Oinima oyo tu na okuya onhapo
“Oludalo lomauta nye, olyelye e mu longa okuya onhapo ehandu olo tali uya?” — MAT. 3:7.
1. Tumbula oihopaenenwa imwe yomOmbibeli yaavo va li va ya onhapo.
MBELA oto ka diladila kushike ngeenge wa udu outumbulilo “okuya onhapo”? Vamwe otashi dulika va diladile komulumenhu omunyasha wondjelo iwa, Josef, oo a li a ya onhapo eshi omukainhu waPotifar a li te mu kondjifa va ye moluhaelo. (Gen. 39:7-12) Vamwe otashi dulika va diladile kOvakriste ovo va li va ya onhapo okudja muJerusalem mo 66 O.P., ovo va li va dulika kelondwelo laJesus olo tali ti: “Ngenge tamu mono Jerusalem sha kondekelwa komatanga ovakwaita, opo nee . . . ava vomuJudea nava fadukile keemhunda naava ve li moshilando nava dje mo.” — Luk. 21:20, 21.
2, 3. (a) Johannes Omuninginifi okwa li a hala okutya shike lelalela eshi a li ta londwele ovawiliki velongelokalunga lOshijuda? (b) Ongahelipi Jesus a li a twa omufindo elondwelo laJohannes?
2 Oihopaenenwa oyo ya tumbulwa metetekelo oya kwatela mo okuya onhapo meityo lolelalela. Ndele kunena, Ovakriste vashili kongonga yedu alishe ova pumbwa okuya onhapo neendelelo oinima i lili noku lili, oku shi popya pafaneko. Johannes Omuninginifi okwa li a longifa outumbulilo “okuya onhapo” meityo lopafaneko. Ovawiliki velongelokalunga lOshijuda ovo va li mokati kovanhu ovo va li ve uya okuninginifwa kuJohannes ova li ve lishii ouyuki, nomolwaasho ova li tava diladila kutya inava pumbwa okulidilulula. Ova li va dina ovanhu vongaho ovo va li tava ninginifwa shi li euliko kutya ove livela ombedi. Johannes okwa li a nyaneka pomutenya ovawiliki ovo ovanaihelele nopehe na oumbada, a ti: “Oludalo lomauta nye, olyelye e mu longa okuya onhapo ehandu olo tali uya? Imeni hano oiimati ya wapalela elidilululo.” — Mat. 3:7, 8.
3 Johannes ka li ta popi okuya onhapo meityo lolelalela. Ponhele yaasho, okwa li ta londwele ovawiliki velongelokalunga lOshijuda kutya ngeenge ova hala oku ka xupa mefiku letokolo nolehandu olo la li tali ke uya, ove na okwiimika oiimati yelidilululo. Konima yefimbo, Jesus okwa li a tokola ovawiliki velongelokalunga lOshijuda noku va lombwela nopehe na oumbada kutya oikala yavo youtondwe otai ulike kutya xe yavo Ondiaboli. (Joh. 8:44) Jesus okwa li a twa omufindo elondwelo laJohannes olo la tumbulwa metetekelo, eshi a ifana ovawiliki velongelokalunga lOshijuda ‘oludalo leenhoka’ noku va pula a ti: “Otamu shiiva ngahelipi okuya onhapo etokolo [laGehenna, NW]?” (Mat. 23:33) Jesus okwa li a hala okutya shike eshi a longifa oshitya ‘Gehenna’?
4. Jesus okwa li a hala okutya shike eshi a londwela shi na sha naGehenna?
4 Gehenna osha li efilu olo la li kondje yekuma laJerusalem, omo kwa li hamu xwikilwa oimbodi nosho yo oinamwenyo oyo ya fya. Jesus okwa li a longifa oshitya Gehenna okuulika kefyo laalushe. Eshi Jesus a pula ovawiliki velongelokalunga lOshijuda shi na sha nokuya onhapo Gehenna, okwa li ta ulike kutya ovawiliki ovo ve li ongudu ova wana okuhanaunwa po fiyo alushe nopehe na eteelelo lenyumuko. — Mat. 5:22, 29.
5. Mokutala kwaasho sha ningwa po mondjokonona, ongahelipi elondwelo laJohannes naJesus olo la li tali xunganeke ehanauno la li la wanifwa?
