‘Ame ondi li pamwe nanye’

“Vahapu tave ke u konakona, [neshiivo lashili otali, NW] ka hapupala.” — DAN. 12:4.

oumbangi ulipi?

OTO NYAMUKULA NGAHELIPI?

Ongahelipi ‘eshiivo lashili’ la hololwa pefimbo letu?

Osha enda ngahelipi opo ovanhu “vahapu” va tambule ko oshili?

Eshiivo lashili ola “hapupala” meenghedi dilipi?

1, 2. (a) Otu shi shii ngahelipi kutya Jesus oku li pamwe novapangelwa vaye paife nonokutya ota ka kala pamwe navo monakwiiwa? (b) Daniel 12:4 okwa ti kutya ovo hava konakona Omishangwa noukeka otava ka mona oidjemo ilipi?

KALA nee ngeno wa fa u liwete u li mOparadisa. Ongula keshe eshi to penduka oho kala u udite wa tulumukwa nawa nowa teelela efiku nodjuulufi. Ku na apa u liudite, molwaashi ku na vali ounghundi washa. Omesho oye ohaa mono ko nawanawa, omatwi oye ohaa udu ko nawanawa, oho udu nawa omadimba nomulyo woinima noyuuditifi ikwao aishe otai longo nawa. Ou na yo eenghono dihapu, ho hafele oilonga yoye, u na ookaume vahapu noku na omalipulo asha. Omanangeko noupuna oo oo hatu ka dula okuhafela koshi yOuhamba waKalunga. Kristus Jesus, oo a nangekwa po e li Ohamba, ota ka nangeka noupuna ovapangelwa vaye noku va honga kombinga yaJehova.

² Jehova ota ka kala pamwe novapiya vaye ovadiinini eshi tava ka kufa ombinga moilonga yokuhonga yomounyuni aushe monakwiiwa. Kalunga nOmona waye ova kala pamwe novapiya vaYe ovadiinini oule womafelemido. Fimbo Jesus ina ya meulu okwa li a shilipaleka ovahongwa vaye ovadiinini kutya ota ka kala pamwe navo. (Lesha Mateus 28:19, 20.) Ndele opo tu pameke eitavelo letu meshilipaleko olo, natu ka konakoneni etumbulo limwe lexunganeko la nwefwa mo olo la shangwa omido di dulife 2 500 da pita, la shangelwa muBabilon shonale. Omuprofeti Daniel okwa popya shi na sha ‘nefimbo lexulilo’ olo tu li mulo, a ti: “Vahapu tave ke u konakona, [neshiivo lashili otali, NW] ka hapupala.” (Dan. 12:4) Oshityalonga shOshiheberi osho sha tolokwa “konakona” otashi yandje ediladilo lokukonenena oshinima. Okukonakona kwa tya ngaho itaku ka etifa tuu omanangeko noupuna makumwifi! Kalunga ota ka kwafela ovo hava konakona noukeka Omishangwa va mone eshiivo lashili lEendjovo daye. Exunganeko olo ola ti yo kutya vahapu otava ka kala ve “neshiivo lashili.” Shimwe vali, eshiivo olo okwa tiwa kutya otali ka hapupala. Ola li tali ka shiivifwa mounyuni aushe nakeshe umwe ota dulu oku li limonena. Eshi hatu konakona nghee exunganeko olo la wanifwa, ohatu ka mona kutya Jesus oku li pamwe novahongwa vaye kunena nonokutya Jehova ota dulu filufilu okuwanifa po omaudaneko aye aeshe.

OVANHU OTAVA KA KALA VE “NESHIIVO LASHILI”

3. Oshike sha li sha ningwa po shi na sha “neshiivo lashili” konima yefyo lovayapostoli?

³ Konima yefyo lovayapostoli, mokati kOvakriste vashili omwa li mwa holoka ovashunimonima ngaashi sha li sha xunganekwa, nova li va hapupala neendelelo. (Oil. 20:28-30; 2 Tes. 2:1-3) Omafelemido a ka landula ko, ovanhu kava li ve “neshiivo lashili” kutya nee ovovo vehe shii nandenande Ombibeli ile ovovo have liti kutya Ovakriste. Nonande ovawiliki vOukwakriste ohava ti kutya ova itavela Omishangwa, ohava hongo vamwe oipupulu, sha hala kutya, ‘omahongo eendemoni’ oo itaa fimanekifa Kalunga. (1 Tim. 4:1) Osho osha ningifa ovanhu vahapu va kale momilaulu dopamhepo. Omahongo ovashunimonima okwa kwatela mo ehongo loipupulu olo kutya Kalunga Omukwatatu, omwenyo ihau fi nosho yo kutya ovanhu vamwe otava ka pya momundilo woheli fiyo alushe.

