Eshi wa konakona Ombiibeli nEendombwedi daJehova owa shiiva oshili. Nopehe na omalimbililo, osho we lihonga oshe ku kwafela u kale u na ekwatafano liwa naKalunga nou kale u na eteelelo loku ka mona omwenyo waalushe noku ka hafela omanangeko noupuna mEduparadisa koshi yOuhamba waKalunga. Paife ou na eitavelo la kola mEendjovo daKalunga noto hafele nale omanangeko noupuna mahapu eshi to endafana neongalo lopaKriste. Doshili, owa mona nhumbi Jehova ta ungaunga noshiwana shaye shokunena. — Sak. 8:23.

Eshi to lilongekidile oku ka ninginifwa, oto ka mona ouwa mokukundafana osho Ovakriste va itavela novakulunhuongalo ovo tave ke ku pula omapulo eninginifo. (Heb. 6:1-3) Jehova na twikile oku ku nangeka noupuna eshi to ningi eenghendabala doku mu shiiva notu na elineekelo kutya ote ke ku pa ondjabi yomwenyo waalushe oo a udaneka. — Joh. 17:3.

1. Omolwashike wa hala okuninginifwa?

2. Jehova oye lyelye?

• ‘Jehova oye Kalunga kombada meulu noposhi kombada yedu. Pe he na umwe.’ — Deut. 4:39.

• ‘Oove ou to ifanwa Jehova, Ove auke u li po Omukombadambada medu alishe.’ — Eps. 83:18.

3. Omolwashike sha fimana okulongifa edina laKalunga?

• “Hano, mu nokwiilikana ngaha: ‘Tate yetu ou u li meulu! Edina loye nali yapulwe.’” — Mat. 6:9.

• “Keshe tuu ou ta ifana edina [laJehova, NW] oye ota xupifwa.” — Rom. 10:13.

4. Ombiibeli oya longifa omautumbulilo amwe elipi oo tae tu kwafele tu shiive Jehova?

• “Omwene oye Kalunga kaalushe Omushiti wominghulo dedu? Ye iha loloka, ndele iha kenyanana, ounongo waye ohau nyenge okukonakonwa.” — Jes. 40:28.

• “Tate yetu ou u li meulu!” — Mat. 6:9.

• “Kalunga Oye ohole.” — 1 Joh. 4:8.

5. Oshike osho hatu dulu okuyandja kuJehova Kalunga?

• “Hola Omwene Kalunga koye nomutima woye aushe nomwenyo woye aushe neenghono doye adishe.” — Mark. 12:30.

• “Omwene Kalunga koye u noku mu twila eengolo noye aeke u noku mu kalela.” — Luk. 4:8.

6. Omolwashike wa hala okukala omudiinini kuJehova?

• “Kala u neendunge, omumwange, hafifa omutima wange, opo nee handi dulu okunyamukula ovalundili vange.” — Omayel. 27:11.

7. Oho ilikana kulyelye, nokupitila medina lalyelye?

• “Oshilishili ohandi mu lombwele: ngeenge tamu indile sha kuTate, Oye ote shi mu pe medina lange.” — Joh. 16:23.

8. Oinima imwe ilipi to dulu okwiilikana kombinga yayo?

• “Hano, mu nokwiilikana ngaha: ‘Tate yetu ou u li meulu! Edina loye nali yapulwe; Ouhamba woye nau uye; ehalo loye nali wanifwe kombada yedu ngaashi yo meulu; omungome wetu womafiku aeshe u tu pa yo nena; tu kufila po omatimba etu, ngaashi nafye yo hatu kufile po ovanamatimba nafye; ndele ino tu twala momayeleko, ndelenee tu xupifa mowii.’” — Mat. 6:9-13.

• “Elineekelo eli letu tu li na muye oleli: ngeenge hatu mu indile sha pahalo laye, ote tu udu.” — 1 Joh. 5:14.

9. Omolwashike tashi dulika Jehova aha pwilikine komailikano etu?

• “Otava ka kuwila Omwene, ndelenee Ye ite ke va nyamukula, . . . molwaashi vo ova ninga eshi inashi yuka.” — Mika 3:4.

• “Omesho Omwene ohaa pashukile ovayuki nomatwi aye ohaa endekele komailikano avo, ndelenee oshipala shOmwene sha twa ondubo naava hava longo owii.” — 1 Pet. 3:12.

