Kala u na omutima wa hokiwa kuJehova

OKWA li mule momufika noku na ondjelo iwa. Moku mu mona, omuprofeti Samuel okwa li a kumwa nokwa fika pexulifodiladilo kutya omonamati waIsai ou womukulunhu okwa li oo a hoololwa kuKalunga okuninga ohamba konima yaSaul. Ndelenee Jehova okwa ti: “Ino tala olupe [lomona ou] nomufika waye, osheshi Ame inandi mu hokwa po. . . . Osheshi omunhu ta tale osho shokombada, ndelenee Omwene ta tale omutima.” Ehoololo laJehova ola li omonamati omunyasha waIsai, David—‘omulumenhu a hokiwa komutima waye.’—1 Samuel 13:14; 16:7.

1, 2. Omolwashike tu na okukala tu na ko nasha nomitima detu?

² Kalunga ota dulu okulesha omutima womunhu, ngaashi konima e shi yelifa nawa ta ti: “Aame Omwene, Ame handi konakona omutima nokuyeleka eefiyo, opo ndi va pe keshe umwe shi fike pokweenda kwaye noshi fike poiimati yoilonga yaye.” (Jeremia 17:10) Heeno, “Omwene ta yeleke omitima.” (Omayeletumbulo 17:3) Nande ongaho, omutima oshike oo u li momunhu oo Jehova ta konakona? Noshike tu na okuninga tu mone omutima wa hokiwa kuye?

“Omunhu womeni womomutima”

3, 4. Oshitya “omutima” osha longifwa unene tuu mondunge ilipi mOmbibeli? Yandja oihopaenenwa.

³ Oshitya “omutima” otashi holoka hanga oikando eyovi mOmishangwa Diyapuki. Moinima ihapu osha longifwa monghedi yopafaneko. Pashihopaenenwa, Jehova okwa lombwela omuprofeti Moses ta ti: “Lombwela Ovaisrael va etele nge eeshaliyambo, keshe umwe ngaashi omwenyo tau mu lombwele mu nokweetela nge eeshaliyambo.” Naavo tava ningi omayambidido, “keshe umwe e nomutima wa penduka . . . , e uya.” (Exodus 25:2; 35:21) Osha yela kutya oshinima shimwe shomutima wopafaneko elinyengotomheno—eenghono domeni odo tadi tu ladipike tu longe sha. Omutima wetu wopafaneko otau ulike yo omaliudo etu, omahalo etu nosho yo ohole yetu. Omutima otau dulu okuhanduka ile u kale wa tila, wa djuupalelwa koluhodi ile wa hafa. (Epsalme 27:3; 39:4; Johannes 16:22; Ovaroma 9:2) Otau dulu okukala nounhwa ile we lininipika, u na ohole ile u na outondwe.—Omayeletumbulo 16:5; Mateus 11:29; 1 Petrus 1:22.

⁴ Onghee hano, “omutima” luhapu ou na ekwatafano nelinyengo nosho yo nomaliudo, fimbo “omadiladilo” e na sha unene tuu neendunge. Eshi osho nghee omautumbulilo oo e na okukala e uditiwe ko ngeenge taa holoka moshitukulwa shimwe mOmishangwa. (Mateus 22:37, OB-1954; Ovafilippi 4:7) Ndelenee omutima nomadiladilo ohai longele kumwe. Pashihopaenenwa, Moses okwa ladipika Ovaisrael ta ti: “Ou na oku shi dimbuluka momutima woye [ile, “u shi dimbuluke momadiladilo oye,” eshangelo lopedu] nokutya, Jehova oye Kalunga kashili.” (Deuteronomion 4:39, NW) Jesus okwa lombwela ovanongo vomishangwa vamwe ta ti: “Otamu diladilile shike owii momitima deni?” (Mateus 9:4) ‘Eendunge,’ “eshiivo,” nosho yo ‘okudiladila’ otai dulu yo okukwatafana nomutima. (1 Eehamba 3:12; Omayeletumbulo 15:14; Markus 2:6) Onghee hano, omutima wopafaneko otau dulu yo okukwatela mo eendunge detu—omadiladilo etu ile eudeko letu.

