ٵيۇپ
32 وسىلايشا الگى ٷش كىسى ايۇپكە جاۋاپ بەرۋىن قويدى، ويتكەنى ول ٶزىنىڭ ادىلدىگىنە سەنىمدى ەدى+. 2 سوندا رام اۋلەتىنەن شىققان بۋزدىق+ باراحەل ۇلى ەليحۋدى قاتتى اشۋ كەرنەدى. ول قۇدايدان گورى ٶزىن ٵدىل ساناعانى ٷشىن ايۇپكە اشۋلاندى+. 3 جاۋاپ تابا الماي، قۇدايدى زۇلىم ەتىپ كورسەتكەندەرى ٷشىن ٵيۇپتىڭ ٷش دوسىنا دا قاھارى قاينادى+. 4 ولاردىڭ جاستارى ۇلكەن بولعاندىقتان+، ەليحۋ ٷنسىز كۇتىپ وتىرعان ەدى. 5 ٷش دوسىنىڭ ايۇپكە بەرەر جاۋابى تاۋسىلعانىن كورگەن ول قاھارىنا ٴمىندى. 6 سودان بۋزدىق باراحەلدىڭ ۇلى ەليحۋ بىلاي دەپ ٴسوزىن باستادى:
«مەن جاسپىن،
ال سىزدەر كوپ جاسادىڭىزدار+.
سىزدەردى سيلاعاندىقتان تارتىنشاقتاپ+،
بىلگەنىمدى ايتۋعا ٴداتىم بارماپ ەدى.
7 مەن: —ۇلكەندەر سويلەسىن،
كوپ جاساعاندار دانالىعىن كورسەتسىن،— دەپ ويلادىم.
8 الايدا ادامعا تۇسىنىك دارىتاتىن — بويىنداعى رۋح،
قۇدىرەتى شەكسىز قۇدايدىڭ دەمى+.
9 ادامدى دانا ەتەتىن كوپ جاساعاندىعى عانا ەمەس،
نەنىڭ دۇرىس ەكەنىن بىلەتىن دە تەك قاريالار ەمەس+.
10 سوندىقتان مەن: —ماعان قۇلاق تۇرىڭىزدەرشى،
بىلەتىنىمدى مەن دە ايتايىن،— دەيمىن.
11 مىنە، مەن ايتاتىن سوزدەرىڭىزدى كۇتتىم،
وي-تولعاۋلارىڭىزدى دەن قويىپ تىڭداپ+،
ايتۋعا ٴسوز تاپقاندارىڭىزشا توستىم+.
12 سىزدەردى مۇقيات تىڭدادىم،
ٴبىراق ەشقايسىسىڭىز ٵيۇپتىڭ ىسىنەن وعاشتىق تابا المادىڭىزدار،
ايتقان ۋاجىنە دە ماردىمدى جاۋاپ قايتارا المادىڭىزدار.
13 ەندەشە: —ٴبىز دانالىقتى تاپتىق.
ونى ادام ەمەس، قۇدايدىڭ ٶزى جەڭىپ شىعادى،— دەمەڭىزدەر.
14 ٵيۇپ سوزدەرىن ماعان باعىتتاعان جوق،
سوندىقتان مەن وعان سىزدەردىڭ سوزدەرىڭىزبەن جاۋاپ بەرمەيمىن.
15 ٴبارىڭىز دە اڭتارىلىپ، اۋىزدارىڭىزعا ٴسوز تۇسپەي،
ايتارعا جاۋاپ تاپپاي وتىرسىزدار.
16 مەن كۇتىپ وتىردىم، ٴبىراق سىزدەر سوزدەن توسىلىپ،
ەش جاۋاپ بەرمەي، ٴبارىڭىز دە ٷنسىز قالدىڭىزدار.
17 سوندىقتان مەن دە جاۋاپ بەرەمىن،
مەن دە بىلەتىنىمدى ايتامىن.
18 سەبەبى ٴسوزىم ىشىمە سيماي،
بويىمداعى رۋح سويلەۋگە ماجبۇرلەپ وتىر.
19 مەن شاراپ قۇيىلىپ، اۋزى بەكىتىلگەن تورسىققا،
جارىلۋعا شاق تۇرعان جاڭا مەسكە ۇقسايمىن+.
20 ەندى ىشىمدەگىنى ايتىپ، ٴبىر جەڭىلدەپ قالايىن!
ٴتىلىمنىڭ تيەگىن اعىتىپ، جاۋاپ بەرەيىن.
21 مەن ەشكىمدى الالامايمىن+،
ەشكىمگە جاعىمپازدانبايمىن دا.
22 ويتكەنى جاعىمپازدانۋدى بىلمەيمىن،
ايتپەسە جاراتۋشىم مەنى بىردەن جوق قىلار ەدى.