پاتشالار 1-جازبا
14 سول كەزدەرى ەروبوعامنىڭ ۇلى ٵبياح قاتتى اۋىرىپ قالدى. 2 سوندا ەروبوعام ايەلىنە بىلاي دەدى: «تۇر دا، مەنىڭ ايەلىم ەكەنىڭدى ەشكىم بىلمەۋ ٷشىن كيىمىڭدى اۋىستىرىپ الىپ، شيلوعا بار. سول جەردە كەزىندە مەنىڭ وسى ەلگە پاتشا بولاتىنىمدى ايتقان احيا پايعامبار+ تۇرادى. 3 وعان ون كۇلشە، بىرنەشە شەلپەك، ٴبىر قۇمىرا بال الا بار. ول بالاعا نە بولاتىنىن ايتىپ بەرەدى».
4 ايەلى ەروبوعامنىڭ ايتۋى بويىنشا جولعا شىعىپ، شيلوداعى+ احيانىڭ ۇيىنە قاراي بەت الدى. احيا الدىنا قادالا قاراپ وتىراتىن، سەبەبى جاسى كەلىپ كوزى كورمەي قالعان بولاتىن.
5 ٴبىراق ەحوبا احياعا: «ەروبوعامنىڭ ايەلى اۋىرىپ جاتقان بالاسىنا نە بولاتىنىن سۇراۋ ٷشىن ساعان كەلە جاتىر. وعان نە ايتاتىنىڭدى ٶزىم بىلدىرەمىن. ول سىرت كەيپىن وزگەرتىپ، باسقا ادام بولعانسىپ كەلەدى»،— دەدى.
6 ايەل ەسىكتەن كىرە بەرگەندە، احيا ونىڭ اياعىنىڭ باسقان دىبىسىن ەستىپ، بىلاي دەدى: «ەروبوعامنىڭ ايەلى، كىرە بەر! نەگە ماعان باسقا ادام بولعانسىپ كەلدىڭ؟ قۇدايدان جاقسى حابار الامىن دەپ كۇتپە. 7 بار دا، ەروبوعامعا مىنانى جەتكىز: —يسرايل قۇدايى ەحوبا بىلاي دەيدى: «سەنى حالقىم يسرايلگە كوسەم ەتىپ تاعايىنداۋ ٷشىن، ٶز حالقىڭنىڭ اراسىنان جوعارىلاتتىم+. 8 ٴداۋىت ۇيىنەن پاتشالىقتى تارتىپ الىپ، ساعان بەردىم+. ٴبىراق سەن قىزمەتشىم ٴداۋىت سياقتى بولمادىڭ. ول مەنىڭ جولىمنان تايماي، بۇيرىقتارىمدى ۇستانىپ، بار جۇرەگىمەن ماعان ۇنايتىندى عانا ىستەپ ٴجۇردى+. 9 سەنىڭ جاساعان جاماندىعىڭ وزىڭە دەيىنگىلەردىڭ بارىنەن اسىپ ٴتۇستى. سەن مەنى قورلاۋ ٷشىن، وزىڭە باسقا ٴتاڭىر جانە تەمىر مۇسىندەر جاساپ الىپ+، مەنەن تەرىس اينالىپ كەتتىڭ+. 10 سوندىقتان ەروبوعامنىڭ ٷيىن پالەگە ۇشىراتىپ، اۋلەتىندە بىردە-ٴبىر ەركەك كىندىكتىنى، ٴتىپتى يسرايلدەگى ەڭ بەيشاراسى مەن ٵلسىزىن دە قالدىرمايمىن. وسىلاي ەروبوعامنىڭ ٷي ٸشىن قي سىپىرعانداي، تىپ-تيپىل ەتىپ سىپىرىپ تاستايمىن+! 11 ونىڭ اۋلەتىنە جاتاتىنداردىڭ قالادا ولگەندەرى يتكە، ال دالادا ولگەندەرى قۇسقا جەم بولادى. ويتكەنى ەحوبا وسىلاي ايتتى».
12 سوسىن احيا بىلاي دەدى: «ال ەندى تۇر دا، ۇيىڭە بار. سەن قالاعا كىرە بەرگەندە، بالاڭ قايتىس بولادى. 13 ونى كۇللى يسرايل جوقتاپ، قابىرگە قويادى. ەروبوعامنىڭ اۋلەتىنەن تەك سول عانا قابىرگە قويىلادى. ويتكەنى يسرايلدىڭ قۇدايى ەحوبا ەروبوعامنىڭ اۋلەتىنەن وسى بالانىڭ بويىنان عانا ٴبىر يگى نارسە تاپتى. 14 ەحوبا يسرايل ەلىنە پاتشا تاعايىندايدى+. ول بەلگىلەنگەن كۇنى ەروبوعامنىڭ ٷيىن جويادى. قالاسا، ول مۇنى قازىر دە ىستەي الادى. 15 ەحوبا يسرايلدى جازالايدى دا، ولار سۋ تەربەگەن قامىس ىسپەتتى بولادى. ول اتا-بابالارىنا بەرگەن جاقسى جەردەن ولاردى تۇپتامىرىمەن جۇلىپ الىپ+، ەۆفراتتىڭ ارعى بەتىنە بىتىراتىپ جىبەرەدى+. سەبەبى ولار وزدەرىنە قاسيەتتى باعانالار* جاساپ الىپ+، ەحوبانى قورلادى. 16 ەروبوعام ٶزى دە كۇناعا باتىپ، يسرايلدى دە كۇناعا باتىرعاندىقتان، قۇداي يسرايلدى تاستاپ كەتەدى+».
