5-تاراۋ
وتاردى باعاتىن باقىلاۋشىلار
يسا جەردەگى قىزمەتى كەزىندە «ىزگى باعۋشى» ەكەنىن دالەلدەدى (جوح. 10:11). سوڭىنان ىنتا-ىقىلاسپەن ەرىپ جۇرگەن قالىڭ جۇرتتى كورگەندە، «يسا ولاردى اياپ كەتتى. ويتكەنى ولار باعۋشىسى جوق قويلارداي ازىپ-توزعان، بەيشارا كۇيدە ەدى» (مات. 9:36). يسانىڭ سۇيىسپەنشىلىكپەن كورسەتكەن قامقورلىعى پەتىر مەن باسقا دا ەلشىلەردىڭ نازارىنان تىس قالعان جوق. يسا ٴيسرايلدىڭ جالعان باعۋشىلارىنان قاتتى ەرەكشەلەندى. ولاردىڭ وتارعا ٵتۇستى قاراعانى سونشا — قويلار بىتىراپ، رۋحاني اش ٴجۇردى! (ەزەك. 34:7، 8). ەلشىلەر يسانىڭ ٴتالىم بەرۋدەگى كەرەمەت ۇلگىسى مەن قويلارعا دەگەن قامقورلىعىن، ٴتىپتى سولار ٷشىن ٶمىرىن قيعانىن كوردى. وسىلاي ولار سەنىمى بار جاندارعا «باعۋشى ٵرى قورعاۋشى» ەحوباعا ورالۋعا قالاي كومەكتەسۋگە بولاتىنىن ۇيرەندى (پەت. 1-ح. 2:25).
2 بىردە يسا پەتىرمەن سويلەسىپ، قويلاردىڭ ازىعىن بەرۋ مەن ولاردى باعۋدىڭ ماڭىزدىلىعىنا باسا نازار اۋداردى (جوح. 21:15—17). بۇل اڭگىمەنىڭ پەتىرگە قاتتى اسەر ەتكەنى ٴشۇباسىز. كەيىنىرەك ول ەرتەدەگى ماسىحشىلەر قاۋىمىنىڭ اقساقالدارىنا مىناداي كەڭەس بەردى: «باقىلاۋشىلار رەتىندە وزدەرىڭە تاپسىرىلعان قۇدايدىڭ وتارىن ىقتيارسىز ەمەس، شىن كوڭىلمەن، قانداي دا ٴبىر پايدا كوزدەپ ەمەس، بار ىنتا-جىگەرمەن باعىڭدار؛ سونداي-اق قۇدايدىڭ مەنشىگىنە وكتەمدىك ەتپەي، قايتا، وتارعا ۇلگى-ونەگە بولىڭدار!» (پەت. 1-ح. 5:1—3). پەتىردىڭ بۇل سوزدەرى بۇگىندەگى قاۋىم باقىلاۋشىلارىنا دا قاتىسى بار. اقساقالدار يساعا ەلىكتەي وتىرىپ، قاۋىمعا ۇلگى-ونەگە بولىپ شىن كوڭىلمەن، ىنتا-جىگەرمەن قىزمەت ەتەدى، ٵرى ەحوباعا دەگەن قىزمەتتە باسشىلىقتى قولعا الادى (ەۆر. 13:7).
اقساقالدار يساعا ەلىكتەي وتىرىپ، قاۋىمعا ۇلگى-ونەگە بولىپ شىن كوڭىلمەن، ىنتا-جىگەرمەن قىزمەت ەتەدى، ٵرى ەحوباعا دەگەن قىزمەتتە باسشىلىقتى قولعا الادى
3 ٴبىز رۋحپەن تاعايىندالعان قاۋىم باقىلاۋشىلارى ٷشىن ريزامىز. ولاردىڭ قامقورلىعى بىزگە كوپ يگىلىك اكەلەدى. مىسالى، باقىلاۋشىلار قاۋىمداعى ٵربىر ادامعا جىگەر بەرىپ، جەكە كوڭىل بولەدى. اپتا سايىن باۋىرلاستاردىڭ سەنىمىن نارلەندىرەتىن قاۋىم كەزدەسۋلەرىن بار ىنتامەن وتكىزەدى (ريم. 12:8). ولار وتارعا زيان كەلتىرەتىن جايتتاردان، مىسالى زۇلىم نيەتتى ادامداردان، بارىن سالىپ قورعايدى. سونىڭ ارقاسىندا ٴبىز قاۋىپسىزدىكتەمىز (يشايا 32:2؛ تيت. 1:9—11). ولاردىڭ ۋاعىز ىسىندە جەتەكشىلىكتى قولعا العاندارى ٴبىزدى اي سايىن ۋاعىزداپ وتىرۋعا تالپىندىرادى (ەۆر. 13:15—17). ەحوبا «سي رەتىندە» بەرگەن وسى ادامدار ارقىلى قاۋىمدى نىعايتادى (ەفەس. 4:8، 11، 12).
باقىلاۋشىلارعا قويىلاتىن تالاپتار
4 قاۋىمعا دۇرىس قامقورلىق كورسەتىلۋ ٷشىن، قۇداي سوزىندە باقىلاۋشى مىندەتىنە تاعايىندالاتىن ەر كىسىلەرگە تالاپتار قويىلعان. سول تالاپتارعا ساي كەلگەندە عانا باقىلاۋشى كيەلى رۋح ارقىلى تاعايىندالدى دەۋگە بولادى (ەل. ٸس. 20:28). ارينە، جازبالارداعى ٴماسىحشى باقىلاۋشىلارعا قويىلعان تالاپتار جوعارى، ويتكەنى باقىلاۋشى بولۋ — ۇلكەن جاۋاپكەرشىلىك. ٴبىراق ەحوبانى شىن جاقسى كورەتىن ٵرى ونىڭ ىسىندە پايداسىن تيگىزگىسى كەلەتىن ەر باۋىرلاستار ٷشىن اتالمىش تالاپتار ورىنداي المايتىنداي تىم جوعارى ەمەس. باقىلاۋشىلاردىڭ كيەلى كىتاپ كەڭەستەرىن كۇندەلىكتى ومىردە قولداناتىندارى بارىنە انىق كورىنىپ تۇرۋ كەرەك.
قاۋىمعا دۇرىس قامقورلىق كورسەتىلۋ ٷشىن، قۇداي سوزىندە باقىلاۋشى مىندەتىنە تاعايىندالاتىن ەر كىسىلەرگە تالاپتار قويىلعان
5 ەلشى پاۋىل تىموتەگە جازعان ٴبىرىنشى حاتى مەن تيتكە ارناعان حاتىندا باقىلاۋشىلارعا قويىلاتىن نەگىزگى تالاپتاردى اتاپ وتكەن. تىموتەگە 1-حات 3:1—7-تارماقتاردا بىلاي دەلىنگەن: «ەگەر بىرەۋ باقىلاۋشى مىندەتىنە ۇمتىلسا، ونىڭ يگىلىكتى ٸستى قالاعانى. باقىلاۋشى ەش كىناراتسىز، ٴبىر عانا ايەلى بار، بارلىق جاعىنان بايسالدى، ەستى، ٸس-ارەكەتىنە ۇقىپتى، قوناقجاي، ٴتالىم بەرۋگە قابىلەتتى، نە ماسكۇنەم، نە قاتىگەز ەمەس، يلىككىش بولۋى كەرەك، سونداي-اق داۋكەس تە، اقشاقۇمار دا بولماۋى ٴتيىس. سونىمەن قاتار وتباسىنا جاقسى باسشىلىق ەتەتىن، ال بالالارى مويىنسۇنعىش ٵرى ٴتارتىپتى بولۋى كەرەك. (ەگەر ادام ٶز وتباسىنا باسشىلىق ەتۋدى بىلمەسە، قالايشا قۇداي قاۋىمىن قامقورلاي الادى؟) ول سەنىمدى جاڭا قابىلداعانداردان بولماسىن، ايتپەسە كەۋدە كوتەرىپ، ىبىلىسكە شىعارىلعان ۇكىمگە ۇشىراۋى مۇمكىن. سونداي-اق جۇرت سوزىنە ىلىكپەۋى جانە ٸبىلىستىڭ تورىنا ٴتۇسىپ قالماۋى ٷشىن قاۋىمنان تىسقارى ادامدار الدىندا جاقساتتى بولۋى ٴتيىس».
