مۇسانىڭ 2-جازباسى
28 ماعان ٴدىني قىزمەتكەر رەتىندە قىزمەت ەتۋ ٷشىن+، يسرايلدىكتەردىڭ اراسىنان اعاڭ حارون+ مەن ونىڭ ۇلدارى+ ناداپ، ٵبيحۋ+، ەلازار مەن يتاماردى+ قاسىڭا الدىرت. 2 ٴسۇيتىپ، اعاڭ حاروندى داڭق پەن ٴسان-سالتاناتقا بولەيتىن كيەلى كيىم توقى+. 3 ٶزىم دانالىق دارىتقان+ شەبەر ادامداردىڭ بارىمەن سويلەس. ولار حاروننىڭ ٴدىني قىزمەتكەرىم رەتىندە قاسيەتتىلىگىن* كورسەتەتىن كيىم توقىپ بەرەدى.
4 ولار مىنالاردى جاساپ بەرسىن: ٴتوسقالتا+، ەفود+، جەڭسىز كويلەك+، ۇزىن جەڭدى شاقپاق كويلەك، سالدە+ جانە بەلبەۋ+. اعاڭ حارون مەن ونىڭ ۇلدارى مەنىڭ ٴدىني قىزمەتكەرلەرىم بولۋ ٷشىن، ولارعا وسىنداي كيەلى كيىم توقىپ بەرۋ كەرەك. 5 بۇل ٷشىن شەبەرلەر التىن، كوك جانە ال قىزىل ٴجىپ، يىرىلگەن كۇلگىن ٴجۇن، سونداي-اق ساپالى زىعىر ٴجىپ قولدانسىن.
6 شەبەرلەر ەفودتى التىن، كوك جانە ال قىزىل جىپتەن، يىرىلگەن كۇلگىن ٴجۇن مەن جاقسىلاپ يىرىلگەن زىعىردان ورنەكتەپ توقىسىن+. 7 ەفودتىڭ ەكى بولىگىن بىرىكتىرىپ تۇراتىن ەكى يىق جاپسىرما ىستەلسىن. 8 ەفودتى مىقتاپ ۇستاپ تۇراتىن بەلبەۋ جاساپ+، ونى دا التىن، كوك جانە ال قىزىل جىپتەن، يىرىلگەن كۇلگىن ٴجۇن مەن جاقسىلاپ يىرىلگەن زىعىردان توقىسىن.
9 ەكى ونيكس تاسىن الىپ+، ولارعا يسرايل ۇلدارىنىڭ ەسىمدەرىن ويىپ جاز+: 10 ولاردىڭ تۋىلۋ رەتىنە قاراي، التاۋىن ٴبىر تاسقا، قالعان التاۋىن ەكىنشى تاسقا جاز. 11 تاس قاشايتىن شەبەر ەكى ونيكس تاسقا يسرايل ۇلدارىنىڭ ەسىمدەرىن مورگە ويىپ جازعانداي جازسىن+. سوسىن ولاردى التىننان جاسالعان قۇرساۋلارعا قوندىر. 12 يسرايل ۇلدارىنا ەستەلىك رەتىندە وسى ەكى تاستى ەفودتىڭ يىق جاپسىرمالارىنا بەكىت+. حارون ەحوبانىڭ الدىندا ولاردىڭ ەسىمىن ەستەلىك رەتىندە ەكى يىعىندا الىپ جۇرەدى. 13 التىننان ەكى قۇرساۋ جاسا، 14 سونداي-اق ساف التىننان شيراتىلعان باۋ سياقتى ەكى شىنجىر ىستە+. وسى شىنجىرلاردى قۇرساۋلارعا بەكىت+.
