جاۋىڭىزدى جاقسى ٴبىلىڭىز
«ٴبىز [شايتاننىڭ] ايلا-امالدارىن جاقسى بىلەمىز» (قورىنتتىقتارعا 2-حات 2:11).
اندەر: 133، 27
1. ادام مەن حاۋا كۇنا جاساعاننان كەيىن، ەحوبا ٴبىزدىڭ دۇشپانىمىز جايلى قانداي جايتتاردى اشتى؟
ادام اتا جىلاندار سويلەي المايتىنىن جاقسى بىلەتىن. سوندىقتان ول جىلاننىڭ حاۋاعا ٴتىل قاتقانىن بىلگەندە، وعان شىن مانىندە جىلان ەمەس، رۋحاني جاراتىلىس سويلەگەنىن تۇسىنگەن بولۋى مۇمكىن (مۇسانىڭ 1-جازباسى 3:1—6). ٴبىراق ادام مەن حاۋا بۇل رۋحاني جاراتىلىستىڭ كىم ەكەنىن بىلمەدى. سوعان قاراماستان ادام وسى بەيتانىس بىرەۋگە ەرىپ، كوكتەگى ٴسۇيۋشى اكەسىنە قارسى شىقتى (تىموتەگە 1-حات 2:14). ەحوبا سول مەزەتتە-اق بۇل زۇلىم دۇشپان جايلى كەيبىر جايتتاردى ايان ەتىپ، ونى اقىرىندا جوياتىنىن ۋادە ەتتى. ٴبىراق ەحوبا سول ۋاقىت كەلگەنشە، جىلان ارقىلى سويلەگەن بۇل رۋح قۇدايدى جاقسى كورەتىندەردىڭ بارىنە قارسى شىعاتىنىن ەسكەرتتى (مۇسانىڭ 1-جازباسى 3:15).
2، 3. ٴماسىح كەلگەنگە دەيىن شايتان جايلى از ايتىلۋىنىڭ سەبەبى نەدە بولۋى مۇمكىن؟
2 ەحوبا وزىنە قارسى شىققان پەرىشتەنىڭ ەسىمى كىم ەكەنىن بىزگە ەشقاشان ايتقان ەمەسa. ەدەمدەگى بۇلىكتەن كەيىن 2500 جىل وتكەن سوڭ عانا ەحوبا بۇل بۇلىكشى جايلى ٴسوز ەتكەن (ٵيۇپ 1:6). وعان «قارسىلاس» دەگەندى بىلدىرەتىن «شايتان» دەگەن ات تاعىلدى. ەۆرەي جازبالارىندا شايتان تەك شەجىرەلەر 1-جازبا، ٵيۇپ جانە زاكاريا دەگەن ٷش كىتاپتا عانا اتالعان. نەگە ٴماسىح كەلگەنگە دەيىن بۇل دۇشپان جايلى وتە از ايتىلدى؟
3 ەحوبا ەۆرەي جازبالارىندا شايتان مەن ونىڭ ىستەرى جايلى كوپ ايتپاعان. بۇل جازبالار ادامدارعا ٴماسىحتى تانىپ، سوڭىنان ەرۋگە كومەكتەسۋ ماقساتىمەن جازىلعان (لۇقا 24:44؛ عالاتتىقتارعا 3:24). ال ٴماسىح كەلگەندە، ەحوبا يسا مەن ونىڭ شاكىرتتەرى ارقىلى شايتان مەن وعان ەرگەن پەرىشتەلەر جايلى كوبىرەك ٴمالىم ەتتىb. ەحوبانىڭ بۇلاي ەتكەنى وتە ورىندى، ويتكەنى ول يسا مەن مايلانعاندار ارقىلى شايتان مەن ونىڭ جاقتاستارىن جويادى (ريمدىكتەرگە 16:20؛ ايان 17:14؛ 20:10).
