Mbela owe lilongekida ngoo oku ka “fyuulula edu”?
ATUSHENI otwa teelela nodjuulufi ewanifo leudaneko laJesus olo tali ti: “Ovo ve na omwenyo muwa otava kala va hafa, osheshi otava ka fyuulula edu.” (Mat. 5:5) Ovavaekwa otava ka fyuulula edu, eshi tava ka pangela pamwe naJesus meulu ve li eehamba. (Eh. 5:10; 20:6) Ovakriste vahapu vashili kunena ova teelela nodjuulufi oku ka fyuulula edu nosho yo okukala ko fiyo alushe va wanenena, ve na ombili nova hafa. Opo osho shi ningwe, otava ka longa oshilonga sha fimana. Pashihopaenenwa, otava ka kwafela mokuninga edu oparadisa, mokushilipaleka kutya ovanyumunwa ove na osho va pumbwa noku va honga. Diladila yo kunghee to dulu okuulika nokuli paife kutya owa halelela okukufa ombinga moilonga ya tya ngaho.
LILONGEKIDA OKU KA PANGELA EDU
Eshi Jehova a lombwela ovanhu va ‘yadife edu noli kale mepangelo lavo,’ okwa ulika kutya edu alishe mokweendela ko kwefimbo otali ka ninga oparadisa. (Gen. 1:28) Ovo tava ka kala nomwenyo fiyo alushe ove na okudulika koshipango sha faafana. Edu itali ka fikila la ninga oparadisa, molwaashi oshikunino shaEden kashi ko kunena. Otapa ka kala oilonga ihapu okudja pehovelo yokuwapaleka eenhele odo paife da nyonaunwa po. Osho otashi ka pula oilonga ihapu filufilu.
Osho otashi tu dimbulukifa oilonga oyo Ovaisrael va li va taalela, eshi va aluka okudja kuBabilon. Edu lavo ola kala lihe na ovanhu oule womido 70. Ashike Jesaja okwa li a xunganeka kutya kekwafo laJehova otava ka dula oku li alulila monghalo iwa. Exunganeko olo ola ti: “Ombuwa yasho ote i shitukifa ngaashi Eden nofuka yasho oshikunino shOmwene.” (Jes. 51:3) Jehova okwa li a kwafela Ovaisrael va ninge edu lavo onhele iwa. Sha faafana, kekwafo laJehova, ovo tava ka fyuulula edu otava ka dula oku li ninga oparadisa iwa. Nokuli nopaife oto dulu okuulika kutya owa hala okukufa ombinga moilonga ya tya ngaho.
Onghedi imwe omokuninga ngaashi to dulu, opo u kaleke eumbo loye nosho yo omudingonoko wa yela nou li palandulafano. Oto dulu okuninga ngaho, nonande ovashiinda shoye kavakoshoki. Oto dulu yo okukwafela mokuwapaleka nokukaleka monghalo iwa Olupale lOuhamba lomoshitukulwa sheni nosho yo Olupale lOyoongalele. Ngeenge eenghalo doye otadi shi pitike, oto dulu yo okuninga eindilo u ninge omuliyambi, opo u kwafele koshikondo shokuyandja oikwafa. Kungaho oto ka ulika kutya owa halelela okukwafela ovamwaxo, ngeenge opa holoka omhumbwe. Lipula kutya, ‘Mbela ohandi dulu okulihonga ounghulungu wonhumba, oo handi dulu okulongifa, ngeenge Jehova okwa pitike nge ndi kale nomwenyo fiyo alushe kombada yedu?’
LILONGEKIDA OKU KA KWAFELA OVANYUMUNWA
Diva konima eshi okamonakadona kaJairus ka nyumunwa, Jesus okwa popya kutya okaana naka pewe sha shokulya. (Mark. 5:42, 43) Otashi dulika kashi fi omutengi okufila oshisho okakadona komido 12. Ashike diladila kutya osho otashi ke tu pula oilonga i fike peni, eshi Jesus ta ka wanifa po eudaneko olo kutya ‘aveshe ovo ve li meembiladimbuluko otava ka uda ondaka yaye, ndele tava di mo.’ (Joh. 5:28, 29) Nonande Ombiibeli inai tu pa ouyelele muhapu, ohatu dulu okudiladila kutya ovanyumunwa otava ka pumbwa ekwafo, opo va mone oikulya, onhele yokukala nosho yo oikutu. Mbela oto dulu okuulika nokuli paife kutya owa halelela okukwafela? Oto dulu okulipula omapulo onhumba aa taa shikula.
