Ngeenge umwe, oo u hole, a efa po okulongela Jehova

1. Ohashi kumu ngahelipi omunhu, ngeenge umwe womoukwaneumbo wavo okwa kondwa?

MBELA ou na omuholike woye a kondwa mo meongalo? Osho otashi teya omukumo neenghono. Omumwameme wedina Hilda okwa ti: “Eshi omushamane wange omudiinini a fya konima eshi twa kala mohombo omido 41, onda li handi diladila kutya itandi ka shakeneka vali onghalo imwe idjuu i dulife pwaayo.b Ashike eshi omonamati wange a fiya po eongalo, omukulukadi waye nosho yo ounona vavo osha li sha ehameka nge neenghono.”

2-3. Metwokumwe nEpsalme 78:40, 41, Jehova oha kala e udite ngahelipi, ngeenge ovapiya vaye ova efa po oku mu longela?

² Diladila nghee Jehova a li e udite, eshi vamwe vomovaengeli, ovo va li oshitukulwa shoukwaneumbo waye, ve mu fiya po! (Jud. 6) Diladila ashike nghee sha li she mu udifa nai, eshi a li ta tale nghee vamwe vomovapiya vaye, Ovaisrael va kala noku mu tukulila oshibofa omafimbo nomafimbo! (Lesha Epsalme 78:40, 41.) Onghee hano, oto dulu okukala noushili kutya Tate yetu womeulu omunahole ohashi mu udifa nai, ngeenge umwe, oo u hole, okwa efa po oku mu longela. Oha kala e ku uditile oukwao wananghali omolwoluhodi olo to piti mulo. Ote ke ku ulikila olukeno moku ku twa omukumo noku ku pa ekwafo olo wa pumbwa.

³ Moshitukulwa eshi ohatu ka kundafana osho twa pumbwa okuninga po, opo Jehova e tu kwafele, ngeenge umwe oo tu hole okwa efa po oku mu longela. Ohatu ka kundafana yo nghee hatu dulu okukwafela vamwe meongalo, ovo va taalela eshongo la tya ngaho. Ndele tete, natu ka kundafaneni omadiladilo mai, oo twa pumbwa okuhenuka.

HENUKA OKULIPA OUSHIMA

4. Ovadali vahapu ohava kala ve udite ngahelipi, ngeenge omona wavo okwa efa po okulongela Jehova?

⁴ Ngeenge omonamati, ile omonakadona a kondwa, oshi li paushitwe kovadali okukala tave lipula kutya okwa li tava dulu okuninga shihapu, opo va kwafele omona a kale omudiinini. Omumwatate wedina Luke okwa popya nghee a li e udite eshi omonamati a kondwa, a ti: “Onda li handi lipe oushima. Onda li handi tu eendjodi dii kombinga yaasho. Omafimbo amwe onda li handi kala handi lili, nomutima wange owa li hau kala tau denge neenghono.” Omumwameme Elizabeth, oo naye e na omonamati a kondwa, okwa ti: “Openi nda lima onghudu ndi li omudalakadi? Onda li ndi udite kutya onda dopa okufindila oshili momonamati wange.”

5. Olyelye e na okupewa ombedi, ngeenge umwe okwa efa po okulongela Jehova?

⁵ Otwa pumbwa okukaleka momadiladilo kutya Jehova okwa pa keshe umwe womufye oshali yemanguluko. Osho osha hala okutya ohatu dulu okuhoolola okudulika kuye, ile tuha dulike kuye. Ovanyasha vamwe inava tulilwa po oshihopaenenwa shiwa kovadali vavo, ashike ova tokola okulongela Jehova nove li ovadiinini. Vamwe ove na ovadali ovadiinini, ovo ve va honga va kale ve hole Jehova. Lwanima, ounona ovo ova ka fiya po Jehova. Oshoshili kutya keshe umwe pauhandimwe oku na okutokola, ngeenge ota longele Jehova. (Jos. 24:15) Onghee hano, ovadali, ovo mu na ounona va efa po okulongela Jehova, inamu diladila kutya epuko leni.

6. Ohashi kumu ngahelipi omunyasha, ngeenge omudali waye okwa efa po okulongela Jehova?

⁶ Omafimbo amwe, omudali oha fiye po oshili nosho yo oukwaneumbo. (Eps. 27:10) Osho otashi dulu okunyemateka ounona, ovo va fimaneka nova lenga oshihopaenenwa shovadali vavo. Esther, oo e na xe a kondwa, okwa ti: “Onda li handi lili lwoikando, molwaashi tate ina dilila ko eshi a fiya po oshili. Okwa li a tokola kutya ina hala vali okulongela Jehova. Ondi hole tate, naashi a kondwa onda kala handi lipula shi na sha nonghalo nawa yaye. Osho osha etela nge oumbada wa pitilila.”

