33-زەرتتەۋ ماقالاسى
قازىرگى قىزمەتىڭىزدى باعالاڭىز
«ادامنىڭ قۇر قيالعا بەرىلگەنىنەن گورى، كوز الدىندا تۇرعان نارسەگە قۋانعانى ارتىق» (ۋاع. 6:9).
111-ٵن قۋانۋعا سەبەپ كوپ
اڭداتپاa
1. باۋىرلاستار ەحوباعا كوبىرەك قىزمەت ەتۋ ٷشىن نە ىستەپ ٴجۇر؟
وسى دۇنيەنىڭ سوڭى جاقىنداعان سايىن ٴبىزدىڭ اتقاراتىن جۇمىسىمىز دا كوبەيىپ جاتىر (مات. 24:14؛ لۇقا 10:2؛ پەت. 1-ح. 5:2). ٴبارىمىز دە ەحوباعا مۇمكىندىگىنشە كوبىرەك قىزمەت ەتكىمىز كەلەدى. كوپ باۋىرلاستار قىزمەت اياسىن كەڭەيتۋدە. كەيبىرەۋلەرى ٸزاشار بولعىلارى كەلەدى. وزگەلەرى بەتەلدە قىزمەت ەتسەم، قۇرىلىس جوبالارىنا قاتىسسام ەكەن دەيدى. ال كوپتەگەن ەر باۋىرلاستار قىزمەت كومەكشىسى بولۋعا نەمەسە اقساقالدىق قىزمەتكە ۇمتىلىپ ٴجۇر (ٴتىم. 1-ح. 3:1، 8). قىزمەتشىلەرىنىڭ مۇنداي تالپىنىسىنا ەحوبا قاتتى قۋانادى! (ٴزاب. 110:3؛ يشايا 6:8).
2. اڭساعان رۋحاني ماقساتىنا جەتە الماعاندا، ٴماسىحشى نە سەزىنۋى مۇمكىن؟
2 قانداي دا ٴبىر رۋحاني ماقساتقا ۇزاق ۋاقىتتان بەرى قول جەتكىزە الماي جۇرسەك، جىگەرىمىز جاسىپ، ەڭسەمىز ٴتۇسۋى مۇمكىن. مىسالى، ومىرلىك جاعدايىمىزعا بايلانىستى نەمەسە جاسىمىزعا بايلانىستى كەيبىر قىزمەت تۇرلەرىنە ٴبىز ٷشىن جول جابىق شىعار (ناق. س. 13:12). مەليساb دەگەن جاسى ۇلكەن باۋىرلاسىمىز بەتەلدە قىزمەت ەتۋدى، پاتشالىقتى جاريالاۋشىلارعا ارنالعان مەكتەپتە وقۋدى قاتتى قالاعان. ٴبىراق ول بىلاي دەيدى: «جاسىم تۋرا كەلمەگەندىكتەن، بۇل مارتەبەلى قىزمەتتەر مەن ٷشىن جاي ارمان عانا. وسىنى ويلاسام، كەيدە جۇرەگىم اۋىرىپ كەتەدى».
3. قانداي دا ٴبىر مارتەبەلى قىزمەتكە يە بولۋ ٷشىن، ٴماسىحشى قانداي قادامدار جاساۋ كەرەك؟
3 دەنساۋلىعى مىقتى جاس باۋىرلاستارعا قوسىمشا جاۋاپكەرشىلىكتەر الۋ ٷشىن، رۋحاني تولىسىپ، كەيبىر قاسيەتتەردى دامىتۋ كەرەك بولار. ولار قۇلشىنىستى، العىر بولعانمەن جانە تەز شەشىم قابىلداي العانمەن، وزگەلەردى قۇرمەتتەۋدى، ٸستى تياناقتى اتقارۋدى جانە شىدامدىلىققا ۇيرەنگەندەرى ٴجون. ەگەر سەن وسى قاسيەتتەردى دامىتساڭ، ساعان كۇتپەگەن جەردەن مارتەبەلى قىزمەتتەردى تاپسىرۋى مۇمكىن. مىسالى، نيك باۋىرلاس 20 جاسىندا قىزمەت كومەكشىسى بولعىسى كەلگەن. ٴبىراق تاعايىندالماي قالعاندا، ونىڭ قاتتى كوڭىلى تۇسەدى. سوندا ول «وسى مەنىڭ ٴبىر جەرىم دۇرىس ەمەس شىعار» دەپ ويلايدى. ٴبىراق نيك ەش بەرىلمەدى. ول قولجەتىمدى ماقساتتارعا بارىنشا ۇمتىلدى. قازىر نيك فيليال كوميتەتىنىڭ مۇشەسى بولىپ قىزمەت ەتەدى.
