مۇسانىڭ 2-جازباسى
32 مۇسانىڭ تاۋدان ۇزاق ۋاقىت تۇسپەي جاتقانىن+ كورگەن حالىق حاروننىڭ قاسىنا جينالىپ، بىلاي دەدى: «كانە، ٴبىزدى باستاپ جۇرەتىن قۇداي ىستەپ بەر+. ويتكەنى ٴبىزدى مىسىردان الىپ شىققان اناۋ مۇسامەن نە بولعانىن بىلمەيمىز». 2 حارون ولارعا: «ايەلدەرىڭ مەن ۇل-قىزدارىڭنىڭ قۇلاعىنداعى التىن سىرعالاردى شەشىپ، ماعان اكەلىڭدەر+»،— دەدى. 3 سوندا بۇكىل جۇرت قۇلاقتارىنان التىن سىرعالارىن شەشىپ، حارونعا اكەلە باستادى. 4 ول التىندى الدى دا، كەسكىش قۇرالمەن پىشىنگە كەلتىرىپ، بۇزاۋدىڭ ٴمۇسىنىن* جاسادى+. سول كەزدە حالىق: «ۋا، يسرايل، سەنى مىسىردان الىپ شىققان قۇدايىڭ — وسى!»— دەستى+.
5 مۇنى كورگەندە، حارون ٴمۇسىننىڭ الدىنا قۇرباندىق ورنىن تۇرعىزدى. ٴسۇيتىپ، ول: «ەرتەڭ ەحوباعا ارنالعان مەيرام بولادى!»— دەپ جاريالادى. 6 كەلەسى كۇنى ولار ەرتە تۇرىپ، تۇگەل ورتەلەتىن قۇرباندىقتار مەن تاتۋلىق قۇرباندىقتارىن ۇسىندى. سوسىن حالىق وتىرىپ، ٸشىپ-جەدى. كەيىن ورىندارىنان تۇرىپ، كوڭىل كوتەرە باستادى+.
7 سوندا ەحوبا مۇساعا بىلاي دەدى: «تومەن ٴتۇس، سەن مىسىردان الىپ شىققان حالىق ازعىندىققا سالىندى+. 8 ولار مەن نۇسقاعان جولدان تەز-اق تايىپ كەتتى+. وزدەرىنە بۇزاۋ ٴمۇسىنىن جاساپ الىپ: —ۋا، يسرايل، سەنى مىسىردان الىپ شىققان قۇدايىڭ — وسى!— دەپ، وعان تاعزىم ەتىپ، قۇرباندىقتار شالۋدا». 9 ٵرى قاراي ەحوبا مۇساعا: «مىنا حالىقتىڭ توڭمويىن ەكەنىن كورىپ تۇرمىن+. 10 مەنى توقتاتامىن دەمە. قاھارىمدى توگىپ، ولاردى قۇرتىپ جىبەرەيىن دە، سەنەن ۇلى حالىق تاراتايىن+»،— دەدى.
11 سوندا مۇسا ەحوبا قۇدايىن رايىنان قايتارماق بولىپ+، بىلاي دەپ جالبارىندى: «ۋا، ەحوبا، ٶزىڭنىڭ قۇدىرەتتى كۇشىڭمەن، قۋاتتى قولىڭمەن مىسىردان الىپ شىققان حالقىڭا اشۋلانىپ قايتەسىڭ+؟ 12 ايتپەسە مىسىرلىقتار «ول يسرايلدىكتەردى تاۋدا قىرىپ سالىپ، جەر بەتىنەن جوق قىلۋ ٷشىن زۇلىم نيەتپەن الىپ شىعىپتى» دەپ جۇرمەي مە+؟ قاھارىڭدى باسىپ، حالقىڭا اپات جىبەرەمىن دەگەن رايىڭنان قايتا كور! 13 قىزمەتشىلەرىڭ ىبىرايىمدى، ىسقاق پەن يسرايلدى ەسىڭە الا كور. ولارعا: —ۇرپاعىڭدى اسپانداعى جۇلدىزدارداي كوبەيتەمىن+. ٶزىم ۋادە ەتكەن وسى جەردىڭ ٴبارىن ۇرپاعىڭا بەرەمىن، ولار ونى ماڭگى يەمدەنەدى،— دەپ، وزىڭمەن انت ەتىپ ەدىڭ عوي+»،— دەدى.
14 سوندا ەحوبا حالقىنا اپات جىبەرەمىن دەگەن رايىنان قايتتى+.
15 مۇسا كەرى بۇرىلىپ، تاۋدان ٴتۇستى. قولىندا ەكى كۋالىك تاقتاشاسى بار ەدى+. بۇل تاس تاقتاشالاردىڭ ەكى بەتىندە دە جازۋى بولاتىن. 16 سول تاقتاشالاردى جاساپ، بەتتەرىندەگى ٴسوزدى قاشاپ جازعان قۇدايدىڭ ٶزى ەدى+. 17 ەشۋا حالىقتىڭ ۋلاپ-شۋلاپ جاتقان داۋسىن ەستىپ، مۇساعا: «قوستان شايقاستىڭ داۋسى شىعىپ جاتىر»،— دەدى. 18 ٴبىراق مۇسا بىلاي جاۋاپ بەردى:
«بۇل — ۇلكەن جەڭىستىڭ قۋانىشتى ٵنى ەمەس،
جەڭىلگەندەردىڭ قايعىرعان زارى دا ەمەس،
ەستىپ تۇرعانىم — بوتەن ٴبىر ٵننىڭ اۋەنى».