4. Ongudu yOvakriste yomo 1870 nasha oya li ya hovela ngahelipi okukonga ‘eshiivo lashili’?

⁴ Mo 1870 nasha, omido omilongo nhee lwaapo fimbo ‘omafiku axuuninwa’ inaa hovela, ongudu inini yOvakriste vashili moPennsylvania, mo-U.S.A, oya li ya ongala opo i konakone Ombibeli noukeka nokukonga ‘eshiivo lashili.’ (2 Tim. 3:1) Ovakriste ovo ova li have liifana ovakonakoni vOmbibeli. Kava li “ovanongo novanaendunge” ovo Jesus a popya kutya eshiivo la tya ngaho ole va holekwa. (Mat. 11:25) Ova li ovalininipiki ovo va li va halelela okulonga ehalo laKalunga. Ova li hava konakona noukeka Omishangwa, have di kundafana nokudilonga kudo pamwe neilikano. Ova li yo hava faafanifa omishangwa dOmbibeli nokukonakona osho sha shangwa kwaavo va ninga omakonakono a faafana. Mokweendela ko kwefimbo, ovakonakoni vOmbibeli ovo ova li va mona oshili oyo ya kala ya holekwa oule womafelemido.

5. Oufo va pambafana vedina The Old Theology ova li va nyanyangidwa nelalakano lashike?

⁵ Nonande ovakonakoni vOmbibeli ova li va tunhukwa omolwoinima oyo va li tave lihongo, eshiivo olo va mona kala li le va ningifa va kale ve na ounhwa nokava li ve liudite kutya otava udifa oshinima shipe. (1 Kor. 8:1) Ponhele yaasho, ova li va nyanyangida po oufo va pambafana vedina The Old Theology. Osho ova li ve shi ninga nelalakano lokukwafela ovaleshi va shiive eeshili dopamishangwa odo di li mOmbibeli. Okafo kotete oka li ke na “ouyelele oo tau kwafele ovanhu va konakone Ombibeli, opo va dule okweefa po eenghulunghedi da puka dovanhu nova shiive omahongo makulu Omwene wetu noovayapostoli.” — The Old Theology, onomola 1, Aprili 1889, ep. 32.

6, 7. (a) Eeshili dilipi twa kwafelwa tu ude ko okudja mo 1870 nasha? (b) Eeshili dilipi wa pandula unene eshi we di lihonga?

⁶ Okangudu oko ka hovela omido di dulife 100 lwaapo da pita inaka holola tuu eeshili dikumwifi!a Eeshili da tya ngaho kadi fi oshinima shififa oudja, sha fa ashike ngeno oinima oyo hai kala tai tuwa eemhata kovakwamhepo. Ponhele yaasho, oditunhula notadi tu etele emanguluko olo tali tu kwafele tu kale tu na onghalamwenyo i na eityo, ihafifa notu na eteelelo. Otadi tu kwafele tu shiive Jehova, omaukwatya aye mawa nosho yo omalalakano aye. Oda yelifa yo onghandangala oyo Jesus ta dana nonokutya omolwashike e uyile kombada yedu nokufya nosho yo osho ta ningi paife. Eeshili odo di na ondilo otadi holola kutya omolwashike Kalunga a efela oukolokoshi u kale po, omolwashike hatu fi, nghee tu na okwiilikana nonghee hatu dulu okukala twa hafa shili.