5 Ovawiliki velongelokalunga lOshijuda ova li va weda ko komanyono avo eshi va li tava hepeke Jesus nosho yo ovashikuli vaye. Ngaashi Johannes, Jesus naye okwa li e va londwela shi na sha nefiku lehandu laKalunga. Pefimbo olo, “ehandu olo” ola li ashike tali ka hanga Jerusalem naJudea. Onghee hano, ovanhu ova li tava dulu okuya onhapo ehandu olo meityo lolelalela. Ehandu olo ola li le uya mo 70 O.P. eshi omatanga ovakwaita aRoma a li a hanauna po Jerusalem notembeli yasho. Pefimbo opo, muJerusalem omwa li mwa holoka “oudjuu” munene oo inau holoka mo nande onale. Ovanhu vahapu ova li va dipawa ile va ya moukwatwa. Ehanauno olo ola li tali faneke ehanauno linene lomalongelokalunga oipupulu okunena, mwa kwatelwa oo hae liti kutya oopaKriste. — Mat. 24:21.
Ehandu lomonakwiiwa olo tu na okuya onhapo
6. Oshike sha li sha ningwa po meongalo lopaKriste lomefelemudo lotete?
6 Ovakriste vamwe vomefelemudo lotete ova li va ninga ovashunimonima nova li ve lishilila ovahongwa. (Oil. 20:29, 30) Eshi ovayapostoli vaJesus va li natango momwenyo, ova li va ‘imba’ oushunimonima u hapupale. Ndele eshi ovayapostoli va fya, opa ka holoka oimhanga ihapu oyo ya totwa po kOvakriste ovanaipupulu. Kunena oku na omalongelokalunga omafele oo tae liti oopaKriste, ndele omahongo ao otaa kondjifafana. Ombibeli oya li ya xunganeka kutya otapa ka holoka ongudu yovawiliki vomalongelokalunga Oukwakriste. Oye va hokolola noutumbulilo wopaushimwe kutya ove li ‘omunhu woulunde’ nosho yo “omona wekano . . . ou Omwene Jesus ote ke mu dipaa po . . . note mu hanauna po neholoko lealuko laye.” — 2 Tes. 2:3, 6-8.
7. Omolwashike ovawiliki vomalongelokalunga Oukwakriste va wana okwiifanwa ‘omunhu woulunde’?
7 Ovawiliki vomalongelokalunga Oukwakriste ove li ‘omunhu woulunde’ meityo olo kutya ova pukifa ovanhu omamiliyona mokuxumifa komesho omahongo oipupulu, omafiku omafudo nelihumbato olo itali tu kumwe naasho Ombibeli tai hongo. Ngaashi ovawiliki velongelokalunga lOshijuda ovo va li va tokolwa kuJesus, ovawiliki vomalongelokalunga vokunena ovo ve li oshitukulwa ‘shomona wekano’ navo otava ka hanaunwa po fiyo alushe nopehe na eteelelo lenyumuko. (2 Tes. 1:6-9) Ndele mbela ovanhu ovo va pukifwa kovawiliki vOukwakriste nokovawiliki vomalongelokalunga amwe e lili oipupulu otava ka ningilwa shike? Opo tu mone enyamukulo kepulo olo, natu ka konakoneni shi na sha noiningwanima oyo ya landula ehanauno laJerusalem lomo 607 K.O.P.
‘Djeni mo onhapo muBabilon’
8, 9. (a) Jeremia okwa li a yandja etumwalaka lopaxunganeko lilipi li na sha nOvajuda ovo va li moukwatwa muBabilon? (b) Konima eshi Babilon sha findwa kOvamedia nokOvapersia, Ovajuda ova li va dula okuya onhapo meityo lilipi?
8 Omuprofeti Jeremia okwa li a xunganeka ehanauno laJerusalem olo le ke uya mo 607 K.O.P. Okwa li a popya kutya oshiwana shaKalunga otashi ka ya moukwatwa oule ‘womido 70’ nosha li tashi ka alulilwa kedu lasho konima yomido odo. (Jer. 29:4, 10) Embo laJeremia ola li la londwela Ovajuda ovo va li moukwatwa muBabilon vehe linyateke nelongelokalunga loipupulu lomuBabilon. Kungaho, ova li tava ka hangwa ve lilongekidila okwaalukila kuJerusalem nokutungulula elongelokalunga la koshoka ngeenge eufwafimbo laJehova ola fiki. Ovajuda ova ka mangululwa diva konima eshi Ovamedia nOvapersia va finda Babilon mo 539 K.O.P. Ohamba yOvapersia, Kores omutivali, okwa li a lombwela Ovajuda va shune kuJerusalem va ka tungulule otembeli yaJehova. — Esra 1:1-4.