4. بۇل ماقالادا نە قاراستىرامىز؟
4 العا قويعان رۋحاني ماقساتىڭىزعا جەتە الماي جاتقاندىقتان، كوڭىلىڭىز ٴتۇسىپ ٴجۇر مە؟ ولاي بولسا، ۋايىمىڭىزدى ەحوباعا ايتىڭىز (ٴزاب. 37:5—7). سونداي-اق تولىسقان ەر باۋىرلاستاردان قىزمەتىڭىزدى قالاي جاقسارتۋعا بولاتىنىن سۇراڭىز. سوسىن سول كەڭەسكە قۇلاق اسۋعا بارىنشا تىرىسىڭىز. سوندا قويعان ماقساتىڭىزعا جەتۋىڭىز ابدەن مۇمكىن. ٴبىراق مەليسا باۋىرلاس سياقتى، ٴسىزدىڭ جاعدايىڭىزدا قانداي دا ٴبىر مارتەبەلى قىزمەتكە جەتۋ مۇمكىن بولماسا شە؟ مۇندايدا قۋانىشىڭىزدى ساقتاپ قالۋعا نە كومەكتەسەدى؟ بۇل سۇراققا جاۋاپ بەرۋ ٷشىن، الدىمەن، مىنا ٷش جايتتى تالقىلايىق: 1) قۋانىشتى نەدەن تاپساق بولادى، 2) قۋانىشىمىزدى قالاي ارتتىرساق بولادى، 3) قۋانىشىمىزعا قۋانىش قوساتىن قانداي ماقساتتار بار؟
قۋانىشتى نەدەن تاپساق بولادى؟
5. قۋانىشتى بولعىمىز كەلسە، نە نارسەگە نازار تىگۋىمىز كەرەك؟ (ۋاعىزداۋشى 6:9)
5 ۋاعىزداۋشى 6:9 دا (وقىڭىز) ايتىلعانداي، قۋانىشتى دۇرىس نارسەدەن ىزدەگەنىمىز ٴجون. «كوز الدىندا تۇرعان نارسەگە قۋاناتىن» ادام قولىندا باردى باعالايدى، ياعني قازىرگى جاعدايىندا اتقارا الاتىن ىستەرگە قۋانادى. ال قۇر قيالعا بەرىلەتىن ادام قول جەتپەس ارمانعا ۇمتىلعاندىقتان، ەشقاشان قاناعات تاپپايدى. بۇدان قانداي ساباق الامىز؟ قۋانىشتى بولعىمىز كەلسە، بار نازارىمىزدى قولىمىزدا بار نارسەگە جانە قازىر جەتە الاتىن ماقساتتارعا تىگۋىمىز كەرەك.
6. قازىر قانداي مىسالدى قاراستىرامىز جانە ودان نە ۇيرەنەمىز؟
6 ادام بالاسى تابيعاتىنان جاڭا نارسەگە ۇمتىلىپ، جاڭا بەلەستەردى باعىندىرعاندى ۇناتادى. ەندەشە، قولدا باردان قاناعات تابۋ مۇمكىن بە؟ ٴيا، مۇمكىن. ادامنىڭ «كوز الدىندا تۇرعان نارسەگە» قۋانا الاتىنى راس. بۇلاي ەتۋگە نە كومەكتەسەتىنىن ٴبىلۋ ٷشىن، ماتاي 25:14—30 تارماقتاردا جازىلعان يسانىڭ ايتقان ٴبىر مىسالىن قاراستىرايىق. ٴبىز ودان قازىرگى باتالاردان قالاي قۋانىش تابا الاتىنىمىزدى جانە سول قۋانىشىمىزدى قالاي ەسەلەي الاتىنىمىزدى بىلەمىز.
قۋانىشىمىزدى قالاي ارتتىرساق بولادى؟
7. يسانىڭ تالانت جايلى مىسالىن قىسقاشا ايتىپ بەرىڭىز.