17 سودان ەروبوعامنىڭ ايەلى ورنىنان تۇرىپ، تيرساعا قايتتى. ول ٷيىنىڭ تابالدىرىعىنان اتتاي بەرگەندە، بالاسى قايتىس بولدى. 18 كۇللى يسرايل ونى جوقتاپ، قابىرگە قويدى. وسىلاي ەحوبانىڭ ٶز قىزمەتشىسى احيا پايعامبار ارقىلى ايتقان ٴسوزى جۇزەگە استى.
19 ەروبوعامنىڭ باسقا دا ىستەرى، قالاي سوعىسىپ+، قالاي بيلىك جۇرگىزگەنى جايلى يسرايل پاتشالارىنىڭ تاريحى باياندالعان كىتاپتا جازىلعان. 20 ەروبوعام 22 جىل بيلىك ەتىپ، اتا-بابالارىنا قوسىلدى+. ونىڭ ورنىنا ۇلى ناداپ تاققا وتىردى+.
21 ال بۇل كەزدە ياھۋدادا سۇلەيمەن ۇلى روبوعام بيلىك ەتتى. ول 41 جاسىندا تاققا وتىرىپ، ەحوبا بارلىق رۋلاردىڭ ىشىنەن ٶزىنىڭ ەسىمىن ورنىقتىرۋ ٷشىن+ تاڭداپ العان يەرۋساليم قالاسىندا+ 17 جىل بيلىك قۇردى. ونىڭ اناسى امموندىق ناعاما ەدى+. 22 ياھۋدا حالقى ەحوبانىڭ الدىندا زۇلىم ىستەر جاسادى+. ولار اتا-بابالارىنان بەتەر كۇناعا باتىپ، ولاردان بەتەر قۇدايدىڭ قىزعانىشىن وياتتى+. 23 ولار دا عيبادات توبەلەرىن جاساعان ەدى، كەز كەلگەن بيىك جەرلەردە+، ٵربىر جايقالعان اعاشتىڭ استىندا+ تاستان نە اعاشتان قاسيەتتى باعانالار* ورناتقان ەدى+. 24 ال عيباداتحانالارىندا بۇزىلعان ەركەكتەر* دە بولدى+. وسىلايشا يسرايلدىكتەر كەزىندە ەحوبا قۋىپ جىبەرگەن حالىقتاردىڭ بارلىق جەركەنىشتى ىستەرىن قايتالادى.
25 روبوعامنىڭ پاتشالىق قۇرۋىنىڭ بەسىنشى جىلى مىسىر پاتشاسى شۇشاق+ يەرۋساليمگە قارسى اتتاندى+. 26 ول ەحوبانىڭ ٷيى مەن پاتشا سارايىنداعى بارلىق قازىنانى+، سۇلەيمەن جاساتقان التىن قالقانداردى دا الىپ كەتتى+. 27 روبوعام پاتشا ولاردىڭ ورنىنا مىس قالقاندار جاساتىپ، پاتشا سارايىنىڭ كىرەبەرىسىندەگى كۇزەتشىلەردىڭ باسشىلارىنا تابىستادى. 28 پاتشا ەحوبانىڭ ۇيىنە بارعان سايىن، كۇزەتشىلەر قالقانداردى سوندا اپارىپ، كەيىن قايتادان كۇزەتشىلەر ۇيىنە اكەپ قوياتىن.
29 روبوعامنىڭ باسقا دا ىستەرى جايلى ياھۋدا پاتشالارىنىڭ تاريحى باياندالعان كىتاپتا جازىلعان+. 30 روبوعامنىڭ تۇسىندا ەروبوعام پاتشامەن سوعىس تولاستامادى+. 31 روبوعام اتا-بابالارىنا قوسىلعاندا، سۇيەگى ٴداۋىتتىڭ قالاسىنداعى سولار جاتقان قابىرگە قويىلدى+. ونىڭ اناسى امموندىق ناعاما بولاتىن+. روبوعامنىڭ ورنىنا تاققا ۇلى ٵبيام*+ وتىردى.