لۇقا
10 بۇدان كەيىن يەمىز يسا تاعى باسقا 70 شاكىرتىن تاڭداپ الىپ، ولاردى ٶزى باراتىن ٵربىر قالا مەن باسقا دا جەرلەرگە وزىنەن بۇرىن ەكى-ەكىدەن جىبەرىپ+، 2 بىلاي دەدى: «راسىندا دا، جينايتىن ەگىن كوپ، ٴبىراق جۇمىسشىلار از. سوندىقتان ەگىننىڭ يەسىنەن ونى جيناۋعا جۇمىسشىلار جىبەرۋىن وتىنىڭدەر+. 3 بارىڭدار، مەن سەندەردى قاسقىرلار اراسىنا جىبەرىلگەن قوزىلار سياقتى جىبەرىپ وتىرمىن+. 4 جولعا اقشا سالاتىن قالتا دا، تاماق سالاتىن دوربا دا، ارتىق ساندال دا الماڭدار+، سونداي-اق جول-جونەكەي بىرەۋگە سالەم بەرىپ كىدىرىپ قالماڭدار. 5 ٴبىر ۇيگە كىرگەندە اۋەلى: —وسى ۇيدە تاتۋلىق بولسىن!— دەپ تىلەڭدەر+. 6 ەگەر سول جەردە تاتۋلىقتى سۇيەتىن ادام بار بولسا، وعان تىلەگەندەرىڭ ورىندالادى، ال جوق بولسا، وزدەرىڭە قايتادى. 7 سول ۇيدە قالىپ+، بەرگەنىن ٸشىپ-جەڭدەر+، ويتكەنى ەڭبەك ەتكەن ادام اقىسىن الۋعا لايىق+. ۇيدەن ۇيگە كوشىپ جۇرمەڭدەر.
8 سونداي-اق قانداي دا ٴبىر قالادا سەندەردى قابىلداسا، الدارىڭا قويىلعان تاماقتى ٸشىپ-جەڭدەر، 9 ونداعى اۋرۋلاردى ساۋىقتىرىڭدار جانە ولارعا: —قۇداي پاتشالىعى تاياپ قالدى+!— دەڭدەر. 10 ال ەگەر قابىلداماسا، باستى كوشەلەرىنە شىعىپ: 11 —سەندەرگە قارسى كۋالىك بولۋ ٷشىن ٴتىپتى اياعىمىزعا جۇققان قالالارىڭنىڭ شاڭىن دا قاعىپ تاستايمىز+. ٴبىراق ەستەرىڭدە بولسىن، قۇداي پاتشالىعى تاياپ قالدى!— دەڭدەر. 12 سەندەرگە مىنانى ايتامىن: سوت كۇنى سول قالانىڭ جازاسىنان گورى سودوم قالاسىنىڭ جازاسى جەڭىلىرەك بولادى+!
13 ەي، حورازين قالاسى، قاسىرەتكە قالاسىڭ! ەي، بەتسايدا قالاسى، سەن دە قاسىرەتكە قالاسىڭ! ويتكەنى سەندەردە جاسالعان قۇدىرەتتى ىستەر تير مەن سيدون قالالارىندا جاسالسا، ولار الدەقاشان ازالى كيىم كيىپ، كۇلدە وتىرىپ* كۇنالارىنا وكىنەر ەدى+. 14 سوندىقتان سوت كۇنى سەندەردىكىنەن گورى تير مەن سيدوننىڭ جازاسى جەڭىلىرەك بولادى! 15 قاپارناۋم قالاسى، بالكىم، سەن كوككە جەتەرسىڭ؟ جوق، سەن كورگە* تاستالاسىڭ!
16 كىمدە-كىم سەندەردى تىڭداسا، مەنى دە تىڭداعانى+. كىم سەندەردى تىڭداۋدان باس تارتسا، ونىڭ مەنى دە تىڭداۋدان باس تارتقانى. ال كىم مەنەن باس تارتسا، ونىڭ مەنى جىبەرگەننەن دە باس تارتقانى+».
17 سودان 70 شاكىرتى قايتا ورالعاندا، قۋانا: «يەم، ٴسىزدىڭ اتىڭىزدان بۇيىرعاندا، ٴتىپتى جىندار دا باعىندى»+،— دەدى. 18 يسا ولارعا بىلاي دەدى: «شايتاننىڭ كوكتەن نايزاعايشا قۇلاپ تۇسكەنىن كوردىم+. 19 مىنە، مەن سەندەرگە جىلاندار مەن شايانداردى تاپتايتىن جانە جاۋدىڭ بارلىق كۇشىن جەڭەتىن بيلىك بەردىم+. سەندەرگە ەش نارسە دە زيانىن تيگىزبەيدى. 20 ٴبىراق جىنداردىڭ وزدەرىڭە باعىنعانىنا ەمەس، ەسىمدەرىڭنىڭ كوكتە جازىلعانىنا قۋانىڭدار+». 21 سول كەزدە يسا كيەلى رۋح پەن قۋانىشقا كەنەلىپ، بىلاي دەدى: «كوك پەن جەردىڭ يەسى — اكە، سەنى ەل الدىندا ماداقتايمىن! سەبەبى سەن بۇلاردى دانىشپاندار مەن ٴبىلىمپازداردان+ مۇقيات جاسىرىپ، بالا سياقتى كىشىپەيىل ادامدارعا اشتىڭ. ٴيا، اكە، ويتكەنى سەنىڭ قالاۋىڭ وسى ەدى+. 22 اكەم ماعان بارلىعىن بەردى. ۇلىنىڭ كىم ەكەنىن اكەدەن باسقا ەشكىم بىلمەيدى. اكەنىڭ كىم ەكەنىن ۇلىنان جانە ۇلى اشقىسى كەلگەن ادامنان باسقا ەشكىم بىلمەيدى+».
