Omolwashike tu na okudana Ouvalelo wOmwene?

“Onda pewa kOmwene eshi nde shi mu shiivifila yo.”—1 OVAKORINTO 11:23.

1, 2. Oshike osho Jesus a ninga moufiku wOpaasa mo 33 O.P.?

OMONA ewifa laJehova opo a li. Nosho yo ovalumenhu 11 ovo va ‘kala puye momayeleko aye.’ (Lukas 22:28) Osha li Etine konguloshi, 31 Maalitsa 33 O.P., notashi dulika ohani iyadi okwa li ya wapeka eulu muJerusalem. Jesus Kristus novayapostoli vaye opo ashike va mane okudana Opaasa. Omukengeleledi Judas Iskariot okwa lombwelwa a fiye po onhele, ndele kasha li natango efimbo lavakwao lokuya. Omolwashike mbela? Omolwaashi Jesus okwa li e li pokuninga oshinima shimwe osho sha fimanenena. Osha li shike mbela?

² Molwaashi omushangi wEvangeli Mateus opo a li, ne tu lombwele. Okwa shanga ta ti: “Jesus okwa kufa omungome, ndee ta hambelele, ndee te u pambula, ndele te u pe ovalongwa vaye ndee ta ti: Tambuleni, lyeni; eshi [otashi ti, NW] olutu lange. Opo Ye okwa kufa eholo, ndee ta pandula, ndee te li va [pe], ndee ta ti: Nweni mo amushe; osheshi olo [otali ti, NW] ohonde yange, ohonde yehangano, tai tilwashi [omolwavahapu] oyokudima po omatimba.” (Mateus 26:26-28) Mbela osho osha li ashike oshiningwanima osho sha ningwa lumwe aluke? Osha li shi na eityo lashike? Mbela oshi na eityo lasha kufye kunena?

“Eshi kaleni tamu shi ningi”

3. Omolwashike osho sha ningwa kuJesus moufiku wo 14 aNisan 33 O.P., kwa li sha fimana?

³ Onghatu oyo Jesus Kristus a katuka moufiku oo wo 14 aNisan 33 O.P., kaya li ashike oshinima osho sha ningwa ohaluka mokukalamwenyo kwaye. Omuyapostoli Paulus okwa kundafana oshiningwanima osho eshi a shangela Ovakriste ovavaekwa muKorinto, omo edimbuluko kwa li la danwa oule womido di dule 20 okudja eshi la totwa po. Nope he na omalimbililo, nonande Paulus ka li pamwe naJesus nosho yo ovayapostoli 11 mo 33 O.P., okwe lihonga kovayapostoli vamwe shi na sha naasho sha ningwa po pomhito oyo. Natango, osha yela kutya Paulus okwa shilipalekwa shi na sha noitukulwa yoshiningwanima osho okupitila mehololo la nwefwa mo. Paulus okwa ti: “Onda pewa kOmwene eshi nde shi mu shiivifila yo nokutya, Omwene Jesus oufiku winya a kengelelwa okwa kufa omungome, ndee ta pandula, ndee te u pambula ta ti: Tambuleni, lyeni, eshi [otashi ti] olutu lange tali mu yandjelwa; [eshi kaleni tamu shi ningi] okudimbulukwa nge. Osho ngaha okwa kufa yo eholo, eshi va lya, ndee ta ti: Eholo eli [otali ti] ehangano lipe omohonde yange, [efimbo keshe] eshi tamu nu mo, [eshi kaleni tamu shi ningi] okudimbulukwa nge.”—1 Ovakorinto 11:23-25, yelekanifa NW.