7 يسا الىس ساپارعا اتتانعالى جاتقان ٴبىر ەر كىسىنى مىسالعا كەلتىردى. ول كەتەرىنەن الدىن قۇلدارىن شاقىرىپ الادى دا، ٵرقايسىسىنا تالانت بەرىپ، شارۋا باستاۋدى تاپسىرادىc. قۇلدارىنىڭ قابىلەتتەرىنە قاراي، بىرىنشىسىنە بەس، ەكىنشىسىنە ەكى، ال ۇشىنشىسىنە ٴبىر تالانت بەرەدى. ولاردىڭ ەكەۋى العان تاپسىرمالارىنا بىلەك سىبانا كىرىسىپ كەتەدى. ال ٷشىنشى قۇل اقشانى اينالىمعا سالماي، ەشقانداي جۇمىس باستامايدى. سوندىقتان قوجايىنى ونى جۇمىستان شىعارىپ جىبەرەدى.
8. مىسالداعى ٴبىرىنشى قۇل نە ٷشىن قۋاندى؟
8 قوجايىنى ٴبىرىنشى قۇلعا بەس تالانت بەرگەندە، ونىڭ مەرەيى ٶسىپ، قۋانىپ قالسا كەرەك. بۇل وتە قوماقتى اقشا بولعاندىقتان، قوجايىنى وعان قانشالىقتى سەنىم ارتقانىن كورەمىز. ال ەكىنشى قۇل جايلى نە دەۋگە بولادى؟ ٴبىرىنشى قۇل سياقتى كوپ اقشا الماعانىنا ونىڭ كوڭىلى تۇسسە بولار ەدى. ٴبىراق ول نە ىستەدى؟
يسانىڭ مىسالىنداعى ەكىنشى قۇلدان نە ۇيرەنەمىز؟ 1. قوجايىنى وعان ەكى تالانت بەردى. 2. قوجايىنىنا پايدا ٴتۇسىرۋ ٷشىن، ول اۋىر ەڭبەك ەتتى. 3. ول قوجايىنىنىڭ تالانتتارىن ەكى ەسەگە كوبەيتتى (9—11-ابزاستاردى قاراڭىز)
9. مىسالدان ەكىنشى قۇل جايلى نە بىلەمىز؟ (ماتاي 25:22، 23)
9 ماتاي 25:22، 23 وقىڭىز. ەكىنشى قۇل ەكى-اق تالانت العانىنا وكپەلەپ، اشۋلاندى ما؟ يسا بۇلاي دەمەگەن. قۇل: «ماعان بەرگەنى وسى-اق پا؟ مەنىڭ ٴبىرىنشى قۇلدان قاي جەرىم كەم؟! ودا بار قابىلەت مەندە دە بار. قوجايىنىم قادىرىمدى بىلمەيدى ەكەن. مەن ودان دا ٶز شارۋاممەن اينالىسىپ، ال مىنا اقشانى كومىپ تاستايىن»،— دەپ كۇڭكىلدەمەگەن.
10. ەكىنشى قۇل تالانتتارىمەن نە ىستەدى؟
10 ٴبىرىنشى قۇل سياقتى ەكىنشى قۇل دا ٶز ىسىنە جاۋاپكەرشىلىكپەن قاراپ، ايانباي ەڭبەك ەتتى. ول قوجايىنى تاپسىرعان اقشانى ەكى ەسەگە كوبەيتتى. قوجايىنى وعان وتە ريزا بولىپ، ەڭبەكقورلىعى، قۇلشىنىسى ٷشىن ونى مولىنان جارىلقادى. ول قۇلىنا الدىڭعىسىنان دا كوپ جاۋاپكەرشىلىك سەنىپ تاپسىردى!