7. Jehova oku uditile ngahelipi ovanyasha, ovo ve na ovadali va kondwa?

⁷ Ovanyasha, ngeenge umwe womovadali veni okwa kondwa, nafye ohashi tu udifa nai. Kaleni mu na oushili kutya Jehova naye oha kala e udite ouyahame, oo hamu kala mu udite. Oku mu hole nokwa hafa, eshi tamu mu longele noudiinini. Nafye ovamwaxo meongalo ohatu kala yo twa hafa. Kaleni mu shii kutya hanye tamu velwa ombedi omolwomatokolo ovadali veni. Jehova okwa pa omunhu keshe ehoololo lokuninga omatokolo, ngaashi sha popiwa pehovelo. Keshe oo e liyapulila Jehova nokwa ninginifwa “oku na okuhumbata omutengi waye mwene.” — Gal. 6:5.

8. Oilyo youkwaneumbo idiinini ohai ningi po shike, ofimbo ya teelela omuholike wayo a alukile kuJehova? (Tala yo oshimhungu “Alukila kuJehova.”)

⁸ Ngeenge umwe, oo u hole, okwa efa po okulongela Jehova, oho kala u na elineekelo kutya efiku limwe ota ka alukila kuJehova. Oshike to dulu okuninga po momukokomoko wefimbo olo? Ninga ngaashi to dulu, opo u pameke eitavelo loye. Ngeenge owa ningi ngaho, oto ka tulila po oshihopaenenwa shiwa oilyo ikweni youkwaneumbo, tashi dulika nokuli naao a kondwa. Otashi ke ku pa yo eenghono odo wa pumbwa, opo u dule okulididimikila ouyehame wopamaliudo. Natu ka taleni keenghatu dimwe tadi longo, odo wa pumbwa okukatuka.

OSHO TO DULU OKUNINGA, OPO U PAMEKE EITAVELO LOYE

9. Omeenghedi dilipi to dulu okupameka eitavelo loye muJehova? (Tala yo oshimhungu “Omishangwa tadi hekeleke ovo ve na omuholike wavo a fiya po Jehova.”)

⁹ Kendabala okuninga keshe osho to dulu, opo u pameke eitavelo loye. Osha fimana okutwikila okulipameka nosho yo okupameka oilyo ikweni youkwaneumbo. Ongahelipi to dulu okuninga ngaho? Pameka eitavelo loye muJehova mokukala ho lesha Eendjovo daye pandjikilile, ho dilonga kudo nokukala pokwoongala kwopaKriste. Joanna, oo e na xe nomumwainakadona va fiya po Jehova, okwa ti: “Ohashi kwafele omadiladilo ange a kale ponhele, ngeenge handi lesha kombinga yavamwe ovo va tumbulwa mOmbiibeli ngaashi Abigail, Ester, Job, Josef naJesus. Oihopaenenwa yavo ohai pameke nge nokukwafela nge ndi kale nda pepelelwa pamadiladilo. Onda mona yo kutya omaimbilo oko-Broadcasting nao ohaa pameke nge.”

10. Ongahelipi Epsalme 32:6-8 tali tu kwafele tu lididimikile omaudjuu opamaliudo?

¹⁰ Mbubulila Jehova oisho yoye aishe. Ino efa po okwiilikana kuye, ngeenge owa mono wa wililwa po komaliudo. Twikila okwiindila kuKalunga ketu omunahole e ku kwafele u kale ho tale ko oinima monghedi omo he i tale ko, e ‘ku honge noku ku udikila ondjila ei u nokweenda nayo.’ (Lesha Epsalme 32:6-8.) Oshoshili kutya otashi dulika u kale u udite ouyahame, eshi to lombwele Jehova nghee u udite. Ashike Jehova oku udite ko filufilu ouyahame woye. Oku ku hole neenghono note ku ladipike u mu mbubulile omutima woye. — Ex. 34:6; Eps. 62:7, 8.

11. Metwokumwe nOvaheberi 12:11, omolwashike tu na okukala twe lineekela outekuduliko wopahole waJehova? (Tala yo oshimhungu “Okukonda mo omunyoni meongalo ohashi ulike kutya Jehova oku tu hole.”)

