MEhololo 20:11, 12, ohatu lesha mo eendjovo domuyapostoli Johannes di na sha nEfiku lEtokolo, tadi ti: “Onda mona olukalwapangelo linene litoka nomukalimutumba mulo, Oye ou edu neulu la ya onhapo oshipala shaye, ndele inaa monikila vali onhele. Ndele nda mona oonakufya, vanini novanene, ve li ofika moipafi yolukalwapangelo; nomambo a nyanunwa; nembo likwao la nyanunwa, olo lomwenyo. Noonakufya ova tokolelwa ei ya shangwa momambo pailonga yavo.” Omutokoli oo a hokololwa opo oye lyelye?

Pefimbo lomido odo eyovi, Jesus Kristus ota ka ‘tokola ovanamwenyo novafi.’ (2 Timoteus 4:1) “Ovanamwenyo” otava ka kala “ongudu inene” oyo tai ka xupa puHarmagedon. (Ehololo 7:9-17) Omuyapostoli Johannes okwa mona yo ‘oonakufya ve li ofika moipafi yolukalwapangelo’ letokolo. Ngaashi Jesus a udaneka, “ava va kala meembila otava udu ondaka yaye. Ndee tava holoka mo” okupitila menyumuko. (Johannes 5:28, 29; Oilonga 24:15) Ndele mbela ovanhu aveshe otava ka tokolwa she likolelela kushike?

Omuyapostoli Johannes okwa li a mona memoniko, ‘omambo a nyanunwa noonakufya ova tokolelwa ei ya shangwa momambo pailonga yavo.’ Mbela omambo oo okwa shangwa oilonga yovanhu yonale? Hasho, etokolo itali ka kala le likolelela kwaasho ovanhu va ningile fimbo inava fya. Otu shi shii ngahelipi? Ombibeli otai ti: “Ou a fya, oye okwa manguluka moulunde.” (Ovaroma 6:7) Onghee hano, ovo tava ka nyumunwa itava ka valulilwa omanyono avo onale. Hano omambo oo oku lile po oiteelelwa yaKalunga yokonahiya. Opo va kale nomwenyo fiyo alushe, ovaxupipo puHarmagedon novanyumunwa ove na okudulika koipango yaKalunga, mwa kwatelwa keshe oshiteelelwa shipe osho Kalunga ta ka yandja pefimbo lomido eyovi. Onghee hano, oohandimwe otava ka tokolwa she likolelela kwaasho tava ningi momukokomoko wEfiku lEtokolo.