پاتشالار 1-جازبا
18 ٴبىرتالاي ۋاقىتتان كەيىن، قۋاڭشىلىق جايلاعان ٷشىنشى جىلى+، ەحوبا ٸلياسقا: «تۇر دا، احاب پاتشاعا بار، ويتكەنى مەن جەر بەتىنە جاۋىن جاۋدىرامىن+»،— دەدى. 2 ٸلياس احاب پاتشاعا بارماق بولىپ جولعا شىقتى. بۇل كەزدە ساماريادا اشارشىلىق ۇدەپ تۇرعان ەدى+.
3 وسى ەكى ارادا احاب ساراي باسقارۋشىسى اباديانى شاقىرتتى. (اباديا ەحوبانى بارىنشا قاستەرلەيتىن ادام ەدى. 4 ەزابەل پاتشايىم+ ەحوبانىڭ پايعامبارلارىنىڭ كوزىن قۇرتىپ جاتقاندا، ول 100 پايعامباردى ەلۋ-ەلۋدەن ۇڭگىرلەرگە جاسىرىپ، نان-سۋمەن قامتاماسىز ەتىپ تۇردى.) 5 پاتشا ابادياعا: «بۇكىل ەلدى ارالاپ، بارلىق بۇلاقتار مەن سايلاردى قاراپ شىق. بالكىم، جىلقى مەن قاشىرلاردى ساقتاپ قالۋعا جەتەرلىك ٴشوپ تاۋىپ، قالعان مالىمىزدى امان الىپ قالارمىز»،— دەپ تاپسىردى. 6 سودان ولار ارالايتىن جەردى ٶزارا ٴبولىپ الىپ، احاب ٴبىر جاققا، ال اباديا باسقا جاققا كەتتى.
7 اباديا كەلە جاتقاندا، كەنەتتەن ٸلياستى كەزدەستىردى. ول پايعامباردى بىردەن تانىپ، جەرگە دەيىن ٴيىلىپ تاعزىم ەتتى دە: «ٸلياس مىرزام، بۇل شىنىمەن-اق ٴسىز بە ەدىڭىز؟»— دەپ سۇرادى+. 8 ول: «ٴيا، بۇل مەنمىن. قوجايىنىڭا بارىپ، مەنىڭ وسىندا ەكەنىمدى ايت»،— دەدى. 9 ٴبىراق اباديا مىنانى ايتتى: «احابتىڭ ۋىسىنا سالىپ بەرىپ ولتىرتەتىندەي، مەن قانداي كۇنا جاسادىم؟ 10 قۇدايىڭىز ەحوبانىڭ الدىندا شىن ايتامىن*، قوجايىنىم ادام جىبەرىپ، ٴسىزدى ىزدەتپەگەن پاتشالىق تا، ەل دە قالعان جوق. سول پاتشالىقتاعى نە ەلدەگى ادامدار «ول مۇندا جوق» دەسە، احاب ولارعا انت بەرگىزەتىن+. 11 ەندى ٴسىز ماعان «قوجايىنىڭا بارىپ، ٸلياس وسىندا ەكەن دەپ ايت» دەيسىز. 12 مەن قاسىڭىزدان كەتكەندە، ەحوبانىڭ رۋحى ٴسىزدى ماعان بەيمالىم ٴبىر جاققا الىپ كەتەدى+. ال مەن احابقا بارىپ ايتقان سوڭ، ول ٴسىزدى تابا الماسا، كوزىمدى قۇرتادى عوي. مەن بولسام بالا كۇنىمنەن ەحوبانى قاستەرلەيتىن اداممىن. 13 ەزابەل ەحوبانىڭ پايعامبارلارىنىڭ كوزىن قۇرتىپ جاتقاندا، مەنىڭ نە ىستەگەنىمدى ەستىمەگەن بە ەدىڭىز؟ مەن ەحوبانىڭ 100 پايعامبارىن ەلۋ-ەلۋدەن ۇڭگىرلەرگە جاسىرىپ، نان-سۋمەن قامتاماسىز ەتىپ ٴجۇردىم+. 14 ال ەندى ٴسىز ماعان «قوجايىنىڭا بارىپ، ٸلياس وسىندا ەكەن دەپ ايت» دەيسىز. ول مەنى ٶلتىرىپ تاستايدى عوي». 15 ٴبىراق ٸلياس: «ٶزىم قىزمەت ەتىپ جۇرگەن اسكەرباسى ەحوبانىڭ الدىندا شىن ايتامىن*، مەن بۇگىن پاتشاعا بارىپ كورىنەمىن»،— دەدى.
16 سوندا اباديا احابقا بارىپ، بولعان جايتتى مالىمدەدى. احاب ىلياسپەن كەزدەسۋ ٷشىن جولعا شىقتى.
17 ول ٸلياستى كورە سالا: «يسرايلدى پالەگە ۇشىراتۋشى، بۇل سەن بە ەدىڭ؟»— دەدى.