6 ال تيتكە پاۋىل بىلاي دەپ جازدى: «مەن سەنى كريتتە سونداعى ولقىلىقتاردى تۇزەتسىن، قالالاردا اقساقالدار تاعايىنداسىن دەپ قالدىردىم. مەنىڭ مىنا نۇسقاۋلارىمدى ۇستان: اقساقال ەتىپ ەش ايىبى جوق ٵرى ٴبىر عانا ايەلگە ۇيلەنگەن كىسىنى تاعايىندا. ال بالالارى جۇگەنسىز، بەتىمەن كەتكەن ەمەس، سەنۋشى بولسىن. باقىلاۋشى قۇداي تاعايىنداعان باسقارۋشى رەتىندە ەش ايىبى جوق بولۋى ٴتيىس. ول ٶز دەگەنىن ىستەتەتىن، قىزبا، ماسكۇنەم، قاتىگەز بولماۋى، سونداي-اق اشكوزدىكپەن ارام ولجا ىزدەمەۋى كەرەك. قايتا، قوناقجاي، ىزگىلىك اتاۋلىنى جاقسى كورەتىن، ەستى، ٵدىل ٵرى ادال، ۇستامدى بولۋى ٴتيىس. ول دۇرىس ٸلىم ارقىلى جىگەرلەندىرە الۋ ٷشىن جانە وسى ىلىمگە قايشى سويلەيتىندەردى اشكەرەلەي الۋ ٷشىن ٴتالىم بەرگەندە، شىنايى سوزدەردەن اۋىتقىماۋ كەرەك» (تيت. 1:5—9).
7 جازبالارداعى باقىلاۋشىلارعا قويىلاتىن تالاپتار قيىن بولىپ كورىنۋى مۇمكىن، ٴبىراق ەر باۋىرلاستار بۇل مىندەتكە ۇمتىلۋدان تارتىنشاقتاماۋ كەرەك. ولار ماسىحشىلەرگە ٴتان كەرەمەت قاسيەتتەردى تانىتسا، قاۋىمداعىلار ولارعا ەلىكتەۋگە تالپىنادى. پاۋىل ەحوبانىڭ «سي رەتىندە ادامداردى» قانداي ماقساتپەن بەرگەنىن بىلاي تۇسىندىرگەن: «ولار قاسيەتتىلەردى تۇزەتۋ، وزگەلەرگە قىزمەت كورسەتۋ جانە ٴماسىحتىڭ دەنەسىن نىعايتۋ ٷشىن بەرىلدى. مۇنى ولار سەنىم جاعىنان دا، قۇداي ۇلى تۋرالى تۋرا ٴبىلىم جاعىنان دا ٴبارىمىز بىرلىككە جەتكەنگە دەيىن، سونداي-اق ٴماسىحتىڭ كەمەلىنە ساي كەلەتىن تولىسقان ادام بولعانىمىزعا دەيىن ىستەمەك» (ەفەس. 4:8، 12، 13).
8 باقىلاۋشىلار تىم جاس نەمەسە سەنىمدى جاڭا قابىلداعانداردىڭ قاتارىنان بولماۋى ٴتيىس. ولار ماسىحشىلىك ومىردە تاجىريبەسى بار، كيەلى كىتاپ جايلى ٴبىلىمى مول، جازبالارعا قاتىستى تۇسىنىگى تەرەڭ ٵرى قاۋىمدى شىن جاقسى كورەتىن ادامدار. ولار كۇنا جاساعان ادامدارمەن سويلەسىپ، تۇزەتۋدەن قورىقپايدى، وسىلايشا قويلاردى ٶز ماقساتىنا پايدالانعىسى كەلەتىن كەز كەلگەن ادامنان قورعايدى (يشايا 32:2). قاۋىمداعىلاردىڭ ٴبارى ولاردى قۇدايدىڭ وتارىن قامقورلايتىن رۋحاني تولىسقان ەر كىسىلەر دەپ بىلەدى.
9 باقىلاۋشى مىندەتىنە ساي كەلەتىن باۋىرلاستار دانالىقتى ٸس جۇزىندە تانىتادى. باقىلاۋشى ۇيلەنگەن بولسا، كيەلى كىتاپتاعى نەكەگە قاتىستى تالاپتى ۇستانادى، اتاپ ايتقاندا، ونىڭ ٴبىر عانا ايەلى بولۋ كەرەك جانە وتباسىنا جاقسى باسشىلىق ەتۋى ٴتيىس. ەگەر باقىلاۋشىنىڭ بالالارى سەنۋشى، مويىنسۇنعىش ٵرى ٴتارتىپتى بولسا، سونداي-اق جۇگەنسىز ەمەس، بەتىمەن كەتپەگەن بولسا، قاۋىمداعىلار ودان وتباسىلىق جانە ماسىحشىلىك ومىرگە قاتىستى كەڭەستى ەمىن-ەركىن سۇراي الادى. بۇعان قوسا، باقىلاۋشى ەش كىناراتسىز ٵرى ونىڭ ەش ايىبى جوق، ول ٴتىپتى تىسقارى ادامدار الدىندا دا جاقساتتى بولۋى ٴتيىس. قاۋىمنىڭ اتىنا كىر كەلمەس ٷشىن، ونىڭ ٴجۇرىس-تۇرىسى ۇلگىلى بولۋ قاجەت، سوندا ەشكىم ونى ايىپتاي المايدى. ول جۋىردا اۋىر كۇناسى ٷشىن سوگىس الماعان بولۋى ٴتيىس. قاۋىمداعى باۋىرلاستار ونىڭ كەرەمەت ۇلگىسىنە ەلىكتەۋگە تالپىنادى، ٵرى وزدەرىنىڭ رۋحاني كۇيىن ونىڭ قامقورىنا سەنىپ تاپسىرا الادى (قور. 1-ح. 11:1؛ 16:15، 16).
10 تالاپتارعا ساي كەلەتىن مۇنداي ەر باۋىرلاستار ماسىحشىلەردىڭ قاۋىمىندا ەجەلگى يسرايلدەگى اقساقالدار سياقتى قىزمەت ەتە الادى. ەجەلدەگى سول كىسىلەر «اقىلدى دا پاراساتتى، تاجىريبەلى» دەپ سيپاتتالعان (مۇس. 5-ج. 1:13). ارينە، ٴماسىحشى اقساقالدار كۇناسىز ەمەس، ٴبىراق ولار قاۋىمدا جانە جۇرت الدىندا ادال ٵرى قۇدايدان قورقاتىن ادام رەتىندە تانىمال. ولار ٴبىرشاما ۋاقىت ارالىعىندا قۇدايدىڭ پرينسيپتەرىنە ساي ٶمىر ٴسۇرىپ جاتقان بولۋى ٴتيىس. مىنسىزدىگىنىڭ ارقاسىندا ولار قاۋىم الدىندا ٴسوز ەركىندىگىنە يە (ريم. 3:23).
11 باقىلاۋشى مىندەتىنە جەكە ىستەرىندە دە، وزگەلەرمەن قارىم-قاتىناسىندا دا بايسالدى ەر ادام تاعايىندالادى. ولار فاناتيك ەمەس. قايتا، ولاردىڭ ومىرلەرىنەن تەپە-تەڭدىك پەن ۇستامدىلىق كورىنىپ تۇرۋ كەرەك. ولاردىڭ بايسالدىلىعى ٸشىپ-جەۋ، دەمالۋ، حوببيمەن اينالىسۋ جانە كوڭىل كوتەرۋ سياقتى ىستەردەن كورىنەدى. الكوگولدى ىشىمدىكتەر ىشكەندە دە بايسالدىلىق تانىتادى، باسقالاردىڭ ونى ماسكۇنەم دەپ ايىپتاۋىنا نەگىز بەرمەيدى. ىشىمدىكتىڭ سالدارىنان ساناسى تۇماندانعان ادامنىڭ ۇستامدىلىقتى جوعالتۋى وپ-وڭاي، ال مۇنداي ادام قاۋىمنىڭ رۋحاني مۇددەسىنە باس-كوز بولا المايدى.