5. Omutima wopafaneko ou lile po shike?

⁵ She likolelela kembo limwe lomauyelele, omutima wopafaneko ou lile po “oshitukulwa shopokati lelalela, meni, nokungaha komunhu womeni oo te liulike ye mwene moilonga yaye i lili nai lili, momahalo aye, ohole yaye, omaliudo aye, ehandu laye, omalalakano aye, omadiladilo aye, omafekelo aye, ounongo waye, eshiivo laye, ounghulungu waye, omaitavelo nomatomhafano aye nomadimbuluko.” Ou lile po osho tu li shili meni, “omunhu womeni womomutima.” (1 Petrus 3:4) Eshi osho Jehova ha tale nokukonakona. Onghee hano, David okwa dula okwiilikana ta ti: “Kalunga, shitile nge omutima wa yela nomeni lange tula mo omhepo ipe i neenghono.” (Epsalme 51:12) Ongahelipi hatu dulu okumona omutima wa yela?

“Tambuleni” Eendjovo daKalunga “momitima deni”

6. Moses okwa yandja ekumaido lilipi kOvaisrael eshi va li va onga onhanda mOmalufilu aMoab?

⁶ Eshi a kumaida ovana vaIsrael va li va ongala mOmalufilu aMoab pokuya mEdu lEudaneko, Moses okwa ti: “[Tambuleni] eendjovo adishe edi nde mu londwela nado nena eli [momitima deni], mu di lombwele ovana veni, va diinine shili eendjovo adishe domhango ei.” (Deuteronomion 32:46, yelekanifa NW.) Ovaisrael ova li ve na “okupwilikina nawa.” (Knox) Omokukala ashike va shiiva nawa oipango yaKalunga kwa li tava dulu oku i findila moludalo lavo.—Deuteronomion 6:6-8.

7. Oshike sha kwatelwa ‘mokutambula’ Eendjovo daKalunga ‘momitima detu’?

⁷ Oshiteelelwa sha fimana omolwokumona omutima wa koshoka osho okumona eshiivo lashili lehalo nolomalalakano aKalunga. Ope na ashike odjo imwe yeshiivo eli, Eendjovo daKalunga da nwefwa mo. (2 Timoteus 3:16, 17) Ndelenee eshiivo lomomutwe olo alike itali tu kwafele tu kale nomutima oo tau hafifa Jehova. Opo eshiivo li nwefe mo osho tu li shili meni, otu na ‘okutambula momitima detu’ osho hatu lihongo. Eshi otashi ningwa ngahelipi? Omupsalme David okwa ti: “Ohandi dimbulukwa omafimbo onalenale, oilonga yoye aishe ohandi i shipulula, ame ndi shipaashipe okulonga kwoye akushe.”—Epsalme 143:5.

8. Omapulo elipi hatu dulu okulipula ngeenge hatu konakona?

⁸ Nafye ohatu dulu okudilonga nokupandula oilonga yaJehova. Ngeenge hatu lesha Ombibeli ile oileshomwa ye likolelela paMbibeli, otu na okulipula omapulo ngaashi: ‘Mbela eshi otashi hongo nge shike kombinga yaJehova? Omaukwatya elipi aJehova ndi wete taa ulikwa apa? Ehokololo eli otali hongo nge shike kombinga yaasho Jehova e hole naasho e he hole? Oilanduliko ilipi yokulandula ondjila oyo Jehova e hole mekondjifafano nokulandula oyo e yele? Ouyelele ou otau tu kumwe ngahelipi naasho ndi shii nale?’

