قورىنتتىقتارعا 1-حات
14 سۇيىسپەنشىلىككە ۇمتىلىڭدار. رۋحاني سيلار الۋعا، اسىرەسە پايعامبارلىق ەتۋ سيىن الۋعا بارىنشا تىرىسىڭدار+. 2 سەبەبى وزگە تىلدە سويلەيتىن كىسى ادامدارعا ەمەس، قۇدايعا سويلەيدى: ول رۋح ارقىلى قاسيەتتى قۇپيالاردى+ ايتقانىمەن، ونى ەشكىم تۇسىنبەيدى+. 3 ال پايعامبارلىق ەتەتىن كىسى سوزدەرىمەن ادامداردى رۋحاني نىعايتادى، جىگەرلەندىرەدى ٵرى جۇباتادى. 4 وزگە تىلدە سويلەيتىن ادام ٶزىن، ال پايعامبارلىق ەتەتىن ادام قاۋىمدى نىعايتادى. 5 مەن ٴبارىڭنىڭ وزگە تىلدەردە سويلەگەندەرىڭدى قالار ەدىم+، ٴبىراق ودان گورى پايعامبارلىق ەتكەندەرىڭ ارتىق+. ٴيا، وزگە تىلدەردە سويلەيتىن ادام قاۋىمدى نىعايتۋ ٷشىن ٶز سوزدەرىن اۋدارماسا، ودان گورى پايعامبارلىق ەتەتىن ادامنىڭ پايداسى كوبىرەك. 6 باۋىرلاستار، مەن سەندەرگە كەلىپ، وزگە تىلدەردە سويلەسەم، مەنەن قانداي پايدا؟ ال ەگەر سەندەرگە كومەكتەسكىم كەلسە، ايانعا+، بىلىمگە+، پايعامبارلىققا نەگىزدەلە وتىرىپ، ٴتالىم بولارلىقتاي ەتىپ سويلەۋىم كەرەك ەمەس پە؟!
7 سىبىزعى، ارفا سياقتى جانسىز اسپاپتار دا ٷن شىعارادى عوي. ٴبىراق ىرعاعى وزگەرىپ تۇرماسا، سول سىبىزعىدا نەمەسە ارفادا نە وينالىپ جاتقانىن قايدان بىلەمىز؟ 8 كەرنەي تۇسىنىكسىز ٷن شىعارسا، كىم سوعىسقا دايىندالادى؟ 9 سول سياقتى، اۋىزدارىڭنان تۇسىنىكتى ٴسوز شىقپاسا، نە ايتقاندارىڭدى ادام قالاي تۇسىنەدى؟ سوزدەرىڭنىڭ دالاعا كەتكەنى عوي. 10 دۇنيەدە قانشاما كوپ تىلدەر بار، ٴبىراق ولاردىڭ ەشقايسىسى دا ٴمانسىز ەمەس. 11 ەگەر ايتىلعان ٴسوزدىڭ ماعىناسىن تۇسىنبەسەم، مەن سويلەپ تۇرعان ادام ٷشىن، ال ول مەن ٷشىن شەتەلدىك بولادى عوي. 12 سەندەر دە رۋحتىڭ سيلارىنا يە بولۋدى بارىنشا قالاساڭدار، قاۋىمدى نىعايتاتىن سيلاردى مولىنان الۋعا ۇمتىلىڭدار+.
13 سوندىقتان وزگە تىلدە سويلەيتىن ادام ٶز سوزدەرىن اۋدارا الۋ ٷشىن دۇعا ەتسىن+. 14 ويتكەنى ەگەر مەن وزگە تىلدە دۇعا ەتسەم، وندا رۋح دارىتقان سي دۇعا ەتۋدە، ٴبىراق ساناممەن ونى تۇسىنبەيمىن. 15 سوندا نە ىستەۋ كەرەك؟ مەن رۋح دارىتقان سيمەن، سونداي-اق ساناممەن دە دۇعا ەتەمىن. رۋح دارىتقان سيمەن، سونداي-اق ساناممەن دە قۇدايدى ماداقتاپ جىرلايمىن. 16 ال ەگەر رۋح دارىتقان سيمەن قۇدايدى ماداقتاپ جىرلاعانىڭدا، سول جەردەگى قاراپايىم كىسى نە ايتىپ جاتقانىڭدى تۇسىنبەسە، ايتقان ريزاشىلىعىڭا قالايشا «اۋمين» دەيدى؟ 17 سەن جاقسىلاپ ريزاشىلىق ايتقانىڭمەن، بۇدان الگى كىسى رۋحاني نىعايمايدى. 18 مەن بارلىعىڭنان دا كوپ تىلدە سويلەيمىن، سول ٷشىن قۇدايعا ريزامىن. 19 ايتسە دە قاۋىمدا وزگە تىلدە 10000 ٴسوز ايتقانشا، باسقالارعا ٴتالىم بەرۋ ٷشىن تۇسىنىكتى بولاتىن بەس ٴسوز ايتقانىم ارتىق+.