9 Ovajuda omayovi ova li va mona omhito yokushuna kuJerusalem. (Esra 2:64-67) Kungaho, ova li va dulika kelombwelo lopaxunganeko laJeremia olo la li la kwatela mo okuya onhapo meityo lokufiya po onhele imwe opo va ye konhele imwe i lili. (Lesha Jeremia 51:6, 45, 50.) Ndele eenghalo kada li da pitika Ovajuda aveshe ve litwike molweendo olo lile lokushuna kuJerusalem nokuJuda. Ovo va li va fyaala muBabilon, ngaashi omuprofeti omunamido Daniel, navo ova li tava ka nangekwa noupuna, shimha ashike va li tava yambidida nomutima aushe elongelokalunga la koshoka nokukala va amuka ko kelongelokalunga loipupulu lomuBabilon.
10. ‘Babilon Shinene’ osha kala tashi longo ‘oixuna’ yoludi lilipi?
10 Kunena, ovanhu omabiliyona ove li momalongelokalunga oipupulu e lili noku lili oo omahongo ao a nyama kelongelokalunga laBabilon shonale. (Gen. 11:6-9) Omalongelokalunga oo aeshe kumwe otaa ifanwa “Babilon shinene, ina yeembwada noyoixuna aishe yedu.” (Eh. 17:5) Omalongelokalunga oipupulu okwa kala taa yambidida ovapangeli vopapolitika mondjokonona aishe. ‘Oixuna’ imwe oyo ya longwa kuBabilon Shinene ongaashi okweetifa oita ihapu oyo ya twaalela eemwenyo dovanhu omamiliyona omafele ovo va “dipawa kombada yedu.” (Eh. 18:24) ‘Oixuna’ imwe vali oyo sha longa oya kwatela mo okuhepeka ounona pamilele nosho yo oluhaelo loludi keshe omo ovawiliki vomalongelokalunga hava kufa ombinga. Kakele kaasho, omalelo eengeleka ohae lipwililikile oilonga ya tya ngaho. Onghee hano, itashi kumwifa eshi Jehova ta ka xulifa po mafiku omalongelokalunga aeshe oipupulu. — Eh. 18:8.
11. Ovakriste vashili ove na oshinakuwanifwa shilipi fimbo Babilon Shinene inashi hanaunwa po?
11 Molwaashi Ovakriste vashili ove shii osho tashi ka ningilwa Babilon Shinene, ove na oshinakuwanifwa shokulondwela ovo ve li musho. Onghedi imwe omo have shi ningi omokutandavelifa Eembibeli noishangomwa yopaMbibeli oyo ya nyanyangidwa ‘komupiya omudiinini nomunaendunge,’ oo a nangekwa po kuJesus opo a kale ta yandje ‘oikulya yopamhepo pefimbo layo.’ (Mat. 24:45) Ngeenge oohandimwe ova ulike ohokwe metumwalaka lOmbibeli, ohatu ningi omalongekido opo tu va kwafele okupitila mekonakonombibeli. Otwe lineekela kutya otava ka mona kutya ova pumbwa ‘okudja mo onhapo muBabilon’ omanga pe na efimbo. — Eh. 18:4.
Inda onhapo elongelo loikalunga
12. Kalunga oha tale ko ngahelipi okwiilikana oihongwafano noikalunga?
12 Oixuna imwe vali oyo hai longwa muBabilon Shinene oyo okwiilikana oihongwafano nosho yo oikalunga. Kalunga okwa tala ko oinima oyo i li “oixuna.” (Deut. 29:17) Keshe oo a hala okuhafifa Kalunga oku na okuhenuka okulongela oikalunga noku na okukala metwokumwe neendjovo daKalunga odo tadi ti: “Aame [Jehova, NW], olo edina lange, ihandi yandje efimano lange kuumwe, ile okuhambelelwa kwange [koihongwafano].” — Jes. 42:8.