10. Jesus Kristus oye lyelye?

• “Simon Petrus okwa nyamukula ndee ta ti: Oove Kristus, Omona waKalunga omunamwenyo.” — Mat. 16:16.

11. Omolwashike Jesus a li e uya kombada yedu?

• ‘Omona wOmunhu ine uya okuyakulwa, ndele okuyakula nokuyandja omwenyo waye u ninge oikulila yavahapu.’ — Mat. 20:28.

• “Ondi na okuudifila oilando imwe yo evaengeli louhamba waKalunga, osheshi olo tuu eli nde li tuminwa.” — Luk. 4:43.

12. Ongahelipi to dulu okuulika olupandu omolwekuliloyambo laJesus?

• “Oye okwa fya ponhele yaaveshe, opo ovo ve nomwenyo vehe likalele vali voovene, ndelenee Oye ou e va fila nokwe va nyumukila.” — 2 Kor. 5:15.

13. Jesus oku na eenghonopangelo di fike peni?

• “Ame onda pewa eenghono adishe meulu nokombada yedu.” — Mat. 28:18.

• “Kalunga okwe mu lenga, nokwe mu luka edina li li kombada yomadina aeshe.” — Fil. 2:9.

14. Mbela owa itavela kutya Olutuwiliki lEendombwedi daJehova olo “omupiya omudiinini nomunaendunge” oo a nangekwa po kuJesus?

• “Olyelye hano omupiya omudiinini nomunaendunge, omwene waye e mu tula kombada yovapiya vaye, e va pe oikulya pefimbo lavo?” — Mat. 24:45.

15. Mbela omhepo iyapuki omunhu?

• “Ndele omweengeli okwe mu nyamukula ta ti: ‘Omhepo Iyapuki otai ku dile kombada, neenghono daau wOkombadambada otadi ku tuvikile, onghee hano omudalwa ou omuyapuki ota ka lukwa Omona waKalunga.’” — Luk. 1:35.

• “Hano nye ava muvai, ngeenge omu shii okupa ovana veni oipewa iwa, unene tuu Xo yeni yomeulu ota yandje Omhepo Iyapuki kwaava tave mu indile.” — Luk. 11:13.

16. Kalunga okwa longifa ngahelipi omhepo iyapuki yaye?

• “Eulu ola shitifwa ondjovo yOmwene, neengudi dalo adishe okomhepo yokanya kaye.” — Eps. 33:6.

• ‘Otamu pewa eenghono, Omhepo Iyapuki ngeenge tai uya munye, ndele tamu ka ninga eendombwedi dange fiyo okominghulo dounyuni.’ — Oil. 1:8.

• “Kape na nande ouxunganeki womomishangwa u shii okufatululwa keendunge domunhu; osheshi inapa etwa nande ouxunganeki kehalo lomunhu, ndelenee ovanhu ovayapuki ova popya odo ve di pewa kuKalunga nokuwilikwa kOmhepo Iyapuki.” — 2 Pet. 1:20, 21.

17. Ouhamba waKalunga oshike?

• “Kalunga ou komeulu ota ka dika ouhamba itau ka teka po fiyo alushe, nepangelo lawo itali ka yandjwa koshiwana shimwe. Ndele owo otau ka nyanyaula notau ka teyaula omauhamba aeshe noku a xulifa po, ndelenee owo vene tau ka kala fiyo alushe.” — Dan. 2:44.

18. Omauwa elipi hatu ka mona mOuhamba waKalunga?

• “Ota feta po omahodi momesho avo, nefyo itali kala po vali ile oluhodi ile okulila ile ouyahame itau kala po vali, osheshi eshi shotete osha xula po.” — Eh. 21:4.

19. Otu shi shii ngahelipi kutya otu li poku ka mona omanangeko noupuna Ouhamba oo?

• “Ovalongwa vaye ove uya kuye, eshi ve li po aveshe, tava ti: ‘Tu lombwela: onaini hano eshi tashi ka ningwa, nedidiliko lokuuya kwoye nolexulilo lefimbo lounyuni olilipi?’ Ndele Jesus okwe va nyamukula ndele ta ti: ‘. . . Oiwana otai fikamene oiwana, noshilongo otashi fikamene oshilongo, otaku di omakakamo edu keembinga neembinga, ondjala tai uya nomapiyaano. Ndele evaengeli eli louhamba otali udifilwa ounyuni aushe li ningile oiwana aishe ondombwedi, opo nee taku uya exulilo.’” — Mat. 24:3, 4, 7, 14.

