30-تاراۋ
«ٴبىر-ٴبىرىڭدى ٴسۇيىپ ٶمىر سۇرىڭدەر!»
1—3. سۇيىسپەنشىلىك كورسەتۋدە ەحوباعا ەلىكتەگەنىمىزدىڭ ناتيجەسى قانداي بولادى؟
«العاننان گورى بەرگەن باقىتتى» (ەلشىلەردىڭ ىستەرى 20:35). يسانىڭ وسى سوزدەرىندە كەلەسى ماڭىزدى شىندىققا باسا نازار اۋدارىلادى: رياسىز سۇيىسپەنشىلىكتىڭ قارىمتاسى قايتارىلادى. بىرەۋدىڭ بىزگە سۇيىسپەنشىلىك كورسەتكەنى باقىتتى ەتكەنمەن، وزگەگە كورسەتىلگەن سۇيىسپەنشىلىك ودان دا زور باقىتقا بولەيدى.
2 مۇنىڭ قانشالىقتى راس ەكەنىن كوكتەگى اكەمىزدەن ارتىق ەشكىم بىلمەيدى. وسى ٴبولىمنىڭ الدىڭعى تاراۋلارىنان كورگەنىمىزدەي، ەحوبا — سۇيىسپەنشىلىكتىڭ ەڭ كەرەمەت ۇلگىسى. سۇيىسپەنشىلىكتى ول سياقتى كەرەمەت تۇردە جانە ول سياقتى ۇزاق ۋاقىت ەشكىم تانىتپاعان. ولاي بولسا، ەحوبانىڭ «باقىتتى قۇداي» دەپ اتالاتىنىنا تاڭعالۋعا بولا ما؟ (تىموتەگە 1-حات 1:11، جد)
3 سۇيىسپەنشىلىككە تولى اكەمىز، اسىرەسە سۇيىسپەنشىلىك كورسەتۋدە، ٴبىزدىڭ وزىنە ۇقساۋعا تىرىسقانىمىزدى قالايدى. ەفەستىكتەرگە 5:1، 2 دە: ‹سۇيىكتى رۋحاني بالاسى رەتىندە قۇدايدان ۇلگى الىڭدار؛ ٴبىر-ٴبىرىڭدى ٴسۇيىپ ٶمىر سۇرىڭدەر!›— دەلىنگەن. سۇيىسپەنشىلىك كورسەتۋدە ەحوباعا ەلىكتەگەندە، بەرۋدەن كەلەتىن باقىتتى سەزىنەمىز. سونىمەن قاتار ەحوباعا ۇنامدى ەكەنىمىزدى بىلگەنىمىز قاناعات سەزىمىنە بولەيدى، ويتكەنى ونىڭ ٴسوزى ‹ٴبىر-ٴبىرىمىزدى سۇيۋگە› شاقىرادى (ريمدىكتەرگە 13:8). سويتسە دە ‹ٴبىر-ٴبىرىمىزدى ٴسۇيىپ ٶمىر ٴسۇرۋدىڭ› باسقا دا سەبەپتەرى بار.
سۇيىسپەنشىلىكتىڭ ماڭىزدىلىعى
سۇيىسپەنشىلىك باۋىرلاستارعا سەنىم ارتۋعا تالپىندىرادى
4، 5. نەگە باۋىرلاستارعا جانقيار سۇيىسپەنشىلىك كورسەتۋ ماڭىزدى؟
4 نەگە باۋىرلاستارعا سۇيىسپەنشىلىك كورسەتۋ ماڭىزدى؟ ٴبىر سوزبەن ايتقاندا، سۇيىسپەنشىلىك شىنايى ماسىحشىلەردىڭ ومىرىندە ەرەكشە ورىن الادى. سۇيىسپەنشىلىكسىز باۋىرلاستارمەن تىعىز قارىم-قاتىناستا بولا المايمىز، ال ەڭ باستىسى، ەحوبانىڭ كوز الدىندا تۇككە تۇرعىسىز بولامىز. مۇنىڭ راس ەكەندىگىنە قۇداي سوزىندە قالايشا ەرەكشە كوڭىل بولىنەتىنىن قاراستىرىپ كورەيىك.