12 باقىلاۋشىلىق قىزمەت ماسىحشىدەن ۇقىپتى بولۋدى تالاپ ەتەدى. ونىڭ جاقسى ادەتتەرى سىرت كورىنىسىنەن، ۇيىنەن جانە كۇندەلىكتى ىستەرىنەن كورىنەدى. مۇنداي ۇقىپتى ادام جۇمىستى كەيىنگە ىسىرا بەرمەيدى، نە ىستەۋ قاجەت ەكەنىن كورىپ، سوعان ساي جوسپار قۇرادى. ول قۇدايدىڭ پرينسيپتەرىن بەرىك ۇستانادى.
13 باقىلاۋشى يلىككىش بولۋ كەرەك. ول اقساقالدار كەڭەسىنىڭ باسقا دا مۇشەلەرىمەن بىرلىكتە قىزمەتتەسە ٴبىلۋى ٴتيىس. وزىنە قاتىستى بايسالدى كوزقاراس تانىتىپ، وزگەلەردەن تىم كوپ نارسەنى تالاپ ەتپەۋ قاجەت. يلىككىش باقىلاۋشى ٶز وي-پىكىرىن وزگە اقساقالداردىكىنەن ارتىق دەپ سانامايدى. وزگەلەر قاسيەتتەرى مەن قابىلەتتەرى جاعىنان ودان جاقسىراق بولۋى مۇمكىن. يلىككىش اقساقال ٶز تۇجىرىمدارىن جازبالارعا نەگىزدەيدى جانە يسا ٴماسىحتىڭ ۇلگىسىنە ەلىكتەۋگە ۇمتىلادى (ٴفىلىپ. 2:2—8). اقساقال داۋكەس نە قاتىگەز ەمەس، كەرىسىنشە، وزگەلەردى وزىنەن جوعارى ساناپ، ورىندى قۇرمەت تانىتادى. ول ارقاشان ٶز پىكىرىن العا تارتىپ، ٶز دەگەنىن ىستەتپەيدى. قىزبا دا ەمەس، قايتا، وزگەلەرمەن اراقاتىناسىندا تاتۋلىق ساقتايدى.
14 قاۋىم باقىلاۋشىسى ەستى بولۋى ٴتيىس. ەستى باقىلاۋشى كەز كەلگەن جاعدايدا سابىرلىق ساقتاپ، دۇرىس وي تۇزە بىلەدى. ول ەحوبانىڭ پرينسيپتەرىن جانە ولاردىڭ قولدانىلۋىن جاقسى تۇسىنەدى. ەستى ادام كەڭەس پەن نۇسقاۋلارعا قۇلاق اسۋعا دايىن تۇرادى. ول ەكىجۇزدى ەمەس.
15 پاۋىل باقىلاۋشىنىڭ ىزگىلىك اتاۋلىنى جاقسى كورۋى كەرەك ەكەنىن ٴتيتتىڭ ەسىنە سالعان. ول ٵدىل دە ادال بولۋ قاجەت. ونىڭ بۇل قاسيەتتەرى وزگەلەرمەن قارىم-قاتىناسىنان جانە دۇرىس تا يگى نارسەنى بەرىك ۇستاناتىنىنان كورىنىپ تۇرۋ كەرەك. ول — ەحوباعا مىزعىماستاي شىن بەرىلگەن ادام، ٵرى ونىڭ ٵدىل پرينسيپتەرىن ٵر كەز ۇستانادى. قۇپيالىلىقتى ساقتاي بىلەدى. بۇعان قوسا، ول وزگەلەردىڭ يگىلىگى ٷشىن ٶزىن جانە وزىندە بارىن اياماي، شىنايى قوناقجايلىلىق تانىتادى (ەل. ٸس. 20:33—35).
16 قىزمەتى جەمىستى بولۋ ٷشىن باقىلاۋشى ٴتالىم بەرۋگە قابىلەتتى بولۋ كەرەك. پاۋىلدىڭ تيتكە جازعان سوزدەرىنە ساي، باقىلاۋشى «دۇرىس ٸلىم ارقىلى جىگەرلەندىرە الۋ ٷشىن جانە وسى ىلىمگە قايشى سويلەيتىندەردى اشكەرەلەي الۋ ٷشىن ٴتالىم بەرگەندە، شىنايى سوزدەردەن اۋىتقىماۋ كەرەك» (تيت. 1:9). وزگەلەردىڭ كوزىن جەتكىزىپ، سەنىمدەرىن نىعايتۋ ٷشىن، ول وي تۇزە بىلەدى، دالەلدەر كەلتىرە الادى، قارسى پىكىردى جەڭە بىلەدى جانە جازبالاردى دۇرىس قولدانادى. ول قولايلى ۋاقىتتا دا، قيىن ۋاقىتتا دا ٴتالىم بەرەدى (ٴتىم. 2-ح. 4:2). شىدامدىلىق پەن جۇمساقتىق تانىتا وتىرىپ، قاجەت كەزدە ادامدى جونگە سالادى، سونداي-اق كۇمانى بار ادامنىڭ كوزىن جەتكىزىپ، سەنىم دامىتۋعا جانە سونىڭ نەگىزىندە يگى ىستەر ىستەۋگە تالپىندىرادى. كوپشىلىك الدىندا نەمەسە اداممەن جەكە سويلەسكەندە ٴتالىم بەرە السا، باقىلاۋشى وسى ماڭىزدى تالاپقا ساي كەلەتىنىن كورسەتەدى.
17 اقساقالداردىڭ ۋاعىزعا دەگەن قۇلشىنىسى كۇشتى بولعانى ماڭىزدى. بۇل ىستە دە ولاردىڭ يساعا ەلىكتەۋگە تىرىساتىنى كورىنىپ تۇرۋ قاجەت. يسا ٷشىن ىزگى حاباردى ۋاعىزداۋ باستى ٸس بولعان. ول شاكىرتتەرىنە شەبەر ۋاعىزداۋشى بولۋعا كومەكتەسكەن (مار. 1:38؛ لۇقا 8:1). اقساقالدار ىستەرى كوپ بولسا دا، ۋاعىزداۋعا دەگەن شەشىمدەرىنە بەرىك، ال ولاردىڭ بۇل ۇلگىسى قاۋىمداعى بارلىق باۋىرلاستاردىڭ دا قۇلشىنىسىن ارتتىرادى. اقساقالدار وتباسىمەن جانە قاۋىمداعى باۋىرلاستارمەن بىرگە ۋاعىزداعاندا، ٴبارى «ٶزارا جىگەرلەنەدى» (ريم. 1:11، 12).
18 باقىلاۋشىلارعا قويىلاتىن تالاپتار الدەكىمگە تىم جوعارى بولىپ كورىنۋى مۇمكىن. ارينە، ەشبىر باقىلاۋشى كيەلى كىتاپتا جازىلعان بۇل جوعارى تالاپتاردى كەمەلدى تۇردە ورىنداي المايدى. ٴبىراق ەشبىر اقساقال اتالىپ وتكەن قاسيەتتەردىڭ قايسىبىرىن مۇلدەم دەرلىك تانىتپاي قويىپ، ۇلكەن ولقىلىققا جول بەرمەۋ كەرەك. كەي اقساقالدار بەلگىلى ٴبىر قاسيەتتەردى تاماشا تانىتسا، وزگەلەرى باسقا قىرىنان باسىمىراق بولىپ كەلەدى. وسىلايشا اقساقالدار كەڭەسىندە قۇدايدىڭ قاۋىمىنا باس-كوز بولۋعا قاجەتتى بارلىق تاماشا قاسيەتتەر توعىسادى.
