Omapulo a dja kovaleshi
Efyo lovapiya vaKalunga ovadiinini ola “nendipalelwa” meityo lilipi?
▪ Omupsalme umwe okwa li a nwefwa mo a imbe ta ti: “Momesho Omwene efyo lovayuki vaye ola nendipalelwa.” (Eps. 116:15) Omwenyo womulongeli waJehova keshe ou na shili ondilo inene momesho aye. Ndele nande ongaho, Epsalme 116 ola kwatela mo shihapu shihe fi ashike efyo lomupiya waJehova umwe pauhandimwe.
Onghee hano, ngeenge taku yandjwa oshipopiwa shefudiko lOmukriste, kutya nee okwa fya e li omudiinini kuJehova, inashi wapala okuyukifa omushangwa wEpsalme 116:15 kunakufya. Omolwashike mbela? Omolwaashi eendjovo domupsalme oo odi na eityo la mbwalangadja. Otadi ulike kutya efyo lovapiya vaKalunga ovadiinini ve li ongudu oli na ongushu inene momesho aye noke na efiku a pitike osho shi ningwe. — Tala Epsalme 72:14; 116:8.
Epsalme 116:15 otali tu shilipaleke kutya Jehova ke na efiku a pitike ovapiya vaye ovadiinini va kombololwe ko kombada yedu ve li ongudu. Ondjokonona yoshiwana shaJehova shokunena i na sha nanghee sha kala tashi lididimikile omahepeko nomayeleko manene otai yandje oumbangi wa yela kutya Kalunga ita efa nandenande oshiwana shaye shi kombololwe po.
Jehova ita ka efa tu xulifwe po tu li ongudu, molwaashi oku na eenghono dinene noita kala ina wanifa po elalakano laye. Ngeenge ngeno Jehova oku efe osho shi ningwe, osho ngeno otashi ka ulika kutya ovatondi vaye ovanaenghono ve mu dule, ndele osho kashi na fiku shi ningwe. Ngeno osho oshi ningwe, ngeno elalakano laye olo kutya kombada yedu alishe otaku ka kala ovanhu ovadiinini otali ka kala inali wanifwa, ashike otu shii kutya elalakano laye itali ponyo nandenande. (Jes. 45:18; 55:10, 11) Kape na yo oo ta ka longa oilonga iyapuki yaJehova kombada yedu ngeenge ngeno kaku na ovalongeli vaye ovo tave mu longele moshihale shokombada yedu shotembeli yaye inene yopamhepo. Itapa ka kala yo ngeno ovo tava diki po ekanghameno ‘ledu lipe,’ olo tali ulike kovanhu ovayuki ovo tava ka kala kombada yedu ve li koshi yewiliko ‘leulu lipe.’ (Eh. 21:1) Osho osha hala okutya ngeno Epangelo lOmido Eyovi laKristus itali ka kala po yo molwaashi kape na ovapangelwa valo vokombada yedu. — Eh. 20:4, 5.
Ngeenge ngeno Jehova okwa efa ovatondi vaye va kombolole po oshiwana shaye ashishe kombada yedu, osho otashi ka tulifa momalimbililo ondodo yaye notashi ka shekifa edina laye. Otashi ka dinifa yo filufilu ondodo yaye e li Omunamapangelo weshito alishe. Shimwe vali, Jehova okwe lifimaneka ye mwene nosho yo edina laye liyapuki, nomolwaasho ita ka efa oshiwana shaye shi kombololwe po ashishe. Diladila yo kwaashi: Jehova ita ka kala ina xupifa ovapiya vaye ve li ongudu ovo va kala tave mu longele noudiinini molwaashi ‘ke na owidi.’ (Deut. 32:4; Gen. 18:25) Kakele kaasho, ngeenge ngeno Jehova oku efe ovapiya vaye va xulifwe po ve li ongudu ita ka kala metwokumwe neendjovo daye odo tadi ti: “Omwene omolwedina laye linene ina hala okweekelashi ovanhu vaye.” (1 Sam. 12:22) Onghee hano, “Omwene ita kandula po oshiwana shaye, Ye ita efa oshifyuululwa shaye.” — Eps. 94:14.
Itashi hekeleke tuu okushiiva kutya Jehova ita ka efa nandenande oshiwana shaye shi xulifwe po kombada yedu! Hano natu kaleni ovadiinini kuJehova, tu na elineekelo meudaneko laye olo tali ti: “Oshilwifo keshe tashi hambulwa shi ku lwife, otashi nyengwa. Nakeshe elaka tali ku hokololifa, oto li tomhele oushima. Eshi efyuululo lovapiya vOmwene nouyuki wavo womuame.” — Jes. 54:17.
[Ouyelele u li pepandja 22]
Kalunga ita ka efa nandenande oshiwana shaye shi kombololwe po shi li ongudu