9. Ekonakono lopaumwene nokudilonga okwa fimana shi fike peni?

⁹ Lisa weedula 32a okwa hokolola nghee a tameka okukala e hole efimano lekonakono nokudilonga taku ti sha: “Konima yeninginifo lange mo 1994, onda li nawa moshili oule weedula mbali lwaapo. Onda kala pokwoongala keshe kwopaKriste, onda longa eevili okudja po 30 fiyo 40 omwedi keshe moukalele womomapya nokweendafana nOvakriste vakwetu. Opo nee onda tameka okutwalwaatwalwa. Onda shuna unene monima nonda li nokuli nda nyona omhango yaKalunga. Ndele onde lialuluka nonda tokola ndi yelife onghalamwenyo yange. Kanda li tuu nda hafa eshi Jehova a didilika elivelombedi lange nokwa tambula nge ko vali! Luhapu onde lipula: ‘Omolwashike nda li nda shuna monima?’ Enyamukulo olo la kala tali uya momadiladilo ange olo kutya onda efa po ekonakono nokudilonga taku ti sha. Oshili yOmbibeli kaya li ya hanga nande omutima wange. Okudja paife nokuuka komesho, ekonakono lopaumwene nokudilonga otaku ka kala oshitukulwa sha fimana shonghalamwenyo yange.” Eshi hatu kulu meshiivo letu lokushiiva Jehova, Omona waye nosho yo Eendjovo daye, inashi fimana tuu opo tu tule po efimbo omolwedilongo tali ti sha!

10. Omolwashike sha endelela tu tule po efimbo lekonakono lopaumwene nokudilonga?

¹⁰ Mounyuni ou we lipyakidila, okumona efimbo lokukonakona nokudilonga oshi li eshongo shili. Ndelenee, Ovakriste kunena ove li komungenge wEdu lEudaneko likumwifa—ounyuni mupe wouyuki waKalunga. (2 Petrus 3:13) Oiningwanima tai halula, ngaashi ehanauno ‘laBabilon Shinene’ nosho yo eponokelo ‘laGog, medu laMagog’ koshiwana shaJehova, oi li pokuuya. (Ehololo 17:1, 2, 5, 15-17; Hesekiel 38:1-4, 14-16; 39:2) Osho shi li komesho otashi dulu okuyeleka ohole yetu yokuhola Jehova. Osha endelela opo tu longife nawa efimbo nokutambula Eendjovo daKalunga momitima detu!—Ovaefeso 5:15, 16.

‘Longekida omutima woye u konakone Eendjovo daKalunga’

11. Ongahelipi omitima detu tadi dulu okufaafanifwa nedu?

¹¹ Omutima wopafaneko otau dulu okufaafanifwa nedu omo eembuto doshili tadi dulu okukunwa. (Mateus 13:18-23) Edu lolelalela ohali limwa opo oimeno i kule nawa. Sha faafana, omutima ou na okulongekidwa, opo u kale nehalo lokutambula Eendjovo daKalunga. Omupristeri Esra okwa “[longekida, NW] omutima waye mokukonakona omhango yOmwene noku i [shikula].” (Esra 7:10) Ongahelipi hatu dulu okulongekida omitima detu?

12. Oshike tashi tu kwafele okulongekida omitima detu omolwekonakono?

¹² Elongekido lomutima la denga mbada ngeenge hatu konakona Eendjovo daKalunga olo eilikano tali di komutima. Okwoongala kwopaKriste kwovailikani vashili ohaku hovelwa nohaku xulifwa neilikano. Inashi wapala tuu okutameka neilikano la yuka pefimbo keshe lekonakonombibeli lopaumwene nopo nee okukala hatu kaleke po oikala yeilikano pefimbo lekonakono letu!

13. Okumona omutima wa hokiwa kuJehova, otu na okuninga shike?

¹³ Omutima wopafaneko ou na okulongekidwa u ekeleshi omadiladilo onale oku he na eshiivo. Ovawiliki vomalongelokalunga vopefimbo laJesus ova li inava hala oku shi ninga. (Mateus 13:15) Mepingafano naasho, Maria ina yaJesus, okwa fika pexulifodiladilo “momutima waye” she likolelela komaushili oo a uda. (Lukas 2:19, 51) Okwa ninga omuhongwa waJesus omudiinini. Lidia wokuTiatira okwa pwilikina kuPaulus, ‘nOmwene okwa yeulula omutima waye.’ Naye okwa ninga omwiitaveli. (Oilonga 16:14, 15) Inatu kala nande twe likukutika mokudiinina omadiladilo etu opaumwene ile omataleko e holike shi na sha nomahongo. Ponhele yaasho, natu kale nehalo opo ‘Kalunga a kale omunashili, ndele keshe omunhu omunaipupulu.’—Ovaroma 3:4.