19 اقساقالدار كەڭەسى ەر كىسىلەردى باقىلاۋشى مىندەتىنە ۇسىنىپ جاتقاندا، ەلشى پاۋىلدىڭ كەلەسى سوزدەرىن جادىندا ۇستاۋعا تىرىسادى: «اربىرىڭە مىنانى ايتامىن: وزدەرىڭ تۋرالى تيىستىسىنەن ارتىق ويلاماڭدار. قايتا، ەستى بولىپ، قۇداي ٴارقايسىسىڭا بەرگەن سەنىمنىڭ مولشەرىنە ساي ويلاڭدار» (ريم. 12:3). ٵر اقساقال ٶزىن كىشى تۇتۋ كەرەك. باۋىرلاستىڭ تالاپتارعا ساي كەلەتىنىن قاراستىرىپ جاتقاندا، ەشكىم «تىم ٵدىل بولماۋى» ٴتيىس (ۋاع. 7:16). اقساقالدار كەڭەسى جازبالارداعى باقىلاۋشىلارعا قويىلعان تالاپتاردى ەستە نىق ۇستاي وتىرىپ، قاراستىرىلىپ جاتقان ەر باۋىرلاستىڭ سول تالاپتارعا اقىلعا قونىمدى دەڭگەيدە ساي كەلەتىنىن انىقتاۋ كەرەك. بۇل ورايدا اقساقالدار ادام كەمەلسىزدىگىن ەسكەرىپ، الالاۋشىلىق پەن ەكىجۇزدىلىككە بوي الدىرمايدى، ەحوبانىڭ ٵدىل تالاپتارىنا قۇرمەت كورسەتە وتىرىپ، قاۋىمنىڭ يگىلىگىن ويلايدى. باۋىرلاستاردى قاراستىرعاندا، اقساقالدار كيەلى رۋح سۇراپ دۇعا ەتەدى جانە جازبالارداعى تالاپتاردى ولاردىڭ قانشالىقتى ورىنداپ جۇرگەنىن مۇقيات سارالايدى. بۇل — اقساقالدارعا جۇكتەلگەن ۇلكەن جاۋاپكەرشىلىكتەردىڭ ٴبىرى. سوندىقتان ولار پاۋىلدىڭ مىنا ەسكەرتۋىنە ساي ارەكەت ەتەدى: «بىرەۋدىڭ ۇستىنە قول قويىپ تاعايىنداۋدا اسىعىستىق جاساما» (ٴتىم. 1-ح. 5:21، 22).
كيەلى رۋحتىڭ جەمىسى
20 رۋحاني تولىسقان ەر كىسىلەر كيەلى رۋحتىڭ نۇسقاۋىمەن ٴجۇرىپ-تۇراتىنىن جانە ومىرىندە سونىڭ جەمىسىن تانىتاتىنىن كورسەتەدى. پاۋىل رۋح جەمىسىنىڭ توعىز قىرىن اتاپ وتكەن: «سۇيىسپەنشىلىك، قۋانىش، تاتۋلىق، شىدامدىلىق، مەيىرىمدىلىك، ىزگىلىك، سەنىم، جۇمساقتىق، ۇستامدىلىق» (عال. 5:22، 23). مۇنداي باقىلاۋشىلار باۋىرلاستاردىڭ جانىن سەرگىتەدى، ٵرى قاۋىمعا قاسيەتتى قىزمەتتى بىرىگە اتقارۋعا كومەكتەسەدى. ولاردىڭ ٴجۇرىس-تۇرىسى مەن ەڭبەكتەرىنىڭ جەمىسى كيەلى رۋح ارقىلى تاعايىندالعانىن پاش ەتەدى (ەل. ٸس. 20:28).
بىرلىكتىڭ نىعايۋىنا سەپتىگىن تيگىزەتىن ەر كىسىلەر
21 اقساقالداردىڭ ٴبارى قاۋىم بىرلىگىن نىعايتۋعا ۇلەس قوسقاندارى وتە ماڭىزدى. ولاردىڭ بولمىستارى ٴبىر-بىرىنە مۇلدەم ۇقساماۋى مۇمكىن. ٴبىراق تالقىلانىپ جاتقان ماسەلەدە وزگەنىڭ پىكىرىمەن كەلىسپەسە دە، ٴبىر-ٴبىرىن قۇرمەتپەن تىڭداي وتىرىپ، اقساقالدار كەڭەسىنىڭ بىرلىگىن ساقتايدى. كيەلى كىتاپ ٴپرينسيپى اياقاستى ەتىلمەسە، اقساقالدار كەڭەسى قابىلداعان سوڭعى شەشىممەن ٵربىر اقساقال كەلىسۋگە جانە ونى قولداۋعا مىندەتتى. شەشىممەن كەلىسۋگە دايىن بولعانى ادامنىڭ «كوكتەن كەلگەن دانالىعى» بار ەكەنىن كورسەتەدى، ال مۇنداي دانالىق «تاتۋ» دا «يلىككىش» (جاق. 3:17، 18). ەشبىر اقساقال ٶزىن باسقا اقساقالدان جوعارىمىن دەپ ويلاماۋ كەرەك. ەشبىر اقساقال باسقالاردان ۇستەم بولۋعا تىرىسپاۋ كەرەك. ەگەر اقساقالدار قاۋىمنىڭ يگىلىگى ٷشىن ٴبىر دەنە ىسپەتتى ٴبىر-بىرىمەن قىزمەتتەسەر بولسا، مۇنىسى ەحوبامەن قىزمەتتەسكەنمەن تەڭ بولادى (قور. 1-ح. 12 تار.؛ قول. 2:19).
باقىلاۋشى مىندەتىنە ۇمتىلۋ
22 تولىسقان ەر باۋىرلاستار باقىلاۋشى بولۋعا ۇمتىلۋ كەرەك (ٴتىم. 1-ح. 3:1). الايدا اقساقالدىق قىزمەت اۋىر ەڭبەك پەن جانكەشتىلىكتى تالاپ ەتەدى، ويتكەنى مۇنداي ادام باۋىرلاستاردىڭ مۇددەسى مەن رۋحاني ساۋلىقتارى ٷشىن قىزمەت ەتۋگە دايىن بولۋ كەرەك بولادى. باقىلاۋشى مىندەتىنە ۇمتىلۋ دەگەنىمىز جازبالارداعى تالاپتارعا ساي كەلۋگە تىرىسۋدى بىلدىرەدى.
جەكە باستىڭ جاعدايى وزگەرۋى مۇمكىن
23 ۇزاق ۋاقىت بويى ادال قىزمەت ەتىپ كەلە جاتقان ەر باۋىرلاس دەرتكە شالدىققاندىقتان، جاسى ۇلعايعاندىقتان نە باسقا دا سەبەپپەن باقىلاۋشى مىندەتىن اتقارۋعا شاماسى جەتپەۋى مۇمكىن. ٴبىراق ول مۇنداي كەزدە دە اقساقال بولىپ قالادى، ٵرى ٴتيىستى قۇرمەتكە لايىق. تاعايىندالۋى ٶز كۇشىندە بولعان ۋاقىتتىڭ بارىندە وسىلاي بولۋى ٴتيىس. مۇمكىندىكتەرىنىڭ شەكتەۋلى بولعانىنا بولا وعان اقساقالدىق قىزمەتىنەن باس تارتۋدىڭ قاجەتى جوق. وتاردى باعۋ ٷشىن قولىنان كەلگەننىڭ ٴبارىن ىستەپ جۇرگەن بارلىق اقساقالدار ىسپەتتى ول دا ەكى ەسە قۇرمەتكە لايىق.
24 ال ەگەر اقساقال قىزمەت ەتۋىن شەكتەپ جاتقان جاعدايىنا بايلانىستى باقىلاۋشىلىق قىزمەتىنەن باس تارتامىن دەپ شەشسە — ٶز ەركى (پەت. 1-ح. 5:2). ول بۇدان كەيىن دە قۇرمەتتەلۋى ٴتيىس. اقساقالدارعا جۇكتەلگەن تاپسىرمالار مەن مىندەتتەردى اتقارا الماسا دا، ونىڭ قاۋىمعا تيگىزەر پايداسى زور.
قاۋىمداعى جاۋاپكەرشىلىكتەرى
25 قاۋىمدا اقساقالداردىڭ ٵرتۇرلى جاۋاپكەرشىلىكتەرى بار. مىسالى، ولاردىڭ ٴبىرى — اقساقالدار كەڭەسىنىڭ ۇيلەستىرۋشىسى، ٴبىرى — حاتشى، ٴبىرى — قىزمەت باقىلاۋشىسى، تاعى ٴبىرى — «كۇزەت مۇناراسىنىڭ» جۇرگىزۋشىسى، ال ٴبىرى — «ماسىحشىلىك ٶمىرىمىز بەن قىزمەتىمىز» كەزدەسۋىنىڭ باقىلاۋشىسى. كوپ اقساقالدار توپ باقىلاۋشىسى بولىپ قىزمەت ەتەدى. بۇل مىندەتتەردىڭ بەلگىلى ٴبىر مەرزىمى جوق. ارينە، ەگەر اقساقال باسقا جاققا كوشىپ كەتسە يا دەنساۋلىعىنا بايلانىستى جاۋاپكەرشىلىكتەرىن اتقارا الماسا، يا بولماسا جازبالارداعى تالاپتارعا ساي بولماي قالسا، ونىڭ مىندەتى باسقا اقساقالعا تاپسىرىلادى. باقىلاۋشىلار از قاۋىمداردا باسقا ەر باۋىرلاستار اقساقال بولۋعا لايىق بولمايىنشا، ٴبىر اقساقالعا بىرنەشە مىندەتتى اتقارۋعا تۋرا كەلۋى مۇمكىن.