• “Momafiku axuuninwa otape ke uya omafimbo madjuu, osheshi ovanhu tava kala nokulihola voovene, ovanalwisho voimaliwa, ovalitangi, novalinenepeki novasheki, vehe neduliko kovakulunhu, vehe shii kupandula, vehe neitavelo, vehe nohole, vehe nombili, ovalundili, ovahenalidiliko, ovakwanyanya, ovatondi vouwa, ovakengeleledi, ovahayavala, ovafulalali, ohole yavo yokuhola ouhalu mwii i dule ei yokuhola Kalunga; ovo ve nemoniko longaho letilokalunga, ndelenee tava shilike eenghono dalo.” — 2 Tim. 3:1-5.

20. Ongahelipi to dulu okuulika kutya Ouhamba owa fimana kwoove?

• “Kongeni tete ouhamba waKalunga nouyuki waye.” — Mat. 6:33.

• “Jesus okwa lombwela ovalongwa vaye: ‘Ngeenge ku na ou a hala okushikula nge, oye ne lixupule ye mwene, ne litwike [omuti waye womahepeko, NW], ye na shikule nge.’” — Mat. 16:24.

21. Satana nosho yo eendemoni ovo olyelye?

• “Nye omu na xo yeni, Satana . . . Ye omudipai nghee a dja.” — Joh. 8:44.

• “Nongadu inene ya ekelwashi, eyoka likulu, la ifanwa ondiaboli naSatana, ou ta hongaula ounyuni aushe, okwa ekelwa pedu, novaengeli vaye ova ekelwashi yo pamwe naye.” — Eh. 12:9.

22. Satana okwa popya oipupulu ilipi kombinga yaJehova nosho yo ovo have mu longele?

• “Omwalikadi okwa nyamukula eyoka: ‘Ohatu li oiimati yomiti domoshikunino, ndelenee oiimati yomuti wopokati koshikunino Kalunga okwa ti: “Inamu i lya, nye inamu i kuma, muha fye.”’ Opo nee eyoka ola tya komwalikadi: ‘Nye itamu fi shili. Kalunga oku shi shii nokutya, ngeenge mwe i li, omesho eni otaa pashuka, ndele tamu shiiva ouwa nowii, ngaashi Kalunga.’” — Gen. 3:2-5.

• “Satana ta nyamukula Omwene ndele ta ti: ‘Oshipa omoshipa! Omunhu keshe osho e shi na, te shi yandjele omwenyo waye.’” — Job 2:4.

23. Ongahelipi to dulu okuulika kutya omalundilo aSatana oipupulu?

• “Longela [Kalunga] nomutima aushe.” — 1 Omaf. 28:9.

• “Fiyo handi ka fuda mo omufudo wange, itandi ekeleshi po ouyuki wange.” — Job 27:5.

24. Omolwashike ovanhu hava fi?

• “Oulunde wa etwa mounyuni komunhu umwe, nefyo okoulunde, osho nee efyo ole uya movanhu aveshe, shaashi aveshe va nyona.” — Rom. 5:12.

25. Oonakufya ove li monghalo ya fa peni?

• “Osheshi ovanamwenyo ove shi shii nokutya, ove nokufya.” — Omuud. 9:5.

26. Oonakufya ove na eteelelo lashike?

• “Otaku ka kala enyumuko lovayuki nolovalunde.” — Oil. 24:15.

27. Ovanhu vangapi tava i meulu va ka pangele pamwe naJesus?

• “Tala, Odjona ya kala ofika komhunda yaSion pamwe nomayovi efele nomayovi omilongo nhee naane ava va shangelwa edina layo nedina laXe moipala yavo.” — Eh. 14:1.

Eshi wa konakona Ombiibeli, owa shiiva kutya ehalo laJehova olilipi nonghee u na okukala metwokumwe nomifikamhango daye douyuki. Otashi dulika wa ninga omalunduluko mahapu monghalamwenyo yoye e na sha nelihumbato loye nowa lundulula etaleko loye li na sha nonghalamwenyo konima eshi we lihonga Ombiibeli. Molwaashi paife owa tokola toko okukala metwokumwe nomifikamhango daJehova douyuki, oto dulu okulongela Jehova oilonga iyapuki u li omuudifi wonghundana iwa.