18 ال ٸلياس وعان مىنانى ايتتى: «يسرايلدى پالەگە ۇشىراتقان — مەن ەمەس، سەن جانە سەنىڭ اكەڭنىڭ اۋلەتى! سەندەر ەحوبانىڭ بۇيرىقتارىن ەلەمەي، باعالدارعا تابىنىپ كەتتىڭدەر+. 19 ال ەندى حابارشىلار جىبەرىپ، بۇكىل يسرايل حالقىن جانە ەزابەلدىڭ داستارقانىنان ٸشىپ-جەيتىن باعالدىڭ 450 پايعامبارى مەن قاسيەتتى باعانانىڭ*+ 400 پايعامبارىن مەنىڭ الدىما، كارميل تاۋىنا+ جينا!» 20 سوندا احاب بۇكىل يسرايل حالقىنا حابار جىبەرىپ، پايعامبارلاردى كارميل تاۋىنا جينادى.
21 ٸلياس حالىققا جاقىنداپ كەلىپ: «قاشانعى ەكىويلى بولىپ جۇرە بەرمەكسىڭدەر*+؟ ەگەر ەحوبا شىنايى قۇداي بولسا، سونىڭ جاعىنا شىعىڭدار+. ال باعالدى شىنايى قۇداي دەسەڭدەر، وندا سونىڭ جاعىنا شىعىڭدار»،— دەدى. ٴبىراق جۇرت ٴلام-ميم دەمەدى. 22 سوندا ٸلياس بىلاي دەپ قوستى: «ەحوبانىڭ پايعامبارلارىنان مەن عانا قالدىم+، ال باعالدىڭ 450 پايعامبارى بار. 23 بىزگە ەكى تايىنشا اكەلىنسىن. ولار بىرەۋىن تاڭداپ الىپ، مۇشەلەسىن دە، وتىننىڭ ۇستىنە قويسىن، ٴبىراق وت تۇتاتپاسىن. مەن دە ەكىنشىسىن مۇشەلەپ، وتىننىڭ ۇستىنە قويامىن، ٴبىراق وت تۇتاتپايمىن. 24 بۇدان كەيىن سەندەر ٶز قۇدايلارىڭدى شاقىرىڭدار+، ال مەن ەحوبانى اتىن اتاپ شاقىرامىن. قايسىسى كوكتەن وت جىبەرىپ جاۋاپ بەرسە، شىنايى قۇداي — سول+». سوندا بۇكىل جۇرت: «جارايدى، سولاي بولسىن!»— دەدى.
25 ٸلياس باعالدىڭ پايعامبارلارىنا: «الدىمەن سەندەر تايىنشالاردىڭ بىرەۋىن تاڭداپ الىپ، مۇشەلەڭدەر، كوپسىڭدەر عوي. سوسىن قۇدايلارىڭنىڭ اتىن اتاپ شاقىرىڭدار، ٴبىراق وت تۇتاتپاڭدار»،— دەدى. 26 ٴسۇيتىپ، ولار وزدەرىنە بەرىلگەن تايىنشانى الىپ، مۇشەلەدى دە، تاڭەرتەڭنەن تۇسكە دەيىن: «ۋا، باعال، جاۋاپ بەرە كور!»— دەپ، باعالدىڭ اتىن شاقىرۋمەن بولدى. ٴبىراق ەشقانداي داۋىس تا، جاۋاپ تا بولمادى+. ولار بولسا وزدەرى تۇرعىزعان قۇرباندىق ورنىن اينالا سەكەڭدەپ بيلەپ ٴجۇردى. 27 تۇسكە قاراي ٸلياس: «بار داۋىستارىڭمەن ايقايلاڭدار! نە دەگەنمەن ول قۇداي عوي+! بالكىم، قولى تيمەي جاتقان شىعار نە تۇزگە وتىرۋعا* كەتكەن بولار. يا بولماسا ۇيىقتاپ جاتسا كەرەك، ونى وياتۋ قاجەت شىعار!»— دەپ، ولاردى مازاق ەتە باستادى. 28 باعالدىڭ پايعامبارلارى بار داۋىستارىمەن ايعايلاپ، داستۇرلەرى بويىنشا، دەنەلەرىن قان جوسا ەتىپ قانجارمەن تىلگىلەپ، نايزامەن جاراقاتتادى. 29 ولار ٴتۇس اۋىپ استىق تارتۋىن ۇسىناتىن ۋاقىت كەلگەنگە دەيىن قۇتىرىندى*. ٴبىراق ەشقانداي داۋىس بولمادى، ەشكىم جاۋاپ تا قاتپادى، كوڭىل دە بولمەدى+.