20 باۋىرلاستار، تۇسىنىكتەرىڭ جاس بالانىكى سياقتى بولماسىن+. ٴبىراق جاماندىققا كەلگەندە، بالا سياقتى+، ال تۇسىنۋگە كەلگەندە، ەرەسەك ادامداي بولىڭدار+. 21 زاڭدا بىلاي دەلىنگەن: «بۇل حالىققا شەتەلدىكتەردىڭ تىلىمەن جانە بوتەندەردىڭ اۋزىمەن سويلەيمىن، ٴبىراق سوندا دا ولار مەنى تىڭداۋدان باس تارتادى،— دەيدى ەحوبا»+. 22 سونىمەن، وزگە تىلدەردە سويلەۋ — سەنەتىندەر ٷشىن ەمەس، سەنبەيتىندەر ٷشىن بەلگى+، ال پايعامبارلىق ەتۋ — سەنبەيتىندەر ٷشىن ەمەس، سەنەتىندەر ٷشىن بەلگى. 23 بۇكىل قاۋىم جينالىپ، ٴبارى وزگە تىلدەردە سويلەپ جاتقاندا، قاراپايىم نە سەنبەيتىن ادامدار سول جەرگە كەلسە، سەندەردى ەستەرى اۋىسىپتى دەمەي مە؟ 24 ال ٴبارىڭ پايعامبارلىق ەتىپ جاتقاندا، سەنبەيتىن نە قاراپايىم ادام كەلسە، ايتقان سوزدەرىڭ ونى اشكەرەلەيدى ٵرى ٶزىن مۇقيات تەكسەرۋگە تالپىندىرادى. 25 سوندا جۇرەگىندەگى قۇپيالارى ايقىن بولىپ، باس ۇرىپ: «قۇداي شىنىمەن سەندەردىڭ ارالارىڭدا!»— دەپ، قۇدايعا تاعزىم ەتەدى+.
26 سونىمەن، باۋىرلاستار، نە ىستەۋ كەرەك؟ بىرگە جينالعاندا، ٴبىرىڭ ٴزابۇر جىرلارىن ايتاسىڭ، ٴبىرىڭ ٴتالىم بەرەسىڭ، ٴبىرىڭ ايان الاسىڭ، ٴبىرىڭ وزگە تىلدە سويلەيسىڭ، تاعى ٴبىرىڭ اۋداراسىڭ+. وسىنىڭ ٴبارىن ٴبىر-ٴبىرىڭدى نىعايتۋ ٷشىن ىستەڭدەر. 27 وزگە تىلدە سويلەيتىندەر بولسا، ەكەۋى، كوپ دەگەندە ۇشەۋى كەزەكتەسىپ سويلەسىن، ال بىرەۋ اۋدارىپ تۇرسىن+. 28 ەگەر اۋداراتىن ەشكىم بولماسا، قاۋىمدا ۇندەمەي، ىشتەي قۇدايعا سويلەسىن. 29 پايعامبارلاردىڭ دا ەكەۋى نە ۇشەۋى+ سويلەپ، ال باسقالار ماعىناسىن پايىمداسىن. 30 ەگەر سوندا وتىرعانداردىڭ ٴبىرى ايان السا، سويلەپ تۇرعانى وعان ٴسوز بەرسىن. 31 ٴبارىڭنىڭ كەزەكتەسىپ پايعامبارلىق ەتۋلەرىڭە بولادى. سوندا ٴبارىڭ ٴتالىم الىپ، جىگەرلەنەسىڭدەر+. 32 پايعامبارلارعا بەرىلگەن رۋحتىڭ سيىن پايعامبارلاردىڭ وزدەرى قاداعالاۋ كەرەك. 33 ويتكەنى قۇداي — تارتىپسىزدىكتىڭ ەمەس، تاتۋلىقتىڭ قۇدايى+.
قاسيەتتىلەردىڭ بارلىق قاۋىمىنداعىداي، 34 ايەلدەر قاۋىمدا ۇندەمەسىن، سەبەبى ولارعا سويلەۋگە رۇقسات ەتىلمەيدى+. قايتا، ەر ادامدارعا باعىنسىن+، قۇداي زاڭىندا دا وسىلاي دەلىنگەن. 35 ەگەر بىردەڭەنى تۇسىنبەسە، ۇيىندە كۇيەۋلەرىنەن سۇراسىن. ويتكەنى ايەلدىڭ قاۋىمدا سويلەگەنى ۇيات.
36 قۇداي ٴسوزى سەندەردەن شىعىپ پا ەدى، الدە سەندەرگە عانا جەتىپ پە ەدى؟
37 كىم ٶزىن پايعامبارمىن نە رۋحتىڭ سيىنا يەمىن دەپ ويلاسا، مەنىڭ جازىپ وتىرعاندارىمدى يەمىزدىڭ وسيەتى دەپ قابىلداسىن. 38 ال مۇنى ەلەمەيتىن ادامنىڭ ٶزى دە ەلەۋسىز قالادى*. 39 سونىمەن، باۋىرلاستارىم، پايعامبارلىق ەتۋگە تالپىنا بەرىڭدەر+، سويتسە دە وزگە تىلدەردە سويلەۋگە تيىم سالماڭدار+. 40 تەك بارلىعى لايىقتى ٵرى تارتىپپەن بولسىن+!