Etukulwa etimulongo netitano
Pwilikina epukululo u itavele outekuduliko
1. (a) Omolwashike atushe twa pumbwa epukululo noutekuduliko? (b) Epulo lilipi twa pumbwa okukonakona?
OMBIBELI otai ti muJakob 3:2: “Fye atushe ohatu puka luhapu.” Ohatu dulu okudiladila oikando ihapu oyo twa dopa okukala ngaashi Eendjovo daKalunga tadi tu ladipike tu kale. Onghee hano, ohatu dimine kutya Ombibeli oi li mondjila eshi tai ti: “Pwilikina epukululo u itavele outekuduliko, opo u mone eendunge komesho.” (Omayeletumbulo 19:20) Kape na omalimbililo kutya otwa ninga nale omalunduluko monghalamwenyo yetu opo tu kale metwokumwe nomahongo Ombibeli. Ndele mbela ohatu linyenge ngahelipi ngeenge Omukriste mukwetu te tu pukulula moshinima shonhumba shokondadalunde?
2. Otu na okuninga ngahelipi ngeenge hatu pewa epukululo pauhandimwe?
2 Vamwe ohava kendabala okuliyukipalifa, tava ninipike okukwata moiti kwoshinima ile tava pe vamwe oushima. Ndele oshiwa okupwilikina kepukululo ndele to li tula moilonga. (Ovaheberi 12:11) Doshili, kape na oo e na okuteelela vamwe va kale va wanenena, nokape na oo a pumbwa okukala ta yandje alushe omapukululo moinima inini ile moinima oyo Ombibeli ya efa ovanhu va tokole vo vene. Kakele kaasho, otashi dulika oo ta yandje epukululo ina konakona oushili aushe, noushili oo otau dulu oku mu yelifilwa nawa nefimaneko. Ndele meenghundafana tadi landula, natu tye nee ngeno epukululo ile outekuduliko oo wa yandjwa owa yuka nowe likolelela kOmbibeli. Omunhu oku na okulinyenga ngahelipi?
Oihopaenenwa oyo tu na okudiladila ngeenge hatu pewa epukululo
3, 4. (a) Ombibeli oi na shike osho tashi dulu oku tu kwafela tu kulike etaleko liwa li na sha nepukululo noutekuduliko? (b) Ohamba Saul oye linyenga ngahelipi kepukululo, noshidjemo osha li shike?
3 Eendjovo daKalunga odi na oimoniwa yashili yonghalamwenyo yoohandimwe ovo va pewa epukululo olo va li va pumbwa. Omafimbo amwe, epukululo ola li la yandjwa pamwe noutekuduliko. Umwe womuvo ohamba Saul yaIsrael. Okwa li a dopa okudulika kuJehova shi na sha noshiwana shOvaamalek. Ovaamalek ova li va pataneka ovapiya vaKalunga, netokolo laKalunga ola li kutya, kutya nee Ovaamalek ile oimuna yavo inai xupifwa nande. Ndele ohamba Saul oya xupifa ohamba yavo nosho yo oinamwenyo yavo iwa.—1 Samuel 15:1-11.
4 Jehova okwa li a tuma omuprofeti Samuel a pukulule Saul. Saul okwe linyenga ngahelipi? Okwa tomhafana kutya okwa finda Ovaamalek ndele ta tokola ashike okuxupifa ohamba yavo. Ndelenee osho kasha li tashi tu kumwe nelombwelo laJehova. (1 Samuel 15:20) Saul okwa kendabala okuyandja oushima kovanhu omolwokuxupifa oimuna, a ti: “Nda li nda tila ovakwaita, ndele nde va itavela.” (1 Samuel 15:24) Okwa li te lipula unene nefimano laye, a pula nokuli Samuel e mu fimaneke moipafi yovanhu. (1 Samuel 15:30) Hauxuuninwa, Jehova okwa ekelashi Saul a ha kale vali ohamba.—1 Samuel 16:1.
