سامۋيلدىڭ 1-جازباسى
13 ساۋل...* جاسىندا پاتشا بولىپ+، يسرايلدە بيلىك ەتكەنىنە ەكى جىل تولدى. 2 سوندا ول يسرايلدەن 3000 ادام تاڭداپ الىپ، 2000 ىن وزىمەن بىرگە ميقماستا جانە بەتەلدىڭ تاۋلى وڭىرىندە قالدىردى، ال 1000 ى جوناتانمەن+ بىرگە بەنيامين جەرىندەگى گيبەيادا+ بولدى. قالعاندارىن ۇيلەرىنە قايتارىپ جىبەردى. 3 بىردە جوناتان فىلىستىرلەردىڭ+ گەباداعى+ قاراۋىل توبىنىڭ تاس-تالقانىن شىعاردى. بۇل حابار فىلىستىرلەردىڭ قۇلاعىنا جەتتى. سول كەزدە ساۋل بۇكىل ەلدە كەرنەي تارتقىزىپ+، «ەۆرەيلەر قۇلاق اسسىن!» دەپ جار سالعىزدى. 4 كۇللى حالىق «ساۋل فىلىستىرلەردىڭ قاراۋىل توبىن تاس-تالقانىن شىعارىپتى، ەندى ولار بىزگە وشىگىپ وتىر» دەگەندى ەستىپ، ساۋلدىڭ قاسىنا عىلعالعا+ جينالدى.
5 فىلىستىرلەر دە ولارمەن سوعىسۋ ٷشىن 30000 سوعىس ارباسىن، 6000 سالت اتتى سارباز جانە تەڭىز جاعالاۋىنداعى قۇم قيىرشىقتارىنداي سانسىز اسكەر جينادى+. ولار جورىققا اتتانىپ، بەت-ابەننىڭ+ شىعىسىنداعى ميقماستا قوس تىكتى. 6 يسرايلدىكتەر قىسپاققا الىنىپ، تىعىرىققا تىرەلگەنىن كورگەندە، ۇڭگىرلەرگە، شاتقالدار مەن جارتاس قۋىستارىنا، جەرقويمالار مەن سۋ جينايتىن ورلارعا بارىپ تىعىلدى+. 7 كەيبىرەۋلەرى ٴتىپتى يورداننان ٶتىپ، عاد پەن عالاقات+ جەرىنە قاشتى. ساۋل بولسا عىلعالدا قالدى، ونىڭ قاسىنداعىلاردىڭ ٴبارى قورقىپ قالتىراۋمەن بولدى. 8 ول سامۋيل بەلگىلەگەن ۋاقىتقا دەيىن، جەتى كۇن كۇتتى. ٴبىراق سامۋيل عىلعالعا كەلمەي جاتقان سوڭ، جۇرت جان-جاققا بىتىراي باستادى. 9 سوندا ساۋل: «تۇگەل ورتەلەتىن جانە تاتۋلىق قۇرباندىقتارىن اكەلىڭدەر»،— دەدى دە، تۇگەل ورتەلەتىن قۇرباندىقتى ٶزى شالدى+.
10 قۇرباندىقتى ورتەپ بولعانى سول-اق ەكەن، سامۋيل كەلدى. ساۋل ونى قارسى الىپ، امانداسۋ ٷشىن الدىنان شىقتى. 11 سامۋيل وعان: «بۇل نە قىلعانىڭ؟»— دەدى. ساۋلدىڭ جاۋابى مىناۋ بولدى: «جۇرت جان-جاققا بىتىراي باستادى+، ٴسىز بولساڭىز بەلگىلەنگەن ۋاقىتتا كەلمەي قويدىڭىز. ونىڭ ۇستىنە، فىلىستىرلەر ميقماسقا جينالىپ جاتتى+. 12 سوندا مەن: —ەندى فىلىستىرلەر عىلعالعا ٴتۇسىپ، ماعان شابۋىلدايدى. ال مەن بولسام ەحوبادان ىقىلاسىن ٴتۇسىرۋىن ٵلى سۇراعان جوقپىن،— دەپ ويلادىم. وسىلايشا تۇگەل ورتەلەتىن قۇرباندىقتى شالۋعا ٴتيىستىمىن دەپ ەسەپتەدىم».
13 سوندا سامۋيل وعان بىلاي دەدى: «قۇدايىڭ ەحوبا بەرگەن بۇيرىقتى ورىنداماي، اقىماقتىق جاسادىڭ+! ونى ورىنداعانىڭدا، ەحوبا پاتشالىعىڭدى ماڭگى مىزعىمايتىن بەرىك ەتەر ەدى. 14 ال ەندى ۇزاق پاتشالىق ەتپەيسىڭ+. ەحوبا ٶزىنىڭ كوڭىلىنەن شىعاتىن ادامدى تابادى+. ەحوبا ونى حالقىنا باسشى ەتىپ قويادى+. سەبەبى سەن ەحوبانىڭ بۇيرىعىنا مويىنسۇنبادىڭ+».
15 بۇدان كەيىن سامۋيل عىلعالدان بەنيامين جەرىندەگى گيبەياعا كەتتى. ساۋل قاسىنداعى ساربازدارىن ساناپ شىققاندا، باس-اياعى 600 دەي ادام بولدى+. 16 سودان ساۋل مەن جوناتان قاستارىندا قالعان ادامدارىمەن بەنيامين جەرىندەگى گەبادا+ تۇراقتاپ قالدى. ال فىلىستىرلەر قوستارىن ميقماستا+ تىكتى. 17 ولار ەلگە شاپقىنشىلىق جاسايتىن ٷش توپ قۇردى. توپتاردىڭ بىرەۋى وفراعا اپاراتىن جولعا، شۋال جەرىنە قاراي تۇسسە، 18 ەكىنشىسى بەت-حورونعا+ اپاراتىن، ال ٷشىنشىسى سەبويم اڭعارىنا جاقىن ورنالاسقان شەگاراعا اپاراتىن جولعا، ٴشول دالاعا، بەت الدى.
19 ول كەزدە بۇكىل يسرايل ەلىندە تەمىر ۇستاسى جوق ەدى، سەبەبى فىلىستىرلەر «ەۆرەيلەر سەمسەر، نايزا جاساپ الىپ جۇرەر» دەپ قورقاتىن. 20 سوندىقتان يسرايلدىكتەر سوقا-كەتپەندەرى مەن وراق-بالتالارىن قايراتۋعا فىلىستىرلەرگە باراتىن. 21 ولار سوقا، كەتپەن، ايىر، بالتالارىنىڭ ٴجۇزىن قايراتۋ ٷشىن نەمەسە ۇشى تەمىر اساتاياقتىڭ باسىن جوندەتۋ ٷشىن ٴبىر پيم* تولەيتىن. 22 سوندىقتان شايقاساتىن كۇنى ساۋل مەن جوناتاننىڭ قاسىنداعى ادامداردىڭ ەشقايسىسىندا سەمسەر دە، نايزا دا بولمادى+. ساۋل مەن جوناتاندا عانا قارۋ بار ەدى.
23 فىلىستىرلەردىڭ قاراۋىل توبى ميقماستاعى اسۋعا قاراي بەتتەدى+.