Mbela Ou Hole Tuu Omalondwelo Ajehova Neenghono Adishe?

“Omwenyo wange otau diinine omalondwelo oye, ndele ndi a hole neenghono adishe.”—EPSALME 119:167, NW.

1. Openi hatu hange unene omauyelele a endululwa e na sha nomalondwelo aJehova?

JEHOVA okwa hala ovapiya vaye va kale nelao. Doshili, opo tu hafele elao lashili, otu na okweenda pamhango yaKalunga nokudiinina omalombwelo aye. Opo eshi shi ningwe, okwe tu pa omalondwelo. Oo a tumbulwa luhapu mOmishangwa, unene tuu mEpsalme 119, olo tashi dulika la totwa kOhamba inyasha yaJuda, Hiskia. Eimbilo eli liwa ola tameka neendjovo edi: “Ovanelao ovava, ve nondjila ya yuka, ndee tava ende pamhango yOmwene. Ovanelao ovava, tava diinine [omalondwelo, NW] aye, ndee tave mu kongo nomutima aushe.”—Epsalme 119:1, 2.

2. Ongahelipi omalondwelo aKalunga e na ekwatafano nelao?

² Ohatu “ende pamhango yOmwene” mokumona eshiivo lashili lEendjovo daye noku di longifa monghalamwenyo. Ndelenee molwaashi inatu wanenena, otwa pumbwa omalondwelo. Oshitya shOshiheberi sha tolokwa “omalondwelo” otashi ulike kutya Kalunga ohe tu dimbulukifa omhango yaye, omalombwelo aye, omifindalandu daye nosho oipango yaye. (Mateus 10:18-20) Ohatu dulu ashike okukala nelao ngeenge ohatu twikile nokudiinina omalondwelo oo, molwaashi otae tu kwafele tu henuke eemwiyo dopamhepo odo hadi eta oshiponga noluhodi.

Diinina omalondwelo aJehova

3. She likolelela paPsalme 119:60, 61, otu na elineekelo lashike?

³ Omalondwelo aKalunga okwa kala a fimanekwa komupsalme oo a imba ta ti: “Ohandi uluma ndee itandi kanghama, ndi wanife oipango yoye. Omalulo ovakolokoshi taa dingilile nge; nande ndi li ngaha, itandi dimbwa nande omhango yoye.” (Epsalme 119:60, 61) Omalondwelo aJehova otae tu kwafele tu lididimikile omahepeko molwaashi otu na elineekelo kutya Tate yetu womeulu ota dulu okukufa po omandangalati omangabeko oo ovatondi tave tu tulile po. Mefimbo la wapala, ote ke tu mangulula komandangalati oo opo tu dule okutwikila noilonga yokuudifa Ouhamba.—Markus 13:10.

4. Ongahelipi hatu dulu okulinyenga komalondwelo aKalunga?

⁴ Omafimbo amwe, ohatu pukululwa komalondwelo aJehova. Natu pandule alushe omapukululo a tya ngaha, ngaashi naanaa omupsalme a ninga. Okwa ilikana kuKalunga ta ti: “[Omalondwelo] oye oo enyaku lange . . . Ame ondi hole [omalondwelo] oye.” (Epsalme 119:24, 119, yelekanifa NW.) Otu na omalondwelo mahapu aKalunga e dule oo kwa li e niwe komupsalme. Oitofwamo omafele ya kufwa mOmishangwa dOshiheberi oyo tai hangika yo mOmishangwa dOshigreka itai tu dimbulukifa ashike omalombwelo aJehova kovapiya vaye ovo va li koshi yOmhango, ndele otai tu dimbulukifa yo omalalakano aye e na sha neongalo lopaKriste. Ngeenge Kalunga e wete kutya osha wana oku tu dimbulukifa oinima oyo tu na okuninga paemhango daye, otwa hafa omolwewiliko la tya ngaha. ‘Mokudiinina omalondwelo aJehova,’ ohatu dulu okuhenuka oinima oyo tai tu kokele momanyono oo taa nyematifa Omushiti wetu noku tu nyeka elao letu.—Epsalme 119:31, NW.

