پاتشالار 1-جازبا
3 سۇلەيمەن مىسىر پاتشاسىنىڭ قىزىنا ۇيلەنىپ+، پەرعاۋىنمەن تۋىس بولدى. سۇلەيمەن ٶزىنىڭ پاتشا سارايىن+، ەحوبانىڭ ٷيىن+ جانە يەرۋساليم دۋالىن تۇرعىزىپ بىتكەنشە+، ايەلى ٴداۋىتتىڭ قالاسىندا+ تۇردى. 2 جۇرت ول كەزدەرى قۇرباندىقتى عيبادات توبەلەرىندە شالىپ ٴجۇردى+. سەبەبى ەحوبانىڭ اتىنا ارنالعان ٷي ٵلى سالىنباعان ەدى+. 3 سۇلەيمەن عيبادات توبەلەرىندە قۇرباندىق شالىپ ورتەيتىنى بولماسا، ەحوبانى جاقسى كورەتىن، ٵرى اكەسى ٴداۋىتتىڭ وسيەتتەرىن ورىنداپ ٴجۇردى+.
4 بىردە پاتشا گيبەونداعى عيبادات ەتەتىن ەڭ باستى عيبادات توبەسىنە بارىپ+، سونداعى قۇرباندىق وشاعىندا 1000 مالدى قۇرباندىققا شالىپ ورتەدى+. 5 سۇلەيمەن گيبەوندا بولعاندا، تۇندە ەحوبا ونىڭ تۇسىنە ەنىپ: «وزىڭە نە بەرگەنىمدى قالايسىڭ، سۇرا»،— دەدى+. 6 ول مىنانى ايتتى: «سەن ٶز قىزمەتشىڭ، مەنىڭ اكەم داۋىتكە اينىماس سۇيىسپەنشىلىگىڭدى مولىنان تانىتتىڭ، ويتكەنى ول الدىڭدا ادال دا ٵدىل بولىپ، شىنشىل جۇرەكپەن ٴجۇردى. سەن وعان وزىنەن كەيىن تاققا وتىراتىن ۇل بەرىپ، كۇنى بۇگىنگە دەيىن اينىماس سۇيىسپەنشىلىگىڭدى مولىنان تانىتىپ كەلەسىڭ+. 7 قۇدايىم ەحوبا، سەن قىزمەتشىڭدى اكەم ٴداۋىتتىڭ ورنىنا پاتشا ەتىپ قويدىڭ، ٴبىراق مەن تىم جاسپىن، تاجىريبەم دە جوق+. 8 قىزمەتشىڭ ٶزىڭ تاڭداپ العان حالىقتى+، ەشكىم ساناپ ەسەبىنە جەتپەيتىن ۇلى حالىقتى باسقارىپ وتىر. 9 سوندىقتان حالقىڭا تورەلىك ەتىپ+، جاقسى مەن جاماندى ايىرا الۋىم ٷشىن+، قىزمەتشىڭە مويىنسۇنعىش جۇرەك سيلاي كور. ونسىز سەنىڭ وسىنشاما كوپ* حالقىڭا تورەلىك ەتۋ كىمنىڭ قولىنان كەلەدى؟!»
10 سۇلەيمەننىڭ وسىنى سۇراعانى ەحوباعا ۇنادى+. 11 سوندىقتان قۇداي وعان بىلاي دەدى: «وزىڭە ۇزاق ٶمىر، زور بايلىق نە جاۋلارىڭنىڭ ٶلىمىن ەمەس، تورەلىك ەتەتىن اقىل-پاراسات سۇراعانىڭ ٷشىن+، 12 ٶتىنىشىڭدى ورىنداپ+، ساعان اقىل-پاراساتقا تولى جۇرەك سيلايمىن+. سەندەي ادام بۇرىن-سوڭدى بولعان ەمەس، سەنەن كەيىن دە بولمايدى+. 13 بۇعان قوسا، سۇراماعانىڭدى — بايلىق پەن اتاق-داڭق+ تا بەرەمىن+. كوزىڭنىڭ تىرىسىندە ساعان تەڭ كەلەر پاتشا بولمايدى+. 14 اكەڭ ٴداۋىت سياقتى جارلىقتارىم مەن بۇيرىقتارىمدى ۇستانىپ، مەنىڭ جولدارىممەن جۇرسەڭ+، عۇمىرىڭدى دا ۇزاق قىلامىن+».
