24-تاراۋ
ەشبىر نارسە ٴبىزدى ‹قۇدايدىڭ سۇيىسپەنشىلىگىنەن ايىرا المايدى!›
1. كەيبىر شىنايى ماسىحشىلەردى قوسا العاندا، كوپ ادامنىڭ كوڭىلىنە قانداي جاعىمسىز سەزىم ۇيالايدى؟
ەحوبا قۇداي جەكە سەنى سۇيە مە؟ كەيبىرەۋلەر جوحان 3:16 دا ايتىلعانداي، قۇدايدىڭ جالپى ادامزاتتى سۇيەتىنىمەن كەلىسەدى. ٴبىراق ولار: «قۇدايدىڭ جەكە مەنى ٴسۇيۋى مۇمكىن ەمەس»،— دەپ ويلاۋى مۇمكىن. ٴتىپتى شىنايى ماسىحشىلەردە دە اراگىدىك وسىنداي كۇمان تۋىپ تۇرۋى مۇمكىن. ٴبىر كىسى اشىنىپ: «مەنىڭ جاعدايىم قۇدايدى قىزىقتىرادى دەگەنگە سەنۋ وتە قيىن»،— دەدى. سەنىڭ كوڭىلىڭە دە وسىنداي كۇمان ۇيالايتىن كەزدەر بولا ما؟
2، 3. كىم ٴبىزدى ەحوبانىڭ كوزىندە تۇككە تۇرعىسىز نەمەسە سۇيۋگە تۇرمايمىز دەگەنگە سەندىرگىسى كەلەدى جانە قالاي بۇل پىكىردى جوققا شىعارا الامىز؟
2 شايتان ٴبىزدى ەحوبا ٶز قىزمەتشىلەرىن سۇيمەيدى دە، باعالامايدى دا دەگەنگە سەندىرگىسى كەلەدى. ول ادامداردى ٴجيى مانساپقورلىق پەن مەنمەندىك رۋحىن وياتۋ ارقىلى ازعىراتىنى راس (قورىنتتىقتارعا 2-حات 11:3). ٴبىراق شايتان اسەرشىل ادامداردى ٶز-ٶزىن سيلاۋ سەزىمىنەن ايىرۋدان دا راقات تابادى (جوحان 7:47—49؛ 8:13، 44). ول اسىرەسە قازىرگى قيىن-قىستاۋ كۇندەردە سولاي ەتۋدە. بۇگىندە كوپ ادام تابيعي باۋىرمالدىق جوق وتباسىندا تاربيەلەنەدى. وزگەلەرى قاتىگەز، ٶزىمشىل، قىڭىر ادامدارمەن ۇنەمى ارالاسۋعا ٴماجبۇر (تىموتەگە 2-حات 3:1—5). ادامنىڭ كوپ جىل بويى قيانات كورگەنى، ۇلتشىلدىق رۋحىن نە جەككورۋشىلىك سەزىنگەنى ٶزىن تۇككە تۇرعىسىز نەمەسە سۇيۋگە تۇرمايتىن دەپ ەسەپتەۋىنە ىقپال ەتۋى مۇمكىن.
3 ەگەر سەنىڭ دە بويىڭدى وسىنداي جاعىمسىز سەزىمدەر بيلەسە، جاسىما. ٴبارىمىز دە اراگىدىك ٶزىمىزدى سەبەپسىز كىنالاپ جاتامىز. ٴبىراق قۇداي ٴسوزىنىڭ «تۇزەتۋ» جانە ‹بەكىنىستەردى تالقانداۋ› ٷشىن جازىلعانىن ۇمىتپا (تىموتەگە 2-حات 3:16؛ قورىنتتىقتارعا 2-حات 10:4). كيەلى كىتاپتا: «قۇداي الدىندا جۇرەگىمىز ورنىعادى. سەبەبى ەگەر جۇرەگىمىز ٴبىزدى ايىپتاسا دا، قۇداي جۇرەگىمىزدەن جوعارى عوي، ول ٴبارىن دە بىلەدى»،— دەلىنگەن (جوحاننىڭ 1-حاتى 3:19، 20). جازبالار ەحوبانىڭ ٴبىزدى سۇيەتىنىن كورسەتىپ، ‹جۇرەگىمىزدى ورنىقتىرادى›. ەندى سونىڭ ٴتورت جولىن قاراستىرىپ كورەيىك.
