ەزەكيەل
1 مەن وتىزىنشى جىلدىڭ ٴتورتىنشى ايىنىڭ بەسىنشى كۇنى كەبار وزەنىنىڭ+ جاعاسىندا جەر اۋدارىلعان ەلدەستەرىمنىڭ اراسىندا جۇرگەنىمدە+، كوك اشىلىپ، قۇدايدان ايان الدىم. 2 بۇل ەحونيا+ پاتشانىڭ جەر اۋدارىلعاننان كەيىنگى بەسىنشى جىلدىڭ ٴتورتىنشى ايىنىڭ بەسىنشى كۇنى ەدى. 3 سوندا ەحوبا* ماعان، ٴدىني قىزمەتكەر ٴبۋزيدىڭ ۇلى ەزەكيەلگە*، حالدەي+ ەلىندەگى كەبار وزەنىنىڭ جاعاسىندا ٴسوزىن ارنادى. سول جەردە ەحوبا ماعان قۇدىرەتىن دارىتتى+.
4 اياندا مەن مىنانى كوردىم: سولتۇستىكتەن قاتتى داۋىل كوتەرىلىپ كەلە جاتتى+، الىپ بۇلت پەن الاۋلاعان وت* كورىندى+. بۇلتتىڭ اينالاسى جارقىراپ تۇردى، ال وتتىڭ ورتاسىندا جالتىراعان التىن مەن كۇمىستىڭ قوسپاسىنا ۇقسايتىن بىردەڭە بار ەدى+. 5 ونىڭ ورتاسىندا تىرشىلىك يەسىنە ۇقسايتىن ٴتورت بەينە تۇردى+. ولاردىڭ ٴتۇر-تۇرپاتى مىناداي ەدى: دەنەلەرى ادامدىكىندەي؛ 6 ٴارقايسىسىنىڭ ٴتورت بەتى جانە ٴتورت قاناتى بولدى+؛ 7 اياقتارى تىك، ال تولارساقتان تومەن جاعى تورپاقتىڭ تۇياعىنداي؛ اياقتارى جالتىراتىلعان مىس ىسپەتتى جالت-جۇلت ەتىپ تۇردى+؛ 8 ولاردىڭ ٴتورت قاناتى جانە ٵر قاناتىنىڭ استىندا ادامدىكىندەي قولى بار ەدى؛ تورتەۋىنىڭ دە بەتتەرى مەن قاناتتارى بولدى؛ 9 قاناتتارى ٴبىر-بىرىنىكىنە تيەتىن. ولار جىلجىعاندا، بۇرىلمايتىن، ٴارقايسىسى تۋرا جۇرەتىن+.
10 تورتەۋىنىڭ دە الدىندا ادامدىكىندەي، وڭ جاعىندا ارىستاندىكىندەي+، سول جاعىندا بۇقانىكىندەي+، ال ارتىندا بۇركىتتىكىندەي+ بەتتەرى بار ەدى+. 11 تىرشىلىك يەلەرىنىڭ بەت الپەتى وسىنداي بولاتىن. ولاردىڭ قاناتتارى جوعارى قاراي كوتەرۋلى تۇردى. ٴارقايسىسىنىڭ ەكى قاناتى ٴبىر-بىرىنىكىنە تيەتىن، ال قالعان ەكى قاناتىمەن دەنەلەرىن جاباتىن+.
12 ٴارقايسىسى كيەلى رۋح قايدا باعىتتاسا، سولاي قاراي تۋرا العا جۇرەتىن+. جۇرگەندە، بۇرىلمايتىن. 13 تىرشىلىك يەلەرىنىڭ تۇلا بويى قىزىپ تۇرعان شوق ىسپەتتى ەدى. ولاردىڭ ارالارىندا الاۋعا ۇقسايتىن بىردەڭەلەر ٵرى-بەرى قوزعالىپ ٴجۇردى. الاۋلارداعى وت جالىنداپ، ال وتتان نايزاعاي ويناپ تۇردى+. 14 العا نە ارتقا قوزعالعاندا، تىرشىلىك يەلەرى نايزاعايعا ۇقسايتىن.