ەحوبانىڭ جاعىندا بولامىز با، الدە شايتاننىڭ با — سونى تاڭداۋىمىز كەرەك
4. نەگە بىزگە ىبىلىستەن ۇرەيلەنە قورقۋدىڭ قاجەتى جوق؟
4 ەلشى پەتىر شايتان ٸبىلىستى «اقىرعان ارىستانعا» تەڭەگەن. ال جوحان ونى «جىلان» جانە «ايداھار» دەپ اتاعان (پەتىردىڭ 1-حاتى 5:8؛ ايان 12:9). ٴبىراق بىزگە ىبىلىستەن ۇرەيلەنە قورقۋدىڭ قاجەتى جوق. ويتكەنى ونىڭ كۇشى شەكتەۋلى (جاقىپ 4:7 وقىڭىز). بۇعان قوسا، ٴبىزدى ەحوبا، يسا مەن ادال پەرىشتەلەر قورعايدى. ولاردىڭ كومەگىمەن ٴبىز جاۋىمىزعا قارسى تۇرا الامىز. دەسە دە ٴبىز ماڭىزدى ٷش سۇراقتىڭ جاۋابىن ٴبىلۋىمىز كەرەك: شايتاننىڭ ىقپالى قانشالىقتى كۇشتى؟ ول ادامدارعا قانداي جولدارمەن ىقپال ەتۋگە تىرىسادى؟ ول نەنى ىستەي المايدى؟ قازىر وسى سۇراقتارعا جاۋاپ الايىق جانە قانداي ساباق الا الاتىنىمىزدى قاراستىرايىق.
شايتاننىڭ ىقپالى قانشالىقتى كۇشتى؟
5، 6. نەگە ادامي بيلەۋشىلەر ەڭ قاجەتتى وزگەرىستەردى جاساي المايدى؟
5 كوپتەگەن پەرىشتەلەر شايتاننىڭ قۇدايعا قارسى شىعارعان بۇلىگىنە قوسىلدى. توپان سۋعا دەيىن شايتان سولاردىڭ كەيبىرىن ايەلدەرمەن جىنىستىق قاتىناسقا تۇسۋگە ازعىرعان. كيەلى كىتاپ بۇنى بەينەلى ماعىنادا سۋرەتتەپ، ايداھاردىڭ اسپانداعى جۇلدىزداردىڭ ۇشتەن ٴبىرىن جەرگە تارتىپ اكەتكەنىن ايتقان (مۇسانىڭ 1-جازباسى 6:1—4؛ ياھۋدا 6؛ ايان 12:3، 4). بۇل پەرىشتەلەر قۇداي وتباسىن تاستاپ كەتكەن كەزدە، وزدەرى بارىپ شايتاننىڭ قول استىنا ٶتتى. ٴبىز بۇل بۇلىكشى پەرىشتەلەردىڭ اراسىندا ەشقانداي ٴتارتىپ جوق دەپ ويلاماۋىمىز كەرەك. كوزگە كورىنبەيتىن رۋحاني الەمدە شايتان قۇداي پاتشالىعىنا ۇقساتىپ ٶز ۇكىمەتىن قۇرىپ العان. ول ٶزىن پاتشا ەتىپ قويعان جانە جىنداردىڭ اراسىندا بەلگىلى ٴبىر ٴتارتىپ ورناتىپ، ولاردى الەمنىڭ ۇستىنەن بيلەۋشى ەتكەن (ەفەستىكتەرگە 6:12).
6 شايتان ٶزىنىڭ وسى ۇيىمى ارقىلى ادامي ۇكىمەتتەردى باسقارادى. ٴبىز بۇعان سەنىمدى بولا الامىز. ويتكەنى ول يساعا «جەر جۇزىنىڭ بارلىق پاتشالىقتارىن كورسەتىپ، بىلاي دەدى: «وسىلاردىڭ بۇكىل بيلىگى مەن ٴسان-سالتاناتىن ساعان بەرەمىن، ويتكەنى ول ماعان بەرىلگەن. ونى كىمگە بەرگىم كەلسە، سوعان بەرەمىن» (لۇقا 4:5، 6). ايتكەنمەن دە كوپتەگەن ۇكىمەتتەر ٶز ازاماتتارىنىڭ جاعدايىن جاساۋعا تىرىسادى. كەيبىر بيلەۋشىلەر ادامدارعا شىن نيەتپەن كومەكتەسكىسى كەلەدى. ٴبىراق ادامي بيلەۋشىلەردىڭ ەشقايسىسى ەڭ قاجەتتى وزگەرىستەردى جاساي المايدى (ٴزابۇر 146:3، 4؛ ايان 12:12).