15 توقىماشى قۇدايدىڭ ۇكىمىن بىلدىرەتىن ٴتوسقالتا جاساسىن+. ول دا ەفود سياقتى التىن، كوك جانە ال قىزىل جىپتەن، يىرىلگەن كۇلگىن ٴجۇن مەن جاقسىلاپ يىرىلگەن زىعىردان ورنەكتەلىپ توقىلسىن+. 16 ونى ەكى بۇكتەگەندە، ٴتورت بۇرىشتى، ۇزىندىعى مەن ەنى ٴبىر قارىستان* بولسىن. 17 وعان ٴتورت قاتار ەتىپ اسىل تاستار ورنات: ٴبىرىنشى قاتارعا لاعىل، توپاز، ٴزۇبارجات؛ 18 ەكىنشى قاتارعا فەرۋزا، جاقۇت، ياشما؛ 19 ٷشىنشى قاتارعا لەشەم*، اقىق، امەتيست؛ 20 ال ٴتورتىنشى قاتارعا حريزوليت، ونيكس، جادەيت. ولار التىن قۇرساۋلارعا قوندىرىلسىن. 21 تاستاردىڭ سانى يسرايل ۇلدارىنىڭ ەسىمدەرىنە ساي 12 بولسىن. ٵر تاسقا 12 رۋدىڭ بىرەۋىنىڭ اتى مورگە جازىلعانداي ويىلىپ جازىلسىن.
22 ٴتوسقالتانى اسىپ قويۋ ٷشىن ساف التىننان شيراتىلعان باۋ ىسپەتتى ەكى شىنجىر جاسا+. 23 ەكى التىن ساقينا جاساپ، ولاردى ٴتوسقالتانىڭ جوعارعى ەكى شەتىنە قوندىر. 24 ٴسۇيتىپ، ەكى التىن شىنجىر باۋدى ٴتوسقالتانىڭ شەتىندەگى وسى ەكى ساقينادان وتكىزىپ بەكىت. 25 ال قالعان ۇشتارىن ەفودتىڭ يىق جاپسىرماسىنداعى قۇرساۋلاردىڭ الدىڭعى جاعىنا بەكىت. 26 باسقا ەكى التىن ساقينا جاساپ، ولاردى ٴتوسقالتانىڭ ەفودقا قاراعان ىشكى جاعىنىڭ تومەنگى ەكى شەتىنە قوندىر+. 27 تاعى دا ەكى التىن ساقينا ىستەپ، يىق جاپسىرمالاردىڭ تومەنگى ۇشىنىڭ بەت جاعىنا، توقىلعان بەلبەۋدىڭ ەفودقا بايلانعان جەرىنىڭ جوعارعى تۇسىنا، بەكىت+. 28 ٴتوسقالتانىڭ ساقينالارىنا بايلانعان كوك باۋلاردىڭ ەكىنشى ۇشتارىن ەفودتاعى وسى ساقينالارعا بايلا. سوندا ٴتوسقالتا ەفودتاعى ورنىنان قوزعالماي، بەلبەۋدىڭ ۇستىڭگى جاعىندا بەرىك تۇرادى.
29 حارون قاسيەتتى بولمەگە كىرگەندە، جۇرەك تۇسىنداعى قۇداي ۇكىمىن بىلدىرەتىن ٴتوسقالتاعا جازىلعان يسرايل ۇلدارىنىڭ ەسىمدەرىن ەحوبانىڭ الدىندا ەستەلىك رەتىندە ۇنەمى الىپ ٴجۇرۋ كەرەك. 30 قۇداي ۇكىمىن بىلدىرەتىن ٴتوسقالتاعا ۋريم مەن ٴتۋمميمدى*+ سالىپ قوي. حارون ەحوبانىڭ الدىنا كەلگەندە، ولار ونىڭ جۇرەك تۇسىندا تۇرسىن. يسرايلدىكتەرگە قۇداي ۇكىمىن بىلدىرەتىن وسى زاتتاردى ول جۇرەك تۇسىندا ەحوبانىڭ الدىندا ٵردايىم الىپ ٴجۇرسىن.
