ەلشىلەردىڭ ىستەرى
26 اگريپپا+ پاۋىلعا: «ٶزىڭدى قورعاپ سويلەۋىڭە بولادى»،— دەپ رۇقسات ەتتى. سوندا پاۋىل قولىن سوزىپ، ٴسوزىن بىلاي باستادى:
2 «اگريپپا پاتشا، ياھۋديلەردىڭ تاققان بارلىق ايىبىنا+ بايلانىستى ٶزىمدى ٴسىزدىڭ الدىڭىزدا تۇرىپ قورعاۋعا قۋانىشتىمىن. 3 ويتكەنى ٴسىز ياھۋديلەردىڭ بارلىق ادەت-عۇرىپتارى مەن داۋلى ماسەلەلەرىن جاقسى بىلەسىز. سوندىقتان مەنى سابىرلىقپەن تىڭداۋىڭىزدى وتىنەمىن.
4 جاستايىمنان حالقىمنىڭ اراسىندا جانە يەرۋساليمدە قالاي ٶمىر ٴسۇرىپ كەلگەنىم ياھۋديلەردىڭ كوبىنە ٴمالىم+. 5 ولار قالاسا، مەنىڭ پارىزشىل+ رەتىندە ٴدىنىمىزدىڭ ەڭ قاتال اعىمىن ۇستانعانىمدى راستاي الادى+. 6 ال ەندى قۇدايدىڭ اتا-بابالارىمىزعا بەرگەن ۋادەسىنە ٷمىت ارتقانىم+ ٷشىن تەرگەلىپ جاتىرمىن. 7 حالقىمىزدىڭ 12 رۋى دا كۇنى-ٴتۇنى ايانباي قاسيەتتى قىزمەت اتقارۋ ارقىلى وسى ۋادەنىڭ ورىندالۋىن كورەمىز دەپ ۇمىتتەنەدى. ۋا، پاتشا، ياھۋديلەر مەنى وسى ۇمىتكە بولا ايىپتاۋدا+.
8 قۇدايدىڭ ولگەندەردى تىرىلتەتىنىنە نەگە سەنبەيسىزدەر؟ 9 كەزىندە مەن نازارەتتىك يسانىڭ ەسىمىنە كوپ قارسىلىق كورسەتۋىم كەرەك دەپ ويلادىم، 10 ٵرى يەرۋساليمدە سولاي ەتتىم دە. جوعارعى ٴدىني قىزمەتكەرلەردەن وكىلەتتىك الىپ، كوپتەگەن قاسيەتتىلەردى تۇرمەگە جاپتىم+ جانە ولاردىڭ ٶلىم جازاسىنا كەسىلۋىن قۇپتادىم+. 11 ولاردى سەنىمدەرىنەن باس تارتقىزۋ ٷشىن، بارلىق ٴماجىلىسحانالاردى ارالاي ٴجۇرىپ، تالاي رەت جازالادىم. اشۋعا بۋلىققانىم سونشا — ولاردى باسقا قالالارعا دا بارىپ قۋدالادىم.
12 وسى ىستەرگە كىرىسىپ كەتكەن مەن جوعارعى ٴدىني قىزمەتكەرلەردەن تاپسىرما مەن وكىلەتتىك الىپ، داماسكىگە بارا جاتقانمىن. 13 سوندا تال تۇستە ماعان جانە سەرىكتەرىمە كوكتەن كۇن نۇرىنان دا جارىق ساۋلە ٴتۇستى+. 14 ٴبارىمىز جەرگە قۇلاي كەتتىك. سوندا ٴبىر داۋىس شىعىپ، ەۆرەي تىلىندە: —ساۋل، ساۋل، مەنى نەگە قۋدالاپ ٴجۇرسىڭ؟ ۇشكىر تاياققا* قارسىلاسا بەرسەڭ، وزىڭە زاقىم كەلتىرەسىڭ،— دەگەنىن ەستىدىم. 15 ٴبىراق مەن: —ٴسىز كىمسىز؟— دەگەنىمدە، ول: —مەن ٶزىڭ قۋدالاپ جۇرگەن يسامىن. 16 ورنىڭنان تۇر، ساعان قىزمەتشىم ٵرى كۋاگەرىم ەتىپ تاڭداۋ ٷشىن كورىندىم. سەن كورگەندەرىڭ جايلى جانە بولاشاقتا كورسەتەتىندەرىم جايلى جاريالايتىن بولاسىڭ+. 17 مەن سەنى ياھۋديلەر مەن وزگە ۇلتتاردىڭ اراسىنا جىبەرەمىن+، سونداي-اق ولاردىڭ قولىنان قۇتقارامىن. 18 تۇنەكتەن+ جارىققا+، شايتاننىڭ بيلىگىنەن+ قۇدايعا بەت بۇرۋلارى ٷشىن، سەنى ولاردىڭ كوزىن اشسىن+ دەپ جىبەرەمىن. سوندا ماعان سەنگەندەرىنىڭ ارقاسىندا قۇداي ولاردىڭ كۇنالارىن كەشىرىپ+، قاسيەتتى ەتىلگەندەرمەن بىرگە مۇرا بەرەدى.