5. Ongahelipi hatu dulu okukala tu hole omalondwelo aJehova neenghono adishe?

⁵ Otu na okukala tu hole omalondwelo aJehova shi fike peni? Omupsalme okwa imba ta ti: “Omwenyo wange otau diinine omalondwelo oye, ndele ndi a hole neenghono adishe.” (Epsalme 119:167, NW) Ohatu ka kala tu hole omalondwelo aJehova neenghono adishe ngeenge ohatu a konakona noku a tambula ko ngaashi ekumaido laTate oo e na ko nasha nafye shili. (1 Petrus 5:6, 7) Otwa pumbwa omalondwelo aye, nohole yetu yoku a hola otai ka kula mokumona nghee hae tu etele omauwa.

Molwaashi twa pumbwa omalondwelo aKalunga

6. Omolwetomheno limwe lilipi twa pumbwa omalondwelo aJehova, noshike tashi tu kwafele tu a dimbuluke?

⁶ Etomheno limwe molwaashi twa pumbwa omalondwelo aJehova olo kutya otu vadimbwanhu. The World Book Encyclopedia otai ti: “Luhapu, ovanhu ohava dimbwa unene omauyelele mokweendela ko kwefimbo. . . . Otashi dulika wa li u na oshimoniwa omo wa li ito dulu okudimbuluka edina ile okatukulwa kouyelele wonhumba oko kwa li konyala to dulu oku ka dimbuluka. . . . Okuhadimbuluka sha kwa tya ngaha kwopokafimbo, oko haku holoka luhapu, ohaku ifanwa okunyengwa okumonununa sha. Ovanongononi otave shi yelekanifa nonghendabala yokukonga oshinima sha tulwa papuko monduda ya dongakana. . . . Onghedi iwa yokudimbuluka okatukulwa kouyelele oyo oku ka konakona efimbo lile konima eshi to diladila kutya ou ka shii nawa.” Ekonakono louladi neendululo otali tu kwafele tu dimbuluke omalondwelo aKalunga noku a diinina omolwouwa wetu vene.

7. Omolwashike omalondwelo aKalunga a pumbiwa unene kunena shi dulife nale?

⁷ Kunena otwa pumbwa omalondwelo aJehova shi dulife nale molwaashi owii owa hapupala unene inashi monika nande onale mondjokonona yovanhu. Ngeenge ohatu yandje elitulemo komalondwelo aKalunga, ohatu limonene ounongo oo wa pumbiwa tu henuke okuyulwa keenghedi dii domounyuni. Omupsalme okwa ti: “Ovalongi vange aveshe ondi va dule eendunge, osheshi [omalondwelo, NW] oye oo omadiladilo ange. Ondi dule ovaxungu omayele, osheshi ohandi diinine omalombwelo oye. Eemhadi dange ohandi di kelele, ndi ha lyate nande melila loulunde, ame ndi shikule ondjovo yoye.” (Epsalme 119:99-101) Okudiinina omalondwelo aKalunga, ohatu ke likelela ‘melila keshe loulunde’ nohatu ka henuka okuninga ngaashi eemhunga dovanhu, ovo ‘va laula meendunge davo, nove li kokule nomwenyo womuKalunga.’—Ovaefeso 4:17-19.

8. Ongahelipi hatu dulu okukala twe lilongekida tu finde omayeleko eitavelo nomupondo?

⁸ Omalondwelo aKalunga okwa pumbiwa yo molwaashi otae tu pameke tu lididimikile omayeleko etu mahapu ‘mefimbo eli lexulilo.’ (Daniel 12:4) Nope he na omalondwelo aa ohatu ningi ‘ovapwilikini hava dimbwa.’ (Jakob 1:25) Ndelenee okukonakona nouladi paumwene nosho yo okukonakona Omishangwa meongalo nekwafo loileshomwa ya dja ‘komupiya omudiinini nomunaendunge’ otaku tu kwafele tu finde omayeleko eitavelo letu nomupondo. (Mateus 24:45-47) Omalongekido a tya ngaha opamhepo otae tu kwafele tu mone osho tu na okuninga opo tu wapalele Jehova ngeenge hatu shakeneke eenghalo didjuu.