5. Oshike sha ningilwa ohamba Ussia eshi ya anya okutambula ko epukululo?
5 Ussia ohamba yaJuda okwa “ninga osho inashi yuka nande, ndele a nyona kOmwene Kalunga kaye. Osheshi a ya mo motembeli yOmwene ndee ta twiminine oitwiminifo.” (2 Omafimbo 26:16) Ovapristeri ovo ashike kwa li va pitikwa pamhango va twiminine oitwiminifo. Eshi omupristeri omukulunhu a kendabala okukelela ohamba Ussia, oya handuka. Oshike sha ningwa po? Ombibeli otai ti: “Oudu woshilundu wa djuuka mombada yoshipala shaye . . . , osheshi Omwene e mu denga. Nohamba Ussia ya li omunashilundu fiyo kefiku lefyo layo.”—2 Omafimbo 26:19-21.
6. (a) Omolwashike Saul naUssia va anya okutambula ko epukululo? (b) Omolwashike okuhatambula ko epukululo ku li oupyakadi wa kwata moiti kunena?
6 Omolwashike Saul naUssia va mona shidjuu okutambula ko epukululo? Oupyakadi munene owa li ounhwa, molwaashi keshe umwe okwa li te lidiladila unene ye mwene. Vahapu ohave lietele oluhodi kuvo vene omolwoikala oyo. Ohava monika va fa ve udite kutya okutambula ko epukululo otaku ulike ounghundi wonhumba muvo ile taku nyono po edina lavo. Ndele ounhwa ou li ounghundi. Ounhwa ohau twikifa omunhu a ha diladile, ndele tau mu ningifa a ekeleshi ekwafo olo tali yandjwa kuJehova okupitila mEendjovo nomehangano laye. Onghee, Jehova ota londwele ta ti: “Ounhwa tau tetekele ehanauno, nelinenepeko tali tetekele epunduko.”—Omayeletumbulo 16:18; Ovaroma 12:3.
Tambula ko epukululo
7. Oilihongomwa tai tungu ilipi tai dulu okulihongwa monghedi omo Moses e linyenga kepukululo?
7 Omishangwa odi na yo oihopaenenwa iwa yaavo va tambula ko epukululo, nohatu dulu okulihonga kuyo. Diladila shi na sha naMoses, oo a pewa epukululo kuxemweno li na sha nanghee e na okuungaunga noinakuwanifwa yaye idjuu. Moses okwa pwilikina kuye ndele te li tula diva moilonga. (Exodus 18:13-24) Nonande Moses okwa li e na eenghonopangelo dinene, omolwashike kwa li a tambula ko epukululo? Omolwaashi okwa li e lininipika. “Moses okwa li omulumenhu omulininipiki unene e dule ovanhu aveshe kombada yedu.” (Numeri 12:3) Elininipiko ola fimana shi fike peni? Sefanja 2:3 ota ulike kutya otali ti omwenyo wetu.
8. (a) Enyono lilipi David a ninga? (b) David okwe linyenga ngahelipi kepukululo laNatan? (c) Oilanduliko yenyono laDavid oya li shike?
8 Ohamba David oya li ya nyona ohombo naBatseba, ndele tai kendabala okuholeka enyono mokudipaifa omushamane waBatseba, Uria. Jehova okwa tuma omuprofeti Natan a pukulule David. David okwe livela ombedi ndele ta dimine diva a ti: “Ame nda nyona kOmwene.” (2 Samuel 12:13) Nonande Kalunga okwa li a tambula ko elivelombedi laDavid, okwa li e na okumona oixuna yoilanduliko yenyono laye. Jehova okwe mu lombwela kutya eongamukonda itali “ka efa fiyo alushe epata” laye, nosho yo kutya ovakainhu vaye otava ka yandjwa ‘kumukwao,’ nokaana oko ka dalwa mokunyona ohombo kwaye otaka ka ‘fya shili.’—2 Samuel 12:10, 11, 14.
9. Oshike osho tu he na okudimbwa ngeenge twa pewa epukululo ile twa handukilwa?
9 Ohamba David oya li i shii omauwa okupwilikina kepukululo lopandunge. Peemhito dimwe, oya pandula Kalunga omolwomunhu oo okupitila muye e mu pa epukululo. (1 Samuel 25:32-35) Mbela nafye osho tu li ngaho? Ngeenge osho, otashi ke tu amena tu ha popye ile tu ha ninge oinima ihapu oyo tai dulu okweeta enyemato. Ndele ongahelipi ngeenge otwa i meenghalo odo tadi tu ningifa tu pukululwe ile tu handukilwe nokuli? Inatu dimbwa nande kutya osho oshi li euliko lohole yaJehova, e na ouwa wetu waalushe momadiladilo.—Omayeletumbulo 3:11, 12; 4:13.