11. قۋانىشىمىزدى ەسەلەۋ ٷشىن نە ىستەسەك بولادى؟
11 ەحوبانىڭ ۇيىمىندا تاپسىرىلعان ٸستى ەكىنشى قۇل سياقتى بەرىلە اتقارساڭىز، ٴسىزدىڭ دە قۋانىشىڭىز ەسەلەنەدى. ۋاعىز ىسىنە ٶزىڭىزدى «تولىعىمەن ارناڭىز»، قاۋىمنىڭ ىستەرىنە بارىنشا اتسالىسىڭىز (ەل. ٸس. 18:5؛ ەۆر. 10:24، 25). كەزدەسۋلەردە تالقىلاناتىن مالىمەتتەرگە جاقسىلاپ دايىندالىپ، جىگەرلى تۇسىنىكتەمەلەر بەرىڭىز. «ماسىحشىلىك ٶمىرىمىز بەن قىزمەتىمىز» كەزدەسۋىندە بەرىلگەن تاپسىرمالارعا جاۋاپكەرشىلىكپەن قاراڭىز. سىزگە قاۋىمنىڭ قانداي دا ٴبىر ٸسىن تاپسىرسا، مۇنى كەشىكتىرمەي اتقارىڭىز. بەرىلگەن تاپسىرمانى ماڭىزسىز ساناپ، بۇعان ۋاقىت كەتىرگىم كەلمەيدى دەمەڭىز. قابىلەتتەرىڭىزدى شىڭداۋعا بارىنشا كۇش سالىڭىز (ناق. س. 22:29). رۋحاني ىستەردى، تاپسىرمالاردى قانشالىقتى بەرىلە اتقارساڭىز، سونشالىقتى تەزىرەك رۋحاني وسەسىز جانە قۋانىشىڭىز دا ارتا تۇسەدى (عال. 6:4). سونداي-اق ٶزىڭىز قالاعان مارتەبەلى قىزمەتكە باسقا بىرەۋ يە بولىپ جاتسا، ونى قىزعانباي، قۋانىشىنا شىن كوڭىلدەن ورتاقتاسا الاسىز (ريم. 12:15؛ عال. 5:26).
12. ەكى باۋىرلاسىمىز قۋانىشتارىن ەسەلەۋ ٷشىن نە ىستەدى؟
12 بەتەلدە قىزمەت ەتكىسى كەلگەن نەمەسە پاتشالىقتى جاريالاۋشىلارعا ارنالعان مەكتەپتە وقىعىسى كەلگەن مەليسا باۋىرلاس ەسىڭىزدە مە؟ ول وسى ماقساتتارىنا قول جەتكىزە المادى. ٴبىراق ول بىلاي دەيدى: «مەن بار كۇشىمدى ٸزاشارلىق قىزمەتىمە جۇمىلدىردىم. ۋاعىزداۋدىڭ ٴتۇر-تۇرىنە قاتىستىم. بۇل ماعان تاۋداي قۋانىش سيلادى». ال نيك باۋىرلاس ەسىڭىزدە مە؟ ول قىزمەت كومەكشىسى بولىپ تاعايىندالماعاندا، قاتتى كوڭىلى تۇسكەن ەدى. «سول كەزدە مەن ٷشىن باسقا دا رۋحاني ىستەرگە ەسىك اشىق ەدى. مىسالى، جاقسىراق ۋاعىزدايتىن بولدىم، كەزدەسۋلەردە ماعىنالى تۇسىنىكتەمەلەر بەرە باستادىم. سونداي-اق بەتەلدە قىزمەت ەتۋگە ٶتىنىش ٴبىلدىردىم جانە كەلەسى جىلى بەتەلگە شاقىرىلدىم»،— دەيدى نيك.
13. قازىرگى قىزمەتىڭىزدى بەرىلە اتقارساڭىز جەمىسى قانداي بولادى؟ (ۋاعىزداۋشى 2:24)
13 ٴماسىحشى قازىرگى قىزمەتىن بەرىلە اتقارسا، بولاشاقتا ۇلكەن جاۋاپكەرشىلىكتەر الا ما؟ نيك باۋىرلاستىڭ جاعدايىندا سولاي بولدى. ٴبىراق ٴسىزدىڭ جاعدايىڭىز مەليسا باۋىرلاستىكىندەي بولسا شە؟ ٴسىز سوندا دا قۋانىشىڭىزدى ەسەلەي الاسىز. ەحوبا ٷشىن اتقارىپ جاتقان قىزمەتىڭىزدەن قۋانىش پەن قاناعات تابا الاسىز (ۋاعىزداۋشى 2:24 وقىڭىز). ال بۇدان دا ماڭىزدىسى، كۇش سالىپ جۇرگەنىڭىزدى قوجايىنىڭىز يسا ٴماسىح جوعارى باعالايدى. بۇل وي دا سىزگە قۋانىش سيلاسىن!