⁷ Paife ohatu dulu okuuda ko omaxunganeko oo a kala ‘oshiholekwa’ oule womido dihapu ndele otaa wanifwa pefimbo eli lexulilo. (Dan. 12:9) Omaxunganeko oo okwa kwatela mo oo taa hangwa mOmishangwa adishe, naunene tuu oo e li mOmavangeli nomembo lEhololo. Jehova okwe tu kwafela nokuli tu ude ko oiningwanima oyo itatu dulu okumona, ngaashi okunangekwa po kwaJesus, oita oyo ya luwa meulu nosho yo okuumbilwa kombada yedu kwaSatana. (Eh. 12:7-12) Okwe tu kwafela yo tu ude ko eityo loinima oyo hatu dulu okumona, ngaashi oita, omakakamo edu, omikifi dolutapo, ondjala nosho yo shi na sha novahenakalunga ovo navo va ningifa “omafimbo madjuu.” — 2 Tim. 3:1-5; Luk. 21:10, 11.

8. Olyelye he tu kwafele tu mone notu ude ko oinima oyo ya xunganekwa mOmbibeli?

⁸ Ohatu dulu okuuda ko noupu eendjovo odo Jesus a li a lombwela ovahongwa vaye, eshi a ti: “Omesho taa mono ei mwe i tala oku na elao. Osheshi handi mu lombwele, ovaprofeti vahapu neehamba va li va hala okumona ei tamu i tale, vo inave i mona, nokuuda ei tamu i udu, vo inave i uda.” (Luk. 10:23, 24) Jehova Kalunga oye e tu kwafela tu mone notu ude ko oinima oyo. Inatu pandula tuu eshi ‘omupopili,’ omhepo iyapuki yaKalunga, ya li ya tumwa opo i wilike ovashikuli vaJesus noku va “twala moshili aishe”! (Lesha Johannes 16:7, 13.) Natu kaleni alushe twa lenga ‘eshiivo lashili’ nokukwafela vamwe navo va likole eshiivo olo nopehe na okuliholamwene.

“VAHAPU” OTAVA KA LIKOLA ‘ESHIIVO LASHILI’

9. Moshifo shaAprili 1881 omwa li mwa popiwa kutya ope na omhumbwe yashike?

⁹ Konima yomido mbali lwaapo okudja eshi oshifo shotete shOshungonangelo yOshiingilisha sha nyanyangidwa, moshifo shaAprili 1881, omwa li mwa popiwa kutya opa pumbiwa ovaudifi 1 000. Oshifo osho osha ti: “Ovo tamu dulu okulongifa efimbo leni lihapu moilonga yOmwene, otwa diladila po ondunge ei kutya . . . Mu li ovatandavelifi voileshomwa ile ovaudifi, otamu i moilando ya kula ile inini, she likolelela kokudula kweni, mu ka konge ponhele keshe Ovakriste, navahapu otamu ka hanga ve na ouladi wokulongela Kalunga, ndele kave na eshiivo loku shi ninga; ovanhu ovo va shiivifileni kombinga yonghenda inene yaTate yetu nosho yo ouwa oo hatu mono meendjovo daYe.”

10. Ovanhu ova li ve linyenga ngahelipi eshi va li va pulwa vaye moilonga yefimbo li yadi?

¹⁰ Eshivo olo la tumbulwa mokatendo ka tetekela otali ulike kutya Ovakonakoni vOmbibeli ova li va mona kutya oshilonga sha fimanenena shOvakriste vashili osho okuudifa onghundana iwa. Ndele omuvalu oo wovaudifi 1 000 owa li ashike tau ka wana monakwiiwa molwaashi pefimbo opo pokwoongala kwOvakonakoni vOmbibeli opa li ashike hapa kala ovaudifi omafele manini. Konima eshi ovanhu vahapu va lesha okafo ile oshifo ova mona kutya ei oyo oshili nova li va ninga ovaudifi. Pashihopaenenwa, mo 1882, konima eshi omunhu umwe wokuLondon, muEngland, a lesha Oshungonangelo yOshiingilisha nosho yo okambo kamwe oko ka nyanyangidwa kOvakonakoni vOmbibeli, okwa shanga ta ti: “Alikana kwafelei nge ndi shiive nghee ndi na okuudifa nosho yo osho ndi na okuudifa opo ndi wanife po oshilonga shiyapuki osho Kalunga a hala tu longe.”

