Osha hala okutya shike okukala uhe na ombinga moinima younyuni

Jesus okwa honga ovashikuli vaye kutya kave na okukala ‘oshitukulwa shounyuni ou.’ (Johannes 15:19) Osho osha kwatela mo okuhakufa ombinga moinima yopapolotika yomounyuni ou nosho yo moita. Ashike ihashi kala alushe shipu okukala tuhe na ombinga moinima oyo. Otashi dulika tu shekwe kovanhu omolwomufika wetu. Ongahelipi hatu dulu okukala tuhe na ombinga moinima younyuni nokukala ovadiinini kuJehova Kalunga?

1. Ovakriste vashili ova tala ko ngahelipi omapangelo opanhu?

Ovakriste ova fimaneka omapangelo. Ohatu ningi ngaashi Jesus e tu lombwela, eshi a ti: “Eshi shOmukesari shi peni Omukesari,” sha hala okutya ohatu dulika keemhango domoilongo omo tu li, ngaashi okufuta oifendela. (Markus 12:17) Ombiibeli otai hongo kutya omapangelo opanhu otaa pangele ashike, molwaashi Jehova a efa a pangele. (Ovaroma 13:1) Onghee hano, otu shii kutya ovapangeli vopanhu ove na eenghonopangelo da ngabekwa. Otwa teelela Kalunga nosho yo Ouhamba waye womeulu u uye u xulife po omaupyakadi ovanhu.

2. Ongahelipi hatu dulu okuulika kutya ihatu kufa ombinga moinima yomounyuni ou?

Ngaashi Jesus, ihatu kufa ombinga moinima yopapolotika. Eshi ovanhu va li va mona Jesus a longa oshikumwifilonga shonhumba, ova li va kendabala oku mu ninga ohamba, ashike okwa li e shi anya. (Johannes 6:15) Omolwashike mbela? Omolwaashi ‘Ouhamba waye kau fi oshitukulwa shounyuni ou.’ (Johannes 18:36) Tu li ovashikuli vaJesus, ohatu ulike meenghedi dihapu kutya ihatu kufa ombinga moinima yomounyuni ou. Pashihopaenenwa, ihatu kufa ombinga moita. (Lesha Mika 4:3.) Otwa fimaneka omadidiliko opashiwana, ngaashi omapandela, ashike ihatu e linyongamene. (1 Johannes 5:21) Ihatu kufa yo ombinga moinima yopapolotika, ngaashi okuhoolola. Kungaho, ohatu ulike filufilu kutya otu li ovadiinini kOuhamba waKalunga.

KONAKONA MOULE

3. Ovakriste vashili ihava kufa ombinga moinima yomounyuni ou

Jesus novashikuli vaye ove tu tulila po oshihopaenenwa. Lesha Ovaroma 13:1, 5-7 nosho yo 1 Petrus 2:13, 14. Opo nee, dana OKAVIDIO, ndele tamu kundafana omapulo taa shikula.

OKAVIDIO: Ovakriste vashili ihava kufa ombinga moinima yomounyuni ou— Oshitukulwa 1 (4:28)

• Omolwashike tu na okukala twa fimaneka ovapangeli?

• Omeenghedi dimwe dilipi hatu dulu okuulika kutya otwe va fimaneka?

Oiwana imwe ohai ti kutya kai na ombinga moinima younyuni ou, ndele pefimbo loita, ohai yambidida ovo tava lwifafana. Mbela okuhakufa ombinga moinima younyuni osha hala lela okutya shike? Lesha Johannes 17:16. Opo nee, dana OKAVIDIO, ndele tamu kundafana epulo tali shikula.

OKAVIDIO: Ovakriste vashili ihava kufa ombinga moinima yomounyuni ou— Oshitukulwa 2 (3:11)

• Osha hala okutya shike okuhakufa ombinga moinima yomounyuni ou?

Ongahelipi ngeenge epangelo ola hala u ninge oshinima osho shi li omhinge nomhango yaKalunga? Lesha Oilonga 5:28, 29. Opo nee, dana OKAVIDIO, ndele tamu kundafana omapulo taa shikula.

OKAVIDIO: Ovakriste vashili ihava kufa ombinga moinima yomounyuni ou— Oshitukulwa 3 (1:18)

• Ngeenge eemhango dopanhu otadi kondjifafana neemhango daKalunga, otu na okudulika keemhango dalyelye?

• Mbela omeenghalo dilipi Omukriste ina pumbwa okudulika keemhango domapangelo?

4. Ino kufa ombinga pamadiladilo nosho yo paenghatu

Lesha 1 Johannes 5:21. Opo nee, dana OKAVIDIO, ndele tamu kundafana omapulo taa shikula.

OKAVIDIO: Omolwashike Ovakriste vashili va pumbwa ouladi— Opo vaha kufe ombinga mopolotika? (2:49)

• Ngaashi sha ulikwa mokavidio, omolwashike Ayenge a tokola, opo aha waimine ongudu yonhumba yopapolotika, ile a kufe ombinga moinima ngaashi okusalutila epandela?

• Mbela oto diladila kutya etokolo laye oli li pandunge?

Omeenghalo vali dilipi tashi dulika tu yelekwe, molwaashi ihatu kufa ombinga moinima yomounyuni ou? Dana OKAVIDIO, ndele tamu kundafana omapulo taa shikula.

OKAVIDIO: Oilihongomwa ya dja mOshungonangelo— Okukala uhe na ombinga moinima younyuni ou wa tukauka (5:16)

• Ongahelipi hatu dulu okukala tuhe na ombinga moinima yomounyuni, ngeenge hatu tale omaudano opaiwana?

• Ongahelipi hatu dulu okukala tuhe na ombinga moinima yomounyuni, nokuli nongeenge omatokolo oo a ningwa kovanapolotika okwe tu kuma pauhandimwe?

• Ongahelipi oikundaneki, ile ovo hatu endafana navo tava dulu okukuma okuhenombinga kwetu moinima yomounyuni?

ENGONGO

Ovakriste ohava kendabala, opo vaha kufe ombinga nandenande moinima yopapolotika, kutya nee opamadiladilo, paendjovo, ile opaenghatu.

Eendululo

• Otu na oshikolo shilipi komapangelo opanhu?

• Omolwashike tu na okukala tuhe na ombinga moinima yopapolotika?

• Eenghalo dilipi tadi dulu okuyeleka okuhenombinga kwetu moinima yomounyuni ou?

TALA OUYELELE WA WEDWA PO

Omaliyambo elipi twa pumbwa okuninga, opo tuha kale tu na ombinga moinima yomounyuni?

Jehova ke na efiku e tu efe (3:14)

Oshike osho omaukwaneumbo taa dulu okuninga po, opo e lilongekidile komesho yefimbo omayeleko oo tashi dulika a ka holoke po omolwokuhenombinga kwao moinima yomounyuni?

Natu diinine omufika wokuhe na ombinga mopolotika poiningwanima yaaveshe (4:25)

Oufembanghenda munene u dule okulwila oshilongo sheni oulipi?

“Oinima aishe otai shiiva kekwafo laKalunga” (5:19)

Konakona nghee hatu dulu okukala tuhe fi oshitukulwa shounyuni, ngeenge hatu ningi omatokolo e na sha noilonga.

‘Keshe tuu oku na okuhumbata omutengi waye mwene’ (Oshungonangelo, 1 Aprili 2006)