Okweendulula omapulo taa shikula otashi ke ku kwafela u kaleke momadiladilo oiteelelwa yaJehova youyuki notashi ke ku dimbulukifa oinima imwe oyo u na okuninga opo u kale wa hokiwa kuYe. Ouyelele wa tya ngaho otau ke ku kwafela u mone kutya osha fimana okuninga oinima neliudo la yela nomonghedi oyo tai fimanekifa Jehova. — 2 Kor. 1:12; 1 Tim. 1:19; 1 Pet. 3:16, 21.

Ngeenge owa fiki poshitwa osho mekonakono loye, oto ka kala wa halelela okudulika koipango aishe yaJehova nokukala oshitukulwa shehangano laye. Omapulo nOmishangwa odo da etwa mo otadi ke ku kwafela u konakone eudeko loye li na sha nokudulika filufilu kelongekido laJehova, kutya nee omeongalo, moukwaneumbo ile omoinima yopapolotika monghalelo ei yoinima. Oto ka kala u na olupandu li na sha nelongekido laJehova lokuhonga nokupameka oshiwana shaye pamhepo. Osho osha kwatela mo okukala pokwoongala nokukufa ombinga muko ngeenge eenghalo otadi shi pitike.

Shikwao vali, oshitukulwa eshi otashi ka kundafana nghee sha fimana okukufa ombinga moilonga yokuudifa pandjikilile nokukwafela ovanhu va shiive Jehova nosho yo osho te va ningile. (Mat. 24:14; 28:19, 20) Otashi ke ku kwafela yo u mone nghee okuliyapulila kwoye Jehova nosho yo eninginifo ya kwata moiti. Oto dulu okukala noushili kutya Jehova okwa lenga eenghendabala doye eshi wa tambula ko efilonghenda laye olo e ku ulikila.

1. Ovakriste ohava tale ko ngahelipi ohombo? Etomheno limwe alike lopamishangwa lilipi tali ufa kutya omunhu ota dulu okuteya ohombo?

• “Inamu lesha hamba, Omushiti okwe va shita pehovelo omulumenhu nomukainhu, ndele ta ti: ‘Onghee hano omulumenhu e nokufiya po xe naina nokulimangeleka komukainhu waye, ndele ava vavali otava ningi omunhu umwe’? Osho hano kave fi vali vavali, ndelenee ombelela imwe. Hano osho Kalunga e shi tula kumwe, inashi kufwa kumwe komunhu . . . Ou ta henge po omukainhu waye omolwoshinima shimwe shihe fi oluhaelo, ndele ta hombola umwe, ye ta haele; naau ta hombola po omuhengwa, ye ota haele.” — Mat. 19:4-6, 9.

2. Omolwashike ovanhu ovo hava kala ashike pamwe inava hombola ve na okuhombola paveta? Ngeenge owa hombola ile wa hombolwa, ohombo yeni oi li ngoo paveta?

• “Va dimbulukifa, va dulike kovapangeli nokovakulunhu voshilongo noku va fimaneka.” — Tit. 3:1.

• “Ohombo nai fimanekwe kwaaveshe, nomutala wohombo nau kale uhe noshipo; osheshi ovaholi voipala novateihombo Kalunga te va tokola.” — Heb. 13:4.

3. Onghandangala ilipi to dana moukwaneumbo?

• “Omumwange, pwilikina outekuduliko waxo, ndele ino ekelashi elongo lanyoko.” — Omayel. 1:8.

• “Omulumenhu oye omutwe womukainhu, ngaashi Kristus yo Oye omutwe weongalo . . . Ovalumenhu, holeni ovakainhu veni ngaashi Kristus.” — Ef. 5:23, 25.

• “Ooxe, inamu shinda ovana veni noku va handukifa, va tekuleni meduliko nomekumaido lOmwene.” — Ef. 6:4.

• “Ounona nye, dulikeni kovakulunhu veni moinima aishe, Osheshi osho sha wapalela mOmwene.” — Kol. 3:20.

• “Ovakainhu, dulikeni kovalumenhu veni.” — 1 Pet. 3:1.

4. Omolwashike tu na okuulika kutya otwa fimaneka omwenyo?

• Kalunga “oye ha yandjele ovanhu aveshe omwenyo nomufudo noinima aishe . . . Muye tu li mo tu nomwenyo, ndele hatu linyenganyenga.” — Oil. 17:25, 28.

5. Omolwashike tuhe na okudipaa, mwa kwatelwa okulikufa edimo?

• ‘Novalumenhu ngeenge tava dengafana ndele tava ngwadjula omukainhu omufimba ndele ta mono oshiponga shefyo, hano omwenyo nau yandjelwe omwenyo omukwao.’ — Ex. 21:22, 23.