11, 12. (a) Ovaudifi vokunena ove na elalakano lilipi la faafana naali lovatandavelifi voileshomwa? (b) Ovatandavelifi voileshomwa ova li hava toto po ngahelipi eengudu ile omaongalo?

¹¹ Mo 1885, Ovakonakoni vOmbibeli 300 lwaapo ova li va ninga ovatandavelifi voileshomwa. Ovalongi vefimbo li yadi ovo ova li ve na elalakano la faafana naali letu, lokuninga ovanhu ovahongwa vaJesus Kristus. Ashike ova li have shi ningi meenghedi da yooloka ko kudetu. Kunena, ohatu konakona Ombibeli nomunhu umwe poshikando noku mu honga pauhandimwe. Opo nee, ohatu shivi omukonakonimbibeli e uye kokwoongala kweongalo olo la totwa nale. Monale, ovatandavelifi voileshomwa ova li hava yandje omambo opo nee, tava shivi ovanhu ovo ve na ohokwe ve uye okukonakona Omishangwa pamwe navo ve li ongudu. Ponhele yokukonakona novanhu pauhandimwe, ova li hava toto po eengudu ile omaongalo.

¹² Pashihopaenenwa, mo 1907, ongudu imwe yovatandavelifi voileshomwa oya li hai i i ka pulapule moshilando shonhumba ngeenge omu na ovo ve na nale embo ledina Millennial Dawn (olo la li yo hali ifanwa Studies in the Scriptures). Oshungonangelo oya ti: “Ovanhu ovo [ve na ohokwe] ova li hava ongala meumbo limwe ve li okangudu. Opo nee, omutandavelifi woileshomwa oha kundafana navo Osoondaxa aishe ta longifa embo ledina Divine Plan of the Ages, mOsoondaxa tashi landula ohe va ladipike va kale alushe have uya kokwoongala.” Ndele mo 1911, ovamwatate ova li va ninga po omalunduluko. Ovaudifi ovaendi ve likalekelwa ve li 58 ova li va yandja oipopiwa yomoipafi mOilongo ya Hangana nomuKanada ashishe. Ova li hava shange omadina neendjukifi daavo ve na ohokwe ovo va li ve uya koshipopiwa nokuninga omalongekido va ka ongale navo meumbo lonhumba opo va tote po ongudu. Mo 1914, opa li omaongalo 1 200 Ovakonakoni vOmbibeli mounyuni aushe.

13. Oshike tashi ku kumwifa shi na sha nokutamunuka mo ‘kweshiivo lashili’ kunena?

¹³ Kunena ope na omaongalo 109 400 lwaapo mounyuni aushe novamwatate ve li 895 800 lwaapo ova ninga ovakokolindjila. Ovanhu hanga ve li omamiliyona ahetatu ova tambula ko ‘eshiivo lashili,’ nohave li tula moilonga mokukalamwenyo kwavo. (Lesha Jesaja 60:22.)b Osho oshididilikwedi neenghono molwaashi Jesus okwa li a xunganeka kutya ovahongwa vaye otava “ka tondelwa edina [laye] kuaveshe.” Okwa weda ko vali ta ti kutya ovashikuli vaye otava ka hepekwa, otava ka idililwa meedolongo nokudipawa nokuli. (Luk. 21:12-17) Ndele nande ope na omapataneko aSatana neendemoni daye nosho yo aavo ve li omhinge nelongelokalunga lashili, oshiwana shaJehova otashi pondola neenghono moilonga yasho yokuninga ovanhu ovahongwa. Kunena, oshiwana shaJehova otashi udifa ‘mounyuni aushe’ kutya nee omeefuka da fita, moitukulwa ya talala neenghono, keemhunda, meembuwa, moilando nosho yo koitukulwa ye likalela. (Mat. 24:14) Osho itashi dulu okuningwa nopehe na ekwafo laKalunga.