قۋانىشىمىزعا قۋانىش قوساتىن ماقساتتار
14. قازىرگى قىزمەتىمىزگە كوز تىگۋ دەگەن نەنى بىلدىرمەيدى؟
14 قازىرگى قىزمەتىمىزگە كوز تىگۋ دەگەن ەحوباعا كوبىرەك قىزمەت ەتۋدىڭ جولدارىن ىزدەمەۋ كەرەك دەگەندى بىلدىرمەيدى. ٴبىز جاقسىراق قىزمەت ەتۋدى، باۋىرلاستارعا كوبىرەك كومەكتەسۋدى ماقسات ەتە الامىز ٵرى ماقسات ەتۋىمىز كەرەك تە. دانالىق، قاراپايىمدىلىق تانىتا وتىرىپ، وزىمىزگە ەمەس، وزگەلەرگە قىزمەت ەتۋدى ويلاساق، وسى ماقساتىمىزعا قول جەتكىزەمىز (ناق. س. 11:2؛ ەل. ٸس. 20:35).
15. قۋانىشىڭىزعا قۋانىش قوساتىن قانداي ماقساتتار بار؟
15 ٴسىز قانداي ماقساتتار قويساڭىز بولادى؟ ولاردىڭ قايسىسىنا قول جەتكىزە الاتىنىڭىزدى ٴتۇسىنۋ ٷشىن، ەحوبادان دانالىق سۇراڭىز (ناق. س. 16:3؛ جاق. 1:5). بالكىم، ٴبىرىنشى ابزاستا ايتىلعان ماقساتتاردىڭ بىرىنە ۇمتىلارسىز. مىسالى، قوسالقى نە تۇراقتى ٸزاشار بولۋعا، بەتەلدە قىزمەت ەتۋ مەن قۇرىلىس جوبالارىنا قاتىسۋعا. الدە جاڭا ٴتىل ۇيرەنەرسىز نە ٴتىپتى شەت ٴتىلدى اۋماقتا قىزمەت ەتە الاتىن شىعارسىز. وسى ماقساتتار جايلى «ەحوبانىڭ ەركىن ورىنداۋ ٷشىن ۇيىمداسقانبىز» كىتابىنىڭ 10-تاراۋىنان جانە قاۋىمىڭىزداعى اقساقالداردان كوبىرەك بىلە الاسىزd. ماقساتىڭىزعا ۇمتىلىپ، پروگرەسس جاساپ جاتقانىڭىزدى وزگەلەر بايقايدى ٵرى باعالايدى، سونداي-اق ٶزىڭىزدىڭ دە قۋانىشىڭىز ارتادى.
16. قانداي دا ٴبىر ماقساتقا ٴدال قازىر قول جەتكىزە الماساڭىز، نە ىستەسەڭىز بولادى؟
16 ال ٴسىزدىڭ جاعدايىڭىزدا بۇل ماقساتتارعا جەتۋ مۇمكىن بولماسا شە؟ مۇندايدا جەتە الاتىن باسقا ماقساتقا ۇمتىلا الاسىز. قازىر سولاردىڭ كەيبىرىن قاراستىرايىق.