7. ادامي ۇكىمەتتەردەن بولەك، شايتان جالعان ٴدىن مەن ساۋدا-ساتتىق الەمىن قالاي قولدانادى؟ (ماقالانىڭ باسىنداعى سۋرەتتى قاراڭىز.)
7 بۇعان قوسا، شايتان مەن جىندار «بۇكىل جەر جۇزىن اداستىرۋ» ٷشىن جالعان ٴدىن مەن ساۋدا-ساتتىق الەمىن قولدانادى (ايان 12:9). شايتان جالعان ٴدىن ارقىلى ەحوبا تۋرالى وتىرىك تاراتادى. ول ٴتىپتى قۇدايدىڭ ەسىمىن جاسىرعىسى كەلگەن (ەرەميا 23:26، 27). ناتيجەسىندە قۇدايعا تابىنىپ ٴجۇرمىن دەپ ويلايتىن كەيبىر اق جۇرەك ادامدار شىندىعىندا جىندارعا تابىنىپ ٴجۇر (قورىنتتىقتارعا 1-حات 10:20؛ قورىنتتىقتارعا 2-حات 11:13—15). شايتان ساۋدا-ساتتىق الەمىن قولدانىپ تا ادامداردى الدايدى. ول اقشا مەن دۇنيە-مۇلىك باقىتتى ەتەدى دەگەن سياقتى وتىرىكتى تاراتادى (ناقىل سوزدەر 18:11). بۇل وتىرىككە سەنەتىن ادامدار ٶمىر بويى قۇدايعا ەمەس، «بايلىققا» قىزمەت ەتىپ وتەدى (ماتاي 6:24). ولار ٴبىر كەزدەرى قۇدايدى جاقسى كورگەن دە شىعار. ٴبىراق دۇنيە-مۇلىكتى قاتتى جاقسى كورىپ كەتەتىندەرى سونشا — قۇدايعا دەگەن سۇيىسپەنشىلىكتەرى ٴسونىپ قالادى (ماتاي 13:22؛ جوحاننىڭ 1-حاتى 2:15، 16).
8، 9. ا) ادام مەن حاۋانىڭ جانە بۇلىكشىل پەرىشتەلەردىڭ ىستەگەندەرىنەن قانداي ەكى ساباق الامىز؟ ٵ) دۇنيەنى شايتان باسقارىپ وتىرعانىن بىلگەنىمىزدىڭ قانداي پايداسى بار؟
8 ادام مەن حاۋانىڭ جانە بۇلىكشىل پەرىشتەلەردىڭ ىستەگەندەرىنەن ٴبىز ەكى ماڭىزدى ساباق الامىز. بىرىنشىدەن، بىزدە ەكى عانا تاڭداۋ بار، سونىڭ بىرەۋىن تاڭداۋىمىز كەرەك. ٴبىز نە ەحوبانىڭ جاعىندا بولامىز، نە شايتاننىڭ جاعىندا بولامىز (ماتاي 7:13). ەكىنشىدەن، شايتاننىڭ جاعىنا شىققانداردىڭ كورەتىن پايداسى شەكتەۋلى. ادام مەن حاۋا نەنىڭ جامان، نەنىڭ جاقسى ەكەنىن وزدەرى شەشۋ مۇمكىندىگىنە يە بولدى. ال جىندار ادامي ۇكىمەتتەرگە قانداي دا ٴبىر بيلىك جۇرگىزە الادى (مۇسانىڭ 1-جازباسى 3:22). ٴبىراق شايتاننىڭ جاعىنا شىعۋدىڭ سالدارى ٵرقاشان دا جامان بولادى. شىن مانىندە بۇل ەشقانداي جاقسىلىققا اپارمايدى! (ٵيۇپ 21:7—17؛ عالاتتىقتارعا 6:7، 8).