19 سوندىقتان، اگريپپا پاتشا، كوكتەن كەلگەن ايانعا مويىنسۇنىپ، 20 ٴبىرىنشى، داماسكىدەگىلەرگە،+ سوسىن، يەرۋساليم تۇرعىندارىنا+، كەيىن بۇكىل ياھۋدەيا ايماعى مەن وزگە ۇلتتارعا بارىپ، ولاردىڭ وكىنۋى ٵرى بۇنى ٸس جۇزىندە كورسەتۋلەرىمەن قۇدايعا بەت بۇرۋلارى كەرەكتىگىن جاريالادىم+. 21 ياھۋديلەر مەنى وسى ٷشىن عيباداتحانادا ۇستاپ الىپ، ولتىرمەك بولدى+. 22 الايدا مەن پايعامبارلاردىڭ جانە مۇسانىڭ الدا بولاتىن جايتتار تۋرالى ايتقاندارىنان+ ارتىققا بارماي، قۇدايدىڭ كومەگىمەن ۇلىقتارعا دا، كىشىكتەرگە دە وسى كۇنگە دەيىن كۋالىك ەتىپ كەلەمىن. 23 اتاپ ايتقاندا، ٴماسىحتىڭ ازاپ شەگۋ كەرەك بولعانى+، ٴبىرىنشى بولىپ قايتا ٴتىرىلىپ+، ياھۋديلەر مەن وزگە ۇلتتارعا جارىق اكەلەتىنى تۋرالى كۋالىك ەتۋدەمىن+».
24 پاۋىل ٶزىن قورعاپ، وسىلاردى ايتىپ جاتقاندا، فەست قاتتى داۋىستاپ: «پاۋىل، سەنىڭ ەسىڭ دۇرىس ەمەس! كوپ بىلگەنىڭ سەنى ەسىڭنەن اداستىردى!»— دەدى. 25 ال پاۋىل بىلاي دەدى: «مەنىڭ ەسىم دۇرىس، جوعارى مارتەبەلى فەست. مەن شىندىق پەن ەستىلىكتىڭ سوزدەرىن ايتىپ تۇرمىن. 26 ٶزىم الدىندا ەركىن سويلەپ تۇرعان پاتشا بۇلاردى جاقسى بىلەدى. ايتقاندارىمنىڭ ەشقايسىسى ونىڭ نازارىنان تىس قالماعانىنا دا سەنىمدىمىن، ويتكەنى بۇلار كوزدەن تاسا جەردە جاسالعان جوق+. 27 اگريپپا پاتشا، پايعامبارلارعا سەنەسىز بە؟ سەنەتىنىڭىزدى بىلەمىن». 28 سوندا اگريپپا: «از ۋاقىتتىڭ ىشىندە مەنى ٴماسىحشى بولۋعا يلاندىرماقسىڭ عوي»،— دەدى. 29 پاۋىل: «از با، كوپ پە، ايتەۋىر ٴبىر ۋاقىتتا تەك ٴسىز عانا ەمەس، مەنى وسىندا تىڭداپ تۇرعانداردىڭ بارلىعى، بۇعاۋلانعان كۇيىمدى قوسپاعاندا، مەن سياقتى بولعاندارىڭىزدى قۇدايدان تىلەيمىن»،— دەدى.
30 كەيىن پاتشا ورنىنان تۇرعاندا، ٵمىرشى مەن بەرنيكە جانە وتىرعانداردىڭ بارلىعى ورىندارىنان تۇردى. 31 ولار سول جەردەن شىعىپ بارا جاتىپ، ٶزارا: «بۇل ادام ولىمگە كەسىلەتىندەي نە بۇعاۋلاناتىنداي ەشتەڭە جاساپ جۇرگەن جوق+»،— دەستى. 32 اگريپپا بولسا فەستكە: «ەگەر ول يمپەراتوردىڭ سوتىن تالاپ ەتپەگەندە+، بوساتىپ جىبەرۋگە بولار ەدى»،— دەدى.