Oto dimbuluka?

Mbela owa lesha ngoo nawanawa Eeshungonangelo odo opo da piti? Ngeenge owe di lesha, kendabala okunyamukula omapulo aa taa landula apa:

Mbela eexwiki daSimson odo da li de mu pa eenghono?

Simson okwa li e na eenghono dinene omolwekwatafano le likalekelwa olo a li e na naJehova e li Omunasiri, ndele kada li hadi di meexwiki daye. Eexwiki daye oda li ashike di li edidiliko lekwatafano laye naJehova. Ekwatafano olo ola ka kumwa eshi Delila a teta ko eexwiki daSimson. — 4/15, epandja 9.

Mokuyelekanifa nomutima wo vene, oinima 3 ilipi tai dulu okunwefa mo nawa omutima wetu wopafaneko?

(1) Oipalwifa. Ngaashi ashike omitima detu do venevene da pumbwa oipalwifa i na oukolele, omitima detu dopafaneko nado oda pumbwa okupalulwa noikulya yopamhepo ya wana. (2) Omalideulo. Okukala hatu kufa ombinga moukalele nouladi otaku ka kaleka omitima detu dopafaneko monghalo iwa. (3) Omudingonoko. Ohatu dulu okuninipika oudjuu wokomutima mokukala hatu endafana luhapu novaitaveli vakwetu ovo ve na ko nasha nafye. — 4/15, epandja 16.

Oshike to dulu okuninga po opo u manguluke ko koumhulile?

Kala kokule nakeshe osho tashi dulu oku ku ningifa u kufe ombinga moumhulile. (Oil. 19:19, 20) Ninga eenghendabala da mana mo u ‘ehene kuKalunga,’ u na elineekelo kutya ota dulu note ke ku kwafela u manguluke ko kenwefemo leendemoni. (Jak. 4:7, 8) — 7/1, epandja 12.

Omolwashike omuyandji woshipopiwa shefudiko ehe na okuyukifa omushangwa wEpsalme 116:15 kunakufya?

Omushangwa oo owa ti: “Momesho Omwene efyo lovayuki vaye ola nendipalelwa.” Osho osha hala okutya efyo lovapiya vaKalunga aveshe oli na ongushu inene momesho aye noke na efiku a pitike osho shi ningwe. Ita ka efa ovapiya vaye va xulifwe po kombada yedu ve li ongudu. — 5/15, epandja 22.

Oolyelye va li ovatandavelifi voileshomwa?

Okudja mo 1931 edina olo “ovatandavelifi voileshomwa” ola li tali ulike kwaavo hava ifanwa ovakokolindjila kunena. — 5/15, epandja 31.

Omolwashike Ovajuda vamwe va li va pundukifwa konghedi omo Jesus a fya?

Odjo imwe youyelele oya ti kutya Ovajuda vomefelemudo lotete ova li va tala ko kutya onghedi omo Jesus a fya oififa ohoni. Ova li va itavela kutya onghedi omo omunhu a fya oyo hai ulike kutya okwa li a tya ngahelipi. Omolwetomheno olo, Jesus okwa li a talwa ko e li omudinwa. — 7/1, epandja 13.

Outumbulilo “Omauhamba aeshe” oo wa longifwa muDaniel 2:44 otau faneke shike?

Otau ulike komauhamba ile komapangelo oo taa fanekwa koitukulwa i lili noku lili yoshihongwafano shoshivela osho sha popiwa kuDaniel. — 6/15, epandja 17.

Onaini epangelo lopamuhanga enaenghono mounyuni laAmerika naBritania la ninga ohamba onhiheyali oyo ya xunganekwa mOmbibeli?

Osho osha li sha ningwa okudja eshi Britania nOilongo ya Hangana va hovela okulongela kumwe monghedi ididilikwedi pefimbo lOita yOtete yOunyuni. — 6/15, epandja 19.

Omafinamhango amwe elipi taa dulu oku ku kwafela u pondole monakwiiwa?

Diladila koilanduliko ofimbo ino ninga omatokolo. (Omayel. 22:3) Tala kutya ou na omahoololo angapi. Tala kutya omatokolo oo to ningi paife otaa ka kuma onakwiiwa yoye ngahelipi. (Omayel. 21:5) Kendabala u hange omalalakano oye. (Joh. 17:3) — 7/1, epandja 18-19.

Omafinamhango Ombibeli amwe elipi taa dulu oku ku kwafela ngeenge owa kala ho mono oyuuyemo inini shi dulife nale?

Diladila kwaasho sha kwatelwa mo. (Luk. 14:28) Lundulula onghedi yoye yokukalamwenyo. (Omayel. 22:3) Kala u na ehalo okutambula ko oilonga yoludi limwe li lili. (Omayel. 29:25) Kala wa wanenwa. (Fil. 4:11, 12) — 7/1, epandja 20-21.