya ngaho otwe a uda oule womido omilongo.’ Ndele oohandimwe ovo ove na okudimbuluka kutya inava limbililwa ashike ongudu yomupiya omudiinini, ndele paulelalela ova limbililwa Jehova nosho yo Omona waye. Jehova okwa ti: “Li teelela.” (Hab. 2:3) Sha faafana, Jesus okwa ti: “Kaleni oupafi, osheshi kamu shi shii efiku lilipi po Omwene weni te uya.” (Mat. 24:42) Petrus okwa ti: “Omu nokuhangika mwa tya ngahelipi moweenda uyapuki nometilokalunga mokuteelela nokweendelelifa euyo lefiku laKalunga.” (2 Pet. 3:11, 12) Ongudu yomupiya omudiinini nOlutuwiliki layo ove na okutala ko eendjovo odo kutya oda kwata moiti.
16. Oikala ilipi tu na okuhenuka, nomolwashike?
16 ‘Omupiya mwii’ oye a fika pexulifodiladilo kutya Omwene okwa kala ko. (Mat. 24:48) Omupiya oo mwii oku li oshitukulwa shongudu oyo ya hokololwa mu 2 Petrus 3:3, 4. Petrus okwa ti kutya ‘momafiku axuuninwa otamu ka holoka ovasheki, ovo tava endifwa kouhalu wavo vene,’ tava sheke ovo hava kaleke filufilu efiku laJehova momadiladilo. Ponhele yokuyandja elitulemo koinima yOuhamba, ovasheki va tya ngaho ohava yandje elitulemo kuvo vene nosho yo komahalo avo okulihola mwene. Onghee hano, inatu kulika oikala ya tya ngaho yokuhadulika noya nyika oshiponga. Ponhele yaasho, natu ‘tale ko onheni yOmwene wetu i li exupifo’ mokukala twe lipyakidila noilonga yokuudifa Ouhamba noyokuninga ovanhu ovahongwa nokukala itatu lipula unene kombinga yokutya oiningwanima oyo i li mefimbolandulafano laJehova Kalunga otai ka ningwa naini. — 2 Pet. 3:15; lesha Oilonga 1:6, 7.
Lineekela Kalunga kexupifo
17. Ovakriste ovadiinini ova li ve linyenga ngahelipi kelondwelo laJesus lokuya onhapo okudja muJerusalem, nomolwashike?
17 Konima eshi omatanga ovakwaita aRoma a li a ponokela Judea mo 66 O.P., Ovakriste ovadiinini ova li va katuka metwokumwe nelondwelo laJesus li na sha nokuya onhapo okudja muJerusalem nopehe na okwoongaonga. (Luk. 21:20-23) Mbela omolwashike va li va katuka eenghatu meendelelo nopehe na okwoongaonga? Nopehe na omalimbililo, okwa li va kaleka momadiladilo elondwelo laJesus. Ashike ova li ve shii kutya otava ka shakeneka omaudjuu omolwetokolo olo tava ningi, ngaashi Kristus a li e va londwela. Ndele nande ongaho, okwa li ve shi shii kutya Jehova iha efa nandenande ovayuki vaye. — Eps. 55:23.
18. Eendjovo daJesus odo di li muLukas 21:25-28 oda nwefa mo ngahelipi etaleko loye li na sha noudjuu munene oo tau ke uya?
18 Nafye otu na okulineekela filufilu muJehova, molwaashi oye aeke ta dulu oku tu xupifa eshi onghalelo ei yoinima tai ka hangwa koudjuu munene oo inau kala ko nande onale mondjokonona yovanhu. Pefimbo lonhumba, konima ngeenge oudjuu munene wa hovele nofimbo Jehova ina hanauna po ounyuni aushe, ovanhu ‘otava ka fya kehaluko mokutila nomokuteelela ei tai hange edu alishe.’ Ndele fimbo ovatondi vaKalunga tava ka kala va tila neenghono, ovapiya vaYe ovadiinini itava ka kala va tila. Mepingafano naasho, ovapiya vaye otava ka kala va hafa molwaashi ove shii kutya exupifo lavo oli li popepi. — Lesha Lukas 21:25-28.
19. Oshike tashi ka kundafanwa moshitukulwa tashi landula?
19 Ovo va yooloka ko kounyuni nosho yo ‘koihovelitungifo’ yao inava teelela tuu onakwiiwa itunhula! Ngaashi oshitukulwa tashi landula tashi ka yelifa, ngeenge otwa hala oku ka mona omwenyo otwa pumbwa okuninga shihapu shihe fi ashike okuhenuka okulonga owii. Otwa pumbwa okukulika omaukwatya oo taa hafifa Jehova nokulonga oilonga oyo a hokwa. — 2 Pet. 3:11.
Oto dulu okuyelifa?
• Oshike tashi fanekwa:
‘keulu nedu’ lokunena?
‘koihovelitungifo’?
‘keulu lipe nedu lipe’?
• Omolwashike tu na okukala twe lineekela filufilu muKalunga?
[Efano pepandja 17]
Ongahelipi to dulu “okwaamena omutima woye” nokukala wa yooloka ko kounyuni?
[Efano pepandja 18]
Ongahelipi hatu dulu okuulika kutya otwa ‘tala ko onheni yOmwene wetu i li exupifo’?