ەحوبا سەنى باعالايدى
4، 5. يسانىڭ تورعايلار تۋرالى كەلتىرگەن مىسالىنان ٴبىزدىڭ ەحوبانىڭ كوزىندە باعالى ەكەنىمىز قالاي كورىنەدى؟
4 بىرىنشىدەن، ٵربىر قىزمەتشىسىنىڭ بويىنان قۇدايدىڭ جاقسى نارسە ىزدەيتىنى كيەلى كىتاپتا تىكەلەي ايتىلادى. مىسالى، يسا بىلاي دەگەن: «ەكى تورعايدى ٴبىر اسساريونعا ساتپاي ما؟ دەگەنمەن كوكتەگى اكەلەرىڭنىڭ ەركىنسىز بىردە-ٴبىر تورعاي جەرگە قۇلاپ تۇسپەيدى. ٴتىپتى باستارىڭداعى شاشتارىڭنىڭ سانى دا وعان بەلگىلى! سوندىقتان ادامداردان قورىقپاڭدار، سەندەر كوپتەگەن تورعايلاردان الدەقايدا قىمباتسىڭدار!» (ماتاي 10:29—31، سىلتەمەنى قارا) يسانىڭ ٴبىرىنشى عاسىرداعى تىڭداۋشىلارى ٷشىن بۇل سوزدەردىڭ نەنى بىلدىرگەنىن قاراستىرىپ كورەيىك.
ەحوبا قيىنشىلىق كەزىندە تانىتقان تاباندىلىعىمىزدى باعالايدى
5 سەن: «تورعايدى ساتىپ الۋدىڭ قاجەتى نە؟»— دەپ تاڭىرقاۋىڭ مۇمكىن. يسانىڭ زامانىندا تورعاي ەڭ ارزان تاعام رەتىندە ساتىلاتىن. بايقاشى، ادام نە بارى ٴبىر اسساريونعا، نە تيىنعا، ەكى تورعاي ساتىپ الا الاتىن. ٴبىراق يسانىڭ كەيىنىرەك ايتقان سوزدەرىنە ساي، ەگەر ساتىپ الۋشى ەكى تيىنعا شىعىندالا الاتىن بولسا، وعان ٴتورت ەمەس، بەس تورعاي بەرىلەر ەدى. بەسىنشى قۇستى ەش قۇنى جوق سياقتى اقىسىز بەرە سالاتىن. بالكىم، تورعاي ىسپەتتى ۇساق قۇستىڭ ادامدار ٷشىن ەش قۇندىلىعى جوق شىعار، ال جاراتۋشى ٷشىن شە؟ يسا بىلاي دەدى: «ولاردىڭ بىرەۋىن دە [ٴتىپتى تەگىن بەرىلگەنىن دە] قۇداي ۇمىتپايدى» (لۇقا 12:6، 7). ەندى يسانىڭ نە ايتقىسى كەلگەنى ٴبىز ٷشىن ايقىندالا ٴتۇستى. ەگەر ەحوبا تورعاي ەكەش تورعايدى سولاي باعالايتىن بولسا، ادامدى ودان بەتەر باعالاماي ما!؟ يسا تۇسىندىرگەندەي، ەحوبا ٴبىز تۋرالى ٴبارىن-ٴبارىن بىلەدى. ٴتىپتى ٴبىزدىڭ ٵربىر شاشىمىز ساناۋلى!
6. شاشىمىزدىڭ سانى جايلى ايتقاندا، يسانىڭ اسىرا سىلتەمەگەنىنە نەگە سەنىمدى بولا الامىز؟
6 شاشىمىز ساناۋلى؟ ٴسىرا، الدەبىرەۋ يسا مۇندا اسىرا سىلتەگەن دەپ ويلار. الايدا قايتا ٴتىرىلۋ ٷمىتى تۋرالى ويلاپ كورشى. ادامدى قايتا جاراتۋ ٷشىن ەحوبا ونى قانشالىقتى جاقسى ٴبىلۋ كەرەك دەسەڭشى! ونىڭ ٴبىزدى جوعارى باعالايتىنى سونشالىق — گەنەتيكالىق كودىمىز بەن جىلدار بويى ەسىمىزدە قالعان جايتتار مەن سەزىمدەرىمىزدى قوسا، بويىمىزداعى ەرەكشەلىكتەردىڭ ٴبارىن بۇگە-شىگەسىنە دەيىن ەسىندە ساقتايدىa. مۇنىمەن سالىستىرعاندا باسىمىزداعى شاشتى (ال ادامنىڭ باسىندا ورتا ەسەپپەن 100000 شاش بولادى) ساناۋ وپ-وڭاي عوي.