14. Ongahelipi hatu dulu okulongekida omitima detu tu pwilikine pokwoongala kwopaKriste?

¹⁴ Okulongekida omutima u pwilikine pokwoongala kwopaKriste osha fimana unene. Omapiyaaneko otaa dulu okukufa po elitulemo letu kwaasho tashi tongwa. Eendjovo da popiwa itadi dulu oku tu nwefa mo naanaa ngeenge ohatu diladila oinima oyo ya ningwa momukokomoko wefiku ile hatu lipula naasho hatu ka ninga mongula. Otwa pumbwa okukala twa tokolatoko okupwilikina nokulihonga ngeenge otwa hala okumona ouwa mwaasho tashi popiwa. Itatu ka mona tuu omauwa ngeenge otwa tokola toko okuuda ko omishangwa tadi fatululwa!—Nehemia 8:5-8, 12.

15. Ongahelipi elininipiko tali tu kwafele tu kale ovanhu ve shii kuhongwa?

¹⁵ Ngaashi ashike okuweda medu oiwedwamo ya yuka tai dulu okuhapupalifa omutungilo walo, onghee hano okukulika elininipiko kwetu, ondjala yoinima yopamhepo, elineekelo, etilokalunga nosho yo ohole yokuhola Kalunga otai dulu okuyambapaleka omitima detu dopafaneko. Elininipiko otali pupaleke omutima notali tu kwafele tu kale ovanhu ve shii kuhongwa. Jehova okwa ti kohamba yaJuda, Josia: “Omutima woye shaashi wa pupalekwa keendjovo we di uda, ndele we lininipika koshipala shOmwene, eshi wa uda osho nde shi popya . . . ndele wa lila koshipala shange, onghee hano nde ku uda.” (2 Eehamba 22:19) Omutima waJosia owa li we lininipika nowa li u na ehalo okutambula epukululo. Elininipiko ola kwafela ovahongwa vaJesus “vongaho, inava longwa” va ude ko nokulongifa omaushili opamhepo oo a nyenga ovalumenhu “ovanaendunge novanongo.” (Oilonga 4:13; Lukas 10:21) Natu “lininipike koshipala shaKalunga ketu” eshi hatu kendabala okumona omutima wa hokiwa kuJehova.—Esra 8:21.

16. Omolwashike eenghendabala da pumbiwa tu kulike ondjala yoikulya yopamhepo?

¹⁶ Jesus okwa ti: “Ovanelao ovovo va shiiva omhumbwe yavo yopamhepo.” (Mateus 5:3, NW) Nonande otwa pewa ehalo loinima yopamhepo, omafininiko okudja mounyuni ou wa nyonauka ile oikala ngaashi onyalo otai dulu i fimike eliudo letu kutya otu na omhumbwe. (Mateus 4:4) Otu na okukulika ehalo liwa lokuhala oikulya yopamhepo. Nokuli nongeenge petameko ihatu shi hafele okulesha Ombibeli nokukonakona paumwene, ngeenge ohatu twikile ohatu ka mona kutya eshiivo otali ka ‘kala ounyenye komwenyo wetu,’ opo nee ohatu ka teelela nehalo linene omafimbo ekonakono.—Omayeletumbulo 2:10, 11.

17. (a) Omolwashike Jehova a wana okulineekelwa filufilu kufye? (b) Ongahelipi hatu dulu okukulika elineekelo muKalunga?

¹⁷ “Nomutima woye aushe lineekela Omwene, ino liameka keendunge doye mwene,” ohamba Salomo osho ya kumaida. (Omayeletumbulo 3:5) Omutima oo we lineekela muJehova ou shii kutya keshe osho ta pula ile ta popi okupitila mEendjovo daye alushe osha yuka. (Jesaja 48:17) Jehova okwa wana shili okulineekelwa filufilu kufye. Ota dulu okuwanifa aishe oyo a tokola. (Jesaja 40:26, 29) Doshili, edina laye olo tali ti lelalela “Oha ningifa,” sha hala okutya eityo eli otali tungu elineekelo mokudula kwaye okuwanifa osho a udaneka. Oku li “omuyuki meendjila daye adishe, nomunanghenda mokulonga kwaye akushe.” (Epsalme 145:17) Doshili, okukulika elineekelo muye, otwa pumbwa ‘okumakela nokutala ouwa wOmwene’ mokulongifa osho twe lihonga okudja mOmbibeli monghalamwenyo yetu yopaumwene nokuulika ouwa oo tashi eta.—Epsalme 34:9.

