⁵ Omuyapostoli Paulus okwa tumbula oiteelelwa yopamishangwa ya fimana oyo i na okuwanifwa po kovapashukili monhumwafo yaye yotete oyo a li a shangela Timoteus nosho yo oyo a li a shangela Titus. Okwa popya mu 1 Timoteus 3:1-7 a ti: “Umwe ngeenge a hala oshilonga shoufitaongalo, oye okwe lihalela oshilonga shiwa. Hano, omufitaongalo e nokukala omuhenashipo, omulumenhu womukainhu umwe aeke, omulidiliki, omunaendunge, omunaenghedi, e shii kuyakula ovaenda, e shii kulonga. Hangholwe, hamunamhata, hamuluva, ndelenee omunambili, omunanheni, hamunalwisho woimaliwa, ou e shii okupangela nawa eumbo laye mwene, ndele ta tekula nawa ounona vaye neenghedi da fimana meduliko. Ndelenee ou ita dulu okutekula eumbo laye mwene, ota dulu ngahelipi okufila eongalo laKalunga oshisho? Hapo e lidilulula, opo ehe linenepeke ndele ta wile metokolo laSatana. Ndelenee e nokumona epopilo liwa kwaavo [ve] li pondje, opo aha hangike komasheko nokomwiyo waSatana.”

⁸ Ovapashukili kave na okukala ovalumenhu ovanyasha ile ovo opo ve lidilulula. Ponhele yaasho, ove na okukala ovalumenhu ve na owino monghalamwenyo yopaKriste, ve na eshiivo lihapu lOmbiibeli, eudeko lOmishangwa nosho yo ohole yashili yokuhola eongalo. Ova pumbwa okukala hava katuka eenghatu nopehe na oumbada nokupukulula ovanyoni, nokungaho otava amene eedi kwaavo va hala oku di etela owii. (Jes. 32:2) Ovapashukili ohava kala ve liwetikile mo kwaaveshe meongalo kutya ova pyokoka pamhepo nove na ko nasha shili noufita waKalunga.