Omaukwatya e na ondilo oo e na okukulikwa
10. Oukwatya ulipi Jesus a ulika kutya owa pumbiwa kwaavo tava ka ya mOuhamba?
10 Opo tu kale tu na ekwatafano liwa naJehova nosho yo novamwatate Ovakriste, otwa pumbwa okukulika omaukwatya onhumba. Jesus okwa popya umwe womuo eshi a fikamifa okaana mokati kovahongwa vaye ndele ta ti: “Ngenge itamu lidilulula ndee tamu ningi ngaashi ounona, mu he na apa tamu ka ya mouhamba wokeulu. Onghee hano, ou te lininipike ngaashi okaana aka, oye omunene e dule vakwao mouhamba wokeulu.” (Mateus 18:3, 4) Ovahongwa vaJesus ova li va pumbwa okukulika elininipiko, molwaashi ova li va twa eemhata kutya olyelye munene mokati kavo.—Lukas 22:24-27.
11. (a) Otwa pumbwa okukala ovalininipiki koolyelye, nomolwashike? (b) Ngeenge otwe lininipika, ohatu ke linyenga ngahelipi kepukululo?
11 Omuyapostoli Petrus okwa shanga a ti: “[Amushe] mokukalafana kweni djaleni elininipiko, osheshi Kalunga ha tondo ovalinenepeki, ndee ovalininipiki te va file onghenda.” (1 Petrus 5:5) Otu shi shii kutya otwa pumbwa okukala ovalininipiki koshipala shaKalunga, ndele omushangwa oo otau ulike kutya otwa pumbwa yo okukala ovalininipiki novaitaveli vakwetu. Ngeenge otwe lininipika, itatu ka kwatela onghone omaetepo mawa avamwe oo tave tu pe, ndele ohatu ke lihonga kuvo.—Omayeletumbulo 12:15.
12. (a) Oukwatya wa fimana ulipi wa pambafana filufilu nelininipiko? (b) Omolwashike tu na okukala tu na ko na sha nanghee elihumbato letu tali dulu okukuma vamwe?
12 Osho sha pambafana filufilu nelininipiko osho okunakonasha nouwa wavamwe. Omuyapostoli Paulus okwa shanga a ti: “Inapa kala ou ta kongo ouwa waye mwene, ndelenee keshe na konge ouwa wamukwao. . . . Onghee hano ngenge tamu li ile tamu nu, ile keshe tuu eshi tamu shi ningi, ashishe shi ningeni okufimanekifa Kalunga. Inamu [pundukifa nande Ovajuda ile Ovagreka ile eongalo laKalunga, NW].” (1 Ovakorinto 10:24-33) Paulus ina tya kutya otu na okweefa po oinima aishe oyo tu hole paumwene, ndele okwe tu ladipika tu ha ninge sha osho tashi dulu okuladipika umwe a ninge oshinima osho eliudo laye tali mu lombwele kutya osha puka.
13. Oshihopaenenwa shilipi tashi dulu okuulika kutya ohatu tula moilonga omayele opamishangwa?
13 Mbela oho pitifa komesho ouwa wavamwe komesho yoinima oyo u hole paumwene? Atusheni otu na okulihonga okuninga ngaho. Ope na eenghedi dihapu omo hatu dulu okuninga ngaho. Pashihopaenenwa, diladila shi na sha nokudjala nosho yo okuliwapeka. Oinima oyo oya kwatela mo omahoololo opaumwene metwokumwe nomifindalandu dopamishangwa di na sha nokudjala pandjele, twa wapala notwa koshoka. Ndele ngeenge owa shiiva kutya onghedi yoye yokudjala ile yokuliwapeka otai imbi vamwe va pwilikine ketumwalaka lOuhamba omolweputuko lovanhu moshitukulwa sheni, mbela oto ka ninga omalunduluko? Doshili, okukwafela omunhu a mone omwenyo waalushe osha fimanenena shi dulife okulihafifa ove mwene.