9 دۇنيەنى شايتان باسقارىپ وتىرعانىن بىلگەنىمىزدىڭ قانداي پايداسى بار؟ بۇل بىزگە ادامي ۇكىمەتتەرگە قاتىستى دۇرىس كوزقاراس ساقتاۋعا كومەكتەسەدى جانە ىزگى حاباردى ۋاعىزداۋعا تالپىندىرادى. ەحوبا ٴبىزدىڭ ۇكىمەتتى قۇرمەتتەگەنىمىزدى قالايتىنىن بىلەمىز (پەتىردىڭ 1-حاتى 2:17). ۇكىمەت زاڭدارى ونىڭ تالاپتارىنا قايشى كەلمەيتىن بولسا، ول بىزدەن سول زاڭدارعا باعىنادى دەپ كۇتەدى (ريمدىكتەرگە 13:1—4). ٴبىراق، بۇعان قوسا، ٴبىز بەيتاراپتىق ساقتاۋىمىز كەرەكتىگىن ٵرى ەشقانداي ساياسي پارتياعا نە باسشىعا قولداۋ كورسەتپەۋىمىز كەرەكتىگىن دە بىلەمىز (جوحان 17:15، 16؛ 18:36). شايتاننىڭ ەحوبانىڭ ەسىمىن جاسىرىپ، اتىنا كىر كەلتىرگىسى كەلەتىنىن تۇسىنگەندىكتەن، ٴبىز ادامدارعا قۇداي جايلى شىندىقتى ۇيرەتۋ ٷشىن بارىمىزدى سالامىز. ٴبىز ونىڭ ەسىمىمەن اتالىپ، ونى قولدانا الاتىنىمىزدى ماقتان تۇتامىز. قۇدايعا دەگەن سۇيىسپەنشىلىگىمىز ٴبىز ٷشىن اقشاعا نە دۇنيە-مۇلىككە دەگەن سۇيىسپەنشىلىكتەن الدەقايدا باعالى (يشايا 43:10؛ تىموتەگە 1-حات 6:6—10).
شايتان وزگەلەرگە قانداي جولدارمەن ىقپال ەتۋگە تىرىسادى؟
10—12. ا) شايتان پەرىشتەلەردى قالاي ەلىكتىرگەن بولۋى مۇمكىن؟ ٵ) بۇل پەرىشتەلەردىڭ ىستەگەندەرىنەن قانداي ساباق الامىز؟
10 شايتان وزگەلەرگە ىقپال ەتۋ ٷشىن ٴتيىمدى تاسىلدەردى قولدانادى. ٶز دەگەنىن ىستەتۋ ٷشىن ول كەيدە تۇزاق قۇرىپ ازعىرادى، ال كەيدە كۇش كورسەتەدى.
11 كوپتەگەن پەرىشتەلەردى ازعىرۋ ٷشىن شايتان ولاردى ەلىكتىردى. ولاردى نە نارسە ازعىراتىنىن ٴبىلۋ ٷشىن ول ۇزاق ۋاقىت بويى باقىلاپ جۇرگەن شىعار. كەيبىر پەرىشتەلەر ونىڭ قارماعىنا ٸلىنىپ، ايەلدەرمەن جىنىستىق قاتىناسقا ٴتۇستى. ال ولاردان تۋىلعان زۇلىم الىپتار اينالاسىنداعى ادامدارعا قاتىگەزدىك كورسەتتى (مۇسانىڭ 1-جازباسى 6:1—4). ازعىندىقتى قولدانىپ ەلىكتىرۋىمەن قاتار، شايتان ولارعا بۇكىل ادامزاتقا ۇستەمدىك ەتىپ، بيلىك جۇرگىزەتىندەرىن ۋادە ەتكەن بولۋى مۇمكىن. وسىلايشا ول «ايەلدىڭ ۇرپاعى» تۋرالى ەحوبانىڭ پايعامبارلىعىنىڭ جۇزەگە اسۋىنا كەدەرگى جاساعىسى كەلگەن شىعار (مۇسانىڭ 1-جازباسى 3:15). ٴبىراق ەحوبا مۇنىسىنا جول بەرگەن جوق. ول توپان سۋ جىبەرگەندە، شايتان مەن جىنداردىڭ ويلاستىرعان جوسپارىنىڭ كۇلى كوككە ۇشتى.