Onghandangala ya fimana oyo hai danwa kokwoongala kwetu

9. Oolyelye ve li “eeshali odo di li ovanhu,” nongahelipi tava kwafele ovaitaveli vakwao?

⁹ Onghedi imwe omo omhumbwe yetu yomalondwelo aKalunga tai wanifwa po oyo okwoongala kwopaKriste, opo elongo hali yandjwa kovamwatate va nangekwa po. Omuyapostoli Paulus okwa shanga ta ti eshi Jesus ‘a londa kombada okwa ya neenghwate, nokwa yandja eeshali odo di li ovanhu.’ Paulus okwa weda ko ta ti: “[Kristus] okwa yandja vamwe va ninge ovayapostoli navamwe ovaprofeti navamwe ovaevangeliste navamwe ovafita navamwe ovalongindjovo opo a longekide ovayapuki va kale va wana va pwa moshilonga sheyakulo, okutunga olutu laKristus.” (Ovaefeso 4:8, 11, 12, yelekanifa NW.) Inatu hafa tuu ‘omolweeshali edi di li ovanhu’—ovakulunhuongalo va nangekwa po—tava yukifa elitulemo letu komalondwelo aJehova ngeenge hatu ongala pamwe omolwoku mu longela!

10. Oshitwa shashike sha fimana mOvaheberi 10:24, 25?

¹⁰ Olupandu omolwomalongekido opakalunga otali dulu oku tu linyengifa tu kale pokwoongala kwetu kweongalo kwopatano oshivike keshe. Omhumbwe yokwoongala pamwe ihaku faula oya divilikwa kuPaulus. Okwa shanga ta ti: “Ndele tu filafaneni oshisho fye tu twafane omukumo mohole nomoilonga iwa. Tu ha efe [po okwoongala pamwe], ngaashi vamwe ve [na ondjikilile yoku shi ninga], ndelenee tu kumaidafaneni, unene eshi tamu mono efiku olo tali ehene popepi.”—Ovaheberi 10:24, 25, yelekanifa NW.

11. Ongahelipi okwoongala kwetu keshe kwokoshivike taku tu kwafele?

¹¹ Mbela oho pandula ngoo osho okwoongala kwetu haku tu ningile? Ekonakono lOshungonangelo lokoshivike ohali pameke eitavelo letu, ohali tu kwafele tu tambule ko omalondwelo aJehova nohali tu pameke tu kondjife “omhepo younyuni.” (1 Ovakorinto 2:12; Oilonga 15:31) POkwoongala kwomOipafi, ovapopi ohava yandje ehongo tali di mEendjovo daKalunga, mwa kwatelwa omalondwelo aJehova osho yo ‘eendjovo diwa domwenyo waalushe’ daJesus. (Johannes 6:68; 7:46; Mateus 5:1–7:29) Ounghulungu wetu wokuhonga ohau upikwa pOfikola yOukalele woPauteokratika. Okwoongala kwoPailonga oku li ekwafo oku tu kwafela tu xwepopaleke okupopya kwetu onghundana iwa eumbo neumbo, momalishuneko, komakonakonombibeli opeumbo nosho yo moinima imwe i na sha noukalele wetu. Ongudu inini yEkonakono lEmbo lomEongalo otai tu pe omhito ya kula tu ninge omilombo odo luhapu da kwatela mo omalondwelo aKalunga.

12, 13. Ongahelipi oshiwana shaKalunga moshilongo shimwe shaAsia sha ulika olupandu lokwoongala kwopaKriste?

