مۇسانىڭ 2-جازباسى
25 ەحوبا مۇساعا مىنانى ايتتى: 2 «يسرايل حالقىنا ماعان سي-تارتۋ اكەلسىن دەپ ايت. جۇرەگى تالپىندىرعان ٵربىر ادامنىڭ ماعان ارناپ اكەلگەن سي-تارتۋىن قابىل الىڭدار+. 3 ولار مىنالاردى الىپ كەلسىن: التىن+، كۇمىس+، مىس+، 4 كوك جانە ال قىزىل ٴجىپ، يىرىلگەن كۇلگىن ٴجۇن، ساپالى زىعىر ٴجىپ، ەشكىنىڭ ٴتۇبىتى، 5 قىزىل تۇسكە بويالعان قوي تەرىسى، يتبالىق تەرىسى، قاراعان اعاشى+، 6 شام مايى+، سونداي-اق مايلاۋ راسىمىنە* ارنالعان ماي+ مەن حوش ٴيىستى زاتتارعا قوسىلاتىن بالزام+، 7 ەفود*+ پەن ٴتوسقالتاعا*+ تاعىلاتىن ونيكس جانە باسقا دا اسىل تاستار. 8 ولار ماعان ارناپ كيەلى شاتىر جاساسىن، مەن ولاردىڭ اراسىندا مەكەندەيتىن بولامىن+. 9 كيەلى شاتىر مەن ونىڭ بۇيىمدارىن ٴدال مەن كورسەتكەن ۇلگىگە ساي جاساڭدار*+.
10 قاراعان اعاشىنان ساندىق جاسات. ونىڭ ۇزىندىعى ەكى جارىم شىنتاق*، ال ەنى مەن بيىكتىگى ٴبىر جارىم شىنتاق بولسىن+. 11 ٸشى-سىرتىن ساف التىنمەن قاپتا+، جوعارعى جيەگىن اينالدىرا التىنمەن اشەكەيلە+. 12 ساندىققا ارناپ التىننان ٴتورت ساقينا قۇي. ولاردى ساندىقتىڭ ٴتورت اياعىنىڭ جوعارعى جاعىنا — ەكەۋىن وڭ جاق بۇيىرىنە، ەكەۋىن سول جاق بۇيىرىنە — بەكىت. 13 قاراعان اعاشىنان سىرىقتار جاساپ، ولاردى التىنمەن قاپتا+. 14 ساندىقتى كوتەرىپ الىپ ٴجۇرۋ ٷشىن، وسى سىرىقتاردى ونىڭ ەكى بۇيىرىندەگى ساقينالاردان وتكىزىپ قوي. 15 ولاردى الىپ تاستاما، ٵردايىم ساقينالارعا كيگىزۋلى تۇرسىن+. 16 ساندىققا مەن بەرەتىن كۋالىك تاقتاشالارىن سالىپ قوي+.
17 ساندىقتىڭ قاقپاعىن دا ساف التىننان جاسا. ونىڭ ۇزىندىعى ەكى جارىم شىنتاق، ەنى ٴبىر جارىم شىنتاق بولسىن+. 18 التىننان سوعىپ ەكى كەرۋبتىڭ* ٴمۇسىنىن جاسا دا، ولاردى قاقپاقتىڭ ەكى جاعىنا+ — 19 بىرەۋىن ٴبىر شەتىنە، ەكىنشىسىن ەكىنشى شەتىنە — ورنات. وسىلاي قاقپاقتىڭ ۇستىنە كەرۋبتەر ورناتىلسىن. 20 ولاردىڭ قاناتتارى جوعارى كوتەرىلىپ، قاقپاقتى كولەگەيلەپ تۇرسىن+. ەكەۋى قاراما-قارسى ورناتىلىپ، جۇزدەرى قاقپاققا قاراتىلسىن. 21 قاقپاقپەن ساندىقتىڭ اۋزىن جاپ+، ال ىشىنە مەن بەرەتىن كۋالىك تاقتاشالارىن سالىپ قوي. 22 مەن ساعان سول جەردەن كورىنىپ، قاقپاقتىڭ ۇستىنەن سويلەيمىن+. يسرايلدىكتەرگە بەرەتىن بۇيرىعىمنىڭ ٴبارىن ساعان وسى كۋالىك ساندىعىنىڭ ۇستىندەگى ەكى كەرۋبتىڭ اراسىنان ايتامىن.