5 جەردەگى ٶمىرىنىڭ سوڭعى ٴتۇنى يسا شاكىرتتەرىنە: «سەندەرگە ٴبىر جاڭا وسيەت ايتامىن: ٴبىرىڭدى ٴبىرىڭ جاقسى كورىڭدەر! مەن وزدەرىڭدى سۇيگەندەي، سەندەر دە ٴبىر-ٴبىرىڭدى سۇيىڭدەر! مەنىڭ شاكىرتتەرىم ەكەندىكتەرىڭدى ەلدىڭ ٴبارى ٶزارا سۇيىسپەنشىلىكتەرىڭنەن بىلەتىن بولادى»،— دەگەن (جوحان 13:34، 35). «مەن وزدەرىڭدى سۇيگەندەي»،— دەدى يسا. ٴيا، ول بىزگە وزىنىكىندەي سۇيىسپەنشىلىك كورسەتۋدى بۇيىردى. 29-تاراۋدان يسا وزگەنىڭ مۇددەسىن وزىنىكىنەن جوعارى قويىپ، جانقيار سۇيىسپەنشىلىك تانىتۋدىڭ زور ۇلگىسىن كورسەتكەنىن بايقادىق. ٴبىز دە جانقيار سۇيىسپەنشىلىك تانىتۋعا ٴتيىسپىز، ٵرى مۇنىمىز ٴتىپتى ٴماسىحشى ەمەستەرگە دە ايقىن كورىنىپ تۇرۋ كەرەك. ٴيا، باۋىرلاستارىمىزعا دەگەن جانقيار سۇيىسپەنشىلىك — ٴماسىحتىڭ شىنايى ٸزباسارلارى ەكەندىگىمىزدىڭ بەلگىسى.
6، 7. ا) ەحوبانىڭ سوزىندە سۇيىسپەنشىلىك كورسەتۋدىڭ ماڭىزدىلىعىنا ەرەكشە كوڭىل بولىنەتىنىن قايدان بىلەمىز؟ ٵ) پاۋىلدىڭ قورىنتتىقتارعا 1-حات 13:4—8 تارماقتارىندا جازىلعان سوزدەرىندە قانداي سۇيىسپەنشىلىككە كوڭىل اۋدارىلادى؟
6 بويىمىزدا سۇيىسپەنشىلىك جەتىسپەسە شە؟ «سۇيىسپەنشىلىگىم بولماسا،— دەدى ەلشى پاۋىل،— وندا مەن سىڭعىرلاعان جەزبىن نەمەسە داڭعىرلاعان قوڭىراۋمىن [«شىڭىلداعان شىڭمىن»، جد]» (قورىنتتىقتارعا 1-حات 13:1، تاۋرات). شىڭىلداعان شىڭ اشتى دىبىس شىعارادى. ال سىڭعىرلاعان جەز جونىندە نە دەۋگە بولادى؟ وزگە اۋدارمالاردا بۇل وي «قۇلاق تۇندىرا كۇركىرەگەن گونگ» نەمەسە «دۇرىلدەگەن گونگ» دەپ بەرىلگەن. نەتكەن ورىندى تەڭەۋ! سۇيىسپەنشىلىگى جوق ادام قۇلاق جارارداي قاتتى شۋ شىعاراتىن ٵرى جانعا جاي بەرۋدىڭ ورنىنا، جاعىمسىز سەزىم تۋدىراتىن مۋزىكالىق اسپاپقا ۇقسايدى. قالايشا مۇنداي ادام وزگەلەرمەن تىعىز قارىم-قاتىناستا بولا الماق؟ پاۋىل تاعى بىلاي دەگەن: «تاۋ قوزعايتىنداي زور سەنىمگە كەنەلسەم، الايدا سۇيىسپەنشىلىگىم بولماسا، تۇككە دە تۇرمايمىن» (قورىنتتىقتارعا 1-حات 13:2). ويلاپ كورشى، ەگەر سۇيىسپەنشىلىگى جوق بولسا، ادام قانشا كۇش سالعانىنا قاراماستان، ‹تۇككە دە تۇرمايدى›. ەحوبانىڭ سوزىندە سۇيىسپەنشىلىك كورسەتۋدىڭ ماڭىزدىلىعىنا ەرەكشە كوڭىل بولىنەتىنى ايقىن كورىنىپ تۇر ەمەس پە؟
7 ولاي بولسا، وزگەلەرمەن قارىم-قاتىناسىمىزدا وسى قاسيەتتى قالاي تانىتۋعا بولادى؟ بۇل سۇراقتىڭ جاۋابىن تابۋ ٷشىن پاۋىلدىڭ قورىنتتىقتارعا 1-حات 13:4—8 تارماقتارىندا جازىلعان سوزدەرىن تالداپ كورەيىك. بۇل تارماقتاردا اڭگىمە قۇدايدىڭ بىزگە دەگەن نەمەسە ٴبىزدىڭ وعان دەگەن سۇيىسپەنشىلىگىمىز جونىندە ەمەس. پاۋىل ٴبىزدىڭ ٴبىر-بىرىمىزگە قالاي سۇيىسپەنشىلىك كورسەتۋىمىز كەرەكتىگىنە كوڭىل اۋدارعان. ول سۇيىسپەنشىلىكتىڭ قانداي ەكەنى جانە قانداي ەمەس ەكەندىگىنە قاتىستى بىرنەشە جايتتى اتاپ وتكەن.
