7. ‘Okudiinina oukumwe momhepo’ otashi ti shike?

⁷ Nonande Jehova okwa tala ko ovavaekwa ve li ovana vaye ovayuki nosho yo eedi dimwe di li ookaume kaye ovayuki pakanghameno lekuliloyambo laKristus, pokati ketu ope na ashike okuholoka okuhaudafana ofimbo tu li kombada yedu mounyuni ou. (Rom. 5:9; Jak. 2:23) Ngeno hasho sha li ngaho, ngeno inatu pumbwa omayele a nwefwa mo oo kutya natu kale hatu ‘lididimikilafana.’ Ndele mbela oshike tashi tu kwafele tu kale twa hangana novaitaveli vakwetu? Otwa pumbwa okukulika oukwatya ‘welininipiko nombili.’ Kakele kaasho, Paulus okwe tu kumaida tu kendabale ‘okudiinina oukumwe momhepo mekwamo lombili lokumanga kumwe.’ (Lesha Ovaefeso 4:1-3.) Okutula moilonga omayele oo okwa kwatela mo okweefa omhepo yaKalunga i tu nwefe mo noi imike mufye oiimati yayo. Mepingafano noilonga yombelela oyo hai tukaula ovanhu, oiimati yomhepo ohai tu kwafele tu kandule po omaupyakadi.

9. Ongahelipi hatu dulu okulikonakona tu tale ngeenge otwa ‘hala shili okudiinina oukumwe momhepo’?

⁹ Keshe umwe womufye okwa pumbwa okulipula kutya: ‘Ohandi ningi ngoo eenghendabala da mana mo opo ndi “diinine oukumwe momhepo mekwamo lombili lokumanga kumwe?” Ohandi linyenge ngahelipi ngeenge pokati ketu naumwe pa holoka oupyakadi wonhumba? Mbela ohandi u lombwele ookaume kange vahapu nelalakano opo va yambidide nge? Mbela ohandi kala nda hala ovakulunhuongalo ovo va ungaunge noupyakadi wetu ponhele yokuninga eenghendabala da mana mo ndi pange vali ombili nomunhu oo? Ngeenge onda didilika kutya pokati ketu naumwe ope na oupyakadi, mbela ohandi kendabala oku mu henuka opo tuha kundafane shi na sha nao?’ Mbela okuninga ngaho otaku ka ulika ngoo kutya ohandi katuka metwokumwe nelalakano laJehova li na sha nokuhanganifa oinima aishe muKristus?

10, 11. (a) Okupanga ombili novamwatate okwa fimana shi fike peni? (b) Otu na okuninga shike opo tu kale tu na ombili notu nangekwe noupuna kuJehova?

¹⁰ Jesus okwa ti: “Ove ngenge to twala oshali shoye koaltari, ndele oko wa dimbulukila omumwanyoko nokutya, e na sha naave, fiya ko oshali shoye koaltari, u ye manga mu ka pafane ombili nomumwanyoko, ove u aluke u ka yandje oshali shoye. Itavela diva mu pafane ombili.” (Mat. 5:23-25) Jakob okwa ti: “[Oiimati] youyuki ohai kunwa mombili kuava hava ningi ombili.” (Jak. 3:17, 18) Onghee hano, itatu dulu okulonga osho sha yuka ngeenge pokati ketu navamwe kape na ombili.

¹¹ Pashihopaenenwa, moilongo imwe oyo ya dedelifwa koita, eepersenda 35 dedu ihadi limwa molwaashi ovanafaalama ova tila eeboma. Ngeenge oboma oya topa, ovanafaalama ohava fiye po omapya avo, nohashi kala shidjuu kovanhu okumona oilonga momikunda noikulya ohai kala ya pumba moilando. Sha faafana, itatu ka kula pamhepo ngeenge otu na omaukwatya oo tae tu ningifa tu nyone po ombili pokati ketu novamwatate. Ndele ngeenge otwa kala hatu dimine po vamwe diva noku va ningila ouwa, ohatu ka kala tu na ombili, na Jehova ote ke tu nangeka noupuna.