ەحوبا بويىمىزداعى نە نارسەنى باعالايدى؟
7، 8. ا) ادامنىڭ جۇرەگىنەن قانداي قاسيەتتەردى كورگەندە، ەحوبا قاتتى قۋانادى؟ ٵ) قانداي ىستەرىمىزدى ەحوبا باعالايدى؟
7 ەكىنشىدەن، كيەلى كىتاپتا ەحوبانىڭ ٶز قىزمەتشىلەرىنىڭ بويىنداعى نە نارسەنى باعالايتىنى ايتىلعان. توقەتەرىن ايتقاندا، وعان جاقسى قاسيەتتەرىمىز بەن كۇش سالىپ جاتقانىمىز قاتتى ۇنايدى. ٴداۋىت پاتشا ٶز ۇلى سۇلەيمەنگە: «جاراتۋشى بارلىق پەيىلدى سىنايدى، ويىڭدا نە بولسا، سونىڭ ٴبارىن بىلەدى»،— دەگەن (شەجىرەلەر 1-جازبا 28:9). ميللياردتاعان ادامنىڭ جۇرەگىن سىنايتىن قۇداي زۇلىمدىق پەن جەككورۋشىلىككە تولى وسى دۇنيەدە الدەبىرەۋدىڭ جۇرەگىندە تىنىشتىق، شىندىق پەن ادىلدىك بارىن بايقاعاندا، قالايشا قۋاناتىن بولۋ كەرەك دەسەڭشى! ال جۇرەگى وزىنە دەگەن سۇيىسپەنشىلىككە تولى، ٶزى تۋرالى ٴبىلىم الۋعا تالپىنىپ، بىلگەنىن وزگەلەرگە ايتاتىن ادامدى تاپسا شە؟ ەحوبا باسقالارمەن ٶزى تۋرالى سويلەسەتىندەردى بايقايتىنىن ايتقان. ٴتىپتى ونىڭ «ەحوبادان قورقاتىن جانە ونىڭ ەسىمى جايلى ويلاناتىندار ٷشىن ەستەلىك كىتابى» دا بار (مالاحي 3:16، جد). ول ٷشىن وسىنداي قاسيەتتەر قىمبات.
8 ەحوبا ٷشىن قانداي يگى ىستەر باعالى؟ ارينە، يسا ماسىحكە ەلىكتەۋگە كۇش سالعانىمىزدى باعالايدى (پەتىردىڭ 1-حاتى 2:21). ول باعالايتىن تاعى ٴبىر ماڭىزدى ٸس — قۇداي پاتشالىعى تۋرالى ىزگى حاباردىڭ ۋاعىزدالۋى. ريمدىكتەرگە 10:15 تەن ٴبىز مىنانى وقيمىز: «ىزگى حابار جەتكىزۋشىلەردىڭ كەلگەنى [«اياعى»، تاۋرات] قانداي تاماشا!» ادەتتە، ٴبىز اياعىمىز تۋرالى «تاماشا»، نەمەسە ادەمى، ەكەن دەپ ويلامايمىز. مۇندا اڭگىمە ەحوبانىڭ قىزمەتشىلەرىنىڭ ىزگى حاباردى ۋاعىزداۋ ٷشىن كۇش سالاتىندارى جونىندە بولىپ وتىر. سول ٷشىن سالىنعان كۇشتىڭ ٴبارى قۇدايدىڭ كوز الدىندا ادەمى ٵرى باعالى (ماتاي 24:14؛ 28:19، 20).