سۇيىسپەنشىلىك قانداي؟
8. وزگەلەرمەن قارىم-قاتىناسىمىزدا شىدامدىلىقتىڭ قانداي كومەگى تيەدى؟
8 «سۇيىسپەنشىلىك شىدامدى». شىدامدىلىق دەگەن وزگەلەرمەن قارىم-قاتىناسىمىزدا سابىر ساقتاپ، ٴتوزىمدى بولۋدى بىلدىرەدى (قولوستىقتارعا 3:13). بىزگە وسىنداي سابىرلىق قاجەت پە؟ كەمەلسىز بولعاندىقتان باۋىرلاستارمەن يىق تىرەسە قىزمەت ەتكەندە، ٴبىر-ٴبىرىمىزدى رەنجىتەتىن كەزدەردىڭ بولىپ تۇراتىنىن مويىنداۋىمىز كەرەك. ٴبىراق توزىمدىلىك پەن ۇستامدىلىق قاۋىمنىڭ ىنتىماعىنا نۇقسان كەلتىرمەي، تۇسىنىسپەۋشىلىكتەردى شەشۋگە جانە بولماشى رەنىشتەرگە ٴمان بەرمەۋگە كومەكتەسەدى.
9. قالايشا وزگەلەرگە مەيىرىمدىلىك تانىتۋعا بولادى؟
9 «سۇيىسپەنشىلىك... مەيىرىمدى». مەيىرىمدىلىك قولعابىس ەتۋ مەن جاقسى سوزدەردەن كورىنىس تابادى. سۇيىسپەنشىلىك مەيىرىمدىلىك كورسەتۋدىڭ، اسىرەسە ونى اسا مۇقتاج جاندارعا كورسەتۋدىڭ، جولدارىن ىزدەۋگە تالپىندىرادى. مىسالى، ەگدە تارتقان باۋىرلاسىمىز جالعىزدىق سەزىنىپ، بىرەۋدىڭ جىگەرلەندىرگەنىنە مۇقتاج شىعار. جالعىز باستى اناعا نە باسقا ٴدىندى ۇستاناتىن وتباسىندا تۇراتىن ايەل باۋىرلاسقا قولداۋ قاجەت بولار. ناۋقاس نەمەسە قانداي دا ٴبىر قيىندىققا دۋشار بولعان باۋىرلاس ادال دوستارىنان جىلى-جىلى سوزدەر ەستۋدى قالايتىن شىعار (ناقىل سوزدەر 12:25؛ 17:17). وسىنداي كەزدەردە مەيىرىمدىلىك كورسەتۋگە ىقىلاس تانىتار بولساق، سۇيىسپەنشىلىگىمىزدىڭ شىنايى ەكەندىگىن پاش ەتەمىز (قورىنتتىقتارعا 2-حات 8:8).
10. قالاي سۇيىسپەنشىلىك، ٴتىپتى قيىن بولعان جاعدايدا دا، شىندىقتىڭ جاعىندا بولۋعا جانە شىندىقتى ايتۋعا كومەكتەسەدى؟
10 «سۇيىسپەنشىلىك... اقيقاتقا قۋانادى». باسقا ٴبىر اۋدارمادا: «سۇيىسپەنشىلىك... قۋانىشپەن شىندىق جاعىنا شىعادى»،— دەلىنگەن. سۇيىسپەنشىلىك ٴبىزدى شىندىقتى قولداۋعا جانە ‹ٴبىر-بىرىمىزگە شىندىقتى ايتۋعا› تالپىندىرادى (زاكاريا 8:16). مىسالى، ٶزىمىز جاقسى كورەتىن ادامداردىڭ ٴبىرى اۋىر كۇنا جاساپ قويسا، ەحوباعا جانە سول ادامعا دەگەن سۇيىسپەنشىلىگىمىز ونىڭ قاتەلىك جاساعانىن جاسىرىپ، اقتاپ نەمەسە ٴتىپتى وزگەلەرگە وتىرىك ايتۋدىڭ ورنىنا، ەحوبانىڭ پرينسيپتەرىن بەرىك ۇستانۋعا كومەكتەسەتىن بولادى. راس، شىندىققا تۋرا قاراۋ وڭاي ەمەس بولار. ٴبىراق ٶزىمىز جاقسى كورەتىن ادامنىڭ يگىلىگىن ويلايتىن بولساق، قۇدايدىڭ سۇيىسپەنشىلىكپەن جونگە سالۋىن قابىل العانىن قالايمىز (ناقىل سوزدەر 3:11، 12). ٴسۇيۋشى ماسىحشىلەر رەتىندە ٴبىز «بارلىق جاعدايدا دا ادال» بولعىمىز كەلەدى (ەۆرەيلەرگە 13:18).