26 اقساقالدار كەڭەسىنىڭ ۇيلەستىرۋشىسى اقساقالدار كەڭەسىنىڭ كەزدەسۋلەرىندە ٴتوراعا قىزمەتىن اتقارادى. ول كىشىپەيىلدىلىك تانىتا وتىرىپ، قۇدايدىڭ وتارىن باعاتىن باسقا دا اقساقالدارمەن بىرگە قىزمەتتەسەدى (ريم. 12:10؛ پەت. 1-ح. 5:2، 3). ول جاقسى ۇيىمداستىرۋشى بولۋى جانە بار ىنتاسىمەن توراعالىق ەتۋى ٴتيىس (ريم. 12:8).
27 حاتشى قاۋىمنىڭ جازبالارىن رەتتەيدى جانە باسقا اقساقالدارعا ماڭىزدى مالىمەتتەردى جەتكىزىپ وتىرادى. ەگەر قاجەت بولسا، وعان جاردەمدەسەتىن باسقا ٴبىر اقساقالدى يا قابىلەتتى قىزمەت كومەكشىسىن تاعايىنداۋعا بولادى.
28 ۋاعىز ىسىنە قاتىستى شارالار مەن قىزمەتپەن بايلانىسى بار باسقا دا ىستەر قىزمەت باقىلاۋشىسىنىڭ نۇسقاۋىمەن اتقارىلادى. قىزمەت باقىلاۋشىسى ۋاعىزداۋ توپتارىنىڭ بارىنە جۇيەلى تۇردە ساپارمەن بارادى. ول ٵر ايدىڭ ٴبىر دەمالىس كۇنىندە كەزەكتى توپقا بارۋدى جوسپارلايدى. ۋاعىزداۋ توپتارى از كىشىگىرىم قاۋىمداردا قىزمەت باقىلاۋشىسى ٴبىر توپقا جىلىنا ەكى رەت بارا الادى. سول ساپار بارىسىندا ول ۋاعىزعا ارنالعان كەزدەسۋدى جۇرگىزەدى، توپپەن بىرگە قىزمەتتەسەدى جانە جاريالاۋشىلارعا قايتا بارۋ ٸسى مەن زەرتتەۋ ساباقتارىن وتكىزۋگە جاردەم بەرەدى.
توپ باقىلاۋشىلارى
29 قاۋىمداعى اسا مارتەبەلى قىزمەتتىڭ ٴبىرى — توپ باقىلاۋشىسى بولۋ. ونىڭ مىندەتىنە مىنالار كىرەدى: 1) ۋاعىزداۋ توبىنداعى ٵر جاريالاۋشىنىڭ رۋحاني كۇيىن ويلاۋ؛ 2) توپتاعى ٵر ادامعا جۇيەلى تۇردە ۋاعىزداۋعا، قىزمەتتە قۇلشىنىستى ٵرى قۋانىشتى بولۋعا كومەكتەسۋ؛ 3) توپتاعى قىزمەت كومەكشىلەرىن ۇيرەتىپ، كوبىرەك جاۋاپكەرشىلىك الۋعا جانە سوعان لايىقتى بولۋعا كومەكتەسۋ. بۇل قىزمەتكە اقساقالدار كەڭەسى اتالمىش مىندەتتەردى جاقسى اتقارا الاتىن ەر باۋىرلاستاردى تاڭدايدى.
30 توپ باقىلاۋشىسىنىڭ مىندەتىنە نە كىرەتىنىن ەسكەرسەك، بۇل قىزمەتكە مۇمكىندىگىنشە اقساقال تاعايىندالۋ كەرەك. ال اقساقال بولماي جاتسا، بۇل مىندەتتى قابىلەتتى قىزمەت كومەكشىسى اتقارسا بولادى. ٴبىراق ول قاۋىم باقىلاۋشىسى بولماعاندىقتان، توپ قىزمەتشىسى دەپ اتالادى. ول وسى قىزمەتتى اقساقالداردىڭ نۇسقاۋىمەن اتقارادى.
31 توپ باقىلاۋشىسىنىڭ ماڭىزدى ٴبىر مىندەتى — ۋاعىز قىزمەتىندە جەتەكشىلىكتى قولعا الۋ. ونىڭ جۇيەلى تۇردە ۋاعىزدايتىنى، قۇلشىنىسى مەن شابىتى توبىنداعى باۋىرلاستارعا جىگەر بەرەدى. توپ جاريالاۋشىلارى ٴبىر-بىرىمەن باس قوسقاندا كومەك پەن جىگەر الاتىندىقتان، ۋاعىزعا ارنالعان توپ كەزدەسۋىن كوپشىلىگىنە ىڭعايلى ۋاقىتقا قويعان جاقسى (لۇقا 10:1—16). توپ باقىلاۋشىسى ٵردايىم ۋچاسكەلەردىڭ جەتكىلىكتى بولۋىن قاداعالايدى. ول ۋاعىزداۋعا ارنالعان كەزدەسۋدى جۇرگىزەدى، ٵرى جاريالاۋشىلاردىڭ سول كۇنگى قىزمەتىن جوسپارلايدى. ٶزى بولمايتىن كەزدەرى توپتاعى جاريالاۋشىلارعا قاجەتتى نۇسقاۋلار بەرىلۋ ٷشىن، باسقا اقساقالمەن يا قىزمەت كومەكشىسىمەن كەلىسىپ الۋى ٴتيىس، ال مۇنداي مۇمكىندىك بولماسا، باسقا قابىلەتتى جاريالاۋشىمەن كەلىسە الادى.
32 توپ باقىلاۋشىسى قىزمەت باقىلاۋشىسىنىڭ ساپارىنا الدىن الا قامدانادى: سول ساپاردىڭ پايداسىن كورۋ ٷشىن، ول ٶز توبىن قۇلاعدار ەتەدى. توپتاعىلاردىڭ ٴبارى اتالمىش شارا جايلى حاباردار بولسا، وعان قۇلشىنا قاتىساتىن بولادى.
33 ۋاعىزداۋ توپتارىنىڭ ٴارقايسىسى ادەيى كىشىگىرىم بولىپ بولىنەدى. وسىلايشا توپ باقىلاۋشىسى ٶزىنىڭ توبىنداعى جاريالاۋشىلاردىڭ بارىمەن جاقسى تانىس بولادى. ٴسۇيۋشى باعۋشى رەتىندە ولاردىڭ اربىرىنە جەكە كوڭىل بولەدى. جەكە كومەك كورسەتۋگە تىرىسادى، ۋاعىزداۋ قىزمەتى مەن قاۋىم كەزدەسۋلەرىنە اتسالىسۋعا تالپىندىرادى. سونداي-اق توبىنداعى ٵر باۋىرلاس رۋحاني مىقتى بولۋ ٷشىن كەز كەلگەن ورىندى كومەگىن ايامايدى. اۋىرىپ قالعان ياكي جانى كۇيزەلگەن ادامنىڭ ۇيىنە كىرىپ-شىعىپ، دەمەۋ كورسەتەدى. كەيبىر جاريالاۋشىلارعا جىگەرلەندىرەرلىك ٴسوز ايتسا نە كەڭەس بەرسە، ولار قاۋىمدا قوسىمشا مارتەبەلى مىندەتتەرگە ۇمتىلىپ، ناتيجەسىندە باۋىرلاستارعا زور جاردەم بەرۋى مۇمكىن. ارينە، توپ باقىلاۋشىسى كوپ كۇشىن ٶز توبىنا كومەك بەرۋگە جۇمسايدى. ٴبىراق اقساقال ٵرى باعۋشى بولعاندىقتان، ول سۇيىسپەنشىلىكپەن قاۋىمداعى بارلىق باۋىرلاستاردىڭ قامىن جەيدى، ٵرى مۇقتاجدىقتا جۇرگەن باۋىرلاستارعا قول ۇشىن بەرۋگە دايار (ەل. ٸس. 20:17، 28).