4. Omolwashike Ovakriste ve na okudana Ouvalelo wOmwene?

⁴ Omushangi wEvangeli Lukas okwa koleka kutya Jesus okwa yandja elombwelo tali ti: “Eshi kaleni tamu shi ningi okudimbulukwa nge.” (Lukas 22:19, NW) Eendjovo odo oda tolokwa yo ngaha: “Shi ningeni okudimbulukwa nge” (Ombibeli yOshikwanyama) nosho yo “Shi ningeni shi li edimbuluko okudimbulukwa nge.” (The Jerusalem Bible) Doshili, edano olo luhapu ohali ifanwa Edimbuluko lefyo laKristus. Paulus okwe li ifana yo Ouvalelo wOmwene—edina olo tali wapalele molwaashi owa li wa dikwa po konguloshi. (1 Ovakorinto 11:20, OB-1954) Ovakriste ova lombwelwa va dane Ouvalelo wOmwene. Ndele omolwashike edano olo kwa li la dikwa po?

Molwaashi Edimbuluko kwa li la dikwa po

5, 6. (a) Oshike sha li etomheno limwe molwaashi Jesus a dika po Edimbuluko? (b) Yandja etomheno vali limwe molwaashi Ouvalelo wOmwene kwa li wa dikwa po.

⁵ Etomheno limwe molwaashi Edimbuluko kwa li la dikwa po oli na sha nelalakano limwe olo la wanifwa po kefyo laJesus. Okwa fya e li omukanyateli kounamapangelo waXe womeulu. Kungaha Kristus okwa ulika kutya Satana Ondiaboli oo a lundila ovanhu kutya ohava longele ashike Kalunga omolwohole yokulihola, oku li omunaipupulu. (Job 2:1-5) Okufya kwaJesus noudiinini okwa ulika kutya elundilo olo oloipupulu nokwa hafifa omutima waJehova.—Omayeletumbulo 27:11.

⁶ Etomheno vali limwe molwaashi Ouvalelo wOmwene kwa li wa dikwa po ola li oku tu dimbulukifa kutya okupitila mefyo laye, Jesus, e li omunhu a wanenena e he na omatimba okwa ‘yandja omwenyo waye u ninge oikulila yavahapu.’ (Mateus 20:28) Eshi omunhu wotete a nyona kuKalunga, okwa kanifa okukalamwenyo kwopanhu kwa wanenena nosho yo omatimaumbwile ako. Ndelenee Jesus okwa ti: “Kalunga a kala e hole ounyuni, Oye a yandja Omona waye Ewifa, opo keshe ou te mu itavele a ha kane, ndelenee a kale e nomwenyo waalushe.” (Johannes 3:16) Doshili, “ondjabi youlunde oyo efyo, ndelenee oshalinghenda yaKalunga oyo omwenyo waalushe muKristus Jesus, Omwene wetu.” (Ovaroma 6:23) Edano lOuvalelo wOmwene ohali tu dimbulukifa ohole inene oyo ya ulikwa kuJehova nosho yo kOmona waye okupitila mefyo lopayambo lOmona. Katu na tuu okukala nolupandu lohole oyo!

Edimbuluko oli na okudanwa naini?

7. Ongahelipi Ovakriste ovavaekwa tava hepaulula efyo lOmwene efimbo keshe eshi tava kufa ombinga mokulya nokunwa omadidiliko Edimbuluko?

⁷ Shi na sha nOuvalelo wOmwene, Paulus okwa ti: “[Efimbo keshe, NW] eshi tamu li omungome ou ndee tamu nu meholo eli, ohamu hepaulula efyo lOmwene fiyo ote uya.” (1 Ovakorinto 11:26) Ovakriste ovavaekwa otava kala nokukufa ombinga mokulya nokunwa omadidiliko Edimbuluko fiyo okefyo lavo. Kungaha, moipafi yaJehova Kalunga nosho yo younyuni, otava kala nokuhepaulula oikando noikando eitavelo lavo mefiloshisho laKalunga lekuliloyambo laJesus.