11. ‹سۇيىسپەنشىلىك ٵردايىم قورعان› بولاتىندىقتان، باۋىرلاستاردىڭ قاتەلىكتەرىنە قاتىستى نە ىستەۋگە تىرىسۋىمىز كەرەك؟
11 ‹سۇيىسپەنشىلىك... ٵردايىم قورعان بولادى›. بۇل تىركەس سوزبە-ٴسوز «ٴبارىن جاۋىپ تاستايدى» دەگەندى بىلدىرەدى. پەتىردىڭ ٴبىرىنشى حاتىندا «سۇيىسپەنشىلىك ادامداردىڭ كوپتەگەن كۇنالارىن جاۋىپ تاستايدى» دەگەن سوزدەر بار (پەتىردىڭ 1-حاتى 4:8، سىلتەمەنى قارا). ٴيا، سۇيىسپەنشىلىكتى باسشىلىققا الاتىن ٴماسىحشى باۋىرلاسىنىڭ كەز كەلگەن كەمەلسىزدىگى مەن كەمشىلىگىنە ٴمان بەرە بەرگىسى كەلمەيدى. كوپ جاعدايدا باۋىرلاستاردىڭ قاتەلىكتەرى مەن كەمشىلىكتەرى بولماشى عانا، ٵرى ولاردى سۇيىسپەنشىلىكپەن جاۋىپ تاستاۋعا بولادى (ناقىل سوزدەر 10:12؛ 17:9).
12. قالاي ەلشى پاۋىل ٴفىليمونعا قاتىستى جاقسىلىققا سەنەتىنىن كورسەتتى جانە ٴبىز ونىڭ ۇلگىسىنەن نە نارسەگە ۇيرەنە الامىز؟
12 «سۇيىسپەنشىلىك... ۇدايى سەنەدى». موففاتتىڭ اۋدارماسىندا سۇيىسپەنشىلىكتىڭ «ارقاشان جاقسىلىققا سەنۋگە دايار» ەكەندىگى ايتىلعان. ٴبىز باۋىرلاستارىمىزدىڭ نيەتتەرىنىڭ تازالىعىنا شەك كەلتىرىپ، ورىنسىز كۇماندانا بەرمەيمىز. سۇيىسپەنشىلىك ولارعا سەنىم ارتىپ، «جاقسىلىققا» سەنۋىمىزگە كومەكتەسەدىa. پاۋىلدىڭ ٴفىليمونعا جازعان حاتىنا كوڭىل ٴبولشى. ول ٴفىليموندى كەزىندە قاشىپ كەتكەن، ال ەندى ٴماسىحشى بولعان قۇلى ونيسىمعا مەيىرىمدىلىك تانىتىپ، قابىل الۋعا شاقىرعان. پاۋىل ٴفىليمونعا قىسىم كورسەتپەگەن، قايتا، سۇيىسپەنشىلىكپەن ٶتىنىش جاساعان. ول: «سەن قۇلاق اسار دەپ ۇمىتتەنىپ، ايتقانىمنان دا ارتىق ورىندايتىنىڭدى بىلە وتىرىپ، وسىنى جازدىم»،— دەپ، ٴفىليمونعا سەنىم ارتاتىنىن كورسەتتى (21-تارماق). سۇيىسپەنشىلىگىمىز باۋىرلاستارعا وسىلايشا سەنىم ارتۋعا تالپىندىرار بولسا، ولاردىڭ جاقسى قاسيەتتەرىنىڭ وسە تۇسۋىنە ىقپال ەتەمىز.
13. باۋىرلاستاردان جاقسىلىق كۇتەتىنىمىزدى قالاي كورسەتەمىز؟
13 «سۇيىسپەنشىلىك... ٷمىتىن ەش ۇزبەيدى». سۇيىسپەنشىلىك سەنگىش بولۋىمەن قاتار، ٷمىت ارتقىش تا. ول ٴبىزدى باۋىرلاستاردان جاقسىلىق كۇتۋگە تالپىندىرادى. مىسالى، ٴبىر باۋىرلاس «ٶزى اڭداماي شالىس قادام جاساپ قويسا»، سۇيىسپەنشىلىكپەن بەرىلگەن تۇزەتۋدى قابىل الادى دەپ ۇمىتتەنەمىز (عالاتتىقتارعا 6:1، جد). سونداي-اق ٴبىز سەنىمى السىزدەر رۋحاني جاعىنان اياققا تۇرادى دەپ تە ۇمىتتەنەمىز، ٵرى سول ٷشىن شىدامدىلىق تانىتا وتىرىپ، قولدان كەلگەننىڭ ٴبارىن ىستەيمىز (ريمدىكتەرگە 15:1؛ سالونيقالىقتارعا 1-حات 5:14). ٴتىپتى ەگەر وزىمىزگە جاقىن ادام تۋرا جولدان تايىپ كەتسە، يسانىڭ استارلى اڭگىمەسىندەگى اداسقان ۇل ىسپەتتى ول دا ٴبىر كۇنى اقىلعا كەلىپ، ەحوباعا قايتا بەت بۇراتىنىنا دەگەن ٷمىتىمىزدى ۇزبەيمىز (لۇقا 15:17، 18).