23 سوسىن ول شاكىرتتەرىنە بۇرىلىپ، وڭاشا بىلاي دەدى: «سەندەر كورىپ جۇرگەن نارسەلەردى كورگەندەر باقىتتى+. 24 سەندەرگە مىنانى ايتامىن: كوپتەگەن پايعامبارلار مەن پاتشالار سەندەر كورىپ جاتقانداردى كورگىسى كەلگەن، ٴبىراق كورگەن جوق+. سەندەر ەستىپ جاتقانداردى ەستىگىسى كەلگەن، ٴبىراق ەستىگەن جوق».
25 مۇسا زاڭىن جەتىك بىلەتىن بىرەۋ تۇرىپ، ونى سىناعىسى كەلىپ: «ۇستاز، ماڭگىلىك ومىرگە يە بولۋىم ٷشىن نە ىستەۋىم كەرەك؟»— دەپ سۇرادى+. 26 يسا: «زاڭدا نە دەپ جازىلعان؟ ونى قالاي تۇسىنەسىڭ؟»— دەدى. 27 ول: «ەحوبا قۇدايىڭدى بار جۇرەگىڭمەن، بۇكىل جان-تانىڭمەن، بار كۇش-قۋاتىڭمەن جانە بارلىق اقىل-ويىڭمەن ٴسۇي!»+ سونداي-اق «وزگە ادامدى ٶزىڭدى سۇيگەندەي ٴسۇي»+،— دەپ جاۋاپ بەردى. 28 يسا: «دۇرىس جاۋاپ بەردىڭ. وسىلاي ىستەي بەر، سوندا ماڭگىلىك ومىرگە يە بولاسىڭ+»،— دەدى.
29 ٴبىراق ٶزىن اقتاعىسى كەلگەن+ ول يسادان: «سوندا مەن ناقتى كىمدى ٴسۇيۋىم كەرەك؟»— دەپ سۇرادى. 30 بۇعان يسانىڭ جاۋابى مىناۋ بولدى: «ٴبىر ادام يەرۋساليمنەن يەريحونعا ىلديلاپ بارا جاتىپ، قاراقشىلاردىڭ قولىنا ٴتۇسىپتى. قاراقشىلار ونى توناپ، ۇرىپ-سوعىپ، شالا-جانسار ەتىپ تاستاپ كەتەدى. 31 سوندا سول جولمەن كەلە جاتقان ٴبىر ٴدىني قىزمەتكەر ونى كورەدى دە، جولدىڭ ارعى بەتىنە ٶتىپ، كەتە بەرەدى. 32 سول سياقتى، جاڭاعى جەرمەن ٶتىپ بارا جاتقان ٴبىر لەۋىلىك ونى كورەدى، ول دا جولدىڭ ارعى بەتىنە ٶتىپ، كەتە بەرەدى. 33 ال سول جولمەن جولاۋشىلاپ بارا جاتقان ٴبىر ساماريالىق كىسى+ ونى كورىپ، اياپ كەتەدى. 34 جانىنا بارىپ، جارالارىنا ماي مەن شاراپ قۇيىپ، تاڭادى. سوسىن ەسەگىنە وتىرعىزىپ، ٴبىر قوناقۇيگە اكەلىپ، قامىن جاسايدى. 35 ەرتەسىنە قوناقۇيدىڭ يەسىنە ەكى دينار* بەرىپ: —مىنا كىسىگە قامقورلىق كورسەتىڭىز. ەگەر ارتىق شىعىن شىعارساڭىز، قايتىپ ورالعاندا تولەيمىن،— دەيدى. 36 سونىمەن، وسى ۇشەۋىنىڭ قايسىسى قاراقشىلاردىڭ قولىنا تۇسكەن كىسىگە سۇيىسپەنشىلىك تانىتتى+ دەپ ويلايسىڭ؟» 37 الگى كىسى: «وعان قايىرىمدىلىق جاساعانى»+،— دەپ جاۋاپ بەرگەندە، يسا: «ەندەشە، بار دا، سەن دە سولاي ىستە»+،— دەدى.
38 يسا شاكىرتتەرىمەن بىرگە جول ٴجۇرىپ بارا جاتىپ، ٴبىر اۋىلعا كىردى. سول جەردە ونى مارتا ەسىمدى ايەل+ ۇيىنە قوناققا شاقىردى. 39 ونىڭ ٴماريام دەگەن ٴسىڭلىسى بار ەدى. ول يەمىز يسانىڭ اياق جاعىندا وتىرىپ، ٴسوزىن ۇيىپ تىڭدادى. 40 ال مارتانىڭ اۋرە-سارساڭى كوپ بولدى. ول يساعا كەلىپ: «يەم، ٴسىڭلىمنىڭ بارلىق جۇمىستى ماعان قالدىرعانىن كورمەيسىز بە؟ ايتىڭىزشى، ماعان كەلىپ كومەكتەسسىن»،— دەدى. 41 ال يەمىز يسا: «مارتا، مارتا، سەن كوپ نارسەنى ويلاپ، ۋايىمدايسىڭ. 42 كوپ نارسەنىڭ قاجەتى جوق، كەرەگى بىرەۋ-اق قوي. ٴماريام دۇرىس* نارسەنى تاڭدادى+، ودان ونى ەشكىم دە ايىرا المايدى»،— دەدى.