• “Omesho oye okwa li taa shipununa nge, fimbo nda li engwili inandi tongoka, nomembo loye omo omwa nyolelwa omafiku ange aeshe, aa nda sheyelwa, fimbo inapa holoka nande limwe lao.” — Eps. 139:16.

• ‘Omwene ta tondo omake taa tileshi ohonde ihe netimba.’ — Omayel. 6:16, 17.

6. Oshipango shaKalunga shi na sha nohonde oshilipi?

• ‘Lidilikeni ohonde nombelela ya fya oshuunguungu.’ — Oil. 15:29.

7. Omolwashike tu na okukala tu hole ovamwatate novamwameme?

• “Oshipango shipe handi shi mu pe: mu holafane ngaashi Ame nda kala ndi mu hole, osho nanye yo mu holafane. Opo tuu opo aveshe tave mu koneke kutya, nye ovalongwa vange, ngeenge mu holafane.” — Joh. 13:34, 35.

8. Ngeenge ou na oudu wolutapo ile omukifi oo tau dulu okutula eemwenyo davamwe moshiponga, (a) Omolwashike uhe na okupapatela ovanhu ile oku va xupita? (b) Omolwashike uhe na okuuda nai ngeenge vamwe inave ku shiva komaumbo avo? (c) Omolwashike omunhu oo a li monghalo omo tashi dulika a kwatelwa mo komikifi odo hadi tandavele okupitila momilele e na oku ke likonakonifa ofimbo ina hovela okweendelafana naumwe? (d) Ngeenge ou na oudu wolutapo, omolwashike u na okulombwela omuunganeki wolutu lovakulunhuongalo ofimbo ino ninginifwa?   

• “Inamu kala noshikolo nomunhu, ndele noshikolo shokuholafana . . . ‘Hola mukweni ngaashi ove u lihole mwene.’ Ohole itai ningile mukwao owii nande washa.” — Rom. 13:8-10.

• “Muha tale keshe tuu osho shaye ashike, ndelenee shomukwao yo.” — Fil. 2:4.

9. Omolwashike Jehova a teelela tu dimine po vamwe?

• “Lididimikilafaneni, diminafaneni po omanyono, ngeenge mwa ningafana nomukweni, ngaashi Kristus e mu dimina po, osho nanye yo mu ninge.” — Kol. 3:13.

10. Oshike u na okuninga po ngeenge omumwaxo okwe ku kengelela ile e ku lundila?

• “Omumwanyoko ngeenge ta nyono kwoove, inda u ke mu pukulule mu li po amuke vavali; ndele ngeenge te ku udu, opo nee ove wa likola omumwanyoko. Ndele ngeenge ita udu ko, ka ifane ko umwe ile vavali, eendjovo adishe opo di tokolwe komakanya [eendombwedi] mbali ile nhatu. Ndele ngeenge ite va udu, shi lombwela eongalo. Ndele ngeenge ita udu ko keongalo, opo nee u kale we mu tala ngaashi omupaani nongaashi omufutifi.” — Mat. 18:15-17.

11. Jehova okwa tala ko ngahelipi omanyono taa landula?

▪ Oluhaelo

▪ Okwiilikana oihongwafano

▪ Oushenge

▪ Okuvaka

▪ Okundobola

▪ Oukolwe

• “Inamu puka, ovahaeli novakaleli voikalunga, novanyoni vohombo nomashenge, novahaeli vomashenge, novalunga novanalwisho, neengholwe novasheki novanyeki ovo itava fyuulula ouhamba waKalunga.” — 1 Kor. 6:9, 10.

12. Shi na sha noluhaelo, mwa kwatelwa oinima i lili i na sha nomilele kondje yohombo, owa tokola okuninga po shike?

• “Kukumeni oluhaelo.” — 1 Kor. 6:18.

13. Omolwashike tu na okulidilika oingangamwifi aishe ile keshe tuu osho tashi dulu okukufa omadiladilo omunhu ponhele?

• “Yandjeni omalutu eni eyambo liyapuki li nomwenyo, la wapalela Kalunga; olo elongelokalunga leni lopandunge. Ndele nye inamu faafana nounyuni ou, ndelenee shitukeni vape momadiladilo eni, opo mu shiive okukonakona ehalo laKalunga olilipi, naashi shiwa, sha wapalela nosha wana.” — Rom. 12:1, 2.