14. قاۋىمدا توزىمدىلىگىمىز قالاي سىنالۋى مۇمكىن جانە سۇيىسپەنشىلىك بىزگە قالاي كومەكتەسەدى؟
14 «سۇيىسپەنشىلىك... بارىنە دە شىدايدى». شىدامدىلىق، انىعىراق ايتساق توزىمدىلىك، كوڭىلىمىز قالعاندا نە قيىنشىلىققا كەزىككەندە، بەرىك بولۋعا كومەكتەسەدى. توزىمدىلىگىمىز قاۋىمنان تىسقارى ادامدارمەن قاتىناسقاندا عانا ەمەس، كەيدە باۋىرلاستارمەن ارالاسقاندا دا سىنالۋى مۇمكىن. كەمەلسىز بولعاندىقتان باۋىرلاستارىمىز كوڭىلىمىزدى قالدىراتىن كەزدەر بولادى. الدەبىرەۋ ويلانباي سويلەپ، جانىمىزعا جارا سالۋى مۇمكىن (ناقىل سوزدەر 12:18). بالكىم، قاۋىمداعى قانداي دا ٴبىر ىستەر ٴبىز ويلاعانداي اتقارىلمايتىن شىعار. جاۋاپكەرشىلىگى بار باۋىرلاستىڭ ٴجۇرىس-تۇرىسى ەرسى كورىنىپ: «قالايشا ٴماسىحشى بولا تۇرا، وسىلاي ەتە الادى؟»— دەپ اڭ-تاڭ قالاتىن شىعارمىز. وسىنداي جاعدايلار قاۋىمعا كەلمەي، ەحوباعا دەگەن قىزمەتىمىزدى دوعارۋعا سەبەپ بولۋى كەرەك پە؟ سۇيىسپەنشىلىگىمىز بار بولسا، سەبەپ بولمايدى! ٴيا، سۇيىسپەنشىلىك سەزىمگە بەرىلىپ، باۋىرلاسىمىزدىڭ بويىنان نەمەسە بۇكىل قاۋىمنان ەشبىر جاقسىلىق كورمەي، كوزىمىزدىڭ تۇماندانىپ كەتۋىنەن ساقتايدى. سۇيىسپەنشىلىك وزگە كەمەلسىز ادامنىڭ نە ايتىپ، نە ىستەگەنىنە قاراماستان، ەحوباعا دەگەن ادالدىعىمىزدى ساقتاپ، قاۋىمدى ٵرى قاراي دا قولداۋعا كۇش بەرەدى (ٴزابۋر 119:165 [118:165]).
سۇيىسپەنشىلىك قانداي ەمەس؟
15. ورىنسىز قىزعانىش دەگەن نە جانە قالاي سۇيىسپەنشىلىك وسى زالىم قاسيەتتەن اۋلاق بولۋعا كومەكتەسەدى؟
15 «سۇيىسپەنشىلىك... قىزعانبايدى». ورىنسىز قىزعانىش وزگە بىرەۋدى مال-مۇلىگىنە، ارتىقشىلىقتارى نە قابىلەتتەرىنە بولا كورە الماي، ٸش تارلىق جاساۋعا اكەلۋى مۇمكىن. مۇنداي قىزعانىش ٶزىمشىل، زالىم بولىپ كەلەدى، ٵرى ەگەر ونى جۇگەندەمەسە، قاۋىمداعى ىنتىماقتى بۇزۋى مۇمكىن. كۇنشىلدىككە دەگەن بەيىمدىلىكتىڭ ىقپالىنا بەرىلمەۋگە نە كومەكتەسە الادى؟ ٴبىر سوزبەن ايتار بولساق، سۇيىسپەنشىلىك. وسى قۇندى قاسيەت وزىمىزدە جوق قانداي دا ٴبىر نارسەگە وزگە بىرەۋدىڭ قول جەتكىزگەنىنە قۋانا بىلۋگە كومەكتەسەدى (ريمدىكتەرگە 12:15). سۇيىسپەنشىلىك بىرەۋ ەرەكشە دارىنى نەمەسە جەتىستىگى ٷشىن ماقتاۋ الىپ جاتسا، مۇنى ٴبىزدىڭ نامىسىمىزدى قامشىلاپ جاتقانداي قابىلداماۋعا كومەك بەرەدى.