14. Omolwashike sha fimana okukulika elininipiko nokukala tu na ko nasha navamwe?
14 Jesus okwa tula po oshihopaenenwa shi na sha nokukala ovalininipiki nokukala tu na ko nasha navamwe, mokukosha nokuli eemhadi dovahongwa vaye. (Johannes 13:12-15) Eendjovo daKalunga otadi popi shi na sha naye tadi ti: “Omadiladilo eni naa fe enya aKristus Jesus kwa li e a na, Oye nande olupe laKalunga, Oye ina hakana a kale a fa Kalunga, ndelenee okwe lidula Ye mwene nokwa djala olupe lomupika nokufafana novanhu nomokukala kwaye okwa li a fa omunhu; nokwe lininipika Ye mwene a dulika fiyo omefyo.”—Ovafilippi 2:5-8; Ovaroma 15:2, 3.
Ino anya outekuduliko waJehova
15. (a) Omalunduluko elipi twa pumbwa okuninga opo tu kale tu na omaukwatya oo taa hafifa Kalunga? (b) Okupitila mushike Jehova e tu pa atusheni epukululo noutekuduliko?
15 Molwaashi atusheni otu li ovalunde, omalunduluko moikala nomelihumbato letu okwa pumbiwa ngeenge otwa hala okuulika omaukwatya aKalunga ketu. Otwa pumbwa okudjala “omunhu mupe.” (Ovakolossi 3:5-14) Epukululo noutekuduliko otai tu kwafele tu mone oinima omo twa pumbwa okuninga omalunduluko, nopo nee hatu tale nghee tu na okuninga omalunduluko oo. Odjo ya fimana yomahongo oo twa pumbwa Ombibeli yo vene. (2 Timoteus 3:16, 17) Oileshomwa yopaMbibeli nosho yo okwoongala oko haku longekidwa kehangano laJehova otai tu kwafele tu tule moilonga Eendjovo daKalunga. Nokuli nonande otwa uda nale omayele oo, mbela ohatu ka dimina kutya otwe a pumbwa ndele hatu kendabala tu xwepopale?
16. Ekwafo lilipi Jehova he tu pe pauhandimwe?
16 Omolwokunakonasha kwopahole, Jehova ote tu kwafele shi na sha nomaupyakadi etu. Omamiliyona ovanhu okwa kala taa kwafelwa okupitila momakonakonombibeli opeumbo. Ovadali otava pukulula nokuyandja outekuduliko kounona vavo ve va amene kelihumbato olo tali dulu okweeta oluhodi. (Omayeletumbulo 6:20-23) Meongalo, luhapu vamwe ohava pula ovakalele va pyokoka omayele nosho yo omaetepo opo va xwepopaleke eenghendabala davo moilonga yomomapya. Ovakulunhuongalo omafimbo amwe ohava pulafana omayele ile va pule ovo ve na owino moukalele. Ovo va pyokoka pamhepo ohava longifa Ombibeli va yandje ekwafo kwaavo ve li pumbwa, tave shi ningi momhepo yonheni. Ngeenge to yandje epukululo, dimbuluka “u lungame naave yo u ha hongaulwe.” (Ovagalati 6:1, 2) Heeno, atusheni otwa pumbwa epukululo noutekuduliko opo tu longele Kalunga aeke kashili twa hangana.
Eenghundafana dokweendulula
• Ongahelipi Jehova he tu kwafele pahole tu mone opo twa pumbwa okuninga omalunduluko paumwene?
• Omolwashike shidjuu kuvahapu okutambula ko epukululo la pumbiwa, nongahelipi osho sha kwata moiti?
• Omaukwatya e na ondilo elipi tae ke tu kwafela tu kale hatu tambula ko epukululo, nongahelipi Jesus a tula po oshihopaenenwa shi na sha naasho?
[Efano pepandja 142]
Ussia okwa anya okutambula ko epukululo nokwa li a kwatwa koshilundu
[Efano pepandja 142]
Moses okwa mona ouwa mokutambula ko epukululo okudja kuJetro