يشايا
18 ەفيوپيا وزەندەرىنىڭ بويىنداعى
ىزىڭدايتىن قاناتتى جاندىكتەر ەلى قاسىرەتكە قالادى+!
2 ول تەڭىز ارقىلى پاپيرۋس قايىقتارمەن وكىلدەرىن جىبەرىپ:
«ەي، جۇيرىك حابارشىلار!
وزدەرى بويشاڭ، تەرىلەرى جىلتىراپ تۇراتىن،
بارلىق جەردە ۇرەي تۋدىراتىن+،
مىقتى دا زورلىقشىل حالىققا،
ەلدەرىن وزەندەر شايىپ كەتكەن حالىققا بارىڭدار»،— دەيدى.
3 ەي، جەرجۇزىنىڭ تۇرعىندارى،
سەندەر كورگەن نارسە تاۋ باسىنا قويىلعان بەلگىدەي،
سەندەر ەستىگەن داۋىس تارتىلعان كەرنەي ۇنىندەي بولادى.
4 ويتكەنى ەحوبا ماعان مىنانى ايتتى:
«مەن ەش ابىرجىماي، ٶز ورنىما* قارايمىن؛
مەنىڭ قاراعانىم اپتاپ ىستىقتاعى كۇن نۇرىنداي،
ناۋقان كەزىندەگى ىستىقتا تۇسەتىن مول شىقتاي بولادى.
5 ناۋقان باستالماي تۇرىپ،
ٴجۇزىم گۇلىن تاستاپ، ٴتۇيىنى تولىسىپ پىسكەندە،
وسكىندەرى پىشاقپەن كەسىلەدى،
مۇرتشالارى قىرقىلىپ تاستالادى.
6 ولار تاۋ قۇزعىندارىنا،
دالا اڭدارىنا قالدىرىلادى.
جاز بويى ولار قۇزعىندارعا،
ناۋقان كەزىندە كۇللى دالا اڭدارىنا جەم بولادى.
7 سول ۋاقىتتا اسكەرباسى ەحوباعا سي اكەلىنەدى،
وزدەرى بويشاڭ، تەرىلەرى جىلتىراپ تۇراتىن،
بارلىق جەردە ۇرەي تۋدىراتىن،
مىقتى دا زورلىقشىل حالىقتان،
ەلدەرىن وزەندەر شايىپ كەتكەن حالىقتان،
اسكەرباسى ەحوبانىڭ ەسىمىمەن اتالاتىن جەرگە، سيون تاۋىنا+، سي اكەلىنەدى».