14. Oinima i na sha neendemoni ilipi Kalunga a tokola?

• “Mokati keni muha kale nande umwe . . . ou ha diinine oundudu ile enyanekelo ile ta xunganeke omadidiliko ile ta pulike ile ta longifa oupule ile ta pula keemhepo dovafi ile komhepo yovashitukifi ile ta kongo omapukululo kovafi.” — Deut. 18:10, 11.

15. Ngeenge omunhu okwa nyona sha kwata moiti ndele okwa hala a kale a hokiwa vali kuJehova, mbela oku na okukatuka eenghatu dilipi nopehe na okwoongaonga?

• “Onde ku hepaululila omatimba ange, noulunde wange inandi u holeka, nda tya: Onda hala ndi hepaululile Omwene omanyono ange.” — Eps. 32:5.

• “Ope na tuu umwe mokati keni ta vele? Oye na ifane ovakulunhu veongalo, ndele vo nave mu ilikanene ndele nave mu vaeke omaadi medina lOmwene. Neilikano leitavelo otali xupifa omunaudu, Omwene note mu yambukifa po, ndele ngeenge okwa hangika a tula etimba, otae mu kufilwa po.” — Jak. 5:14, 15.

16. Oto ka ninga po shike ngeenge ou shii Omukriste mukweni oo a nyona enyono la kwata moiti?

• ‘Umwe ngeenge ta nyono ngaha, nokutya ye nande ta udu okwaana nokwa shiiva okuninga ondombwedi yoshinima e shi mona ile e shi shiivifilwa, ndele ite shi holola ye ota nyono.’ — Lev. 5:1.

17. Otu na okuungaunga naumwe ngahelipi ngeenge okwa ningwa eshiivifo kutya okwa kondwa?

• “Ngeenge pe na ou ha ifanwa omumwaxo, ye omuhaeli ile omunalwisho ile omukaleli woikalunga ile omusheki ile ongholwe ile omunyeki, muha endafane naye, nye muha lye nandenande naye.” — 1 Kor. 5:11.

• “Ngeenge ku na hano ou te uya kunye, ndele ite uya e nelongo eli, inamu mu tambula meumbo, nye inamu mu kunda.” — 2 Joh. 10.

18. Omolwashike ookaume koye kopofingo ve na okukala ve hole Jehova?

• “Kala nokweenda novanongo, opo nee naave yo u ninge omunongo. Ndelenee ou ha endafana novashima, ota ka laipala.” — Omayel. 13:20.

• “Inamu puka: ‘Ookaume vai otava nyono po eenghedi diwa.’” — 1 Kor. 15:33.

19. Omolwashike Eendombwedi daJehova dihe na okukufa ombinga moinima yopapolotika?

• “Vo kave fi vomounyuni, ngaashi Ame [Jesus] ndihe fi womounyuni.” — Joh. 17:16.

20. Omolwashike u na okudulika kepangelo?

• “Omunhu keshe na dulike kovapangeli ava have mu pangele. Osheshi kape na nande epangelo inali dja kuKalunga; ovapangeli ava ve li po, ova tulwa po kuKalunga.” — Rom. 13:1.

21. Oshike tu na okuninga po ngeenge omhango yepangelo oi li omhinge nomhango yaKalunga?

• “Okudulika kuKalunga ku dule okudulika kovanhu.” — Oil. 5:29.

22. Omishangwa dilipi tadi dulu oku ku kwafela u kale wa yooloka ko kounyuni ngeenge to hoolola oilonga?

• “Oshiwana itashi yelulile vali eongamukonda oshiwana shikwao, ndele itave ke lilonga vali oukwaita.” — Mika 4:3.

• “Djeni mo [muBabilon Shinene], nye ovanhu vange, mu ha kwatafane noulunde washo, mu ha hangike komahepeko asho.” — Eh. 18:4.

23. Omalihafifo oludi lilipi tu na okuhoolola, na elipi tu na okuhenuka?

• ‘Omwene oku tonde oo e hole owii.’ — Eps. 11:5.

• “Tileni owii, dameni ouwa.” — Rom. 12:9.

• “Oinima aishe oyo yoshili, oinima aishe oyo ya fimana, oinima aishe oyo ya yuka, oinima aishe oyo ya koshoka, oinima aishe oyo i holike, oinima aishe oyo hai popiwa nawa, ouwa keshe noshinima keshe osho shi shii okupandulwa, twikileni okudiladila oinima ei.” — Fil. 4:8.