¹¹ Yambidida etokolo lovakulunhuongalo. Okukonda mo omunyoni meongalo oshi li oshitukulwa shelongekido laJehova. Outekuduliko oo wopahole ohau etele ovanhu aveshe ouwa, mwa kwatelwa nomunyoni. (Lesha Ovaheberi 12:11.) Vamwe otashi dulika va popye kutya ovakulunhuongalo inava ninge etokolo li li mondjila lokukonda mo umwe meongalo. Ndele luhapu ovanhu va tya ngaho, ihava popi shi na sha naasho omunyoni a ninga. Ihatu kala tu na oushili aushe we lixwa po. Onghee hano, natu kale tu na elineekelo kutya ovakulunhuongalo, ovo ve li mokomitiye yopamhangu, ova konakona noukeka omafinamhango Ombiibeli nova tula moilonga omatokolo “Omwene.” — 2 Omaf. 19:6.

12. Ouwa ulipi vamwe va mona, eshi va yambidida outekuduliko waJehova?

¹² Ngeenge owa yambidida etokolo lovakulunhuongalo lokukonda mo omuholike woye, otashi ka kwafela omunyoni a alukile kuJehova. Elizabeth, oo a tumbulwa nale, okwa ti: “Osha li shidjuu neenghono okuhakwatafana nomonamati wetu, oo a kula. Ndele konima eshi a alukila kuJehova okwa li a dimina kutya okwa li a wana shili okukondwa. Mokweendela ko kwefimbo, okwa ka popya kutya okwe lihonga oilihongomwa ihapu. Onda mona kutya outekuduliko waJehova alushe owa yuka.” Omushamane waye, Mark, okwa weda ko ta ti: “Lwanima, omonamati wetu okwa lombwela nge kutya okwa li a hala okwaalukila kuJehova, molwaashi inatu kendabala nandenande okukala hatu kwatafana naye. Onda pandula neenghono Jehova, eshi e tu kwafela tu dulike kuye.”

13. Oshike tashi dulu oku ku kwafela u dule okuungaunga nouyahame wopamaliudo?

¹³ Popya nookaume, ovo ve udite ko onghalo yoye. Kala ho endafana novamwatate novamwameme, ovo va pyokoka pamhepo notave ku kwafele u kale netaleko liwa. (Omayel. 12:25; 17:17) Joanna, oo a tumbulwa metetekelo, okwa ti: “Onda li ndi udite owike. Ashike eshi nda popya nookaume ovalineekelwa osha kwafela nge ndi dule okulididimika.” Ndele mbela oto ka ninga po shike, ngeenge vamwe meongalo otava popi oinima oyo tai naipike onghalo yoye?

14. Omolwashike tu na ‘okutwikila okulididimikilafana nokudiminafana po nehalo liwa’?

¹⁴ Kala ho lididimikile ovamwatate novamwameme. Inatu teelela keshe umwe a popye oinima ya yuka. (Jak. 3:2) Atusheni inatu wanenena. Onghee hano, inashi ku kumwifa, ngeenge vamwe kave shii osho ve na okupopya, ile va popye oinima oyo tai ku udifa nai. Paulelalela, kave shii kutya nava tye shike. Kaleka momadiladilo omayele omuyapostoli Paulus, oo taa ti: “Twikileni okulididimikilafana nokudiminafana po nehalo liwa ngeenge mwa ningafana nai. Ngaashi Jehova he mu dimine po nehalo liwa, nanye yo osho mu na okuninga.” (Kol. 3:13) Omumwameme umwe, oo e na omupambele a kondwa, okwa ti: “Jehova okwa kwafela nge ndi dimine po ovamwatate novamwameme, ovo va li tava kendabala okutwa nge omukumo, ndele ponhele yaasho ova udifa nge nai.” Oshike eongalo tali dulu okuninga po, opo li kwafele oilyo youkwaneumbo oyo idiinini?

EONGALO OTALI DULU OKUKWAFELA

15. Oshike hatu dulu okuninga po, opo tu kwafele oilyo oyo i na omupambele opo a kondwa?

¹⁵ Kala ho ungaunga pahole nosho yo nolukeno noilyo youkwaneumbo oyo idiinini. Omumwameme wedina Miriam okwa popya kutya okwa li ha kala a tila okuya kokwoongala konima eshi omumwainamati a kondwa. Okwa ti: “Onda li handi kala nda tila kutya ovanhu otava ka tya ngahelipi. Ashike opa li ovamwatate novamwameme vahapu, ovo va li hava kala va nyika oluhodi kombinga yaasho sha ningwa po. Kava li va popya sha shii shi na sha nomumwamememati oo a kondwa. Ohandi va pandula, molwaashi ova li va nyika oluhodi pamwe naame.” Omumwameme vali umwe okwa ti: “Konima eshi omonamati wetu a kondwa, ookaume ketu ovaholike ova li have uya oku tu hekeleka. Vamwe ove tu lombwela kutya kave shii kutya nava tye shike. Vamwe ohava lili pamwe naame, ofimbo vamwe hava tumine nge eenhumwafo detwomukumo. Osho va ninga osha kwafela nge neenghono!”