9، 10. ا) قيىنشىلىق كەزىندە تانىتقان تاباندىلىعىمىزدى ەحوبانىڭ باعالايتىنىنا نەگە سەنىمدى بولا الامىز؟ ٵ) ەحوبا ادال قىزمەتشىلەرى تۋراسىندا ەشقاشان قانداي جاعىمسىز كوزقاراستا بولمايدى؟
9 سونىمەن قاتار ەحوبا تاباندىلىعىمىزدى باعالايدى (ماتاي 24:13). ەسىڭدە بولسىن، شايتان ٴبىزدىڭ ەحوبادان باس تارتقانىمىزدى قالايدى. سەن ادالدىعىڭدى ساقتاپ قالعان سايىن، شايتاننىڭ اشتى مىسقىلىنا ەحوبانىڭ جاۋاپ بەرۋىنە مۇمكىندىك بەرەسىڭ (ناقىل سوزدەر 27:11). تاباندى بولۋ ارقاشان وڭايعا سوعا بەرمەيدى. اۋىر ناۋقاس، جوقشىلىق، كوڭىلگە تۇسكەن قاياۋ تاعى دا باسقا قيىنشىلىقتار ٵربىر كۇندى ازاپقا اينالدىرىپ جىبەرۋى مۇمكىن. ارمان-تىلەگىمىزدىڭ ۇزاق ۋاقىت ورىندالماي قويۋى دا ۇنجىرعامىزدى تۇسىرەدى (ناقىل سوزدەر 13:12). وسىنداي قيىنشىلىقتارعا قاراماستان، تاباندى بولعانىمىز ەحوبا ٷشىن وتە باعالى. مىنە، سوندىقتان دا ٴداۋىت پاتشا كوز جاسىن ەحوبادان ٶزىنىڭ ‹ىدىسىندا› ساقتاۋدى وتىنگەن، سوسىن، سەنىمدىلىكپەن: «ولار سەنىڭ كىتابىڭدا ەمەس پە ەدى؟»— دەپ قوسقان (ٴزابۋر 56:8 [55:9]). ٴيا، ەحوبا وزىنە دەگەن ادالدىعىمىزدى ساقتاۋ ٷشىن توككەن جاسىمىز بەن شەككەن قاسىرەتىمىزدىڭ ٴبارىن باعالايدى، ٵرى ەسىندە ساقتايدى. ونىڭ كوز الدىندا بۇلار دا اسا قۇندى.
«سەندەر كوپتەگەن تورعايلاردان الدەقايدا قىمباتسىڭدار!»
10 دەسە دە ٴمىنشىل جۇرەگىمىز قۇدايدىڭ كوزىندە باعالى ەكەنىمىزدى مويىنداعىسى كەلمەۋى مۇمكىن. ول: «مەنەن الدەقايدا ارتىق ادامدار بار عوي. ەحوبا مەنى وزگەلەرمەن سالىستىرعاندا، مۇلدەم كوڭىلى تولمايتىن بولار»،— دەپ تىنىمسىز سىبىرلاپ تۇراتىن شىعار. الايدا ەحوبا ٴبىزدى ەشكىممەن سالىستىرمايدى، ٵرى ٴبىز تۋراسىندا ويلاعاندا، قاتال ەمەس (عالاتتىقتارعا 6:4). ول جۇرەگىمىزدى ەرەكشە قىراعىلىقپەن زەرتتەپ، ونداعى جاقسىلىقتى، مەيلى ول تيتتەي بولسا دا، باعالايدى.
ەحوبا جاماننان جاقسىنى ىرىكتەپ الادى
11. ابياعا قاتىستى ارەكەتىنەن ەحوبا تۋرالى نە بىلەمىز؟
11 ۇشىنشىدەن، ەحوبا بويىمىزداعى جاقسىلىقتى مۇقيات ىرىكتەپ الادى. مىسالى، جولدان تايعان ەروبوعام پاتشانىڭ اۋلەتىن تۇگەل قۇرتىپ جىبەرۋ ٷشىن ۇكىم شىعارعاندا، ەحوبا سول پاتشانىڭ ابيا دەگەن ۇلىنىڭ لايىقتى تۇردە جەرلەنۋى كەرەكتىگىن ايتتى. نەلىكتەن؟ «ونىڭ بويىنان جاراتۋشى يە، يسرايل قۇدايى الدىندا جاساعان الدە ٴبىر يگىلىكتى ٸس تابىلعان ەدى» (پاتشالىقتار 3-جازبا 14:1، 10—13). ەحوبا، بىلايشا ايتقاندا، سول بالاڭ جىگىتتىڭ جۇرەگىن ەلەكتەن وتكىزىپ، «الدە ٴبىر يگىلىكتى» نارسەنى تاپتى. سول ٴبىر يگىلىك قانشالىقتى كىشكەنتاي نە ماردىمسىز بولماسىن، ەحوبا ونى ٶز سوزىندە جازىپ قالدىرۋعا تۇرارلىقتاي باعالى دەپ قاراستىرعان. ول ٴتىپتى جولدان تايعان پاتشا اۋلەتىنىڭ سول مۇشەسىنە بەلگىلى ٴبىر شامادا مەيىرىمدىلىك كورسەتىپ، قارىمتاسىن قايتاردى.