31 ەفودتىڭ ىشىنەن كييۋ ٷشىن كوك جىپتەن جەڭسىز كويلەك توقى+. 32 ونىڭ جوعارى جاعىنان باس سۇعاتىن ويىق جاسا. سوگىلىپ كەتپەس ٷشىن، توقىماشى ويىقتىڭ شەتىن اينالدىرا ساۋىتتىكىندەي مىقتى جيەكتەمە توقىسىن. 33 سوسىن كوك جانە ال قىزىل جىپتەن، يىرىلگەن كۇلگىن جۇننەن كويلەكتىڭ ەتەگىنە اينالدىرا انار جەمىستەرىن جاسا. ال انارلاردىڭ ارا-اراسىنا التىن قوڭىراۋشالار ٸلىپ قوي. 34 ولار جەڭسىز كويلەكتىڭ ەتەگىنە ٴبىر التىن قوڭىراۋشا، ٴبىر انار بولىپ كەزەك-كەزەك ورنالاسسىن. 35 بۇل كويلەكتى حارون قىزمەتىن اتقارعاندا كيىپ جۇرۋگە ٴتيىس. ول ەحوبانىڭ الدىندا تۇرۋ ٷشىن قاسيەتتى ورىنعا كىرگەندە جانە قايتا شىققاندا، قوڭىراۋشالاردىڭ سىڭعىرى ەستىلىپ تۇرۋى كەرەك، ايتپەسە ول ٶلىم قۇشادى+.
36 ساف التىننان جىلتىراعان شاعىن تاسپا جاساپ، بەتىنە «كيەلىلىك ەحوباعا تيەسىلى»+ دەپ مورگە جازعانداي ويىپ جاز. 37 ونى كوك باۋمەن سالدەنىڭ ماڭداي تۇسىنا بايلاپ قوي+. 38 ول حاروننىڭ ماڭدايىندا تۇرسىن. الدەكىم قاسيەتتى نارسەلەرگە، ياعني يسرايل ۇلدارى ۇسىنعان قاسيەتتى تارتۋلارعا، لايىقتى تۇردە قاراماي كۇنا جاساسا، سونى حارون موينىنا الادى+. ەحوبانىڭ ىقىلاسىنا يە بولۋ ٷشىن، ول ۇنەمى حاروننىڭ ماڭدايىندا تاعۋلى ٴجۇرسىن.
39 ساپالى زىعىر جىپتەن ۇزىن جەڭدى شاقپاق كويلەك، سالدە جانە بەلبەۋ توقى+.
40 داڭق پەن ٴسان-سالتاناتقا بولەيتىن+ ۇزىن جەڭدى كويلەك، بەلبەۋ جانە باسكيىمدى حاروننىڭ ۇلدارىنا دا توقىپ بەر+. 41 وسى كيىمدەردى اعاڭ حارونعا جانە ونىڭ ۇلدارىنا كيگىز. سوسىن ولارعا مايلاۋ+ جانە تاعايىنداۋ ٴراسىمىن+ جاساپ، قاسيەتتى قىزمەتكە ارنا*. ولار مەنىڭ ٴدىني قىزمەتكەرلەرىم بولادى. 42 سونداي-اق جالاڭاش تاندەرىن بەلىنەن تىزەسىنە دەيىن جاۋىپ تۇرۋ ٷشىن+، ولارعا زىعىر جىپتەن دامبال توقىپ بەر. 43 حارون مەن ونىڭ ۇلدارى كەزدەسۋ شاتىرىنا كىرگەندە نەمەسە قاسيەتتى ورىندا قىزمەت ەتىپ ٴجۇرىپ قۇرباندىق وشاعىنا جاقىنداعاندا، وسى كيىمدەردى كيىپ جۇرۋلەرى كەرەك، ولاي ەتپەسە، كىنالى بولىپ، ٶلىم قۇشادى. بۇل — ونىڭ ٶزى دە، كەلەر ۇرپاعى دا ماڭگىلىك ۇستانۋى كەرەك نۇسقاۋ.