16. باۋىرلاستاردى شىنىمەن جاقسى كورەر بولساق، نەگە قىزمەتتەگى جەتىستىكتەرىمىزگە ماقتانۋدان اۋلاق بولامىز؟
16 «سۇيىسپەنشىلىك... ماقتانبايدى، پاڭدانبايدى». سۇيىسپەنشىلىك دارىندارىمىز بەن جەتىستىكتەرىمىزگە بولا كوكىرەك كەرۋىمىزگە جول بەرمەيدى. ەگەر باۋىرلاستاردى شىنىمەن جاقسى كورسەك، قىزمەتتەگى جەتىستىكتەرىمىزگە نەمەسە قاۋىمداعى ارتىقشىلىقتارىمىزعا قالايشا ماقتانا بەرمەكپىز؟ وسىلاي لەپىرە بەرەر بولساق، باسقالار وزدەرىن بىزبەن سالىستىرىپ، ۇنجىرعالارى ٴتۇسۋى مۇمكىن. سۇيىسپەنشىلىك قىزمەتتەگى ارتىقشىلىقتارىمىزعا ماقتانۋدان اۋلاق ەتەدى، ويتكەنى ونى بىزگە تاپسىرعان قۇداي عوي (قورىنتتىقتارعا 1-حات 3:5—9). سونىمەن قاتار سۇيىسپەنشىلىك «پاڭدانبايدى» نەمەسە باسقا ٴبىر اۋدارمادا ايتىلعانداي، «نەتكەن ماڭىزدى اداممىن دەگەن ويمەن ٶزىن الداندىرمايدى». سۇيىسپەنشىلىك ٶزىمىز تۋرالى تىم جوعارى ويدا بولۋدان ساقتايدى (ريمدىكتەرگە 12:3).
17. سۇيىسپەنشىلىك ٴبىزدى وزگەلەرگە قالاي قاراۋعا تالپىندىرادى جانە قانداي ارەكەتتەردەن اۋلاق ەتەدى؟
17 ‹سۇيىسپەنشىلىك... جۇگەنسىز ەمەس›. جۇگەنسىز ارەكەت ەتەتىن ادام كورگەنسىزدىك جاساپ، وزگەنىڭ ىزاسىن كەلتىرەدى. بۇل سۇيىسپەنشىلىككە جاتپايدى، ويتكەنى مۇنداي ارەكەت ادامدى وزگەنىڭ سەزىمى مەن يگىلىگى مۇلدەم قىزىقتىرمايتىنىن كورسەتەدى. ال سۇيىسپەنشىلىك، كەرىسىنشە، وزگەلەردىڭ سەزىمىن ەسكەرەتىندىگىمەن ەرەكشەلەنەدى. سۇيىسپەنشىلىك ادامنىڭ ٸلتيپاتتى بولۋىنا، ٶزىن دۇرىس ۇستاۋىنا جانە باۋىرلاستارىن سيلاۋىنا ىقپال ەتەدى. سوندىقتان ول ‹ادەپسىزدىك جاساۋدان› — ٴيا، ٴماسىحشى باۋىرلاستارىمىزدى رەنجىتەتىن نە قورلايتىن كەز كەلگەن ارەكەتتەن — اۋلاق ەتەدى (ەفەستىكتەرگە 5:3، 4).
18. نەگە سۇيىسپەنشىلىگى بار ادام بارلىق نارسەنىڭ ٶزى قالاعانداي بولعانىن تالاپ ەتپەيدى؟
18 ‹سۇيىسپەنشىلىك... ٶزىمشىل ەمەس›. باسقا ٴبىر اۋدارما بۇل ويدى: «سۇيىسپەنشىلىك ٶز دەگەنىنەن قايتپاي تۇرىپ المايدى»،— دەپ جەتكىزەدى. سۇيىسپەنشىلىگى بار ادام، تەك ٶز ويىن عانا ارقاشان دۇرىس دەپ ەسەپتەپ، بارلىق نارسەنىڭ ٶزى قالاعانداي بولعانىن تالاپ ەتپەيدى. ول تابان تىرەسىپ تۇرىپ الىپ، وزگەلەرگە قىسىم جاساپ، كوزقاراستارىن وزگەرتۋگە ماجبۇرلەمەيدى. مۇنداي قىڭىرلىق — مەنمەندىكتىڭ بەلگىسى، ال كيەلى كىتاپتا: «مەنمەندىك — كۇيرەۋدىڭ باسى»،— دەلىنگەن (ناقىل سوزدەر 16:18). ەگەر ٴبىز باۋىرلاستاردى شىنىمەن جاقسى كورەتىن بولساق، ولاردىڭ كوزقاراستارىن سيلايمىز، ٵرى مۇمكىن بولعان جەردە كونبىستىك تانىتۋعا دايار بولامىز. كونبىستىك رۋحى پاۋىلدىڭ كەلەسى سوزدەرىنە ساي كەلەدى: «اركىم جەكە باسىنىڭ عانا ەمەس، باسقالاردىڭ دا مۇددەلەرىن ويلاۋى كەرەك» (قورىنتتىقتارعا 1-حات 10:24).
