Ouyelele wa fimanenena wondjokonona yEendombwedi daJehova
Otwa hala okutuvikila omamona etu e na sha nondjokonona
OSHIWANA shaJehova oshi na efyuululo loupuna wopamhepo. Efyuululo olo lihokwifa otali dulu okuhangwa moinima ngaashi moishangomwa, momafano, meenhumwafo, momahokololo avamwe, moikwanoipangifo oyo hatu longifa melongelokalunga letu, moilonga yokuudifa nosho yo mondjokonona yetu. Ndele mbela ouwa ulipi hatu mono mokutuvikila ouyelele wa tya ngaho nomokuninga omalafululo e na sha nonakudiwa yetu? MuIsrael shonale, omitwe domaukwaneumbo oda li di na okuhonga ovana vado eemhango noku va hokololela oikumwifilonga yaJehova opo va kale ‘ve lineekela Kalunga.’ — Eps. 78:1-7.
Okukonga omauyelele e na sha nondjokonona okwa kala taku dana onghandangala mokuwanifwa kwelalakano laJehova. Pashihopaenenwa, eshi ovapataneki va li tava kendabala okuya moshipala oilonga yokutunga otembeli muJerusalem, opa li pa ningwa elongekido lopambelewa lokuhada moinima yopandjokonona oyo ya li ya tuvikilwa moshilandopangelo shaMedia shedina Ahmeta nova li va hanga mo omukanda wa shangwa kohamba Kores omo ya yandja elombwelo lokutungulula otembeli. (Esra 6:1-4, 12) Onghee hano, otembeli oyo oya li ya tungululwa metwokumwe nehalo laKalunga. Omushangi wEvangeli Lukas naye okwa li a longifa eedjo domauyelele opandjokonona opo a dule ‘okukonakona aishe ngaashi ya shikulafana kehovelo.’ — Luk. 1:1-4.
Olutuwiliki nalo oli na ohokwe inene mokutuvikila ondjokonona yetu yopalongelokalunga. Oshilyo shimwe shOlutuwiliki osha divilika efimano lokupungula omauyelele opamhepo, okushanga nokutambekida efyuululo letu la tya ngaho, sha ti: “Opo tu shiive kutya otwa finda peni, otu na yo okukala tu shii kutya otwa dile peni.” Onghee hano, paife opa totwa oshikondo shokutuvikila nokuungaunga nomauyelele e na sha nonakudiwa yehangano keembelewa da kula moBrooklyn, shaNew York, shi li mepashukilo lOkomitiye yOkushanga.
ONDJOKONONA YETU OTAI FAAFANIFWA NOALUBUMA YOUKWANEUMBO NOSHO YO OMAFYUULULO
Ondjokonona ohai ende tai dimbuwa mokweendela ko kwefimbo, navahapu vomufye otashi dulika tu ke lipe oushima eshi inatu ongela ondjokonona yomapata etu ye lixwa po. Onghee hano, oshikondo shokwoongela omauyelele otashi longo noudiinini opo shi tuvikile nokushanga ondjokonona yetu oyo ya pakela notai tamunuka mo. Oishangomwa yetu yonale, omahokololo matunhula e na sha noohandimwe nosho yo oinima ikwao yondilo yehangano, oyo imwe yomomamona oo a tuvikilwa koshikondo osho. Oikwanoipangifo ya tya ngaho oi li efyuululo olo tali tu hokololele kombinga yonakudiwa yelongelokalunga letu notai tu kwafele tu kale tu na etimaumbwile li na sha nonakwiiwa yehangano letu.
Ohatu ke lihonga shihapu shi na sha nondjokonona yehangano okupitila moshitukulwa shipe shedina, “Ouyelele wa fimanenena wondjokonona yEendombwedi daJehova.” Otashi ka kala hashi piti lune momudo mOshungonangelo yokukonakonwa. Pashihopaenenwa, otwa diladila opo moshifo shomwedi tau uya mu ka kale ehokololo la nuninwa okunyamukula omapulo aa taa shikula apa: Okatemba kokuhumbatela oileshomwa kedina Dawn Mobile oshike? Okwa li haka longifwa koolyelye? Okwa li haka longifwa naini nomolwashike?