¹² Okukala pokwoongala kweongalo ihaku faula otaku tu dimbulukifa oipango yaKalunga notashi tu kwafele moku tu kaleka noupamhepo wa kola mokutaalela omaupyakadi, oudjuu wopamaxupilo nosho yo omayeleko amwe eitavelo letu. Efimano lokwoongala ola li la talika ko nouladi kOvakriste vamwe 70 moshilongo shimwe shomuAsia ovo kwa li va kufwa mo momaumbo avo nokutelwatelwa va ka kale mofuka mokule. Molwaashi ova tokola toko okutwikila okwoongala pamwe ihava faula, ova alukila koshilando shavo sha hanaunwa po koita, tava ongele po osho sha fiwa po shOlupale lOuhamba noku li tungulula mongoya.

¹³ Konima yokulididimikila eedula dihapu doita moshitukulwa shimwe shomoshilongo osho tuu osho, ovapiya vaJehova natango ove li tava longo nouladi. Omukulunhuongalo umwe moshitukulwa okwa pulwa: “Oshike sha li ekwafo linene mokukaleka ovamwatate pamwe?” Okwa nyamukula ngahelipi? “Moule weedula 19, otwa kala ihatu faula nande okwoongala. Omafimbo amwe omolwokutelwa eeboma ile omolwomaupyakadi amwe, ovamwatate vamwe inava dula okufika konhele yokwoongala, ashike inatu efa po nande okwoongala.” Ovamwatate novamwameme ava ovaholike ova uda ko shili efimano ‘lokuhaefa po okwoongala pamwe.’

14. Oshike hatu lihongo monghedindjikilile yomukulupe Hanna?

¹⁴ Omufiyekadi Hanna womido 84 “ina dja mo nandenande motembeli.” Oshilanduliko, ye opo a li eshi okahanana Jesus ka li ka etwa mo diva konima yokudalwa kwako. (Lukas 2:36-38) Mbela owa tokola toko u ha faule nande okwoongala? Mbela oto kendabala ngaashi to dulu u kale ho kala pomutumba keshe woyoongalele yetu yoikandjo nosho yo yoitukulwa? Omahongo mawa opamhepo oo haa yandjwa pokwoongala oko ohae tu pe euliko la yela kutya Tate yetu womeulu oha file oshisho ovapiya vaye. (Jesaja 40:11) Eemhito da tya ngaha ohadi xumifa komesho ehafo, nokukala po kwetu otaku ulike olupandu letu okupandula omalondwelo aJehova.—Nehemia 8:5-8, 12.

Twa yoololwa ko komalondwelo aJehova

15, 16. Ongahelipi okudiinina omalondwelo aJehova taku nwefa mo elihumbato letu?

¹⁵ Okudiinina omalondwelo aKalunga otashi tu kwafele tu kale twa yooloka ko kounyuni ou mwii. Pashihopaenenwa, okupwilikina omalondwelo aKalunga otashi tu kelele tu ha kufe ombinga moluhaelo. (Deuteronomion 5:18; Omayeletumbulo 6:29-35; Ovaheberi 13:4) Eyeleko lokupopya oipupulu, okukala tu he na oudiinini ile okuvaka otaku dulu okupondolwa sha kanghamena kokudiinina omalondwelo opakalunga. (Exodus 20:15, 16; Leviticus 19:11; Omayeletumbulo 30:7-9; Ovaefeso 4:25, 28; Ovaheberi 13:18) Okupwilikina komalondwelo aJehova otashi tu kelele yo tu ha handuke, tu ha kale nonghone ile tu lundile vamwe.—Leviticus 19:16, 18; Epsalme 15:1, 3.