8. Ofiyo onaini olutu lovavaekwa li na okudana Ouvalelo wOmwene?

⁸ Ofiyo onaini olutu lOvakriste ovavaekwa li na okudana Edimbuluko lefyo laKristus? Paulus okwa ti: “Fiyo ote uya,” sha hala okutya omadano oo otaa twikile fiyo okuuya kwaJesus okutambula ovashikuli vaye ovavaekwa meulu okupitila menyumuko pefimbo ‘lokukala po’ kwaye. (1 Ovatessaloniki 4:14-17, NW) Osho otashi tu kumwe neendjovo daJesus odo a lombwela ovayapostoli ovadiinini 11 ta ti: “Nande ohandi i ndi ke mu [longele] onhele, ohandi aluka, ndele handi mu ile, nanye yo mu kale apa Ame ndi li.”—Johannes 14:3.

9. Eendjovo daJesus odo da shangwa muMarkus 14:25 oda hala okutya ngahelipi?

⁹ Eshi Jesus a dika po Edimbuluko, okwa popya shi na sha neholo lomaviinyu ta lombwele ovayapostoli vaye ovadiinini ta ti: “Itandi nu vali oiimati yomiviinyu fiyo efiku olo handi ke a nwa mape omouhamba waKalunga.” (Markus 14:25) Molwaashi Jesus ita dulu okunwa omaviinyu olelalela meulu, osha yela kutya okwa li e na momadiladilo ehafo olo omafimbo amwe hali fanekwa komaviinyu. (Epsalme 104:15; Omuudifi 10:19) Okukala pamwe mOuhamba otashi ka eta ehafo olo ye nosho yo ovashikuli voshikoti shaye va teelela nodjuulufi inene.—Ovaroma 8:23; 2 Ovakorinto 5:2.

10. Olungapi Edimbuluko li na okudanwa?

¹⁰ Mbela efyo laJesus oli na okudimbulukiwa omwedi keshe, oshivike keshe ile nokuli efiku keshe? Hasho. Jesus okwa dika po Ouvalelo wOmwene nokwa li a dipawa mefiku lOpaasa, oyo kwa li hai danwa i li ‘edimbuluko’ lokumangululwa kwaIsrael moupika wOvaegipti mo 1513 K.O.P. (Exodus 12:14) Opaasa okwa li hai danwa lumwe aluke momudo, mefiku eti-14 lohani yOshijuda Nisan. (Exodus 12:1-6; Leviticus 23:5) Osho otashi ulike kutya efyo laJesus oli na okudimbulukiwa ashike lwoikando ngaashi ashike Opaasa kwa li hai danwa—lumwe momudo—ndele hamwedi keshe, oshivike keshe ile efiku keshe.

11, 12. Ondjokonona otai holola shike shi na sha nomadano otete Edimbuluko?

¹¹ Onghee hano osha wapala okudana Edimbuluko omudo keshe mo 14 aNisan. Embo limwe lomauyelele otali ti: “Ovakriste vomuAsia Linini okwa li hava ifanwa Ovatimulongonane omolwonghedindjikilile yavo yokudana alushe opaasa [Ouvalelo wOmwene] mo 14 aNisan . . . Efiku olo ohashi dulika li kale mEtitano ile momafiku oshivike amwe e lili.”—The New Schaff-Herzog Encyclopedia of Religious Knowledge, Embo 4, epandja 44.

¹² Mokutya ko sha shi na sha nonghedi yomefelemudo etivali O.P., omunandjokonona J. L. von Mosheim ota ti kutya Ovatimulongonane ova dana Edimbuluko mo 14 aNisan omolwaashi “okwa li va tala ko oshihopaenenwa shaKristus kutya osha fimana ngaashi omhango.” Omunandjokonona vali umwe okwa ti: “Elongifo leengeleka dOvatimulongonane daAsia ola li metwokumwe nongeleka yaJerusalem. Mefelemudo eti-2 pOpaasa yavo eengeleka odo mo 14 aNisan oda dana ekulilo olo la etifwa kefyo laKristus.”—Studia Patristica, Embo 5, 1962, epandja 8.