13. Otu na okuhenuka eenghedi delongelo loikalunga dilipi odo ihadi limonikila mo noupu?
13 Eendjovo daKalunga oda eta poluhaela eenghedi dokulongela oikalunga odo ihadi limonikila mo noupu. Pashihopaenenwa, Ombibeli otai ti kutya olwisho oli li “elongelo loikalunga.” (Kol. 3:5) Okukala nolwisho osha hala okutya okukala wa hala oinima oyo wa dilikwa ile okuhaluka oinima yavamwe. (Ex. 20:17) Omweengeli oo a ka ninga Satana Ondiaboli okwa li e na okahalu, a li a hala ondodo younamapangelo aeshe nokukala ta ilikanwa. (Luk. 4:5-7) Osho osha li she mu ningifa a tukulile Jehova oshibofa nokuhongaula Eva a haluke oshinima osho Jehova a li a dilika. Paulelalela, Adam naye okwa li a ya momwiyo wokulongela oikalunga eshi a efa a pangelwe komahalo okuliholamwene ndele ta pitifa komesho ekwatafano laye nomukulukadi waye ponhele yokudulika kuXe yavo womeulu omunahole. Mepingafano naasho, aveshe ovo va hala oku ka xupa mefiku lehandu laKalunga ove na okuliyandjela Kalunga oye aeke nokuhenuka olwisho.
“Kukumeni oluhaelo”
14-16. (a) Omolwashike taku dulu okutiwa kutya Josef okwe tu tulila po oshihopaenenwa shiwa shopaenghedi? (b) Oshike tu na okuninga po ngeenge otwa kwatwa komahalo okuya momilele inadi koshoka? (c) Oshike tashi dulu oku tu kwafela tu kukume filufilu oluhaelo?
14 Lesha 1 Ovakorinto 6:18. Eshi omukulukadi waPotifar a li ta kendabala okukokela Josef moluhaelo, Josef okwa li a ya onhapo meityo lolelalela. Josef ina tulila po tuu Ovakriste ovo va hombola nosho yo ovo inava hombola ile inava hombolwa oshihopaenenwa shiwa! Osha yela kutya eliudo laJosef ola li la nwefwa mo koiningwanima yonale oyo tai ulike nghee Kalunga ha tale ko oluhaelo. Ngeenge otwa hala okudulika koshipango osho tashi ti ‘natu kukume oluhaelo,’ otu na okuhenuka oinima oyo tai dulu okupendula omahalo okuya momilele nomunhu oo ehe fi kaume ketu kopahombo. Ombibeli oya ti: “Dipaeni hano oinhimbu yeni yopadu: oluhaelo, onyata, olwisho loipala, okahalu kaii, nolwisho leliko olo elongelo loikalunga, osheshi ei hai etele ovana vokuhadulika ehandu laKalunga.” — Kol. 3:5, 6.
15 Didilika kutya ‘ehandu laKalunga otali ka hanga ovana vokuhadulika.’ Ovanhu vahapu kunena mounyuni ova kulika omahalo mai okuya momilele nove liefela moluhaelo. Onghee hano, tu li Ovakriste otu na okwiilikana opo Kalunga e tu kwafele noku tu pe omhepo yaye iyapuki opo tuha pangelwe komahalo omilele inadi koshoka. Kakele kaasho, okukala hatu konakona Ombibeli, okukala hatu kala pokwoongala kwopaKriste nosho yo okulombwela ovanhu vakwetu onghundana iwa otashi ke tu kwafela tu ‘kale nokweenda momhepo.’ Nokungaho, itatu ka “wanifa vali ouhalu wombelela.” — Gal. 5:16.
16 Ngeenge ohatu tale omafano oipala, itatu ‘ende momhepo’ nandenande. Kakele kaasho, Omukriste keshe oku na okuhenuka okulesha nokupwilikina ile okutala oinima oyo tai pendula omahalo omilele. Natango, osha puka ‘kovayapuki’ vaKalunga okukala tava ningi omashendjo e na sha noinima oyo ya nyika oluhaelo ile okukala tava kundafana kombinga yoinima ya tya ngaho. (Ef. 5:3, 4) Ngeenge ohatu henuka oinima ya tya ngaho, ohatu ulikile Tate yetu omunahole kutya otwa halelela oku ka xupa mefiku lehandu laye nokuya mounyuni mupe wouyuki.
Inda onhapo “olwisho loimaliwa”
17, 18. Omolwashike tu na okuya onhapo “olwisho loimaliwa”?
17 Monhumwafo yotete oyo Paulus a li a shangela Timoteus, okwa li a divilika omafinamhango oo a li e na okuwilika ovapiya Ovakriste, ovo vamwe vomuvo va li hava kala va hala okulikola shihapu painiwe molwaashi kwa li hava longele Ovakriste vakwao. Vamwe otashi dulika va li hava kendabala okulikola oupuna mokulongifa oinima iyapuki omolwomalalakano okuliholamwene. Paulus okwa li a londwela Ovakriste vaha tale ko ‘etilokalunga li li oshilikolifo shemona lounyuni.’ Oupyakadi oo otashi dulika wa li wa etifwa ‘kolwisho loimaliwa,’ olo tali dulu okukwata keshe umwe, kutya nee oshipuna ile ohepele nokweetela omunhu oilanduliko ii. — 1 Tim. 6:1, 2, 5, 9, 10.