24. Omolwashike Eendombwedi daJehova ihadi waimine omalongelokalunga makwao?

• “Itamu dulu okulya koshililo shOmwene nokoshililo sheendemoni.” — 1 Kor. 10:21.

• “Nye mu liyoolole mo muvo, Omwene osho ta ti, nye inamu kuma eshi sha nyata; opo Ame ohandi mu tambula.” — 2 Kor. 6:17.

25. Omafinamhango elipi taa dulu oku ku kwafela ngeenge to ningi etokolo li na sha nokuya koshivilo shonhumba?

• “Ova lumbakana mumwe novapaani, ndele tave liikifa eenghedi davo. Ndele tava longele oikalunga yavo; yo oye va pundukifa nokuli.” — Eps. 106:35, 36.

• “Ndelenee noonakufya inava shiiva nande osha.” — Omuud. 9:5.

• “Vo kave fi vomounyuni, ngaashi Ame ndihe fi womounyuni.” — Joh. 17:16.

• “Osha wana eshi mwa wanifa ehalo lovapaani mefimbo eli la pita, eshi mwa li mwa kala moluhaelo, momalwisho, moukolwe, moivilo youfiku, moufukenhu woikunwa nomoixuna yokulongela oikalunga.” — 1 Pet. 4:3

26. Oihopaenenwa yopaMbiibeli otai ku kwafele ngahelipi shi na sha nokudana omafiku omadalo?

• “Mefiku etitatu, efiku lokudimbulukwa okudalwa kwaFarao, ye okwa telekela ovapiya vaye oshitelekela nokwa yela mokati kovapiya vaye omukulunhu wovapindi nomukulunhu wovateleki vomingome. Okwa shunifa omukulunhu wovapindi moshilonga shaye shoupindi . . . Ndelenee omukulunhu wovateleki vomingome okwe mu endjelelifa momuti.” — Gen. 40:20-22.

• “Oshivilo shefiku lokudalwa kwaHerodes eshi sha dana, omona okakadona kaHerodias oka tutula oudano moipafi yavo, ndele oo owa hafifa Herodes; onghee okwe mu udanekela neano e mu pe keshe eshi a hala. Ndele ye okwa tya ngaashi a hekelwa kuina: ‘Pe nge omutwe waJohannes [Omuninginifi, NW] moshiyaxa eshi.’ Ndele oya tuma okutetifa ko omutwe waJohannes modolongo.” — Mat 14:6-8, 10

27. Omolwashike wa hala okushikula omayele ovakulunhuongalo?

• “Shikuleni ovakwatelikomesho veni, nye mu dulike kuvo, osheshi ovo hava pashukile eemwenyo deni ngaashi ovo tave ke di pulwa, opo ve shi ninge nehafo, hanokukema, osheshi osho itashi mu wapalele.” — Heb. 13:17.

28. Omolwashike sha fimana koukwaneumbo okukonga efimbo lokulesha nokukonakona Ombiibeli pamwe?

• “Ha hokwa omhango yOmwene noku i diladila omutenya noufiku. Ndele ye ota ka kala ngaashi omuti, ou wa twikwa pomatondokelo omeva ndele tau imifa oiimati yao pefimbo lao, nomafo ao ihaa lembe. Naashishe eshi ta ningi, osha fewa.” — Eps. 1:2, 3.

29. Omolwashike u hole okukala pokwoongala nokukufa ombinga muko?

• “Edina loye onda hala oku li shiivifila oovakwetu, nomokati keongalo ohandi ku hambelele.” — Eps. 22:22.

• “Ndele tu filafaneni oshisho fye tu twaafane omukumo mohole nomoilonga iwa. Tuha efe eongalo letu vene, ngaashi vamwe ve li po hava ningi, ndelenee tu kumaidafaneni, unene eshi tamu mono efiku olo tali ehene popepi.” — Heb. 10:24, 25.

30. Jesus okwe tu pa oilonga ilipi ya fimanenena?

• “Indeni hano ka ningeni ovanhu aveshe ovalongwa vange, noku va [ninginifa, NW] . . . , noku va longa okudiinina aishe ei nde i mu lombwela.” — Mat. 28:19, 20.

31. Oikala ilipi hai hafifa Jehova ngeenge hatu yandje omayambidido opashimaliwa opo tu yambidida oilonga yOuhamba ile hatu kwafele ovamwatate novamwameme?