Eityo lomungome

13. Omungome woludi lilipi Jesus a longifa eshi a dika po Ouvalelo wOmwene?

¹³ Eshi Jesus a dika po Edimbuluko “okwa kufa omungome, e u nangeka noupuna, ndee te u pambula, te u . . . pe [ovayapostoli].” (Markus 14:22) Omungome oo wa li po pomhito oyo oo tuu oo wa li opo ashike wa longifwa pOpaasa. (Exodus 13:6-10) Molwaashi okwa li wa telekwa u he na onhafi, okwa li wa mbatalala nowa li tau dulu okupambulwa noupu nokwa li u na okupambulwa opo u tukulwe. Eshi Jesus kwa li a hapupalifa omingome pashikumwifilonga omolwovanhu omayovi, oda li tadi dulu okupambulwa noupu, omolwaashi okwe di pambula opo di dule okutukulwa. (Mateus 14:19; 15:36) Onghee hano osha yela kutya okupambula omungome wEdimbuluko kaku na eityo lopamhepo.

14. (a) Omolwashike omungome wEdimbuluko wa wapala okukala u he na onhafi? (b) Oludi lomungome lilipi tali dulu okumonika ile okutelekwa opo li dule okulongifwa pOuvalelo wOmwene?

¹⁴ Shi na sha nomungome oo a longifa eshi a dika po Edimbuluko, Jesus okwa ti: “Eshi [otashi ti, NW] olutu lange tali mu yandjelwa.” (1 Ovakorinto 11:24; Markus 14:22) Okwa li sha yeleka eshi omungome oo wa li u he na onhafi. Omolwashike mbela? Omolwaashi onhafi otai dulu okufaneka owii, oukolokoshi ile oulunde. (1 Ovakorinto 5:6-8) Omungome owa li tau faneke olutu lopanhu laJesus la wanenena, li he na omatimba, olo la yandjwa li li ekuliloyambo la wapalela. (Ovaheberi 7:26; 10:5-10) Eendombwedi daJehova ohadi kaleke oshinima osho momadiladilo nohadi landula oshihopaenenwa osho sha tulwa po kuJesus mokulongifa omingome inadi ya onhafi pomadano Edimbuluko. Peemhito dimwe, ohadi longifa omingome dOshijuda inadi ya oinyenyepeki, hadi ifanwa matzos, di he na oinima ya wedwa mo ngaashi eenyanga ile omai. Ile ponhele yaasho, omungome inau ya onhafi otau dulu okuningwa mokulunga oufila woilya munini (oufila weemboloto apa tashi shiiva) nomeva manini. Olumbololo oli na okulalakanifwa notali dulu okutelekwa moshipana sha vaekwa omaadi manini fiyo osheshi omungome wa kukuta.

Eityo lomaviinyu

15. Oshike sha li meholo olo la longifwa eshi Kristus a dika po Edimbuluko lefyo laye?

¹⁵ Konima eshi a yandja omungome inau ya onhafi, Jesus okwa kufa eholo, “a pandula, ndele okwe li . . . pa [ovayapostoli], ndele va nwa mo aveshe.” Jesus okwa yelifa ta ti: “[Eshi otashi ti, NW] ohonde yange, ohonde yehangano tai tilwashi omolwavahapu.” (Markus 14:23, 24) Oshike sha li meholo? Omaviinyu a pya, ndele hameva omandjebele inaa pya. Ngeenge Omishangwa tadi popi omaviinyu, inadi hala okutya omeva omandjebele inaa pya. Pashihopaenenwa, ngaashi Jesus a ti, omaviinyu a pya otaa dulu okutaula ‘omakutu makulu,’ ndele hameva omandjebele. Ovatondi vaKristus ove mu lundila kutya okwa li ‘ongholwe.’ Elundilo la tya ngaho ngeno ola kala li he na eityo ngeenge omaviinyu okwa li ashike omeva ongaho omandjebele. (Mateus 9:17; 11:19) Omaviinyu okwa li haa nuwa pedano lOpaasa, na Kristus okwe a longifa okudika po Edimbuluko lefyo laye.

16, 17. Oludi lomaviinyu elipi taa wapalele edano lEdimbuluko, nomolwashike?