34 توپ باقىلاۋشىسىنىڭ مىندەتتەرىنىڭ ٴبىرى — حاتشىعا ٶز توبىنداعى جاريالاۋشىلاردىڭ ۋاعىزداۋ قىزمەتى جونىندەگى ەسەبىن جيناۋعا جاردەمدەسۋ. ول ەسەپتەردى جيناپ بولعان سوڭ، قاۋىم حاتشىسىنا بەرەدى. ٵر جاريالاۋشى تەز ارادا ٶز ەسەبىن تاپسىرسا، بۇنىمەن ٶز توپ باقىلاۋشىسىنا كومەك كورسەتەدى. بۇل ٷشىن ولار ٵر ايدىڭ سوڭىندا ٶز ەسەپتەرىن توپ باقىلاۋشىسىنىڭ قولىنا ۇستاتادى، يا بولماسا پاتشالىق سارايىنداعى ەسەپتەرگە ارنالعان ارنايى جاشىككە سالادى.
قاۋىمنىڭ قىزمەت كوميتەتى
35 قاۋىمنىڭ قىزمەت كوميتەتىنىڭ قۇرامىنا اقساقالدار كەڭەسىنىڭ ۇيلەستىرۋشىسى، حاتشى جانە قىزمەت باقىلاۋشىسى كىرەدى. بۇل كوميتەتكە جۇكتەلگەن بەلگىلى ٴبىر مىندەتتەر بار. مىسالى، قىزمەت كوميتەتى پاتشالىق سارايىن نەكە بايانداماسى نە جەرلەۋ بايانداماسى ٷشىن قولدانۋدى ماقۇلدايدى، جاريالاۋشىلاردى ۋاعىزداۋ توپتارىنا بولۋگە دە وسى كوميتەت جاۋاپتى. جاريالاۋشىلاردىڭ تۇراقتى جانە قوسالقى ىزاشارلىق قىزمەتكە يا قىزمەتتىڭ باسقا تۇرىنە بەرگەن وتىنىشتەرىن قاراستىرىپ ماقۇلدايدى. قاۋىمنىڭ قىزمەت كوميتەتى اقساقالدار كەڭەسىنىڭ نۇسقاۋىمەن قىزمەت اتقارادى.
36 كەيدە قاۋىمنىڭ قىزمەت كوميتەتىنىڭ، «كۇزەت مۇناراسىن» جۇرگىزۋشىسىنىڭ، «ماسىحشىلىك ٶمىرىمىز بەن قىزمەتىمىز» كەزدەسۋىنىڭ باقىلاۋشىسى مەن اقساقالدار كەڭەسىن قۇرايتىن باۋىرلاستاردىڭ بەلگىلى ٴبىر مىندەتتەرىن فيليال ٴتۇسىندىرىپ جاتادى.
37 اقساقالدار كەڭەسى قاۋىمنىڭ رۋحاني وسىمىمەن بايلانىستى ماسەلەلەردى قاراستىرۋ ٷشىن اراگىدىك باس قوسىپ وتىرادى. اۋداندىق باقىلاۋشىنىڭ ساپارى كەزىندە وتكىزىلەتىن كەزدەسۋدەن بولەك، سول ساپاردان شامامەن ٷش اي وتكەن سوڭ، اقساقالدار كەزدەسۋ وتكىزەدى. ارينە، قاجەت بولسا، اقساقالدار باسقا ۋاقىتتا دا جينالا الادى.
باقىلاۋشىلارعا باعىنۋ
38 باقىلاۋشىلار كەمەلسىز ادامدار بولسا دا، قاۋىمداعى بارلىق باۋىرلاستار ولارعا باعىنۋ كەرەك. ويتكەنى بۇل — ەحوبا ورناتقان شارا. باقىلاۋشىلار ٶز ٸس-ارەكەتتەرى ٷشىن ەحوبانىڭ الدىندا جاۋاپ بەرەدى. ولار ەحوبانىڭ وكىلدەرى، سولار ارقىلى قۇداي تەوكراتيالىق بيلىگىن جۇرگىزەدى. ەۆرەيلەرگە 13:17 دە بىلاي دەلىنگەن: «ارالارىڭدا باسشىلىقتى قولعا العاندارعا مويىنسۇنىڭدار ٵرى باعىنىڭدار. سەبەبى ولار ۇنەمى سەندەردىڭ قامدارىڭدى ويلايدى، ٵرى بۇل ٷشىن ەسەپ بەرەدى. ولار كۇرسىنىپ ەمەس، قۋانا قامدارىڭدى ويلاۋ ٷشىن سولاي ەتىڭدەر، ايتپەسە بۇدان وزدەرىڭ زيان كورەسىڭدەر». ەحوبانىڭ كيەلى رۋحى ارقىلى تاعايىندالعان باقىلاۋشى كيەلى رۋح جەمىسىن تانىتۋدى قويسا جانە ٶمىرى سالتى جازبالارداعى تالاپتارعا ساي كەلمەيتىن بولسا، ەحوبا سول كيەلى رۋحى ارقىلى ونى قىزمەتىنەن بوساتادى.
39 قاۋىم باقىلاۋشىلارىنىڭ اۋىر ەڭبەگى مەن كەرەمەت ۇلگىسى ٷشىن ريزاشىلىعىمىز شەكسىز، سولاي ەمەس پە؟ سالونيكاداعى قاۋىمعا جازعان حاتىندا پاۋىل باۋىرلاستاردى مىناعان تالپىندىرعان: «باۋىرلاستار، سەندەردەن سۇرايتىنىمىز — ارالارىڭدا اۋىر ەڭبەكتەنىپ، يەمىزدىڭ ىسىندە جەتەكشىلىك ەتىپ، اقىل-كەڭەس بەرىپ جۇرگەندەردى قادىرلەڭدەر. ولاردى ەڭبەكتەرى ٷشىن ايرىقشا قۇرمەتتەپ، جاقسى كورىڭدەر» (سال. 1-ح. 5:12، 13). باقىلاۋشىلاردىڭ جاساپ جاتقان اۋىر ەڭبەگىنىڭ ارقاسىندا قۇدايعا دەگەن قىزمەتىمىز قيىن ەمەس، ٵرى ٴبىزدى قۋانىشقا بولەيدى. سونداي-اق پاۋىل تىموتەگە جازعان ٴبىرىنشى حاتىندا قاۋىمداعىلاردىڭ باقىلاۋشىلارعا قانداي كوزقاراس دامىتۋ كەرەكتىگىنە قاتىستى بىلاي دەگەن: «جاقسى باسشىلىق ەتەتىن اقساقالدار، اسىرەسە قۇداي ٴسوزىن ايتىپ، ٴتالىم بەرۋدە ايانباي ەڭبەك ەتەتىندەر، ەكى ەسە قۇرمەتكە لايىق» (ٴتىم. 1-ح. 5:17).
ۇيىمداعى باسقا دا جاۋاپكەرشىلىكتەر
40 كەيدە كەيبىر اقساقالدار «ناۋقاستارعا كومەك كورسەتۋ توپتارىنىڭ» مۇشەسى بولىپ تاعايىندالادى. ال كەيبىرەۋلەرى اۋرۋحانالارمەن بايلانىس كوميتەتتەرىندە قىزمەت اتقارادى، ياعني ٴتۇرلى اۋرۋحانالارعا بارىپ، دارىگەرلەرمەن ەحوبا كۋاگەرلەرىن قانسىز ەمدەۋ جايلى سويلەسەدى. سونداي-اق پاتشالىق سارايلارى مەن كونگرەسس سارايلارىن سوعۋعا كومەكتەسىپ، كونگرەسس كوميتەتتەرىندە قىزمەت ەتىپ، پاتشالىقتىڭ مۇددەسىن العا جىلجىتىپ جۇرگەن باقىلاۋشىلار دا بار. وسى باۋىرلاستاردىڭ اۋىر ەڭبەگى مەن دايىندىق رۋحى ٷشىن ۇيىمداعى بارلىق باۋىرلاستار ٴدان ريزا! ٴيا، ٴبىز «مۇنداي ادامداردى قۇرمەتتەيمىز» (ٴفىلىپ. 2:29).