ٴسىز قانداي ماقساتقا ۇمتىلساڭىز بولادى؟ (17-ابزاستى قاراڭىز)f
17. تىموتەگە 1-حات 4:13، 15 كە ساي، ەر باۋىرلاس جاقسى تالىمگەر بولۋ ٷشىن نە ىستەسە بولادى؟
17 تىموتەگە 1-حات 4:13، 15 وقىڭىز. شومىلدىرۋ راسىمىنەن وتكەن ەر باۋىرلاس بولساڭىز، سويلەۋ مەن ٴتالىم بەرۋ قابىلەتىڭىزدى شىڭداي بەرىڭىز. ويتكەنى ٶزىڭىزدى وقۋعا، سويلەۋگە، ٴتالىم بەرۋگە «ارناساڭىز»، تىڭداۋشىلارىڭىز ٷشىن ناعىز باتا بولاسىز. بۇل ٷشىن «وقۋ مەن ٴتالىم بەرۋ قابىلەتىن شىڭدايىق» كىتاپشاسىنداعى ٵربىر ساباقتى جاقسىلاپ زەرتتەپ، كەڭەستەرىن قولدانۋدى ماقسات ەتىڭىز. ٴبىر-ٴبىر ساباقتان اسىقپاي زەرتتەڭىز. سول ساباقپەن جاقسىلاپ جۇمىس ىستەپ، ۇيدە جاتتىعىڭىز. كەيىن قاۋىمدا باياندامامەن شىققاندا، جاتتىققانىڭىزدى قولدانىڭىز. كەڭەس بەرۋشىدەن نەمەسە «قۇداي ٴسوزىن ايتىپ، ٴتالىم بەرۋدە ايانباي ەڭبەك ەتەتىن» باسقا دا اقساقالداردان اقىل سۇراساڭىز بولادىe (ٴتىم. 1-ح. 5:17). بايانداما ايتقاندا كىتاپشاداعى ساباقتى قولدانۋ جاعىن عانا ەمەس، تىڭدارماندارىڭىزدىڭ سەنىمىن نىعايتۋدى جانە ولاردى ارەكەتكە تالپىندىرۋدى دا ويلاڭىز. سوندا ٶزىڭىزدىڭ دە، وزگەنىڭ دە قۋانىشىنا قۋانىش قوساسىز!
ٴسىز قانداي ماقساتقا ۇمتىلساڭىز بولادى؟ (18-ابزاستى قاراڭىز)g
18. ۋاعىزداۋ مەن ٴتالىم بەرۋ تاپسىرماڭىزدى جاقسى اتقارۋعا نە كومەكتەسەدى؟
18 ۋاعىزداۋ مەن شاكىرت دايىنداۋ تاپسىرماسى بارلىعىمىزعا بەرىلگەن (مات. 28:19، 20؛ ريم. 10:14). وسى ماڭىزدى ٸستى جاقسى اتقارۋ ٷشىن قابىلەتتەرىڭىزدى شىڭداعىڭىز كەلە مە؟ ولاي بولسا، «ٴتالىم بەرۋ» كىتاپشاسىن زەرتتەڭىز جانە ۇيرەنگەندەرىڭىزدى قولدانۋ ٷشىن ناقتى ماقساتتار قويىڭىز. قىزمەتىڭىزگە كومەك بولاتىن باسقا دا كەڭەستەردى «ماسىحشىلىك ٶمىرىمىز بەن قىزمەتىمىز» جۇمىس داپتەرىنەن جانە ۆيدەو جۇزىندە كورسەتىلەتىن پىكىرلەسۋ ۇلگىلەرىنەن تابا الاسىز. ٴسىزدىڭ اۋماعىڭىزدا قايسىسى ٴتيىمدى ەكەنىن ٴبىلۋ ٷشىن، ۋاعىزداۋ تاسىلدەرىنىڭ ٴتۇر-ٴتۇرىن قولدانىپ كورىڭىز. وسى ايتىلعان كەڭەستەردىڭ بارلىعىن قولدانساڭىز، شەبەر ۋاعىزداۋشى بولۋدان كەلەتىن مول قۋانىشقا كەنەلەسىز (ٴتىم. 2-ح. 4:5).
ٴسىز قانداي ماقساتقا ۇمتىلساڭىز بولادى؟ (19-ابزاستى قاراڭىز)h
19. قۇدايعا ۇنامدى قاسيەتتەردى دامىتۋعا نە كومەكتەسەدى؟
19 ەڭ ماڭىزدى ماقساتتاردىڭ ٴبىرى — ەحوباعا ۇنامدى قاسيەتتەر دامىتۋ ەكەنىن دە ۇمىتپاڭىز (عال. 5:22، 23؛ قول. 3:12؛ پەت. 2-ح. 1:5—8). سول ماقساتقا جەتۋگە نە كومەكتەسەدى؟ مىسالى، سەنىمىڭىزدى بەرىك ەتكىڭىز كەلسە، ٴبىزدىڭ ادەبيەتتەردەن سەنىمدى نىعايتۋعا كومەكتەسەتىن ماقالالاردى وقىڭىز. سونداي-اق ٴتۇرلى سىناققا كەزىككەندە سەنىمدەرىنەن تايماعان باۋىرلاستاردىڭ ۇلگىلەرى جايىندا ®JW Broadcasting تەگى ۆيدەولاردى قاراڭىز. كەيىن ولاردىڭ سەنىمدەرىنە قالاي ەلىكتەي الاتىنىڭىزدى ويلانىڭىز.