16. Ongahelipi eongalo tali dulu okutwikila okuyambidida ovo ve na omupambele a kondwa?

¹⁶ Twikila okuyambidida oilyo youkwaneumbo oyo idiinini. Ova pumbwa okuulikilwa ohole nokutuwa omukumo shi dulife nale. (Heb. 10:24, 25) Omafimbo amwe, oilyo youkwaneumbo oyo i na omupambele a kondwa ohai kala i udite kutya nayo inai pumbwa okweendafana neongalo. Inatu efa va kale ve udite ngaho. Ovanyasha, ovo ve na ovadali va fiya po oshili, otwa pumbwa oku va pandula noku va twa omukumo. Maria, oo e na omushamane a kondwa nokwa fiya po oukwaneumbo, okwa ti: “Ookaume kange vamwe ohave uya keumbo letu, hava teleke ko nokukwafela nge ndi konakone Ombiibeli nounona vange. Ohava kala ve udite ko ouyehame wange nohava lili pamwe naame. Ohava popile nge, ngeenge ovanhu tava popi oinima ihe li paushili kombinga yange. Ova twa nge omukumo ndi pule komesho.” — Rom. 12:13, 15.

17. Oshike ovakulunhuongalo tava dulu okuninga, opo va hekeleke ovo va wililwa po?

¹⁷ Ovakulunhuongalo, kaleni hamu kongo eemhito, opo mu twe omukumo oilyo youkwaneumbo oyo idiinini. Omu na oshinakuwanifwa she likalekelwa shokuhekeleka ovapiya vakweni, ovo ve na ovaholike vavo va fiya po Jehova. (1 Tes. 5:14) Kaleni hamu va tu omukumo, ofimbo okwoongala inaku hovela nokonima yako. Kaleni hamu va talele po komaumbo avo nokwiilikana pamwe navo. Kaleni hamu longo pamwe navo moukalele noku va shiva omafimbo nomafimbo pelongelokalunga loukwaneumbo weni. Ovafita vopamhepo ova pumbwa okufila oshisho eedi daJehova odo da nyika oluhodi, oku di kenukila noku di ulikila ohole oyo da pumbwa. — 1 Tes. 2:7, 8.

KALA U NA OMUKUMO NOKUTWIKILA OKULINEEKELA MUJEHOVA

18. Metwokumwe na 2 Petrus 3:9, Kalunga okwa hala ovanyoni va ninge shike?

¹⁸ Jehova “ina hala nande oumwe a hanaunwe po, ndele okwa hala ovanhu aveshe ve lidilulule.” (Lesha 2 Petrus 3:9.) Nonande omunhu okwa nyona enyono la kwata moiti, natango oku na ondilo momesho aye. Dimbuluka kutya Jehova okwa yandja oifuta i na ondilo, ekuliloyambo lOmona waye omuholike, opo a kulile ovalunde. Jehova ota kendabala okukwafela ovanhu va tya ngaho, va alukile kuye. Oku na elineekelo kutya otava ka alukila kuye, ngaashi sha ulikwa mefaneko laJesus li na sha nomumati a kanene. (Luk. 15:11-32) Vahapu ovo va li va fiya po oshili, lwanima ova ka alukila kuTate wavo womeulu omunahole. Eongalo ola li le va hambelela nomutima aushe. Elizabeth, oo a tumbulwa pehovelo, okwa li a hafa neenghono, eshi omonamati a alulilwa meongalo. Okwa popya shi na sha nonghalo oyo, a ti: “Ohandi pandula neenghono ovo va li ve tu twa omukumo, opo tuha sholole.”

19. Omolwashike tu na okutwikila okulineekela muJehova?

¹⁹ Ohatu dulu okulineekela filufilu muJehova. Alushe omayele aye ohae tu kwafele. Jehova oha yandje noku li Tate omunalukeno, oo e hole neenghono aveshe ovo ve mu hole nohave mu longele. Kala u shii kutya Jehova ite ke ku efa, ngeenge u li moudjuu. (Heb. 13:5, 6) Mark, oo a tumbulwa nale, okwa ti: “Jehova ke na efiku e tu efe. Ote ke tu kwafela, ngeenge tu li momaudjuu.” Jehova ota twikile oku ku pa “eenghono di dule dopaushitwe.” (2 Kor. 4:7) Onghee hano, oto dulu okukala omudiinini, u na omukumo, nonande umwe womovaholike voye okwa fiya po Jehova.