19. قالاي سۇيىسپەنشىلىك وزگەلەر ٴبىزدى رەنجىتكەندە، دۇرىس كوزقاراس ساقتاۋعا كومەكتەسەدى؟
19 ‹سۇيىسپەنشىلىك...اشۋشاڭ ەمەس، كەك تە ساقتامايدى›. سۇيىسپەنشىلىك بىرەۋدىڭ سوزىنە نە ىسىنە تەز اشۋلانا كەتپەيدى. بىرەۋ رەنجىتكەندە، ۇنجىرعامىزدىڭ ٴتۇسۋى تابيعي نارسە ەكەنى راس. سويتسە دە اشۋلانۋعا كەلەلى نەگىز بولعان كۇننىڭ وزىندە، سۇيىسپەنشىلىك اشۋلانىپ جۇرە بەرۋىمىزگە جول بەرمەيدى (ەفەستىكتەرگە 4:26، 27). ٴبىز جانعا باتاتىن سوزدەر مەن ىستەردى، ۇمىتپاس ٷشىن قويىن داپتەرگە جازىپ قويعانداي، كوڭىلىمىزدە ساقتاپ جۇرمەيمىز. قايتا، سۇيىسپەنشىلىك ٴبىزدى ٴسۇيۋشى اكەمىزگە ەلىكتەۋگە تالپىندىرادى. 26-تاراۋدان كورگەنىمىزدەي، كەلەلى سەبەپ بار بولسا، ەحوبا ارقاشان كەشىرەدى. ال كەشىرگەندە ٴبىرجولا ۇمىتادى، ياعني كۇنالارىمىزدى قايتىپ بەتىمىزگە باسپايدى. ەحوبانىڭ كەك ساقتامايتىنىنا قالايشا ريزامىز دەسەڭشى!
20. ٴبىر باۋىرلاس كۇناكار جولعا ٴتۇسىپ، اقىرىندا سونىڭ جەمىسىن كورىپ جاتسا، نە ىستەر ەدىك؟
20 ‹سۇيىسپەنشىلىك ادىلەتسىزدىكتى قۇپتامايدى›. وزگە ٴبىر اۋدارمادا بۇل سوزدەر: «سۇيىسپەنشىلىك... ادامنىڭ كۇنا جاساپ قويعانىنا قۋانبايدى»،— دەپ اۋدارىلعان. موففاتتىڭ اۋدارماسىندا: «سۇيىسپەنشىلىك وزگەلەر قاتەلىك جاساپ جاتسا، ەشقاشان قۋانبايدى»،— دەلىنگەن. سۇيىسپەنشىلىك پەن ادىلەتسىزدىكتىڭ اراسىندا ورتاق ەشتەڭە جوق، سوندىقتان ازعىندىق اتاۋلىعا جەڭىل-جەلپى قاراماۋىمىز كەرەك. ەگەر ٴبىر باۋىرلاس كۇناكار جولعا ٴتۇسىپ، اقىرىندا سونىڭ جەمىسىن كورىپ جاتسا، نە ىستەر ەدىك؟ سۇيىسپەنشىلىك بۇعان قۋانىپ: «ساۋاپ بولدى! وزىنە دە سول كەرەك!»— دەپ ويلاۋىمىزعا جول بەرمەيدى (ناقىل سوزدەر 17:5). ٴبىراق قاتەلىك جاساعان باۋىرلاستىڭ رۋحاني ساۋىعۋ ٷشىن جاقسى قادامدار جاساعانىن كورىپ قۋانامىز.