• “Omwene mu fimaneka neliko loye.” — Omayel. 3:9.

• “Keshe tuu na yandje ngaashi omutima waye tau mu lombwele, hanomunyengutima ile kefininiko, osheshi Kalunga e hole ou ta yandje nehafo.” — 2 Kor. 9:7.

32. Ovakriste ova teelela okuhanga omaudjuu elipi?

• “Ovanelao ava, tava hepekelwa ouyuki, osheshi ouhamba weulu owavo. Ovanelao onye, ovanhu ngeenge tave mu sheke ndele tave mu taataa ndele tave mu popile mowii aushe nokufufya molwange. Hafeni nye mu nyakukwe pombada, osheshi ondjabi yeni oinene meulu; osho ngaha va li va taataa ovaxunganeki, ve mu tetekela.” — Mat. 5:10-12.

33. Omolwashike shi li oufembanghenda okuninginifwa u li Ondombwedi yaJehova?

• “Eendjovo doye oda li kwaame enyaku nehafo lomutima wange, osheshi ame onda lukilwa edina loye, Omwene, Kalunga.” — Jer. 15:16.

Eninginifo ohali ningwa alushe poyoongalele yEendombwedi daJehova, inini naayo yakula. Omuyandji woshipopiwa sheninginifo oha shivi ovaninginifwa va fikame lwopexulilo loshipopiwa shaye, nova nyamukule mokule nonewi la yela omapulo avali taa shikula.

1. Mbela omwe livela ombedi omolwomatimba eni, mwe liyapulila Jehova mu longe ehalo laye nomwa dimina kutya ote mu xupifa okupitila muJesus Kristus?

2. Mbela omu udite ko tuu kutya eninginifo otali mu didilikifa mu li vamwe vomEendombwedi daJehova metwokumwe nehangano laye?

Eshi ovaninginifwa tava nyamukula heeno newi la yela komapulo oo, otava ‘hepaulula moipafi’ eitavelo lavo mekuliloyambo nosho yo kutya ove liyapulila filufilu Jehova. (Rom. 10:9, 10) Onghee hano, ovaninginifwa ova pumbwa okudilonga komapulo oo pamwe neilikano komesho yefimbo opo va dule oku ke a nyamukula, ve na oulela pauhandimwe.

Mbela owe liyapulila Jehova okupitila meilikano, to mu udanekele kutya oye aeke to ka longela nonokutya okulonga ehalo laye osho oshinima sha fimanenena monghalamwenyo yoye?

Ou na ngoo oushili lela kutya kape na sha osho tashi ku imbi uha ninginifwe poshoongalele tashi uya?

Omidjalo dilipi tadi wapalele okuninginifwa nado? (1 Tim. 2:9, 10; Joh. 15:19; Fil. 1:10)

Otu na okudjala monghedi tai wapalele “nokuliwapeka noshishohoni noukoshoki” opo tu hepaululile kutya fye “oonakutilakalunga.” Ovaninginifwa itava ka djala oikutu yokuyowifa hai limonikila, ya shangwa omatumbulo onhumba ile ya fanekwa omadidiliko eengeshefa. Ove na okudjala oikutu tai wapalele noya koshoka.

Ovaninginifwa ove na okulihumbata monghedi ya tya ngahelipi pefimbo lokuninginifwa kwavo? (Luk. 3:21, 22)

Jesus okwa tula po oshihopaenenwa shiwa shi na sha nanghee ovaninginifwa ve na okulihumbata kunena. Okwa li e shi shii kutya eninginifo olo onghatu ya kwata moiti, naasho okwa li e shi ulika melihumbato laye. Onghee hano, onhele yeninginifo kai fi onhele yokuningila oiyolifa ile yokuyowela ile yokuningila oinima yoludi keshe oyo itai fimanekifa oshiningwanima osho. Omuninginifwa mupe ke na okuninga oinima ihafele a fa omunhu a findana mefiyafanepo ile moudano wonhumba. Nonande eninginifo oli li omhito ihafifa, ehafo oli na okuulikwa monghedi yefimaneko.

Okwoongala pandjikilile nosho yo okweendafana neongalo otaku ke ku kwafela ngahelipi u kale metwokumwe neliyapulo loye kuJehova?

Omolwashike sha fimanenena okukala nelandulafano lokukonakona Ombiibeli paumwene nokukala ho i moukalele pandjikilile, nokuli nokonima eshi wa ninginifwa?