‘ESHIIVO LASHILI’ OTALI KA “HAPUPALA”

14. Ongahelipi ‘eshiivo lashili’ la hapupala okupitila moishangomwa?

¹⁴ ‘Eshiivo lashili’ lovanhu vahapu ovo tava udifa onghundana iwa ola hapupala. Ola hapupala yo okupitila moishangomwa. Pashihopaenenwa, muJuli 1879, Ovakonakoni vOmbibeli ova li va nyanyangida oshifo shotete shedina Zion’s Watch Tower and Herald of Christ’s Presence. Opa li pa nyanyangidwa eekopi 6 000 doshifo osho mOshiingilisha, da pilindwa kofeema imwe. Omumwatate Charles Taze Russell oo a li e na omido 27 oye a li a hoololwa a ninge omulongekidi woshifo osho nOvakonakoni vOmbibeli vakwao va-5 va pyokoka ova li ovashangi. Paife Oshungonangelo ohai nyanyangidwa momalaka 195. Oshifo osho osho hashi tandavelifwa neenghono kombada yedu, haku tandavelifwa eekopi 42 182 000 doshifo keshe. Oshifo sha landula ko o-Awake! nohaku tandavelifwa eekopi 41 042 000 momalaka 84. Shimwe vali, omudo keshe ohaku nyanyangidwa omambo nEembibeli omamiliyona 100 lwaapo.

15. Oilonga yetu yokupilinda ohai futwa noimaliwa hai di peni?

¹⁵ Oilonga oyo inenenene ohai yambididwa nomayambidido opashimaliwa ehalo liwa. (Lesha Mateus 10:8.) Oshinima sha tya ngaho ohashi kumwifa ovo hava longo momahangano okupilinda molwaashi ove shii kutya omashina okupilinda, eembapila, ohinga nosho yo oilongifo ikwao oi na ondilo. Omumwatate umwe oo ha longo moshikondo shokulanda oinima yoitaimbelewa okwa ti: “Ovanangeshefa ovo hava talele po oinyanyangido yetu ohava kala va kuminwa neenghono oushili oo kutya oitaimbelewa yetu omo mu na omashina oshinanena oo haa pilinda oileshomwa ihapu poshikando ohai yambididwa nomayambidido opashimaliwa ehalo liwa. Ohava kala yo va kumwa okumona kutya ovo hava longo moBetel ova nyashuka nova hafa.”

EDU ALISHE OTALI KA KALA LI YADI ESHIIVO LOKUSHIIVA KALUNGA

16. ‘Eshiivo lashili’ ola hololwa omolwetomheno lilipi?

¹⁶ ‘Eshiivo lashili’ ola hapupala omolwetomheno liwa. Kalunga okwa hala “ovanhu aveshe va xupifwe nova fike meshiivo loshili.” (1 Tim. 2:3, 4) Jehova okwa hala ovanhu va shiive oshili opo va dule oku mu longela monghedi ya yuka noku va nangeke noupuna. Opo Jehova a holole ‘eshiivo lashili,’ okwa ongela oshixupe shOvakriste ovavaekwa ovadiinini. Ota ongele yo ‘ongudu inene yomoiwana aishe nomomaludi aeshe nomovanhu aveshe nomomalaka aeshe,’ oyo i na eteelelo loku ka kala nomwenyo fiyo alushe kombada yedu. — Eh. 7:9.

17. Okutamunuka mo kwelongelokalunga lashili otaku yandje

¹⁷ Eshi elongelokalunga lashili la kala tali tamunuka mo momukokomoko womido di dulife 130 da pita, otashi ulike filufilu kutya Kalunga nosho yo Ohamba oyo a nangeka po, Jesus Kristus, ova kala pamwe novapiya vaYe kombada yedu, tave va wilike, tave va amene, tave va unganeke noku va honga. Ekulo olo otali yandje yo oumbangi kutya omaudaneko aJehova e na sha nonakwiiwa otaa ka wanifwa po. Ombibeli oya ti: “Edu alishe otali ka kala li yadi eshiivo lokushiiva Omwene, ngaashi omeva a tuvikila efuta.” (Jes. 11:9) Ovanhu itava ka hafela tuu omanangeko noupuna manene!

[Omashangelo opedu]

[Efano pepandja 6]

Ovakonakoni vOmbibeli vopefimbo lonale ova li ovalininipiki ovo va li va halelela okulonga ehalo laKalunga

[Efano pepandja 7]

Jehova okwa lenga eenghendabala doye dokutandavelifa ‘eshiivo lashili’