¹⁶ Omaviinyu ashike matilyana e li edidiliko tali wapalele laasho sha li tashi fanekwa kwaasho sha li meholo, sha hala okutya, ohonde yaJesus ya tilwashi. Ye mwene okwa ti: “Eshi otashi ti ohonde yange, ohonde yehangano tai tilwashi omolwavahapu.” Nomuyapostoli Petrus okwa shanga ta ti: “[Ovakriste ovavaekwa] mu shi shii onye inamu kulilwa noinima hai xulu po, oshisiliveri noshingoldo omokukala kweni kwonale mwe ku fyuulula kooxo, ndelenee onohonde yaKristus i nondilo, ngaashi ei yodjona i he noshipo noi he nonyata.”—1 Petrus 1:18, 19.

¹⁷ Nope he na omalimbililo, omaviinyu matilyana oo a longwa momandjebele oo oludi lomaviinyu oo a li a longifwa kuJesus eshi a li ta diki po Edimbuluko. Ndelenee kunena omaviinyu amwe matilyana itaa tambulwa ko molwaashi okwa nghonopalekwa noalkoholi ile a tulwa oihemba noinyenyepeki. Ohonde yaJesus okwa li ya wana nokaya li ya pumbwa sha osho shi na okuwedwa mo. Onghee hano, omaviinyu ngaashi oo haa ifanwa port, sherry navermouth itaa wapalele. Eholo lEdimbuluko oli na okukala nomaviinyu matilyana inaa nyenyepekwa noinaa nghonopalekwa nasha. Omaviinyu matilyana inaa nyenyepekwa a ningwa peumbo momandjebele otaa dulu okulongifwa nosho yo omaviinyu matilyana ngaashi oo haa ifanwa burgundy noclaret.

18. Omolwashike Jesus ina ninga oshikumwifilonga shi na sha nomungome nosho yo omaviinyu Edimbuluko?

¹⁸ Eshi a li ta diki po ouvalelo, Jesus ina ninga oshikumwifilonga mokulundulula omadidiliko noku a ninga ombelela yaye yolelalela nosho yo ohonde yaye yolelalela. Okulya ombelela yomunhu nosho yo okunwa ohonde otashi teya omhango yaKalunga. (Genesis 9:3, 4; Leviticus 17:10) Jesus okwa li natango e na olutu laye alishe lopambelela nosho yo ohonde yaye aishe. Olutu laye okwa li la yandjwa li li eyambo la wanenena nohonde yaye okwa li ya tilwashi omutenya wa landula ko mefiku olo tuu olo lOshijuda, 14 aNisan. Onghee hano, omungome nosho yo omaviinyu Edimbuluko oku li ashike omadidiliko, taa faneke olutu nosho yo ohonde yaKristus.a

Edimbuluko—Ouvalelo wekwatafano

19. Omolwashike oiyasha ihapu ile omaholo mahapu taa dulu okulongifwa pedano lOuvalelo wOmwene?

¹⁹ Eshi Jesus a dika po Edimbuluko, okwa shiva ovayapostoli vaye ovadiinini va nwe meholo limwe. Evangeli laMateus otali ti: “[Jesus] okwa kufa eholo, ndee ta pandula, ndee te li va [pe], ndee ta ti: Nweni mo amushe.” (Mateus 26:27) Okulongifa ashike “eholo” limwe ndele hamaholo mahapu kasha li oupyakadi, omolwaashi pomhito oyo ovakufimbinga ashike 11 va li poshililo shimwe nokwa li tava dulu okulitambekida eholo olo noupu. Omudo ou, omamiliyona otaa ka ongala omolwOuvalelo wOmwene momaongalo e dule po 94 000 Eendombwedi daJehova mounyuni aushe. Omolwovanhu vahapu ovo tava ka ongala omolwedano olo moufiku umwe, itaku dulu nande okulongifwa eholo limwe alike molwaaveshe. Ndelenee efinamhango ohali kalekwa po momaongalo manene mokulongifa omaholo mahapu opo e litambekidwe kovakalimutumba mefimbo lixupi ngaashi tashi shiiva. Sha faafana, otapa dulu okulongifwa oiyasha yomungome i dulife pushimwe. Kape na sha mOmishangwa osho tashi ulike kutya eholo oli na okukala la hongwa monghedi ye likalekelwa. Ndele nande ongaho, eholo nosho yo oshiyasha oi na okuwapalela efimano loshiningwanima osho. Oshi li pandunge okuhayada eholo fiyo osheshi tali dulu okutika eshi tali litambekidwa.