30 سوندا ٸلياس جۇرتقا: «ماعان جاقىنداڭدار!»— دەدى، ولار جاقىندادى. بۇدان كەيىن ول ەحوبانىڭ قيراعان قۇرباندىق ورنىن قايتا تۇرعىزدى+. 31 ٸلياس جاقىپتىڭ 12 ۇلىنان تاراعان رۋلاردىڭ سانىنا قاراي 12 تاس الدى. (كەزىندە ەحوبا جاقىپقا: «سەنىڭ ەسىمىڭ يسرايل بولادى»،— دەگەن ەدى+.) 32 سوسىن سول تاستاردان ەحوبانىڭ ەسىمىنە ارناپ قۇرباندىق ورنىن تۇرعىزدى دا+، ەكى دوربا* استىق ٴدانىن سەبۋگە بولاتىن جەردى اينالدىرا ارىق قازدى. 33 بۇدان كەيىن قۇرباندىق ورنىنا وتىن قالاستىردى دا+، ۇستىنە مۇشەلەنگەن تايىنشانى قويعان سوڭ، جۇرتقا: «ٴتورت ۇلكەن قۇمىراعا سۋ تولتىرىپ اكەپ، تۇگەل ورتەلەتىن قۇرباندىق پەن وتىننىڭ ۇستىنە قۇيىڭدار!»— دەپ بۇيىردى. 34 سوسىن: «تاعى دا سۋ قۇيىڭدار»،— دەدى. ولار سولاي ەتكەندە، ٸلياس: «ٷشىنشى رەت قۇيىڭدار»،— دەدى. جۇرت ٷشىنشى رەت تاعى قۇيدى. 35 قۇرباندىق ورنىنىڭ جان-جاعىنان سۋ اعىپ كەتتى. ٸلياس ارىقتى دا سۋعا تولتىردى.
36 كەشكى استىق تارتۋىن ۇسىناتىن ۋاقىت كەلگەندە+، ٸلياس پايعامبار العا شىعىپ، بىلاي دەپ دۇعا ەتتى: «ۋا، ىبىرايىمنىڭ، ىسقاقتىڭ، يسرايلدىڭ قۇدايى ەحوبا+! بۇگىن مىنا جۇرتقا يسرايلدىڭ قۇدايى ٶزىڭ ەكەنىڭدى، ال مەن سەنىڭ قىزمەتشىڭ ەكەنىمدى ٵرى ٴبارىن سەنىڭ ايتۋىڭ بويىنشا ىستەپ جاتقانىمدى بىلدىرە كور+. 37 جاۋاپ بەرشى، ۋا، ەحوبا! جاۋاپ بەرە كور! سوندا مىنا حالىق، ۋا، ەحوبا، سەنىڭ شىنايى قۇداي ەكەنىڭدى ٵرى جۇرەكتەرىن وزىڭە بۇرىپ جاتقانىڭدى بىلەتىن بولادى+».
38 سوندا ەحوبادان وت ٴتۇسىپ، قۇرباندىق+ پەن وتىندى، تاستار مەن توپىراقتى جالماپ، ارىقتاعى سۋدى دا قۇرعاتىپ جىبەردى+. 39 جۇرت مۇنى كورە سالا، ەتپەتتەپ جىعىلا كەتىپ: «ەحوبا — شىنايى قۇداي! ەحوبا — شىنايى قۇداي!»— دەدى. 40 ٸلياس بولسا: «باعالدىڭ پايعامبارلارىن ۇستاڭدار! بىردە-بىرەۋى قاشىپ كەتپەسىن!»— دەپ بۇيىردى. سول-اق ەكەن جۇرت ولاردى ۇستاپ الدى. ٸلياس باعالدىڭ پايعامبارلارىن قيشون سۋىنىڭ+ بويىنا اپارىپ، سول جەردە ٶلتىردى+.
41 بۇدان كەيىن ول احاب پاتشاعا: «بار دا، ٸشىپ-جە، سەبەبى مەن نوسەردىڭ داۋسىن ەستىپ تۇرمىن!»— دەدى+. 42 احاب ٸشىپ-جەۋگە كەتتى. ال ٸلياس كارميل تاۋىنا كوتەرىلدى دە، تىزەرلەپ، باسىن ەكى تىزەسىنىڭ اراسىنا قويىپ وتىردى+. 43 سوسىن قىزمەتشىسىنەن: «جوعارى كوتەرىلىپ، تەڭىز جاققا قاراشى»،— دەپ ٶتىندى. ول كوتەرىلىپ قارادى دا، ەشتەڭە جوق ەكەنىن ايتتى. ٸلياس تاعى دا: «تاعى بارىپ قارا»،— دەدى. وسىلاي ونى جەتى رەت جىبەردى. 44 جەتىنشى رەت جىبەرگەندە، قىزمەتشىسى: «تەڭىز جاقتان الاقانداي بۇلت كوتەرىلىپ كەلە جاتىر!»— دەدى. ٸلياس وعان: «بار دا، احابقا مىنانى ايت: —ارباڭدى جەگىپ، جولعا شىق، ايتپەسە نوسەردىڭ استىندا قالاسىڭ»،— دەپ تاپسىردى. 45 وسى ەكى ارادا اسپاندى قارا بۇلت تورلاپ، جەل تۇرىپ، شەلەكتەپ جاڭبىر قۇيىپ كەتتى+. بۇل كەزدە احاب ەزرەحەلگە+ قاراي كەتىپ بارا جاتتى. 46 سوندا ەحوبا ٸلياسقا قۇدىرەت دارىتىپ، ول كويلەگىنىڭ ەتەگىن بەلىنە قىستىرىپ الدى دا، احابتىڭ الدىنا ٴتۇسىپ، ەزرەحەلگە دەيىن جۇگىرىپ وتىردى.