قورىنتتىقتارعا 2-حات
9 قاسيەتتىلەرگە قىزمەت كورسەتۋ+ جونىندە سەندەرگە جازۋدىڭ قاجەتى دە جوق. 2 ويتكەنى بۇعان ارقاشان دايار ەكەندەرىڭدى بىلەمىن جانە احاياداعىلار بىلتىردان بەرى كومەككە ٵزىر دەپ، ماكەدوندىقتارعا ماقتانىپ تا ٴجۇرمىن. وسى قۇلشىنىستارىڭ ولاردىڭ كوبىنە قوزعاۋ سالدى. 3 ماقتاعانىمىز بەكەر بولماسىن، قايتا، ٶزىم ايتقانداي، سەندەر شىنىمەن دايار تۇرسىن دەپ، باۋىرلاستاردى جىبەرىپ وتىرمىن. 4 ايتپەسە ماكەدوندىقتار مەنىمەن بىرگە كەلسە، دايار ەمەس ەكەندەرىڭدى كورىپ، سەندەردى ايتپاي-اق قويايىن، سەندەرگە سەنگەن بىزدەر ۇياتقا قالىپ جۇرەرمىز. 5 سوندىقتان دا باۋىرلاستاردى سەندەرگە الدىن الا بارۋعا تالپىندىرىپ، ۋادە ەتكەن سيلارىڭدى جيناپ قويعاندارىن ٴجون كوردىم. سوندا تارتۋلارىڭ ٴبىز ماجبۇرلەگەندىكتەن ەمەس، وزدەرىڭ جومارتتىقپەن بەرگەن سي بولادى.
6 بۇل ورايدا ايتارىم — ساراڭ سەپكەن از، ال جومارت سەپكەن مول جينايدى+. 7 اركىم جۇرەك شەشىمىنە قاراي، ەش قينالماي، زورلىقسىز بەرسىن+، سەبەبى قۇداي قۋانىشپەن بەرەتىندەردى جاقسى كورەدى+.
8 ونىڭ ۇستىنە، سەندەردە قاجەتتىنىڭ ٴبارى ٵردايىم مول، ٵرى ارقيلى يگى ىستەر جاساۋعا كەرەكتىنىڭ ٴبارى جەتكىلىكتى بولۋ ٷشىن، قۇداي راقىمىن مولىنان جاۋدىرا الادى+. 9 (كيەلى جازبادا: «ول جومارتتىقپەن ٶز يەلىگىمەن ٴبولىسىپ، جارلىلارعا بەردى. ونىڭ ٵدىل ىستەرى ماڭگى باقي قالادى»،— دەلىنگەن+. 10 ديقانعا تۇقىمدى، ادامدارعا ناندى مولىنان بەرەتىن قۇداي سەندەرگە سەبەتىن تۇقىمدى اعىل-تەگىل ەتىپ بەرەدى، سونداي-اق ٵدىل ىستەرىڭنىڭ ٶنىمىن مولايتا تۇسەدى.) 11 بارلىق جاعىنان جومارت بولۋلارىڭ ٷشىن، ٴبارىن مولىنان الىپ جاتىرسىڭدار. ٴبىزدىڭ وسى اتقارىپ جاتقان ٸسىمىزدىڭ ارقاسىندا مۇنداي جومارتتىق ادامداردى قۇدايعا ريزاشىلىق بىلدىرۋگە تالپىندىرادى. 12 ويتكەنى وسى اتقارعان قىزمەتتەرىڭ قاسيەتتىلەردىڭ قاجەتتىلىگىن جاقسىلاپ قامتاماسىز ەتىپ+ قانا قويماي، قۇدايعا العىس ايتۋشىلاردىڭ كوپ بولۋىنا سەبەپشى بولماق. 13 ولار وسى قىزمەتتىڭ جەمىسىن كورىپ، وزدەرىڭ جاريالاپ جۇرگەن ٴماسىح تۋرالى ىزگى حابارعا باعىناتىندارىڭ ٷشىن جانە ولارعا دا، وزگەلەردىڭ بارىنە دە جومارتتىقپەن ساداقا بەرىپ جاتقاندارىڭ ٷشىن قۇدايدى دارىپتەۋدە+. 14 قۇداي سەندەرگە شەكسىز راقىمىن جاۋدىرىپ جاتقاندىقتان، ولار سۇيىسپەنشىلىكتەرىن ٴبىلدىرىپ، سەندەر ٷشىن جالبارىنۋدا.
15 تەڭدەسى جوق سيى ٷشىن قۇدايعا مىڭ دا ٴبىر راقمەت!