¹⁶ Mokudiinina omalondwelo aKalunga, ohatu ka kala twa koshoka, ile twa yooloka ko, omolwoilonga yaye. Inashi fimana tuu okukala twa yooloka ko kounyuni ou! Meilikano kuJehova onguloshi yaye yaxuuninwa monghalamwenyo yaye kombada yedu, Jesus okwa ilikana eilikano eli omolwovashikuli vaye ta ti: “Ame onde va pa eendjovo doye, nounyuni otau va tondo, osheshi vo kave fi vomounyuni ou, ngaashi Ame ndi he fi womounyuni ou. Ihandi indile u va kufe mo mounyuni ou, ndele u va amene kowii. Vo kave fi vomounyuni, ngaashi Ame ndi he fi womounyuni. Va yapulila moshili yoye, eendjovo doye odo oshili.” (Johannes 17:14-17) Natu twikile nohole yokuhola Eendjovo daKalunga, odo tadi tu yoolola ko omolwoilonga yaye iyapuki.

17. Oshike tashi dulu okuningwa ngeenge ohatu lipwililikile omalondwelo aKalunga, notu na okuninga shike?

¹⁷ Tu li ovapiya vaJehova, otwa hala okukala twa wapalela oilonga yaye. Ndelenee ngeenge ohatu lipwililikile omalondwelo aKalunga, ohatu dulu okufindwa komhepo younyuni ou, tai xumifwa komesho kokupopya kwao kuhapu, koileshomwa, komalihafifo nosho yo kelihumbato. Doshili, fye inatu hala okuninga ovanalwisho voimaliwa, ovalitangi, ovalinenepeki, tu he shii kupandula, tu he noudiinini, ovakwanyanya, ovahayavala, ovafulalali, ovaholi vomalihafifo ponhele yokuhola Kalunga—okutumbula ashike amwe omomaukwatya oo haa ulikwa kwaavo ve liteeka Kalunga. (2 Timoteus 3:1-5) Molwaashi otu li lelalela momafiku axuuninwa onghalelo yoinima ei youkolokoshi, natu twikile nokwiilikana omolwekwafo lopakalunga opo tu dule okutwikila nokudiinina omalondwelo aJehova nokungaha ohatu ‘ka kala twa lungama pandjovo yaye.’—Epsalme 119:9, NW.

18. Okudiinina omalondwelo aKalunga otashi tu linyengifa tu katuke eenghatu diwa dilipi?

¹⁸ Omalondwelo aJehova ohaa ningi shihapu shi dulife oku tu londwela ashike shi na sha noinima oyo tu he na okuninga. Okudiinina omalondwelo aye otaku ke tu katukifa eenghatu do venevene, noku tu linyengifa tu lineekele muJehova filufilu noku mu hola nomitima detu adishe neemwenyo detu adishe neendunge detu adishe neenghono detu adishe. (Deuteronomion 6:5; Epsalme 4:5; Omayeletumbulo 3:5, 6; Mateus 22:37; Markus 12:30) Omalondwelo aKalunga otae tu tu yo omukumo tu kale tu hole ovanhu vakwetu. (Leviticus 19:18; Mateus 22:39) Unene tuu ohatu ulike ohole yokuhola Kalunga nosho yo ovanhu vakwetu ngeenge hatu wanifa po ehalo laKalunga nokutukulilafana navamwe “eshiivo lokushiiva Kalunga” olo tali yandje omwenyo.—Omayeletumbulo 2:1-5.

Okudiinina omalondwelo aJehova otashi ti omwenyo!

19. Ongahelipi hatu dulu okuulikila vamwe kutya okupwilikina omalondwelo aJehova otaku hongo notaku kwafa?

¹⁹ Ngeenge ohatu diinine omalondwelo aJehova nokukwafela vamwe ve shi ninge yo, ohatu lixupifa fye vene naava tave tu pwilikine. (1 Timoteus 4:16) Ongahelipi hatu dulu okuulikila vamwe kutya okupwilikina komalondwelo aJehova otaku hongo notaku kwafa shili? Omokulongifa omafinamhango Ombibeli monghalamwenyo yetu. Aveshe ovo ve na ‘oikala iwa kombinga yomwenyo waalushe’ otava dulu okumona kutya ondjila oyo ya tulwa po mEendjovo daKalunga oi li dingi okushikula. (Oilonga 13:48, NW) Otava dulu yo okumona kutya ‘Kalunga oku li shili mokati ketu’ notashi ve linyengifa va longele Omwene Omunamapangelo aeshe Jehova pamwe nafye.—1 Ovakorinto 14:24, 25.