اۋداندىق باقىلاۋشى
41 باسقارۋشى كەڭەس كەيبىر لايىقتى اقساقالداردى اۋداندىق باقىلاۋشى ەتىپ تاعايىندايدى. اۋداندىق باقىلاۋشىلار فيليالدىڭ تاپسىرىسىمەن ٶز اۋدانىنداعى قاۋىمدارعا جىلىنا ەكى رەت بارادى. ولار اراگىدىك شالعاي اۋماقتاردا قىزمەت ەتەتىن ٸزاشارلارعا دا بارىپ تۇرادى. اۋداندىق باقىلاۋشى ٶز ساپارىنىڭ كەستەسىن قۇرادى، ال باۋىرلاستار ساپاردىڭ پايداسىن كورۋ ٷشىن ٵر قاۋىمدى الدىن الا حاباردار ەتەدى.
42 اۋداندىق باقىلاۋشىنىڭ ساپارى بارلىق باۋىرلاستاردى رۋحاني سەرگىتۋ ٷشىن، اقساقالدار كەڭەسىنىڭ ۇيلەستىرۋشىسى ساپارمەن بايلانىسى بار ىستەردى ۇيىمداستىرادى (ريم. 1:11، 12). ساپار جايلى حابارلاما مەن اۋداندىق باقىلاۋشىنىڭ (ۇيلەنگەن بولسا ايەلىنىڭ دە) جەكە قاجەتتىلىكتەرى جايلى مالىمەت العان سوڭ، اقساقالدار كەڭەسىنىڭ ۇيلەستىرۋشىسى باسقا باۋىرلاستاردىڭ كومەگىنە جۇگىنە وتىرىپ، باسپانا مەن باسقا دا قاجەتتى زاتتاردى دايىندايدى. وسى جوسپار جايلى ول ٴتيىستى ادامداردىڭ ٴبارىن جانە اۋداندىق باقىلاۋشىنى دا حاباردار ەتەدى.
43 اۋداندىق باقىلاۋشى اقساقالدار كەڭەسىنىڭ ۇيلەستىرۋشىسىمەن حابارلاسىپ، ۋاعىزداۋعا ارنالعان كەزدەسۋلەر مەن باسقا دا كەزدەسۋلەردىڭ كەستەسىن تالقىلاپ الادى. بۇل كەستەلەر اۋداندىق باقىلاۋشىنىڭ ۇسىنىسىنا جانە فيليالدان كەلگەن باسشىلىققا نەگىزدەلىپ قۇرىلادى. باۋىرلاستارعا قاۋىم كەزدەسۋلەرى، ىزاشارلارمەن كەزدەسۋ، اقساقالدارمەن جانە قىزمەت كومەكشىلەرىمەن كەزدەسۋ، ۋاعىزداۋعا ارنالعان كەزدەسۋلەردىڭ وتەتىن ۋاقىتى مەن ورنىن مالىمدەۋ كەرەك.
44 سەيسەنبى تۇستەن كەيىن اۋداندىق باقىلاۋشى جاريالاۋشىلاردىڭ ەسەپ كارتوچكالارىن، قاۋىمعا كەلۋشىلەردىڭ سانىن، ۋچاسكەلەر جونىندەگى جازبانى جانە قاۋىم قارجىسىن قاراپ شىعادى. وسىنىڭ ارقاسىندا ول قاۋىمنىڭ كەيبىر قاجەتتىلىكتەرىن كورە بىلەدى، ٵرى سول قۇجاتتارعا جاۋاپتى باۋىرلاستارعا كومەك بەرە الادى. اۋداندىق باقىلاۋشى بۇل قۇجاتتاردى دەر كەزىندە الۋ ٷشىن، اقساقالدار كەڭەسىنىڭ ۇيلەستىرۋشىسى الدىن الا قام جاسايدى.
45 اۋداندىق باقىلاۋشى ساپار بارىسىندا شاماسىنا قاراي قاۋىم كەزدەسۋلەرىندە، ۋاعىز قىزمەتىندە، تۇسكى اس كەزىندە جانە تاعى باسقا ۋاقىتتاردا باۋىرلاستارعا جەكە كوڭىل بولۋگە تىرىسادى. بۇعان قوسا، ول اقساقالدارمەن جانە قىزمەت كومەكشىلەرىمەن كەزدەسىپ، جازبالارعا نەگىزدەلگەن ورىندى كەڭەستەر، ۇسىنىستار مەن جىگەرلى سوزدەر ايتادى. بۇنىسى باۋىرلاستارعا وتاردى باعۋ جاۋاپكەرشىلىگىن جاقسى اتقارۋعا كومەكتەسەدى (ناق. س. 27:23؛ ەل. ٸس. 20:26—32؛ ٴتىم. 1-ح. 4:11—16). ول ىزاشارلارمەن دە كەزدەسىپ، ولاردى جىگەرلەندىرەدى جانە قىزمەتتەگى قيىندىقتارىن شەشۋدە جەكە كومەك كورسەتەدى.
46 ەگەر كوڭىل ٴبولۋدى تالاپ ەتەتىن باسقا دا ماسەلەلەر بولسا، اۋداندىق باقىلاۋشى مۇمكىندىگىنشە ساپار بارىسىندا جاردەم بەرەدى. ەگەر بۇل ماسەلەلەردى ساپار اپتاسىندا شەشىپ بىتپەسە، اۋداندىق باقىلاۋشى اقساقالدارعا نە سول ماسەلەگە قاتىسى بار ادامدارعا جازبالاردان قاجەتتى باسشىلىقتى تابۋ ٷشىن ىزدەنىس جۇرگىزۋگە كومەكتەسە الادى. ەگەر فيليال تاراپىنان قوسىمشا ارەكەت قاجەت بولسا، اۋداندىق باقىلاۋشى مەن اقساقالدار بۇل ماسەلەنى بۇگە-شىگەسىنە دەيىن فيليالعا جازىپ جىبەرەدى.
47 اۋداندىق باقىلاۋشى قاۋىمعا ساپارمەن كەلگەندە قاۋىم كەزدەسۋلەرىنە قاتىسادى. كەزدەسۋلەردىڭ كەستەسى فيليالدان كەلگەن باسشىلىقتارعا ساي ارا-تۇرا وزگەرىپ تۇرۋى مۇمكىن. اۋداندىق باقىلاۋشى قاۋىمدى جىگەرلەندىرۋ، تالپىندىرۋ، ۇيرەتۋ جانە نىعايتۋ ماقساتىندا باياندامالار ايتادى. ول باۋىرلاستاردىڭ ەحوباعا، يساعا جانە ۇيىمعا دەگەن سۇيىسپەنشىلىكتەرىن ارتتىرۋعا تىرىسادى.
48 اۋداندىق باقىلاۋشىنىڭ ساپارىنىڭ ٴبىر ماقساتى — باۋىرلاستاردى قىزمەتتە قۇلشىنىستى بولۋعا تالپىندىرىپ، بۇعان قاتىستى ٴتيىمدى كەڭەستەر ايتۋ. قاۋىمداعى باۋىرلاستار ساپار اپتاسىندا ۋاعىز ىسىنە تولىق اتسالىسۋ ٷشىن ٶز كەستەلەرىنە وزگەرىس ەنگىزسە بولادى. بالكىم، ساپار اپتاسى تۇسەتىن ايدا قوسالقى ٸزاشار بولىپ قىزمەت ەتۋدى جوسپارلايتىن شىعار. اۋداندىق باقىلاۋشىمەن نە ونىڭ ايەلىمەن ۋاعىزعا شىققىسى كەلەتىن كەز كەلگەن باۋىرلاس الدىن الا جازىلىپ قويسا بولادى. ولاردى كيەلى كىتاپتى زەرتتەۋ ساباقتارىنا نە قايتا بارۋلارعا اپارساق، پايداسى كوبىرەك بولادى. اۋداندىق باقىلاۋشىنىڭ ٴبىر اپتالىق ساپارىنىڭ وسى بولىگىنە تولىق قولداۋ كورسەتۋگە ۇمتىلىپ جاتقانىڭىز اسا باعالى! (ناق. س. 27:17).