20, 21. Omolwashike hatu dulu okutya kutya Edimbuluko oli li ouvalelo wekwatafano?

²⁰ Nonande oiyasha ihapu yomingome nosho yo omaholo mahapu omaviinyu otaa dulu okulongifwa, Edimbuluko oli li ouvalelo wekwatafano. MuIsrael shonale, omulumenhu okwa li ha dulu okuninga ouvalelo wekwatafano mokweeta oshinamwenyo konhele iyapuki yaKalunga oko kwa li hashi dipaelwa. Oilyo imwe yoshinamwenyo okwa li hai xwikwa po koaltari, imwe okwa li hai pewa omupristeri oo ta kwatele komesho, imwe okwa li hai pewa ovana ovapristeri vaAron, nomuyambi nosho yo oukwaneumbo waye tau kufa ombinga mouvalelo. (Leviticus 3:1-16; 7:28-36, OB-1986) Edimbuluko nalo oli li ouvalelo wekwatafano omolwaashi omwa kwatelwa okutukulilafana.

²¹ Jehova okwa kwatelwa mo mouvalelo oo wekwatafano e li Omutoti welongekido olo. Jesus oye eyambo, nOvakriste ovavaekwa ovo hava kufa ombinga mokulya nokunwa omadidiliko oo ve li ovakufimbinga mokutukulilafana. Okulya poshililo shaJehova otashi faneke kutya ovakufimbinga ove na ombili naye. Onghee hano, Paulus okwa shanga ta ti: “Eholo lepuniko eli hatu li nangeke noupuna, [kali] fi hamba ekwatafano nohonde yaKristus? Omungome ou hatu u pambula, kau fi ekwatafano nolutu laKristus? Osheshi omungome oumwe, nosho fye vahapu olutu limwe; osheshi ofyeni atusheni twa tambula komungome ou umwe.”—1 Ovakorinto 10:16, 17.

22. Omapulo elipi e na sha nEdimbuluko tu na yo okukonakona?

²² Ouvalelo wOmwene oo ashike edano lopalongelokalunga lokomudo hali danwa kEendombwedi daJehova. Eshi osha wapala omolwaashi Jesus okwa lombwela ovashikuli vaye ta ti: “Eshi kaleni tamu shi ningi okudimbulukwa nge.” Ohatu dimbuluka efyo laJesus pEdimbuluko, efyo olo la tumbalekifa ounamapangelo waJehova. Ngaashi twa didilika, pouvalelo oo wekwatafano, omungome otau faneke olutu laKristus lopanhu la yambwa, nomaviinyu otaa faneke ohonde yaye ya tilwashi. Ndelenee ovakufimbinga mokulya nokunwa omingome nomaviinyu oo e li omadidiliko ovanini neenghono momuvalu. Omolwashike shi li ngaho? Mbela Edimbuluko oli na tuu eityo lashili komamiliyona oo ihaa kufa ombinga mokulya nokunwa? Doshili, Ouvalelo wOmwene ou na okukala u na eityo lashike kwoove?

[Omashangelo opedu]

Oto nyamukula ngahelipi?

• Omolwashike Jesus a dika po Ouvalelo wOmwene?

• Olungapi Edimbuluko li na okudanwa?

• Omungome wEdimbuluko inau ya onhafi ou na eityo lashike?

• Omaviinyu Edimbuluko otaa faneke shike?

[Efano pepandja 11]

Jesus okwa dika po Ouvalelo wOmwene