20, 21. Omalondwelo aKalunga nomhepo yaye otai dulu oku tu kwafela tu ninge shike?

²⁰ Mokutwikila nokukonakona Omishangwa, okulongifa osho twe lihonga nokumona omauwa eyadi momalongekido aJehova opamhepo, ohatu ka kala tu hole omalondwelo aye neenghono adishe. Ngeenge ohatu pwilikine kuo, omalondwelo aa otae ke tu kwafela tu djale “omunhu mupe a shitwa a [fa] Kalunga omouyuki nomouyapuki woshili.” (Ovaefeso 4:20-24) Omalondwelo aJehova nosho yo omhepo yaye iyapuki otai tu dulifa tu ulike ohole, ehafo, ombili, onheni, oukaume, ouwa, eitavelo, ounambili nelipangelo—omaukwatya oo inaa faafana nomaukwatya ounyuni oo u li mepangelo laSatana! (Ovagalati 5:22, 23, yelekanifa NW; 1 Johannes 5:19.) Onghee hano, ohatu dulu okukala nolupandu ngeenge hatu dimbulukifwa shi na ko nasha noiteelelwa yaJehova pefimbo lekonakonombibeli lopaumwene, okudja komukulunhuongalo a nangekwa po, pokwoongala, poyoongalele yoikandjo nosho yo yoitukulwa.

²¹ Ngeenge otwa diinina omalondwelo aJehova, ohatu dulu okuhafa, kutya nee ohatu hepekwa omolwouyuki. (Lukas 6:22, 23) Ohatu tale kuKalunga e tu amene keenghalo domatilifo. Eshi osha fimana unene paife eshi oiwana aishe tai ongelwa ‘omolwoita mefiku linene laKalunga Omunamapangelo aeshe’ puHarmagedon.—Ehololo 16:14-16.

22. Etokolotoko letu olashike li na sha nomalondwelo aJehova?

²² Ngeenge otwa hala okumona oshalinghenda inai longelwa yomwenyo waalushe, otu na okukala tu hole omalondwelo aJehova neenghono adishe noku a diinina nomutima aushe. Onghee hano natu kale tu na omhepo ya fa yomupsalme ou a imba ta ti: “[Omalondwelo, NW] oye oo ouyuki fiyo alushe. Pe nge omayele, opo ndi kale nomwenyo.” (Epsalme 119:144) Natu ulike etokolotoko la fa olo li wetike meendjovo domupsalme tadi ti: “Ohandi ingida kuove [Jehova]: Xupife nge, opo ame ndi diinine [omalondwelo, NW] oye.” (Epsalme 119:146) Heeno, meendjovo nomoilonga, natu ulike kutya otu hole omalondwelo aJehova neenghono adishe.

[Efano pepandja 25]

Omupsalme okwa kala e hole omalondwelo aJehova neenghono adishe

[Efano pepandja 27]

Mokushikula oshihopaenenwa shaHanna, mbela owa tokola toko u ha faule okwoongala?

[Efano pepandja 28]

Okupwilikina komalondwelo aJehova otaku tu yoolola ko tu li twa koshoka notwa hokiwa omolwoilonga yaye

[Efano pepandja 29]

Oto nyamukula ngahelipi?

• Omupsalme okwa li a tala ko ngahelipi omalondwelo aJehova?

• Omolwashike twa pumbwa omalondwelo aKalunga?

• Okwoongala kwetu otaku dana onghandangala yashike i na sha nomalondwelo opakalunga?

• Ongahelipi omalondwelo aJehova tae tu yoolola ko kounyuni ou?