20. قول جەتپەيتىن ماقساتتارعا كوڭىلىمىزدى تۇسىرمەي، قۋانىشىمىزدى ارتتىرۋ ٷشىن نە ىستەۋىمىز كەرەك؟
20 ەحوباعا قازىرگىدەن دە كوپ قىزمەت ەتۋدى قاي-قايسىسىمىز دا قالايمىز. ٴبىراق جاڭا دۇنيەدە ەشقانداي كەدەرگى بولمايتىندىقتان، ەحوباعا قالاعانىمىزشا ٵرى تولىق قىزمەت ەتەتىن بولامىز. ال ازىرگە قولجەتىمدى ىستەردى بارىنشا اتقارا بەرەيىك. سوندا قۋانىشىمىزعا قۋانىش قوسىلادى، ٵرى جەتە المايتىن ماقساتتارىمىز ٷشىن قاتتى كوڭىلىمىز تۇسپەيدى. ال ەڭ ماڭىزدىسى، «باقىتتى قۇدايىمىز» ەحوبانى داڭقتايمىز (ٴتىم. 1-ح. 1:11). ەندەشە، ٶز جاعدايىمىزدا اتقارا الاتىن قىزمەتتەر مەن جاۋاپكەرشىلىكتەردەن قۋانىش تابا بەرەيىك!
82-ٵن «سەندەردەگى جارىق جارقىراپ تۇرسىن»
a ٴبىز ەحوبانى قاتتى جاقسى كورەمىز. سوندىقتان وعان ايانباي قىزمەت ەتكىمىز كەلەدى. مىسالى، قىزمەت اياسىن كەڭەيتۋدى جوسپارلايمىز جانە قاۋىمدا قوسىمشا جاۋاپكەرشىلىكتەرگە ۇمتىلامىز. ٴبىراق قانشا كۇش سالساق تا، بۇل ماقساتتارعا جەتە الماساق شە؟ قىزمەتىمىزدى قۇلشىنىسپەن اتقارا بەرۋگە جانە قۋانىشىمىزدى جوعالتپاۋعا نە كومەكتەسەدى؟ مۇنى يسا ايتقان تالانت تۋرالى استارلى اڭگىمەدەن بىلەمىز.
b كەيبىر ەسىمدەر وزگەرتىلگەن.
c ٴسوز ٴمانى: ٴبىر تالانت جۇمىسشىنىڭ شامامەن 20 جىلدىق ەڭبەكاقىسىنا تەڭ.
d شومىلدىرۋ راسىمىنەن وتكەن ەر باۋىرلاستار قىزمەت كومەكشىسى بولۋعا، اقساقالدىق قىزمەتتى اتقارۋعا تالپىندىرىلادى. وسى مىندەتتەردى العىسى كەلەتىندەرگە قويىلاتىن تالاپتاردى «ەحوبانىڭ ەركىن ورىنداۋ ٷشىن ۇيىمداسقانبىز» كىتابىنىڭ 5، 6-تاراۋىنان بىلە الاسىز.
e ٴسوز ٴمانى: كەڭەس بەرۋشى دەگەن — قاۋىمدا ٵرتۇرلى تاپسىرمالارمەن شىعاتىن اقساقالدار مەن قىزمەت كومەكشىلەرىنە كەڭەس بەرۋگە تاعايىندالعان اقساقال. ول كەڭەستى قاجەت بولعان جاعدايدا ٵرى وڭاشادا بەرەدى.
f سۋرەت سيپاتتاماسى: جاقسى تالىمگەر بولۋعا ۇمتىلىپ جۇرگەن ەر باۋىرلاس ادەبيەتتەرىمىزدەن ىزدەنىس جاساپ وتىر.
g سۋرەت سيپاتتاماسى: بەيرەسمي كۋالىك بەرۋدى ماقسات ەتكەن ايەل باۋىرلاس داياشى قىزعا بايلانىس كارتاسىن بەرىپ جاتىر.
h سۋرەت سيپاتتاماسى: ەحوباعا ۇنامدى قاسيەتتەردى دامىتۋعا ۇمتىلعان ايەل باۋىرلاس وزگە باۋىرلاسقا توسىن سي جاساپ جاتىر.