ٴسىز بىلگەنسىز بە؟
فىلىپپەن كەزدەسكەندە ەفيوپيالىق قىزمەتكەر قانداي كۇيمەدە وتىردى؟
«جاڭا دۇنيە اۋدارماسىندا» «كۇيمە» دەپ اۋدارىلعان ٴتۇپنۇسقاداعى ٴسوز كولىكتىڭ بىرنەشە تۇرىنە نۇسقايدى (ەل. ٸس. 8:28، 29، 38). الايدا ەفيوپيالىق ٴۋازىر مىنگەن كۇيمە سوعىسقا نە جارىسقا ارنالعان كىشكەنتاي اربادان ۇلكەنىرەك بولعان كورىنەدى. بۇلاي تۇجىرىمداۋعا قانداي سەبەپتەر بار؟
ەفيوپيالىق قىزمەتكەر ۇزاق جولعا شىققان جوعارى دارەجەلى كىسى بولعان. ول «ەفيوپيالىق پاتشايىمنىڭ بۇكىل قازىناسىنا قارايتىن جوعارى لاۋازىمدى قىزمەتكەر» بولعان (ەل. ٸس. 8:27). ەجەلگى ەفيوپيا اۋماعىنا قازىرگى سۋدان مەن مىسىردىڭ وڭتۇستىك بولىگى كىرگەن. بالكىم، ەفيوپيالىق قىزمەتكەر بۇكىل ساپار بويى ٴبىر عانا كولىككە وتىرماعان شىعار، ٴبىراق ٴبىر انىعى، ۇزاق جولعا شىققاندىقتان ونىڭ ٴبىراز جۇگى بولعان. ٴى عاسىردا ادام تاسىمالدايتىن كولىكتىڭ ٴبىر ٴتۇرى ٴتورت دوڭعالاقتى، توبەسى جابىق كۇيمە بولعان. ەلشىلەردىڭ ىستەرى كىتابىن تۇسىندىرەتىن ٴبىر ەڭبەكتە ايتىلعانداي، «جۇك سالۋعا بولاتىندىقتان جانە وتىرۋعا قولايلى بولعاندىقتان بۇنداي كۇيمەمەن ۇزاق ساپارعا شىعۋعا بولاتىن».
ٴفىلىپ كەلگەندە ەفيوپيالىق قىزمەتكەر وقىپ وتىردى. كيەلى كىتاپتا: «ٴفىلىپ الگى كىسىنىڭ [ياعني ەفيوپيالىق قىزمەتكەردىڭ] يشايا پايعامباردىڭ جازباسىن داۋىستاپ وقىپ وتىرعانىن ەستىدى»،— دەلىنگەن (ەل. ٸس. 8:30). ۇزاق ساپارعا ارنالعان كۇيمە جىلدام جۇرمەيتىن. ول باياۋ جۇرگەننىڭ ارقاسىندا ەفيوپيالىق قىزمەتكەر جازبانى وقي العان جانە ٴفىلىپ ونى جاياۋ-اق قۋىپ جەتكەن.
ەفيوپيالىق قىزمەتكەر «ٴفىلىپتى قاسىنا وتىرۋعا شاقىردى» (ەل. ٸس. 8:31). ادەتتە جارىسقا ارنالعان اربالاردا جۇرگىزۋشى تۇرىپ تۇراتىن. ٴبىراق ساپارعا ارنالعان كۇيمەدە ەفيوپيالىق قىزمەتكەرگە دە، فىلىپكە دە وتىراتىن ورىن تابىلعان.
ەلشىلەردىڭ ىستەرى 8-تاراۋدا جازىلعانداردى جانە قولدا بار تاريحي دەرەكتەردى ەسكەرە كەلە، ەندى ٴبىزدىڭ ادەبيەتتەرىمىزدە ەفيوپيالىق قىزمەتكەردىڭ كۇيمەسىن سوعىس ارباسى نە جارىس ارباسىنداي ەمەس، ۇلكەنىرەك ەتىپ بەينەلەنەدى.