15 سۇلەيمەن ويانعاندا، ايان كورگەنىن ۇقتى. ول يەرۋساليمگە ورالىپ، ەحوبانىڭ كەلىسىم ساندىعىنىڭ الدىنا كەلدى. سول جەردە ول تۇگەل ورتەلەتىن جانە تاتۋلىق قۇرباندىقتارىن+ ۇسىندى. سوسىن كۇللى قىزمەتشىلەرىنە ارناپ توي جاسادى.
16 ٴبىر كۇنى پاتشانىڭ الدىنا ەكى جەزوكشە ايەل كەلدى. 17 ولاردىڭ بىرەۋى بىلاي دەدى: «تاقسىر يەم، مىنا ايەل ەكەۋمىز ٴبىر ۇيدە تۇرامىز. ول ۇيدە بولعان كەزدە، مەن بوسانىپ بالا تۋدىم. 18 ٷش كۇننەن كەيىن مىنا ايەل دە بالا تۋدى. ۇيدە ەكەۋمىزدەن باسقا ەشكىم بولعان جوق. 19 ٴبىر كۇنى تۇندە ول ۇيىقتاپ جاتقاندا، بالاسىن دەنەسىمەن باسىپ قالىپ، ٶلتىرىپ الىپتى. 20 سوسىن ٴتۇن ورتاسىندا تۇرىپ، كۇڭىڭىز ۇيىقتاپ جاتقاندا، قوينىمداعى بالامدى الىپ، ورنىنا ٶزىنىڭ ٶلى بالاسىن سالىپ قويىپتى. 21 تاڭەرتەڭ بالامدى ەمىزەيىن دەپ تۇرسام، ول ٶلى ەكەن. ٴبىراق مۇقيات زەر سالىپ قاراپ ەدىم، ونىڭ مەن تۋعان بالا ەمەس ەكەنىن كوردىم!» 22 الايدا ەكىنشى ايەل: «ولاي ەمەس، ٴتىرى بالا مەنىكى، ٶلى بالا سەنىكى!»— دەدى. سوندا ٴبىرىنشىسى: «جوق، ٶلى بالا سەنىكى، ٴتىرىسى مەنىكى!»— دەپ قويمادى. وسىلاي ەكى ايەل پاتشانىڭ الدىندا ايتىسىپ تۇرىپ الدى.
23 اقىرىندا پاتشا بىلاي دەدى: «بىرەۋى «ٴتىرى بالا مەنىكى، ٶلى بالا سەنىكى» دەسە، ەكىنشىسى «جوق، ٶلى بالا سەنىكى، ال ٴتىرىسى مەنىكى» دەيدى». 24 بۇدان كەيىن پاتشا: «ماعان سەمسەر اكەلىڭدەر!»— دەپ بۇيىردى. وعان سەمسەر اكەلىندى. 25 سوندا ول: «ٴتىرى بالانى قاق ٴبولىپ، ٴبىر جارتىسىن بىرەۋىنە، ەكىنشى جارتىسىن ەكىنشىسىنە بەرىڭدەر!»— دەدى. 26 مۇنى ەستي سالا، ٴتىرى بالانىڭ شەشەسى ەت جۇرەگى ەزىلىپ: «تاقسىر يەم! بالانى ولتىرە كورمەڭىز، مىنا ايەلگە بەرە سالىڭىز!»— دەپ ٶتىندى. ال ەكىنشى ايەل: «ماعان دا جوق، ساعان دا جوق. بالانى شابا بەرىڭدەر!»— دەدى. 27 سوندا پاتشا: «بالانى ولتىرمەڭدەر، ٴبىرىنشى ايەلگە بەرىڭدەر. ونىڭ اناسى — سول!»— دەپ كەسىمىن ايتتى.
28 پاتشانىڭ قالاي تورەلىك ەتكەنىن بۇكىل يسرايل ەستىدى. ولار قۇدايدىڭ وعان ادىلدىك ورناتاتىن دانالىق بەرگەنىن كورىپ+، پاتشانى قاستەرلەيتىن بولدى+.