Ngaashi ashike oalbuma youkwaneumbo hai tu dimbulukifa ondjokonona yomapata etu, ouyelele oo tau ongelwa kehangano u na sha nondjokonona ohau tu lombwele shihapu kombinga yetu nosho yo yovapiya vaJehova vopefimbo lonale. Ohau tu dimbulukifa yo shi na sha neitavelo nouladi waavo va li ko nale, ehafo nomashongo oo haa holoka po eshi hatu longele Jehova, ewiliko nekwafo olo Jehova ha pe alushe ovapiya vaye. (Deut. 33:27) Otu na elineekelo kutya Jehova ota ka twikila okunangeka noupuna eenghendabala detu dokutuvikila omauyelele ondjokonona yehangano, oo tau ke tu kwafela tu kale twa hangana shi dulife nale noku tu pameka tu dule okuwanifa po ehalo laye.
[Oshimhungu/Efano pepandja 31]
Nghee ouyelele wondjokonona yehangano hau longifwa
Ngeenge taku longekidwa oileshomwa yopaKriste, ou-DVD nosho yo oishangomwa ikwao ye likolelela kOmbibeli, ovashangi, ovafaneki, ovalafululi navakwao vamwe ohava longifa omauyelele ondjokonona yehangano. Onghee hano, oshikondo shokwoongela omauyelele ohashi fi oshisho nohashi katuka eenghatu opo shi ongele nokutuvikila omauyelele mahapu e na sha nondjokonona yehangano okudja keedjo ngaashi oitaimbelewa, oikondo i lili nai lili yaBetel, okomaongalo, okoohandimwe nokomahangano omounyuni. Natu ka taleni pauxupi nghee oshikondo osho hashi ongele omauyelele ondjokonona:
Okwoongelwa nokukonakonwa kwoinima: Oinima oyo ya fimanenena ohai wedwa alushe monhele yokutuvikila omauyelele opandjokonona. Ehangano ohali pewa oinima nehalo liwa koohandimwe ovo omaukwaneumbo avo a kala taa longele Jehova noudiinini oule womido dihapu opo i ninge po yalo ile li longife ko ashike. Okuyelekanifa nokunongonona oinima ya tya ngaho otaku hapupalifa eudeko letu li na sha nondjokonona yetu nosho yo yaavo va li ko nale.
Okupakelwa kwoinima: Oshikondo shokwoongela omauyelele osha ongela oinima omayovi, naimwe yomuyo oya ninga nokuli oule womido di dulife pefele. Oinima aishe oya yoolokafana momalupe, mounene, momitungilo noi na okutuvikilwa nawa melandulafano opo i dule okulongifwa monakwiiwa.
Okuwapekululwa nokupungulwa kwoinima: Omambo noikwanoipangifo oyo tai dulu okunyonauka ile okupomboka diva ohai wapekululwa nokutuvikilwa taku longifwa omilandu doshinanena. Omikanda, omafano, eenghundana odo da kwatwa ile da kondwa meedjo domauyelele, eefilima noinima oyo ya kwatwa moungalo ohai tapwa mo nokutuvikilwa moikwakombiyuta. Kungaho, omunhu ota dulu okukonga omauyelele oo kokombiyuta ponhele yoku ka hadaula moikwambapila ile moinima yo vene yopandjokonona.
Okutuvikila nokukonga vali omauyelele oo a kana: Oikwanoipangifo yopandjokonona ohai tuvikilwa palandulafano opo iha kane noi amenwe iha nyonaunwe keenhe detango nokoututo. Opa unganekwa onhele kokombiyuta yokutuvikila omauyelele ondjokonona yehangano oyo hai kwafele mokuninga omalafululo nokukongulula omauyelele oo e na ondilo ngeenge okwa kana.
[Omafano pepandja 32]
1. Epulakata lokino yedina “Photo-Drama of Creation.” 2. Omusholondodo wovambesteli voileshomwa. 3. Ohauto yomambako. 4. Oshungonangelo yo 15 Aprili 1912. 5. Omukanda tau shiivifa okumangwa po kwaJ. F. Rutherford. 6. Embako loradio yedina WBBR. 7. Ongalamafona. 8. Okatasi komambo. 9. Omadidilikoshango opaumwene. 10. Ondelekalama ya shangelwa J. F. Rutherford.