ايان
18 بۇلاردان كەيىن كوكتەن تومەن ٴتۇسىپ كەلە جاتقان زور بيلىگى بار باسقا ٴبىر پەرىشتەنى كوردىم. ونىڭ سالتاناتىنان جەر جارقىراپ كەتتى. 2 پەرىشتە قاتتى داۋىستاپ بىلاي دەدى: «ول قۇلادى! ۇلى بابىل قۇلادى+! ول جىنداردىڭ ورداسىنا جانە ارام رۋحتار* مەن ارام دا جەكسۇرىن قۇستاردىڭ مەكەنىنە اينالدى+! 3 كۇللى حالىقتار ونىڭ ازعىندىعىنىڭ* قۇمارلىعىنا تولى شاراپقا ماس بولدى+. جەرجۇزىنىڭ پاتشالارى ونىمەن ازعىندىق جاسادى+، ال جەر بەتىندەگى ساۋداگەرلەر ونىڭ ۇياتسىزدىقپەن شالقىپ ٶمىر سۇرگەنىنىڭ جانە مول داۋلەتىنىڭ ارقاسىندا بايىدى».
4 كوكتەن بىلاي دەگەن باسقا ٴبىر داۋىستى ەستىدىم: «مەنىڭ حالقىم، ونىڭ كۇنالارىنا ورتاقتاسىپ، باسىنا تۇسەتىن پالەلەرگە دۋشار بولماس ٷشىن ودان شىق+! 5 سەبەبى كۇنالارى كوبەيىپ كوككە جەتكەندىكتەن+، قۇداي ونىڭ ادىلەتسىز ىستەرىن* ەسكە الدى+. 6 ونىڭ باسقالارعا ىستەگەنى وزىنە ىستەلىنىپ+، قارىمتاسى ەكى ەسە قايتارىلسىن+. ٶزى ىشىمدىك ارالاستىرعان توستاعانعا+ وعان ەكى ەسە ەتىپ ارالاستىرىلىپ بەرىلسىن+. 7 ٶزىن قانشالىقتى ماداقتاپ، ۇياتسىزدىقپەن مولشىلىققا كەنەلگەن بولسا، وعان سونشاما ازاپ پەن قايعى-قاسىرەت تارتقىزىلسىن. ويتكەنى ول ىشتەي: —مەن تاقتا وتىرعان پاتشايىمدايمىن. مەن جەسىر ەمەسپىن، ەشقاشان قايعى-قاسىرەت شەكپەيمىن،— دەۋىن قويمايدى+. 8 سوندىقتان ول ٴبىر كۇننىڭ ىشىندە پالەگە — ٶلىم، قايعى-قاسىرەت پەن اشتىققا — ۇشىراپ، تۇگى قالماي وتقا ورتەنىپ كەتەدى+، سەبەبى ونى سوتتاۋشى ەحوبا قۇداي قۇدىرەتتى+.
9 سوندا ونىمەن ازعىندىق جاساعان ٵرى ونىمەن بىرگە ۇياتسىزدىقپەن شالقىپ ٶمىر سۇرگەن جەرجۇزىنىڭ پاتشالارى ول ورتەنىپ جاتقان وتتىڭ ٴتۇتىنىن كورگەندە، زار ەڭىرەپ، قايعىدان كوكىرەكتەرىن ۇرىپ جىلايتىن بولادى. 10 ونىڭ باسىنا تۇسكەن ازابىنان زارەلەرى ۇشقان ولار الىستا تۇرىپ: —قارالى كۇن تۋدى! ۇلى قالا+، مىقتى قالا بابىل، باسىڭا قارالى كۇن تۋدى، سەبەبى ٴبىر ساعات ىشىندە ساعان شىعارىلعان ۇكىم جۇزەگە استى!— دەيدى.