‹بارلىعىنان دا اسىپ تۇسەتىن جول›
21—23. ا) پاۋىل «سۇيىسپەنشىلىك ەشقاشان دا سارقىلمايدى» دەۋىمەن نە ايتقىسى كەلگەن؟ ٵ) وسى كىتاپتىڭ سوڭعى تاراۋى قانداي تاقىرىپقا باعىشتالادى؟
21 «سۇيىسپەنشىلىك ەشقاشان دا سارقىلمايدى». پاۋىل مۇنىمەن نە ايتقىسى كەلگەن؟ مانماتىننەن ونىڭ ەرتەدەگى ماسىحشىلەر قابىلداعان كيەلى رۋحتىڭ سيلارى جونىندە ايتقانى كورىنەدى. مۇنداي سيلار جاڭادان قۇرىلعان قاۋىمنىڭ قۇدايعا ۇنامدى ەكەندىگىنىڭ بەلگىسى بولعان. ٴبىراق ماسىحشىلەردىڭ ٴبارى بىردەي ساۋىقتىرىپ، پايعامبارلىق ايتىپ نەمەسە ٴتۇرلى تىلدەردە سويلەمەيتىن. الايدا ماڭىزدىسى بۇل ەمەس-ٴتىن. كەرەمەت سيلار ٴبارىبىر توقتار ەدى. سويتسە دە ماسىحشىلەردىڭ ٴبارى دامىتا الاتىن ٴبىر نارسە بولدى. ول كەز كەلگەن سيدان الدەقايدا ارتىق ٵرى الدەقايدا ۇزاق ۋاقىتقا سوزىلار ەدى. سوندىقتان دا پاۋىل ونى ‹بارلىعىنان دا اسىپ تۇسەتىن جول› دەپ اتاعان (قورىنتتىقتارعا 1-حات 12:31). ول نە قىلعان جول؟ بۇل — سۇيىسپەنشىلىك جولى.
22 ماسىحشىلەرگە ٴتان سۇيىسپەنشىلىكتى پاۋىل «ەشقاشان دا سارقىلمايدى» دەپ سۋرەتتەگەن، ٴيا، ول ەشقاشان بىتپەيدى. بۇگىندە يسانىڭ شىنايى ٸزباسارلارى باۋىرلاستارىنا دەگەن جانقيار سۇيىسپەنشىلىكتەرىمەن تانىلادى. ەحوبانىڭ قىزمەتشىلەرىنىڭ دۇنيە جۇزىندەگى قاۋىمدارىندا وسىنداي سۇيىسپەنشىلىكتىڭ بار ەكەندىگىنىڭ كۋاسى بولىپ ٴجۇر ەمەسپىز بە؟ بۇل سۇيىسپەنشىلىك ماڭگى سونبەيدى، ويتكەنى ەحوبا ٶزىنىڭ ادال قىزمەتشىلەرىنە ماڭگىلىك ٶمىر بەرۋدى ۋادە ەتكەن (ٴزابۋر 37:9—11، 29 [36:9—11، 29]). سوندىقتان ٵرى قاراي دا ‹ٴبىر-ٴبىرىمىزدى ٴسۇيىپ ٶمىر ٴسۇرۋ› ٷشىن قولدان كەلگەننىڭ ٴبارىن ىستەي بەرەلىك. وسىلاي ەتۋ ارقىلى بەرۋدەن كەلەتىن زور باقىتتى سەزىنەمىز. بۇل عانا ەمەس، ٴبىز ماڭگىلىك ٶمىر سۇرەمىز، ٴيا، ماڭگىلىك بويى سۇيىسپەنشىلىككە تولى ەحوبا قۇدايىمىزدىڭ سۇيىسپەنشىلىگىنە ەلىكتەي بەرەتىن بولامىز.
ەحوبانىڭ حالقى ٴبىر-بىرىنە دەگەن سۇيىسپەنشىلىگىمەن ەرەكشەلەنەدى
23 سۇيىسپەنشىلىككە ارنالعان ٴبولىمنىڭ وسى سوڭعى تاراۋىندا ٴبىر-ٴبىرىمىزدى قالاي سۇيە الاتىنىمىزدى تالقىلادىق. ٴبىز ەحوبانىڭ كۇشىنىڭ، ادىلدىگى مەن دانالىعىنىڭ، سونداي-اق سۇيىسپەنشىلىگىنىڭ زور پايداسىن كورۋدەمىز، سوندىقتان وزىمىزدەن: «مەن ەحوبانى شىنىمەن سۇيەتىنىمدى قالاي كورسەتە الامىن؟»— دەپ سۇراعانىمىز ابزال. كەلەسى سوڭعى تاراۋ وسى تاقىرىپقا باعىشتالادى.
a ماسىحشىلەردىڭ سۇيىسپەنشىلىگى، ارينە، اڭقاۋ بولۋدى بىلدىرمەيدى. كيەلى كىتاپ ٴبىزدى مىناعان شاقىرادى: «جىك شىعارىپ... ارازدىق تۋعىزۋشىلاردان ساق بولىپ، اۋلاق جۇرىڭدەر!» (ريمدىكتەرگە 16:17)