49 جىل سايىن ٵر اۋدان ٷشىن ەكى اۋداندىق كونگرەسس ۇيىمداستىرىلادى. سول كونگرەستەردىڭ ۇيىمداستىرىلۋى مەن وتكىزىلۋىنە اۋداندىق باقىلاۋشى جاۋاپتى. ول كونگرەسس باقىلاۋشىسى مەن ونىڭ كومەكشىسىن تاعايىندايدى. ولار اۋداندىق باقىلاۋشىمەن كونگرەستى ۇيىمداستىرۋ ماسەلەسىندە تىعىز قىزمەتتەسەدى. وسىنىڭ ارقاسىندا اۋداندىق باقىلاۋشى بار نازارىن كونگرەسس باعدارلاماسىنا اۋدارا الادى. ول سونداي-اق كونگرەستىڭ ٵرتۇرلى بولىمىنە قابىلەتتى ەر باۋىرلاستاردى تاعايىندايدى. ٵر كونگرەستەن سوڭ اۋدان قارجىسىنىڭ تەكسەرىلۋىن دە ۇيىمداستىرادى. جىل سايىنعى اۋداندىق كونگرەستەردىڭ بىرىنە فيليال وكىلى شاقىرىلعان بايانداماشى رەتىندە كەلەدى. اراقاشىقتىقتىڭ سەبەبىنەن نە كونگرەسس وتەتىن عيمارات كىشكەنتاي بولعاندىقتان، كەيبىر اۋداندار بىرنەشەگە ٴبولىنىپ، ٴارقايسىسىندا جەكە اۋداندىق كونگرەسس وتكىزىلەدى.
50 اۋداندىق باقىلاۋشى ٵر ايدىڭ سوڭىندا ٶزىنىڭ ۋاعىزداۋ قىزمەتى جونىندەگى ەسەبىن تىكەلەي فيليالعا جىبەرەدى. باقىلاۋشىنىڭ جولعا، تاماق پەن باسپاناعا، قىزمەتىن اتقارۋعا قاجەتتى باسقا دا نارسەلەرگە كەتكەن ازىن-اۋلاق شىعىندارى بولادى. شىعىنداردى قىزمەت ەتكەن قاۋىمى وتەي الماسا، باقىلاۋشى شىعىندار جايلى مالىمەتتى فيليالعا جىبەرەدى. بۇل ارالاۋشى وكىلدەر ەحوبانىڭ پاتشالىعىنىڭ مۇددەسىن ٴبىرىنشى ورىنعا قويسا، يسا ۋادە ەتكەندەي، كەرەك-جاراعى قوسىلىپ بەرىلەتىنىنە سەنىمدى (لۇقا 12:31). قاۋىمدار وزدەرىنە قىزمەت ەتىپ جۇرگەن ادال اقساقالدارعا قوناقجايلىلىق تانىتۋدى ۇلكەن مارتەبە سانايدى (جوح. 3-ح. 5—8).
فيليال كوميتەتى
51 ەحوبا كۋاگەرلەرىنىڭ دۇنيەجۇزىندەگى ٵر فيليالىندا رۋحاني تولىسقان ٵرى لايىقتى ٷش نە ودان دا كوپ ەر باۋىرلاستان تۇراتىن فيليال كوميتەتى بار. ولار قاراماعىنداعى ٴبىر نە بىرنەشە ەلدىڭ ۋاعىز ىسىنە باس-كوز بولادى. كوميتەتتىڭ ٴبىر مۇشەسى فيليال كوميتەتىنىڭ ۇيلەستىرۋشىسى بولىپ قىزمەت اتقارادى.
52 فيليال كوميتەتىندەگى باۋىرلاستار فيليالدىڭ اۋماعىنداعى بارلىق قاۋىمدارعا قاتىستى ماسەلەلەردى شەشەدى. بۇل كوميتەت پاتشالىق جايلى ىزگى حاباردىڭ بۇكىل فيليال اۋماعىنا ۋاعىزدالۋىن قاداعالايدى جانە تاناپتاعى قاجەتتىلىكتەردى ٴجىتى باقىلاۋ ٷشىن، قاۋىمدار مەن اۋدانداردىڭ دۇرىس بولىنگەنىنە كوز جەتكىزەدى. فيليال كوميتەتى تاناپتاعى ميسسيونەرلەر مەن ارنايى، تۇراقتى، قوسالقى ٸزاشارلاردىڭ قىزمەتىنە كوڭىل بولەدى. ال كونگرەستەر كەزىندە «بارلىعى لايىقتى ٵرى تارتىپپەن بولۋ» ٷشىن ارنايى شارالار جاساپ، تاپسىرمالار بەرەدى (قور. 1-ح. 14:40).
53 فيليال كوميتەتىنىڭ قاراماعىنا باسقا ەل كىرسە، سول ەلدە جەرگىلىكتى كوميتەت تاعايىندالادى. وسىنىڭ ارقاسىندا جەرگىلىكتى كوميتەت قىزمەت ەتىپ جاتقان ەلدەگى ۋاعىز ٸسى جاقسىراق باقىلانادى. جەرگىلىكتى كوميتەت بەتەل ٷيى مەن كەڭسەلەردەگى ماسەلەلەردى شەشەدى، حات الىسادى، ەسەپ بەرەدى، جالپى تاناپتاعى ٸس-شارالارعا باس-كوز بولادى. پاتشالىقتىڭ مۇددەسىن العا جىلجىتۋ ٷشىن جەرگىلىكتى كوميتەت فيليال كوميتەتىمەن قىزمەتتەسەدى.
54 فيليال كوميتەتتەرى مەن جەرگىلىكتى كوميتەتتەردىڭ بارلىق مۇشەسىن باسقارۋشى كەڭەس تاعايىندايدى.
باس باسقارمانىڭ وكىلدەرى
55 باسقارۋشى كەڭەس ارا-تۇرا دۇنيەجۇزىندەگى ٵر فيليالعا بارۋ ٷشىن لايىقتى ەر باۋىرلاستاردى تاعايىندايدى. بۇل قىزمەتتى اتقاراتىن باۋىرلاس باس باسقارمانىڭ وكىلى دەگەن اتپەن بەلگىلى. ونىڭ نەگىزگى مىندەتى — بەتەل وتباسىن جىگەرلەندىرىپ، فيليال كوميتەتىنە ۋاعىزداۋ مەن شاكىرت دايىنداۋ ىسىنە قاتىستى تۋىنداعان قيىندىقتار مەن ماسەلەلەردى شەشۋگە كومەكتەسۋ. بۇل باۋىرلاس فيليالدىڭ قاراماعىنداعى اۋماقتا قىزمەت ەتىپ جۇرگەن كەيبىر اۋداندىق باقىلاۋشىلارمەن جانە اراگىدىك ميسسيونەرلەرمەن كەزدەسەدى. كەزدەسۋ بارىسىندا ولاردىڭ قيىندىقتارى مەن قاجەتتىلىكتەرى جايلى اڭگىمەلەسىپ، اتقارىپ جۇرگەن ەڭ ماڭىزدى ىستەرىنە، ياعني ۋاعىزداۋ مەن شاكىرت دايىنداۋ ىسىنە قاجەتتى جىگەر بەرەدى.
56 باس باسقارمانىڭ وكىلى تاناپتا قانداي جەتىستىكتەر بولىپ جاتقانىنا، ونداعى ۋاعىز قىزمەتى مەن قاۋىمداردىڭ ٸس-شارالارىنا باسا نازار اۋدارادى. ۋاقىتى جەتىپ جاتسا، شالعاي اۋماقتاعى اۋدارما كەڭسەلەرىنە دە بارادى. باس باسقارمانىڭ وكىلى فيليالعا كەلگەندە، جاعدايعا قاراي سول جەردە ۋاعىز ىسىنە قاتىسۋعا تىرىسادى.
وتاردى باعۋعا تاعايىندالعان باقىلاۋشىلارعا باعىنىپ جۇرسەك، قاۋىمنىڭ باسى يسا ماسىحپەن قىزمەتتەسەمىز
سۇيىسپەنشىلىككە تولى باقىلاۋ ٸسى
57 ٴبىز تولىسقان ٴماسىحشى ەر باۋىرلاستاردىڭ اۋىر ەڭبەگى مەن سۇيىسپەنشىلىككە تولى قامقورلىعىنىڭ زور يگىلىگىن كورىپ ٴجۇرمىز. وتاردى باعۋعا تاعايىندالعان باقىلاۋشىلارعا باعىنىپ جۇرسەك، قاۋىمنىڭ باسى يسا ماسىحپەن قىزمەتتەسەمىز (قور. 1-ح. 16:15—18؛ ەفەس. 1:22، 23). ناتيجەسىندە قۇداي رۋحى دۇنيەجۇزىندەگى بارلىق قاۋىمدارعا اسەر ەتەدى، ال قۇداي ٴسوزى جەر-جاھاندا ٴجۇرىپ جاتقان ۋاعىز ىسىنە باسشىلىق بەرەدى (ٴزاب. 119:105).