Exunganeko 4. Ovanhu kave na ohole yopaushitwe

“Ovanhu otava ka kala . . . vehe na ohole yopaushitwe momaukwaneumbo avo.” — 2 TIMOTEUS 3:1-3, patoloko lOmbibeli yo-God’s Word.

● Omulumenhu umwe wedina Chris oo ha longele ehangano lokukwafela ovo va ninga oihakanwa yelongifo leenghono momaukwaneumbo kOlundume laWales, okwa ti: “Ohandi dimbuluka omukainhu umwe a li e uya mombelewa yetu a dengwa neenghono nokanda li nokuli nda dula okudimbulukwa kutya oye ngoo nda monene oshikando shimwe. Ovakainhu vamwe ohava kala va yahamekwa nai pamaliudo noihava dulu nokuli okutala ovanhu koipala.”

OMAUMBANGI OTAA ULIKE SHIKE? Moshilongo shimwe shomuAfrika, omukainhu umwe lwaapo womovakainhu vatatu otashi dulika a hepekwa pamilele eshi a li okaana. Omakonakono vali amwe a ningilwe moshilongo osho tuu osho otaa ulike kutya ovalumenhu ve dulife poshititatu shimwe ove wete shi li nawa okudenga ovakulukadi vavo. Ndele nande ongaho, ovakainhu havo aveke hava ningi oihakanwa yelongifo leenghono momaukwaneumbo. Pashihopaenenwa, ovalumenhu vatatu lwaapo movalumenhu omulongo muKanada ohava dengwa kovakulukadi vavo ile hava hepekwa momikalo dimwe vali.

OSHO OVANHU VAHAPU HAVA TI: Elongifo leenghono momaukwaneumbo ola kala ko okudja nale. Ovanhu ohava yandje ashike elitulemo lihapu kulo kunena shi dulife nale.

EPOPYO OLO OLOSHILI NGOO? Ovanhu ova didilika kutya ope na elongifo leenghono momaukwaneumbo unene tuu momido omilongo opo da piti. Ndele nonande vahapu ova didilika kutya ope na elongifo leenghono momaukwaneumbo, mbela osho osha ningifa oikoya ya tya ngaho i ninipale? Hasho nandenande! Ovanhu vahapu kunena kave na vali ohole yopaushitwe.

OVE OTO TI NGAHELIPI? Mbela osho kashi li ewanifo la 2 Timoteus 3:1-3? Mbela ovanhu vahapu kunena ohava ulikilafana ngoo ohole yopaushitwe momaukwaneumbo avo nonande osho osho ngeno ve na okuninga?

[Eendjovo dididilikwedi pepandja 7]

“Ovanhu ova dimina kutya elongifo leenghono olo limwe lomoikoya ihapu hai longwa momaukwaneumbo oyo ihai lopotwa. Omukainhu oha ka lopota ashike kopolifi omahepeko ile omaponokelo oo a ningilwa komushamane waye ngeenge okwa fiki lwopo 35.” — A SPOKESWOMAN FOR WALES DOMESTIC ABUSE HELPLINE.