شايتان ازعىندىق، اتاققۇمارلىق جانە تىلسىم كۇشتەر ارقىلى ٴبىزدى ازعىرۋعا تىرىسادى (12، 13-ابزاستاردى قاراڭىز)
12 بۇدان نەگە ۇيرەنەمىز؟ ازعىندىق پەن اتاققۇمارلىق — شايتاننىڭ وتە ٴتيىمدى تۇزاقتارى. شايتانعا ەرىپ كەتكەن پەرىشتەلەر كوكتە كوپ جىل بويى قۇدايدىڭ قاسىندا بولعان! سوندا دا ولاردىڭ كوبىسى بويلارىندا جامان قالاۋلاردىڭ پايدا بولۋىنا جول بەردى. كەيىن بۇل قالاۋلارى بۇرىنعىدان بەتەر ٶرشىپ كەتتى. ەندەشە، مىنانى ۇمىتپايىق: ەحوباعا قانشالىقتى ۇزاق قىزمەت ەتپەيىك، جۇرەگىمىزدە جامان قالاۋلار دامي باستاۋى مۇمكىن (قورىنتتىقتارعا 1-حات 10:12). سوندىقتان دا ۇنەمى جۇرەگىمىزدە نە بارىن تەكسەرىپ، كەز كەلگەن ونەگەسىز ويلار مەن وركوكىرەكتىكتەن ارىلۋىمىز كەرەك! (عالاتتىقتارعا 5:26؛ قولوستىقتارعا 3:5 وقىڭىز).
13. شايتان تاعى قانداي تۇزاقتى قولدانادى جانە ودان قالاي اۋلاق بولا الامىز؟
13 شايتان قولداناتىن تاعى ٴبىر تۇزاق — تىلسىم كۇشتەرگە دەگەن قىزىعۋشىلىق. ادامداردىڭ جىن-پەرىلەرگە دەگەن قىزىعۋشىلىعىن وياتۋ ٷشىن ول جالعان ٴدىن مەن كوڭىل كوتەرۋ تۇرلەرىن قولدانادى. فيلمدەر، ەلەكتروندىق ويىندار مەن باسقا دا كوڭىل كوتەرۋ تۇرلەرى تىلسىم كۇشتەردى قىزىقتى ەتىپ كورسەتۋى مۇمكىن. بۇل تۇزاققا تۇسۋدەن قالاي اۋلاق بولا الامىز؟ قۇداي ۇيىمى كوڭىل كوتەرۋ تۇرلەرىنىڭ قايسىسى جاقسى، ال قايسىسى جامان ەكەنىن ٴتىزىپ جازىپ بەرەدى دەپ كۇتپەۋىمىز كەرەك. ەحوبانىڭ پرينسيپتەرىنە نەگىزدەلە وتىرىپ دۇرىس تاڭداۋ جاساۋ ٷشىن، ار-ۇجدانىمىزدى تاربيەلەۋىمىز قاجەت (ەۆرەيلەرگە 5:14). ەگەر قۇدايعا دەگەن سۇيىسپەنشىلىگىمىز «ەكىجۇزدى بولماسا»، ٴبىز دانالىقپەن شەشىم قابىلدايتىن بولامىز (ريمدىكتەرگە 12:9، سىلتەمە). ەكىجۇزدى ادامنىڭ ٴسوزى باسقا، ٸسى باسقا. ەندەشە كوڭىل كوتەرۋ ٴتۇرىن تاڭداعاندا بىلاي دەپ ويلانىپ كورەيىك: «وزگەلەرگە ۇيرەتىپ جۇرگەن پرينسيپتەردى ٶزىم ۇستانىپ جاتىرمىن با؟ ەگەر زەرتتەۋ ساباعىن وتكىزىپ جۇرگەن نەمەسە قايتا بارىپ جۇرگەن ادامدارىم مەن تاڭداعان كوڭىل كوتەرۋ ٴتۇرىن كورسە، نە ويلايدى؟» وزگەلەرگە ۇيرەتەتىن پرينسيپتەردى ٶزىمىز ۇستانساق، شايتاننىڭ تۇزاعىنان باس تارتۋ وڭايىراق بولادى (جوحاننىڭ 1-حاتى 3:18).