15 ٴتورت بەتى بار تىرشىلىك يەلەرىنىڭ ٴارقايسىسىنىڭ جانىندا، جەردە ٴبىر-ٴبىر دوڭگەلەكتىڭ تۇرعانىن كوردىم+. 16 دوڭگەلەكتەر حريزوليتتەي جالتىرايتىن. تورتەۋىنىڭ دە ٴپىشىنى مەن قۇرىلىسى بىردەي ەدى: ٴبىر دوڭگەلەكتىڭ ىشىندە تاعى ٴبىر دوڭگەلەك ورنالاسقانداي كورىنەتىن*. 17 دوڭگەلەكتەر قوزعالعاندا، بۇرىلماي-اق ٴتورت باعىتتىڭ بىرىنە قاراي جۇرە بەرەتىن. 18 دوڭگەلەك قۇرساۋلارىنىڭ ۇلكەندىگى سونشا — بويىڭدى ۇرەي بيلەيدى. قۇرساۋلاردىڭ تورتەۋى دە اينالدىرا كوزدەرگە تولى ەدى+. 19 تىرشىلىك يەلەرى جۇرسە، دوڭگەلەكتەر بىرگە جۇرەتىن، جەردەن كوتەرىلسە، بىرگە كوتەرىلەتىن+. 20 رۋح قايدا باعىتتاسا، تىرشىلىك يەلەرى سولاي قاراي جۇرەتىن. ولار جوعارى كوتەرىلگەن سايىن قاستارىنداعى دوڭگەلەكتەر دە كوتەرىلەتىن، سەبەبى تىرشىلىك يەلەرىندەگى رۋح دوڭگەلەكتەردە دە بولدى. 21 تىرشىلىك يەلەرى جۇرگەندە، ولار دا جۇرەتىن، توقتاسا، توقتايتىن. جەردەن كوتەرىلسە، بىرگە كوتەرىلەتىن، سەبەبى تىرشىلىك يەلەرىندەگى رۋح دوڭگەلەكتەردە دە بولدى.
22 تىرشىلىك يەلەرىنىڭ توبە جاعىندا ادامدى تاڭ-تاماشا قالدىراتىن جالتىراعان مۇز ايدىنىنا ۇقسايتىن تاقتا سياقتى بىردەڭە توسەلىپ جاتتى+. 23 تاقتانىڭ استىندا تىرشىلىك يەلەرىنىڭ قاناتتارى ٴبىر-بىرىنە قاراي جازىلىپ تۇردى. ولاردىڭ ٴارقايسىسىنىڭ وڭ جانە سول جاقتارىندا دەنەلەرىن جاباتىن قوس قاناتتارى بار ەدى. 24 ولار قوزعالعاندا، مەن قاناتتارىنىڭ شۋىلىن ەستىدىم. ول سارقىراپ اققان سۋدىڭ گۇرىلىندەي، قۇدىرەتى شەكسىز قۇدايدىڭ داۋسىنداي، قالىڭ قولدىڭ شۋىنداي ەدى+. ولار توقتاعاندا، قاناتتارىن تومەن تۇسىرەتىن.
25 تىرشىلىك يەلەرىنىڭ توبە جاعىنداعى تاقتانىڭ ۇستىنەن داۋىس ەستىلدى. (ولار توقتاعاندا، قاناتتارىن تومەن تۇسىرەتىن.) 26 تاقتانىڭ ۇستىڭگى جاعىندا جاقۇت تاسى سياقتى بىردەڭە بولدى+، ول تاققا ۇقسايتىن+، ال ۇستىندە ادام ىسپەتتەس بىرەۋ وتىردى+. 27 ونىڭ بەلىنەن جوعارعى جاعى وتتاي لاۋلاعان التىن مەن كۇمىستىڭ قوسپاسىنداي جالتىراپ+، ال بەلىنەن تومەنگى جاعى وتتاي الاۋلاپ+ تۇردى. ال ونىڭ اينالاسى ساۋلە شاشىپ تۇردى. 28 ونىڭ اينالاسىنداعى ساۋلە جاڭبىرلى كۇنى بۇلت اراسىنان شىعاتىن كەمپىرقوساققا ۇقسايتىن+. بۇل ەحوبانىڭ بەينە ٴبىر سالتاناتى ىسپەتتى ەدى+. مۇنى كورگەندە، مەن جەرگە ەتپەتتەي كەتتىم. سوندا بىرەۋدىڭ داۋسىن ەستىدىم.