18. Ongahelipi etilokalunga tali tu kwafele tu kale nehalo okutambula ko ewiliko laKalunga?

¹⁸ Okuulika natango koukwatya umwe oo tau ningi omitima detu di kale da hala okutambula ko ewiliko laKalunga, Salomo okwa ti: “Tila Omwene, ndee kanduka mo mowii.” (Omayeletumbulo 3:7) Jehova okwa ti shi na sha nOvaisrael vonale: “Akutu, [ngeno, NW] va kale ve nomutima wa tya ngaha va kale nokutila nge nokudiinina alushe oipango yange aishe, opo vo vene novana vavo va mone elao fiyo alushe.” (Deuteronomion 5:29) Heeno, ovo hava tila Kalunga ohava dulika kuye. Jehova oku na ounghulungu “opo a kwafe neenghono ovo have liameke kuye nomutima aushe” nokuhandukila ovo inave mu fimaneka. (2 Omafimbo 16:9) Etilo lefimaneko tu ha nyematife Kalunga nali pangele oilonga yetu aishe, omadiladilo etu aeshe nosho yo omaliudo etu aeshe.

‘Hola Jehova nomutima woye aushe’

19. Ohole otai dana onghandangala yashike mokuninga omitima detu di linyenge kewiliko laJehova?

¹⁹ Komesho yomaukwatya aeshe, ohole ohai ningi shili omitima detu di linyenge kewiliko laJehova. Omutima wa yadifwa nohole yokuhola Kalunga otau ningi omunhu a kale a hala okulihonga osho tashi hafifa Kalunga nosho yo osho tashi mu nyematifa. (1 Johannes 5:3) Jesus okwa ti: “Hola [Jehova, NW] Kalunga koye nomutima woye aushe nomwenyo woye aushe neendunge doye adishe.” (Mateus 22:37) Natu pameke ohole yetu yokuhola Kalunga moku i ninga onghedindjikilile okuulika ouwa waye, mokupopya naye keshe efiku ngaashi kaume kopofingo nosho yo oku mu lombwela vamwe nouladi.

20. Ongahelipi hatu dulu okumona omutima wa hokiwa kuJehova?

²⁰ Mokweendulula: Okumona omutima wa hokiwa kuJehova osha kwatela mo okweefa Eendjovo daKalunga di nwefe mo osho tu li meni, omunhu womeni womomutima. Ekonakono lopaumwene lOmishangwa tali ti sha nosho yo okudilonga nolupandu okwa pumbiwa. Onghedi iwa oku shi hanga oyo okukala nomutima wa longekidwa—omutima wa manguluka komadiladilo onale oku he na eshiivo, wa yadifwa nomaukwatya oo tae tu ningi ovanhu ve shii kuhongwa! Heeno, nekwafo laJehova, omutima muwa otau dulu okumonika. Ndelenee, eenghatu dilipi hatu dulu okukatuka tu amene omitima detu?

[Omashangelo opedu]

[Efano pepandja 12]

David okwa dilonga nolupandu oinima yopamhepo. Mbela naave osho ho ningi?

[Efano pepandja 16]

Longekida omutima woye fimbo ino konakona Eendjovo daKalunga

[Efano pepandja 16]

Oto nyamukula ngahelipi?

• Omutima wopafaneko ulipi oo Jehova ta konakona?

• Ongahelipi hatu dulu ‘okutambula’ Eendjovo daKalunga ‘momitima detu’?

• Ongahelipi tu na okulongekida omitima detu tu konakone Eendjovo daKalunga?

• Eshi wa konakona oshitukulwa eshi, ou udite we linyengifwa u ninge shike?