شايتان ۇكىمەتتىڭ تىيىم سالۋى، سىنىپتاستاردىڭ قىسىم كورسەتۋى جانە وتباسىنىڭ قارسىلىعى ارقىلى بىزگە كۇش كورسەتۋگە تىرىسادى (14-ابزاستى قاراڭىز)
14. شايتان بىزگە قالاي كۇش كورسەتۋى مۇمكىن جانە وعان قالاي تويتارىس بەرە الامىز؟
14 سونداي-اق شايتان ەحوباعا دەگەن ادالدىعىمىزدان تايدىرۋ ٷشىن بىزگە كۇش كورسەتىپ، قورقىتقىسى كەلەدى. مىسالى، ۋاعىزداۋ ىسىنە تىيىم سالۋ ٷشىن ول ۇكىمەتكە ىقپال ەتۋى مۇمكىن. يا بولماسا ارىپتەستەرىمىزدىڭ نە سىنىپتاستارىمىزدىڭ كيەلى كىتاپ تالاپتارىنا ساي ٴجۇرىپ-تۇرعانىمىزدى كەلەكە-مازاق قىلۋىنا ىقپال ەتۋى مۇمكىن (پەتىردىڭ 1-حاتى 4:4). شايتان ٴتىپتى سەنبەيتىن تۋىستارىمىزعا دا ىقپال ەتە الادى. نيەتتەرى جاقسى بولعانمەن، ولار ٴبىزدىڭ قاۋىم كەزدەسۋلەرىنە بارۋىمىزعا بوگەت جاساۋعا تىرىسۋى مۇمكىن (ماتاي 10:36). وسىنداي جولدارمەن كۇش كورسەتكەندە، شايتانعا تويتارىس بەرۋ ٷشىن نە ىستەي الامىز؟ شايتاننىڭ بىزبەن سوعىسىپ جاتقانىن بىلەتىندىكتەن، ٴبىز ونىڭ مۇنداي شابۋىلدارىنا تاڭعالماۋىمىز كەرەك (ايان 2:10؛ 12:17). سونداي-اق ماسەلەنىڭ شىن مانىندە نەدە ەكەنىن ەستەن شىعارماۋىمىز قاجەت: شايتان ٴبىزدىڭ ەحوباعا وڭاي كەزدە عانا قىزمەت ەتىپ، جاعدايىمىز قيىنداپ كەتسە، ودان تەرىس اينالىپ كەتەتىنىمىزدى ايتقان (ٵيۇپ 1:9—11؛ 2:4، 5). سونىمەن قاتار ٴبىز ەحوبادان ۇدايى كۇش سۇراپ دۇعا ەتۋىمىز كەرەك. ول ٴبىزدى ەشقاشان دا تاستامايتىنىن جادىمىزدا ۇستايىق (ەۆرەيلەرگە 13:5).
شايتان نە ىستەي المايدى؟
15. شايتان بىزگە ٶزىمىز قالامايتىن نارسەنى كۇشتەپ ىستەتە الا ما؟ ٴتۇسىندىرىڭىز.
15 ادام ٶزى قالاماسا، شايتان ونى كۇشتەپ ەشتەڭە ىستەتە المايدى (جاقىپ 1:14). وسى دۇنيەدەگى كوپ ادامدار شايتاننىڭ جاعىندا جۇرگەندەرىن بىلمەيدى دە. ال شىندىقتى بىلگەن سوڭ، ادام نە ەحوبانىڭ، نە شايتاننىڭ جاعىن تاڭداۋى ٴتيىس (ەلشىلەردىڭ ىستەرى 3:17؛ 17:30). قۇدايعا مويىنسۇنۋعا بەكىنسەك، شايتان ٴبىزدى ادالدىعىمىزدان تايدىرا المايدى! (ٵيۇپ 2:3؛ 27:5).