23 قاراعان اعاشىنان ۇستەل جاسا+. ونىڭ ۇزىندىعى ەكى شىنتاق، ەنى ٴبىر شىنتاق، بيىكتىگى ٴبىر جارىم شىنتاق بولسىن+. 24 ونى ساف التىنمەن قاپتاپ، جيەگىن التىنمەن اينالدىرا ورنەكتە. 25 ونىڭ استىنا اينالدىرا ەنى ٴتورت ەلى* بولاتىن جاقتاۋ ىستەپ، ونىڭ دا تومەنگى جيەگىن التىنمەن ورنەكتە. 26 ٴتورت التىن ساقينا جاساپ، ولاردى ۇستەلدىڭ اياقتارى ورناتىلعان ٴتورت بۇرىشىنا، 27 ۇستەل جاقتاۋىنا جاقىنىراق جەرگە بەكىتۋ كەرەك. ساقينالاردان ۇستەلدى كوتەرىپ جۇرەتىن سىرىقتار وتكىزىلەدى. 28 سىرىقتاردى قاراعان اعاشىنان جاساپ، التىنمەن قاپتا. ۇستەلدى سولارمەن كوتەرىپ ٴجۇرۋ قاجەت.
29 سونداي-اق ۇستەلگە ارنالعان جايپاق تاباقتار، توستاعاندار، سۇيىق تارتۋلار قۇياتىن كەرسەندەر مەن قۇمىرالار جاسا. ولار دا ساف التىننان ىستەلسىن+. 30 مەنىڭ الدىما اكەلىنگەن نان تارتۋى ٵردايىم ۇستەل ۇستىندە تۇراتىن بولسىن+.
31 ساف التىننان سوعىپ، شامدال جاسا+. ونىڭ تۇعىرى مەن دىڭگەگى بولسىن، ال دىڭگەگىنەن ساباقتار شىقسىن. ٵر ساباق توستاعان جاپىراقشالاردان، تۇيىندەر مەن گۇلدەردەن قۇرالسىن+. 32 دىڭگەكتەن ساباق تاراپ، ۇشەۋى ٴبىر جاعىنا، ۇشەۋى ەكىنشى جاعىنا شىعىپ تۇرسىن. 33 دىڭگەكتىڭ ٴبىر جاعىنداعى ٵر ساباقتا بادام گۇلىنە ۇقساس ٷش توستاعان جاپىراقشا بولسىن، ولار تۇيىندەرمەن جانە گۇلدەرمەن كەزەكتەسىپ ورنالاسسىن. ەكىنشى جاعىنداعى ساباقتارى دا ٴدال سولاي بولسىن. شامدالدىڭ دىڭگەگىنەن شىققان التى ساباقتىڭ ٴبارى وسىلاي جاسالۋ كەرەك. 34 ال دىڭگەكتىڭ وزىندە بادام گۇلىنە ۇقساس ٴتورت توستاعان جاپىراقشا بولسىن، ولار دا تۇيىندەرمەن جانە گۇلدەرمەن كەزەكتەسىپ ورنالاسسىن. 35 دىڭگەكتەن ەكى جاققا شىعىپ تۇرعان ٴبىرىنشى قاتارداعى ساباقتاردىڭ تۇيىسكەن جەرىنىڭ استىنا ٴتۇيىن جاسالسىن، ەكىنشى جانە ٷشىنشى قاتارداعى ساباقتاردىڭ دا تۇيىسكەن جەرىنىڭ استىنا ٴتۇيىن ىستەلسىن. وسىلاي التى ساباقتىڭ تۇبىندە ٴتۇيىن بولسىن. 36 تۇيىندەرى مەن ساباقتارىن قوسا العاندا، بۇكىل شامدال تۇتاس ساف التىننان سوعىلىپ جاسالۋ كەرەك+. 37 وعان قوياتىن جەتى شام جاسا. بۇل شامدار جانعاندا، جارىعى شامدالدىڭ الدىڭعى جاعىنا ٴتۇسىپ تۇراتىنداي بولسىن+. 38 ونىڭ قىسقاشتارى مەن كۇلالعىش قالاقتارى ساف التىننان جاسالسىن+. 39 شامدال مەن ونىڭ بارلىق قۇرال-جابدىقتارى ٷشىن ٴبىر تالانت* ساف التىن جۇمسالسىن. 40 بۇلاردىڭ ٴبارىن تاۋدا كورسەتىلگەن ۇلگىگە ساي جاسايتىن بول+.