11 جەر بەتىندەگى ساۋداگەرلەر دە جىلاپ، قايعىرادى، ويتكەنى ولاردىڭ تاۋارلارىن ەندى ەشكىم ساتىپ المايدى. 12 ٴيا، ولاردىڭ التىن-كۇمىستەرىن، اسىل تاستارى مەن ٸنجۋ-مارجاندارىن؛ ساپالى زىعىر، جىبەك، كۇلگىن جانە ال قىزىل ماتالارىن؛ جۇپار ٴيىستى اعاشتان، ٴپىل سۇيەگىنەن، قىمبات اعاشتان، مىس، تەمىر جانە ٴمارماردان جاسالعان نەشە ٴتۇرلى بۇيىمدارىن؛ 13 سونداي-اق دارشىن، ٷندى دامدەۋىشى، حوش ٴيىستى زات، ٴيىسماي، لاداندارىن؛ شاراپ، ٴزايتۇن مايى، ساپالى ۇن مەن بيدايلارىن؛ ٸرىلى-ۇساقتى مالدارىن، جىلقىلار مەن اربالارىن، قۇلدارى مەن ادام ٶمىرىن ەشكىم ساتىپ المايدى. 14 سەن جانىڭ سونداي قالاعان كەرەمەت نارسەلەردەن قۇر قالدىڭ، جەڭسىك تاعامدارىڭ مەن سالتاناتىڭ دا عايىپ بولدى، ەندى قايتىپ ولاردى تاپپايسىڭ.
15 وسىلاردىڭ بارىمەن ساۋدا-ساتتىق جاساپ، بابىلدىڭ ارقاسىندا بايىپ العان ساۋداگەرلەر ونىڭ باسىنا تۇسكەن ازابىنان زارەلەرى قالماي، الىستا تۇرىپ، قايعىرا جىلاپ: 16 —قارالى كۇن تۋدى! ساپالى زىعىردان، كۇلگىن جانە ال قىزىل ماتادان كيىم كيىپ، التىن، اسىل تاستار جانە ٸنجۋ-مارجانمەن مولىنان بەزەندىرىلگەن+ ۇلى قالاعا قارالى كۇن تۋدى، 17 سەبەبى سونشاما مول بايلىق ٴبىر ساعات ىشىندە تالان-تاراج بولدى!— دەيدى.
كەمە باسشىلارى مەن تەڭىز ساياحاتشىلارى، تەڭىزشىلەر جانە تەڭىزدىڭ ارقاسىندا كۇن كورەتىندەردىڭ ٴبارى الىستا تۇرىپ، 18 ورتەنىپ جاتقان ونىڭ ٴتۇتىنىن كورگەندە: —ەشقاشان مۇنداي ۇلى قالا بولعان ەمەس!— دەپ زارلادى. 19 باستارىنا توپىراق شاشىپ، قايعىرا جىلاپ: —وعان قارالى كۇن تۋدى! تەڭىزدەگى كەمە يەلەرىنىڭ ٴبارى سونىڭ داۋلەتىنىڭ ارقاسىندا بايىعان ەدى. ۇلى قالاعا قارالى كۇن تۋدى، سەبەبى ول ٴبىر ساعات ىشىندە تالان-تاراج بولدى+!— دەپ ايقايلادى.
20 كوك، قۋان+! قاسيەتتىلەر+، ەلشىلەر مەن پايعامبارلار، سەندەر دە قۋانىڭدار، ويتكەنى قۇداي سەندەردىڭ يگىلىكتەرىڭ ٷشىن وعان شىعارعان ۇكىمىن جۇزەگە اسىردى+!»
21 سوندا قۇدىرەتتى پەرىشتە ۇلكەن ديىرمەن تاسىنداي ٴبىر تاستى الىپ، تەڭىزگە لاقتىرىپ كەپ جىبەردى دە، بىلاي دەدى: «ۇلى بابىل قالاسى دا وسىنداي ەكپىنمەن لاقتىرىلادى، ٵرى ەندى قايتىپ تابىلمايدى+. 22 بۇدان بىلاي سەنەن، بابىل، ارفامەن ٵن ايتقان ادامنىڭ داۋسى، سىبىزعىشى مەن كەرنەيشىنىڭ نە باسقا دا اسپاپتا وينايتىنداردىڭ اۋەنى ەستىلمەيدى. قولونەرمەن اينالىساتىن ەشبىر شەبەر دە بولمايدى، ديىرمەننىڭ شۋى دا ەستىلمەيدى. 23 ەندى قايتىپ شام جارىعىن كورمەيسىڭ، كۇيەۋجىگىت پەن قالىڭدىقتىڭ دا داۋسى ەستىلمەيدى. ويتكەنى ساۋداگەرلەرىڭ جەر بەتىنىڭ مىقتىلارى بولدى، ال سەن باقسى-بالگەرلىكپەن* اينالىسىپ+، كۇللى حالىقتاردى اداستىردىڭ. 24 ٴيا، پايعامبارلار مەن قاسيەتتىلەردىڭ+ جانە ولتىرىلگەندەردىڭ ٴبارىنىڭ قانى وسى قالادان تابىلدى+».