18 Mbela oto dimbuluka oohandimwe mOmbibeli ovo va li va nyona po ekwatafano lavo naKalunga ‘omolwolwisho loimaliwa’ ile omolwokuhaluka oinima yondilo? (Jos. 7:11, 21; 2 Eeh. 5:20, 25-27) Paulus okwa li a kumaida Timoteus a ti: “Omunhu waKalunga, inda onhapo oinima ya tya ngaha, lalakanena ouyuki netilokalunga neitavelo nohole nelididimiko noutalonheni.” (1 Tim. 6:11) Atusheni otwa pumbwa okudulika komayele oo ngeenge otwa hala oku ka xupa mefiku lehandu laKalunga olo tali uya.
‘Inda onhapo okahalu kounyasha’
19. Oshike osho ovanyasha aveshe va pumbwa?
19 Lesha Omayeletumbulo 22:15. Oulai oo hau kala momitima dovanyasha otau dulu oku va twala noupu moshiponga. Ndele outekuduliko oo wa kanghamena kOmbibeli otau dulu okukwafela ovanyasha. Ovanyasha vahapu Ovakriste ovo ovadali vavo vehe fi Ovakriste ohava konakona nokutula moilonga omafinamhango oo taa hangwa mOmbibeli. Ovanyasha vamwe ohava mono ouwa momayele opandunge oo hava pewa kOvakriste ovo va pyokoka pamhepo momaongalo. Omayele oo a kanghamena kOmbibeli otaa dulu oku tu etela ehafo paife nosho yo monakwiiwa, kashi na nee mbudi kutya ohatu a pewa kulyelye. — Heb. 12:8-11.
20. Oshike tashi dulu okukwafela ovanyasha va ye onhapo ouhalu mwii?
20 Lesha 2 Timoteus 2:20-22. Ovanyasha vahapu ovo inava mona outekuduliko wokolela ihava katuka pandunge. Ova ninga oihakanwa yoinima ngaashi omhepo yefiyafanepo, ouhalu mwii, oluhaelo, olwisho loimaliwa nosho yo okulalakanena omalihafifo. Oikala ya tya ngaho ohai etifwa ‘kokahalu kounyasha’ oko Ombibeli tai tu kumaida tu ye onhapo. Opo ovanyasha Ovakriste va ye onhapo okahalu oko, ove na okuhenuka omanwefemo a nyika oshiponga, kutya nee otae va dilile peni. Oshinima osho tashi ke va kwafela unene va ye onhapo okahalu kounyasha omayele opamishangwa oo tae va ladipike va lalakanene omaukwatya opaKriste “pamwe naava tava ifana Omwene nomutima wa yela.”
21. Eudaneko litunhula lilipi Jesus Kristus a udanekela eedi daye?
21 Kashi na nee mbudi kutya otu li ovanyasha ile ovakulunhu, ohatu ka ulika kutya otwa hala okukwatelwa mokati keedi daJesus odo hadi ‘i onhapo ondaka yavamwe ve lili,’ ngeenge otwa henuka okupwilikina kwaavo tava kendabala oku tu pukifa. (Joh. 10:5) Ndele opo tu ka xupe mefiku lehandu laKalunga, inatu pumbwa ashike okuya onhapo oinima oyo ya nyika oshiponga, ndele otwa pumbwa yo okulalakanena omaukwatya mawa. Oshitukulwa tashi landula otashi ka kundafana omaukwatya aheyali oo tu na okulalakanena. Otu na etomheno liwa lokukonakona omaukwatya oo, molwaashi Jesus okwa udaneka a ti: “Ohandi [ka pa eedi dange] omwenyo waalushe, ndele odo itadi ka kana fiyo alushe, ndele kape na ou te di vakula mo meke lange.” — Joh. 10:28.
Oto nyamukula ngahelipi?
• Elondwelo lilipi Jesus a li a pa ovawiliki velongelokalunga lOshijuda?
• Ovanhu omamiliyona kunena ova taalela oshiponga shilipi?
• Otu na okuhenuka eenghedi delongelo loikalunga dilipi odo ihadi limonikila mo noupu?
[Omafano pepandja 17]
Mbela oto ka diladila kushike ngeenge wa udu outumbulilo “okuya onhapo”?