مۇسانىڭ 2-جازباسى
15 سوندا مۇسا مەن يسرايلدىكتەر ەحوبانى ماداقتاپ، بىلاي دەپ ٵن سالدى+:
«ەحوباعا ارناپ ٵن شىرقايىن، داڭقى ونىڭ اسقاقتادى+.
تەڭىزگە ول لاقتىردى اتىمەن قوسا جاۋىنگەردى+.
2 ەحوبا* — مەنىڭ كۇش-قۋاتىم، ول — مەنىڭ قۇتقارۋشىم+.
ول — مەنىڭ قۇدايىم، ونى مەن ماداقتايمىن+.
ول — اكەمنىڭ قۇدايى+، ونى مەن داڭقتايمىن+.
3 ەحوبا — مىقتى جاۋىنگەر+. ەحوبا — ونىڭ ەسىمى+.
4 پەرعاۋىننىڭ سوعىس ارباسى مەن اسكەرىن تەڭىزگە ول لاقتىردى+،
تاڭداۋلى جاۋىنگەرلەرىن قىزىل تەڭىزگە باتىردى+.
5 بۋىرقانعان سۋ باسىپ قالىپ، سۋ تۇبىنە ولار تاستاي باتتى+.
6 ۋا، ەحوبا، وڭ قولىڭنىڭ زور قۇدىرەتى+،
ۋا، ەحوبا، وڭ قولىڭ جاۋدى تالقاندايدى.
7 اسقان ۇلىلىعىڭمەن قۇلاتاسىڭ وزىڭە قارسى شىققانداردى+،
لاۋلاعان قاھارىڭ سابانداي جالمايدى ولاردى.
8 تاناۋىڭنىڭ لەبىنەن الىپ سۋ كوتەرىلىپ،
تۇرا قالدى اعىستىڭ جولىن بوگەپ،
بۋىرقانعان سۋ تەڭىز ورتاسىندا* قالدى قاتىپ.
9 جاۋ بىلاي دەدى: «سوڭىنا تۇسەم! قۋىپ جەتەم!
قۇمارىم قانعانشا، ولجامدى بولىسەم.
سەمسەرىمدى قىنابىنان سۋىرىپ، ولاردى كۇل-تالقان ەتەم»+.
10 ۇرلەپ ەدىڭ تەڭىزگە، كومىپ قالدى ولاردى+،
قالىڭ سۋعا باتىپ كەتتى قورعاسىنداي بارلىعى.
11 ۋا، ەحوبا، قاي قۇداي ساعان تەڭ كەلەدى+؟
سەن سەكىلدى بار ما ەكەن اسقان كيەلى+؟
دارىپتەۋگە دە، قورقۋعا دا لايىقسىڭ، تاڭعاجايىپ كەرەمەتتەر جاسايسىڭ+.
12 وڭ قولىڭدى سوزعاندا، جۇتىپ قويدى جەر ولاردى+.
13 ازات ەتكەن*+ حالقىڭدى اينىماس سۇيىسپەنشىلىگىڭمەن جەتەلەيسىڭ،
كيەلى مەكەنىڭە قۇدىرەتىڭمەن الىپ باراسىڭ.
14 حالىقتار ەستىپ+، قالتىراپ دىرىلدەر،
ٴفىلىستىر ەلى تولعاق ازابىن شەگەر.
15 سول ۋاقىتتا ەدوم شەيحتارى* ۇرەيلەنەر،
موابتىڭ وكتەم بيلەۋشىلەرى دە قورقىپ قالشىلدار+.
ال قاناحان جۇرتىنىڭ جىگەرى قۇم بولار+.
16 ولەردەي قورقىپ، ولاردىڭ زارەسى ۇشادى+.
قولىڭنىڭ قۇدىرەتىن كورىپ، تاستاي قاتىپ قالادى،
ۋا، ەحوبا، حالقىڭ سەنىڭ جاندارىنان وتكەنشە،
17 ولاردى اكەپ قوندىراسىڭ يەلىگىڭدەگى تاۋىڭا+،
ۋا، ەحوبا، ورنىقتىراسىڭ دايىنداعان ٶز تۇراعىڭا،
ۋا، ەحوبا، ٶز قولىڭمەن تۇرعىزعان قاسيەتتى ورنىڭا.
18 ەحوبا پاتشا بولىپ بيلىك ەتەدى ماڭگى باقي+.
19 پەرعاۋىننىڭ سوعىس ارباسى مەن اتتى اسكەرى كىرگەن كەزدە تەڭىزگە+،
ەحوبا تەڭىز سۋىن قايتارىپ، قۇلاتتى ونى ۇستەرىنە+،
ال يسرايل حالقى تەڭىزدىڭ ورتاسىمەن، ٶتىپ كەتتى قۇرعاق جەرمەن+».
20 سوندا حاروننىڭ اپكەسى ٴماريام پايعامبار قولىنا داڭعىراسىن الدى. ايەلدەردىڭ ٴبارى وعان ەرىپ، داڭعىرالارىن الىپ، بيلەي جونەلدى. 21 ٴماريام ەرلەردىڭ انىنە بىلاي جاۋاپ بەردى:
«ەحوباعا ارناپ ٵن شىرقاڭدار، داڭقى ونىڭ اسقاقتادى+.
تەڭىزگە ول لاقتىردى اتىمەن قوسا جاۋىنگەردى+».
22 بۇدان سوڭ مۇسا يسرايل حالقىن قىزىل تەڭىزدىڭ ماڭىنان شۋر شولىنە الىپ باردى. ولار شولدە ٷش كۇن بويى ٴجۇرىپ، سۋ تاپپادى. 23 سودان كوش مارا+ دەگەن جەرگە كەلدى. ٴبىراق بۇل جەردىڭ سۋى اشتى بولعاندىقتان، ىشە المادى. سوندىقتان ول بۇل جەردى مارا* دەپ اتاعان ەدى. 24 حالىق مۇساعا: «ەندى نە ىشەمىز؟»— دەپ كۇڭكىلدەي باستادى+. 25 مۇسا ەحوباعا جالبارىنىپ ەدى+، ەحوبا وعان ٴبىر اعاشتى كورسەتتى. مۇسا ونى سۋعا تاستاعاندا، سۋ تۇشى بولدى.
سول جەردە قۇداي ٶز حالقىنىڭ مويىنسۇنۋشىلىعىن سىنادى+. بۇل جايت ولار ٷشىن ساباق ٵرى بولاشاقتا ۇستانۋلارى كەرەك زاڭ ىسپەتتى بولدى. 26 ول: «ەگەر ەحوبا قۇدايىڭنىڭ سوزىنە مۇقيات دەن قويساڭ، ونىڭ كوز الدىندا دۇرىس نارسەنى ىستەسەڭ، سونداي-اق زاڭدارىنا مويىنسۇنىپ، جارلىقتارىن ۇستانساڭ+، وندا مىسىرلىقتارعا جىبەرگەن اۋرۋلاردىڭ ٴبىرىن دە ساعان جولاتپايمىن+. ويتكەنى مەن سەنى ساۋىقتىرۋشى ەحوبامىن+»،— دەدى.
27 كەيىن ولار ەليمگە كەلدى. سول جەردە 12 بۇلاق پەن 70 قۇرما پالماسى بار بولاتىن. ٴسۇيتىپ، ولار سۋدىڭ جانىنا قوستارىن تىكتى.