19 مۇسا قوسقا جاقىنداي بەرگەندە، بۇزاۋدى+ جانە بيلەپ جاتقان ادامداردى كورىپ، بويىن ىزا كەرنەدى. تاۋ ەتەگىندە تۇرعان ول قولىنداعى تاقتاشالاردى جەرگە لاقتىرىپ جىبەرىپ، كۇل-تالقانىن شىعاردى+. 20 ال ولاردىڭ جاساعان بۇزاۋىن الىپ، وتقا جاقتى+. سوسىن ونى ۇنتاقتاپ، سۋ بەتىنە شاشتى دا، يسرايلدىكتەرگە سول سۋدان ىشكىزدى+. 21 بۇدان سوڭ مۇسا حاروننان: «بۇل حالىقتى وسىنداي اۋىر كۇناعا باتىراتىنداي، ولار ساعان نە ىستەدى؟»— دەپ سۇرادى. 22 سوندا حاروننىڭ جاۋابى مىناۋ بولدى: «مىرزام، ماعان اشۋلانا كورمە. بۇل حالىقتىڭ جاماندىققا بەيىم ەكەنىن ٶزىڭ بىلەسىڭ عوي+. 23 ولار ماعان: —ٴبىزدى باستاپ جۇرەتىن قۇداي ىستەپ بەر. ويتكەنى ٴبىزدى مىسىردان الىپ شىققان اناۋ مۇسامەن نە بولعانىن بىلمەيمىز،— دەدى+. 24 سوندا مەن ولارعا: —كىمدە التىنى بولسا، شەشىپ، ماعان بەرسىن،— دەدىم. كەيىن ولاردى الىپ، وتقا تاستاپ ەدىم، الگى بۇزاۋ شىعا كەلدى».
25 مۇسا حالىقتىڭ جۇگەنسىز بولىپ كەتكەنىن كوردى. حارون جول بەرگەندىكتەن، ولار بەتىمەن كەتىپ، جاۋلارىنا تابا بولدى. 26 مۇسا قوستىڭ كىرەبەرىس قاقپاسىنىڭ الدىندا تۇرىپ: «كىم ەحوبانىڭ جاعىندا بولسا، سول قاسىما كەلسىن!»— دەدى+. سوندا ونىڭ قاسىنا لەۋىلىكتەر تۇگەل جينالدى. 27 ولارعا مۇسا: «يسرايلدىڭ قۇدايى ەحوبا سەندەرگە بىلاي دەيدى: —اركىم سەمسەرىن بەلىنە بايلاسىن دا، قوستى و شەتى مەن بۇ شەتىنە* دەيىن تۇگەل ارالاپ، كۇناعا باتقان ٶز باۋىرىن، كورشى-قولاڭى مەن دوس-جاراندارىن ٶلتىرسىن»،— دەپ تاپسىردى+. 28 لەۋىلىكتەر مۇسانىڭ ايتقانىن ىستەدى. سول كۇنى شامامەن 3000 ادام جەر قۇشتى. 29 بۇدان كەيىن مۇسا: «بۇگىن وزدەرىڭدى ەحوباعا قىزمەت ەتۋگە باعىشتاڭدار، ويتكەنى ٴارقايسىسىڭ ۇلدارىڭ مەن باۋىرلارىڭا قارسى شىقتىڭدار+. ول سەندەرگە بۇگىن باتاسىن بەرەدى+»،— دەپ ايتتى.
30 كەلەسى كۇنى مۇسا حالىققا: «سەندەر وتە اۋىر كۇنا جاسادىڭدار، سوندىقتان مەن ەحوبانىڭ الدىنا كوتەرىلمەكپىن. مۇمكىن، كۇنالارىڭ ٷشىن ونىڭ كەشىرىمىن الا الارمىن»،— دەدى+. 31 ول ەحوبانىڭ الدىنا قايتا بارىپ، بىلاي دەدى: «مىنا حالىق وزدەرىنە التىننان قۇداي جاساپ، اۋىر كۇناعا باتتى عوي+! 32 ٴبىراق سەن ولاردى كەشىرە كور+. كەشىرمەسەڭ، ٶزىڭ جازعان كىتاپتان مەنىڭ ەسىمىمدى ٶشىرىپ تاستا+». 33 سوندا ەحوبا مۇساعا: «مەن كىتابىمنان ماعان قارسى كۇنا جاساعان ادامنىڭ عانا ەسىمىن وشىرەمىن. 34 ەندى بار دا، حالىقتى مەن ايتقان جەرگە الىپ بار. مەنىڭ پەرىشتەم الدىڭدا ٴجۇرىپ وتىرادى+. جاۋاپقا تارتاتىن كۇن كەلگەندە، ولاردى كۇناسى ٷشىن جازالايمىن»،— دەدى. 35 كەيىن ەحوبا حالىقتى بۇزاۋ جاساعانى ٷشىن، ياعني حارون جاساعان بۇزاۋ ٷشىن، جازالادى.