Oshike to dulu okuninga kunena, opo u ulike kutya owe lilongekida oku ka fyuulula edu?
Ngeenge opa shiivifwa kutya omupashukilishikandjo ota talele po eongalo leni, mbela oto ke mu shiva e uye a lye omusha? Ngeenge ovapiya ovo ve li moilonga yefimbo li yadi ye likalekelwa ova tuminwa momapya okudja moBetel, ile ngeenge omupashukilishikandjo oshinakuwanifwa shaye osha xulifwa po, mbela ito dulu oku va kwafela, opo u va kongele onhele yokukala? Ngeenge oshoongalele shoshitukulwa, ile oshoongalele she likalekelwa otashi ka ningilwa moshitukulwa sheni, mbela ito dulu okuliyamba, opo u ka kwafele fimbo oshoongalele inashi hovela nokonima yasho, ile u lilongekide okutambula ko ovaenda?
LILONGEKIDA OKU KA HONGA OVANYUMUNWA
Metwokumwe nOilonga 24:15, otwa teelela ovanhu omabiliyona va ka nyumunwe. Vahapu vomovanhu ovo ova fya inava mona omhito yokushiiva Jehova. Otava ka mona omhito ya tya ngaho, konima ngeenge ovanyumunwa.a Ovapiya vaKalunga ovadiinini novanawino otava ka kufa ombinga moilonga ya tya ngaho yokuhonga. (Jes. 11:9) Charlotte, oo a udifila moEuropa, moSouth America nomuAfrica, okwa ti kutya okwa teelela nodjuulufi oshinima osho. Okwa popya te limemesha ta ti: “Onda teelela nodjuulufi oku ka honga ovanhu ovo tava ka nyumuka. Ngeenge handi lesha kombinga yaumwe oo a li ko monakudiwa, luhapu ohandi diladila kutya: ‘Ngeno omunhu oo okwa li e shii Jehova, ngeno onghalamwenyo yaye oya lunduluka monghedi imwe i lili.’ Onda teelela nodjuulufi oku ka lombwela ovanhu ovo tava ka nyumunwa osho va xutwifa.”
Nokuli novapiya ovadiinini vaJehova, ovo va li ko fimbo Jesus ine uya kombada yedu, otave ke lihonga shihapu. Diladila kehafo nokoufembanghenda oo hatu ka kala tu na wokuyelifila Daniel ewanifo lomaxunganeko oo a shanga, ndele ka li e a udite ko. (Dan. 12:8) Ohatu ka kwafela yo Rut naNaomi ve lihonge nghee oukwaneumbo wavo wa li oshitukulwa shepata laMessias. Itashi ka kala tuu shihafifa oku ka kufa ombinga moilonga yokuhonga oyo tai ka longwa mounyuni aushe, oo uhe na omafininiko nosho yo omapiyaaneko ounyuni ou woukolokoshi wokunena!
Ongahelipi to dulu okuulika paife kutya owa halelela oku ka honga ovanyumunwa? Onghedi imwe omokukendabala okuxwepopaleka ounghulungu woye wokuhonga nosho yo okukufa ombinga moilonga yokuudifa pandjikilile oyo tai longwa mounyuni aushe. (Mat. 24:14) Nokuli nongeenge omido doye, ile eenghalo vali dikwao oda ngabeka omalipyakidilo oye paife, eenghendabala doye otadi ka ulika kutya owe lilongekida oku ka honga ovanyumunwa.
Oshiwa okudiladila kombinga yomapulo aa a fimana: Mbela owa teelela ngoo nodjuulufi oku ka fyuulula edu? Mbela owa teelela ngoo nodjuulufi oku ka longa edu, oku ka kongela onhele nokuhonga ovo tava ka nyumunwa? Oto dulu okuulika kutya owe lilongekida mokukonga eemhito kunena, opo u kufe ombinga moilonga ya faafana naayo to ka longa, eshi to ka fyuulula edu.
a Tala oshitukulwa “Tava twala vahapu kouyuki” mOshungonangelo yaSeptemba 2022.