16، 17. ا) شايتان مەن جىندار تاعى نە ىستەي المايدى؟ ٵ) نەگە ەحوباعا داۋىستاپ دۇعا ەتۋدەن قورىقپاۋىمىز كەرەك؟
16 شايتان مەن جىندار ىستەي المايتىن باسقا دا نارسەلەر بار. مىسالى، ولار ٴبىزدىڭ جۇرەگىمىز بەن ويىمىزدى وقي الاتىنى كيەلى كىتاپتىڭ ەش جەرىندە ايتىلماعان. مۇنى ەحوبا مەن يسا عانا ىستەي الادى (سامۋيلدىڭ 1-جازباسى 16:7؛ مارقا 2:8). ولاي بولسا، داۋىستاپ سويلەسەك نە دۇعا ەتسەك، ٸبىلىس پەن جىندار ٴبىزدى ەستىپ قويىپ، كەيىن سونى وزىمىزگە قارسى قولدانادى دەپ قورقۋىمىز كەرەك پە؟ جوق! نەگە؟ مىسالى، ٴبىز ٸبىلىس كورىپ قويۋى مۇمكىن دەپ، ەحوباعا دەگەن قىزمەتىمىزدە يگى ىستەر جاساۋعا قورىقپايمىز عوي. سول سياقتى، ٸبىلىس ەستىپ قويۋى مۇمكىن دەپ، داۋىستاپ دۇعا ەتۋدەن قورىقپاۋىمىز كەرەك. ونىڭ ۇستىنە، كيەلى كىتاپتىڭ كوپ جەرىندە قۇداي قىزمەتشىلەرىنىڭ داۋىستاپ دۇعا ەتكەنى ايتىلعان. ولاردىڭ ٸبىلىس ەستىپ قويادى دەپ قورىققانى جايلى ەش جەردە جازىلماعان (پاتشالار 1-جازبا 8:22، 23؛ جوحان 11:41، 42؛ ەلشىلەردىڭ ىستەرى 4:23، 24). ەحوباعا ۇنامدى تۇردە سويلەپ، ارەكەت ەتۋگە بارىنشا تىرىساتىن بولساق، ول ٸبىلىستىڭ بىزگە وڭالماستاي زالال كەلتىرۋىنە جول بەرمەيدى. بۇعان كامىل سەنسەك بولادى (ٴزابۇر 34:7 وقىڭىز).
17 ٴبىز جاۋىمىزدى جاقسى ٴبىلۋىمىز كەرەك. ٴبىراق بىزگە ودان قورقۋدىڭ قاجەتى جوق. كەمەلسىز بولساق تا، ەحوبانىڭ كومەگىمەن ٴبىز شايتاندى جەڭە الامىز! (جوحاننىڭ 1-حاتى 2:14). وعان قارسى تۇرساق، ول بىزدەن قاشىپ كەتەدى (جاقىپ 4:7؛ پەتىردىڭ 1-حاتى 5:9). بۇگىندە شايتان اسىرەسە جاستارعا شابۋىلداپ جاتقانى بايقالادى. ولار ٸبىلىستىڭ شابۋىلىنا قالاي تويتارىس بەرە الادى؟ بۇل جايلى كەلەسى ماقالادا تالقىلايمىز.
a كيەلى كىتاپتا كەيبىر پەرىشتەلەردىڭ ەسىمى اتالعان (بيلەر 13:18؛ دانيال 8:16؛ لۇقا 1:19؛ ايان 12:7). وندا تاعى ٵر جۇلدىزدىڭ اتى بار ەكەنى ايتىلعان (ٴزابۇر 147:4). بۇدان ەحوبا پەرىشتەلەردىڭ بارىنە، سونىڭ ىشىندە شايتانعا اينالعان پەرىشتەگە دە، ەسىم بەرگەن دەپ تۇجىرىمداۋعا بولادى.
b ەۆرەي جازبالارىندا «شايتان» دەگەن اتاۋ 10 نان اسا رەت، ال ماسىحشىلەردىڭ گرەك جازبالارىندا 40 قا جۋىق رەت كەزدەسەدى.