سامۋيلدىڭ 1-جازباسى
31 فىلىستىرلەر يسرايلگە قارسى اتتاندى+. يسرايلدىكتەر ولاردان قاشا جونەلدى. ولاردىڭ كوبى گەلبويا تاۋىندا قازا بولدى+. 2 فىلىستىرلەر ساۋل مەن ۇلدارىن وكشەلەي قۋىپ، ونىڭ جوناتان+، ٵبيناداپ، مالحيشۋا دەگەن ۇلدارىن+ ٶلتىردى. 3 ال ساۋلدىڭ اينالاسىندا شايقاس كۇشەيە ٴتۇستى. سول كەزدە وعان ساداقشىلاردىڭ جەبەسى ٴتيىپ، قاتتى جارالاندى+. 4 سوندا ساۋل قارۋ-جاراعىن الىپ جۇرەتىن جىگىتكە: «سەمسەرىڭدى قىنابىنان سۋىرىپ، ماعان سۇعىپ ال! ايتپەسە مۇنى مىنا سۇندەتتەلمەگەندەر+ ىستەپ، مەنى قورلاپ جۇرەر»،— دەدى. ٴبىراق جىگىت قاتتى قورقىپ، ولاي ەتكىسى كەلمەدى. سوندا ساۋل سەمسەرىن الىپ، وزىنە قاراتتى دا، ۇستىنە قۇلاي سالدى+. 5 ساۋلدىڭ ولگەنىن+ كورگەندە، ونىڭ قارۋ-جاراعىن الىپ جۇرەتىن جىگىت تە سەمسەرىنىڭ ۇستىنە قۇلاپ ٶلدى. 6 وسىلايشا سول كۇنى ساۋل، ونىڭ ٷش ۇلى، قارۋ-جاراعىن الىپ جۇرەتىن جىگىت جانە بارلىق ادامدارى قازا بولدى+. 7 اڭعاردا جانە يوردان ايماعىندا تۇراتىن يسرايلدىكتەر يسرايل اسكەرىنىڭ قاشقانىن، ال ساۋل مەن ۇلدارىنىڭ قازا بولعانىن كورگەندە، قالالارىن تاستاپ قاشىپ كەتتى+. فىلىستىرلەر بولسا ولاردىڭ قالالارىنا كىرىپ الدى.
8 كەلەسى كۇنى فىلىستىرلەر قازا بولعانداردى توناۋعا كەلگەندە، گەلبويا تاۋىندا ٶلىپ جاتقان ساۋل مەن ونىڭ ٷش ۇلىنىڭ مايىتىنە تاپ بولدى+. 9 ولار ساۋلدىڭ باسىن شاۋىپ الدى، ساۋىت-سايمانىن دا سىپىرىپ الىپ، پۇتتارىنىڭ عيباداتحانالارىندا+ جانە جۇرت اراسىندا حابارلاۋ ٷشىن فىلىستىرلەر جەرىنىڭ شارتارابىنا شابارماندار جىبەردى+. 10 سوسىن ساۋلدىڭ ساۋىت-سايمانى اشتار مۇسىندەرىنىڭ عيباداتحاناسىنا اپارىلدى، ال دەنەسىن فىلىستىرلەر بەت-شان+ قامالىنىڭ قابىرعاسىنا ٸلىپ قويدى. 11 يابەس-عالاقات+ تۇرعىندارى ولاردىڭ ساۋلعا نە ىستەگەنىن ەستىگەندە، 12 قالانىڭ ەر-ازاماتتارى جينالىپ، جولعا شىقتى. ولار ٴتۇنى بويى ٴجۇرىپ وتىرىپ، بەت-شانعا كەلدى دە، ساۋل مەن ونىڭ ۇلدارىنىڭ دەنەلەرىن قابىرعادان ٴتۇسىرىپ الدى. بۇدان كەيىن ولاردى يابەسكە اكەلىپ، ورتەپ جىبەردى. 13 سۇيەكتەرىن+ يابەستەگى ٴبىر جىڭعىل اعاشىنىڭ تۇبىنە كومىپ+، جەتى كۇن ورازا تۇتتى.