12، 13. ا) كۇنا جاساپ قويساق تا، ەحوبا بويىمىزدان جاقسىلىق ىزدەيتىنى جوسافاتتىڭ جاعدايىنان قالاي كورىنەدى؟ ٵ) قالايشا ەحوبا يگى ىستەرىمىز بەن قاسيەتتەرىمىزگە قاتىستى ٴسۇيۋشى اكە ىسپەتتى ارەكەت ەتەدى؟
12 كيەلى كىتاپتا جاقسى پاتشا جوسافاتقا قاتىستى بۇدان دا اسەرلى وقيعا جازىلعان. بىردە پاتشا اقىلسىز ارەكەت جاساپ قويعاندا، ەحوبانىڭ پايعامبارى: «بۇل ٷشىن ساعان جاراتقان يە جۇزىنەن قاھار [توگىلەدى]»،— دەيدى. نەتكەن جان تۇرشىكتىرەتىن سوزدەر! ٴبىراق مۇنىمەن ەحوبانىڭ حابارشىسىنىڭ سوزدەرى اياقتالعان جوق. ول: «دەگەنمەن، سەنىڭ بويىڭنان جاقسىلىق تا تابىلدى»،— دەپ ٴسوزىن جالعادى (شەجىرەلەر 2-جازبا 19:1—3). ەحوبانىڭ ٵدىل اشۋى جوسافاتتىڭ بويىنداعى جاقسىلىقتى كورمەيتىندەي كوزىن تۇمانداتىپ تاستاعان جوق. كەمەلسىز ادامداردىڭ ارەكەتى بۇدان قالايشا ەرەكشەلەنەدى دەسەڭشى! ەگەر بىرەۋدەن كوڭىلىمىز قالسا، ٴبىز ونىڭ بۇكىل جاقسىلىعىنا كوز جۇما سالۋعا بەيىمبىز. ال كۇنا جاساپ قويساق، سالىمىز سۋعا كەتىپ، ار-ۇجدانىمىز مازالاپ، ٶزىمىزدى كىنالى سەزىنگەنىمىز سونشا، بويىمىزداعى جاقسىلىقتى كورۋدەن قالامىز. الايدا مىنانى ەشقاشان ۇمىتپالىق: ەگەر ٴبىز كۇنامىزگە وكىنىپ، ونى قايتالاماۋ ٷشىن بارىنشا كۇش سالار بولساق، ەحوبا كەشىرەدى.
13 التىن ىزدەۋشىنىڭ ەش قۇنى جوق قۇمنان التىندى شايىپ الاتىنىنداي، ەحوبا دا جۇرەگىڭدى ەلەكتەن وتكىزىپ، مۇنداي كۇنالاردى لاقتىرىپ تاستايدى. ال جاقسى قاسيەتتەرىڭ مەن ىستەرىڭدى شە؟ ارينە، مۇنداي «ساف التىندى» الىپ قالادى! ٴسۇيۋشى اتا-انالار بالالارىنىڭ كىشكەنتاي كۇنىندە سالعان سۋرەتتەرىن نەمەسە مەكتەپتە جاساعان قانداي دا ٴبىر جۇمىسىن، ونداعان جىلدار بويى، ٴتىپتى كەيدە بالالارىنىڭ ٶزى ول تۋرالى ۇمىتىپ كەتىپ جاتسا دا، اسپەتتەپ ساقتاپ جۇرەتىنىن بايقاعانسىڭ با؟ ەحوباداي ٴسۇيۋشى اكە جوق! ٴبىز ادالدىعىمىزدى ساقتاعان كەزدىڭ بارىندە ەحوبا يگى ىستەرىمىز بەن قاسيەتتەرىمىزدى ەشقاشان ۇمىتپايدى. ٴتىپتى مۇنى ۇمىتىپ كەتۋدى ادىلەتسىزدىك دەپ قاراستىرادى، ال ول ەشقاشان ادىلەتسىز ارەكەت ەتپەيدى (ەۆرەيلەرگە 6:10). ەحوبا جۇرەگىمىزدى باسقاشا دا ەلەكتەن وتكىزەدى.
14، 15. ا) نەگە ٴبىزدىڭ كەمەلسىزدىگىمىز ەحوبانىڭ بويىمىزداعى جاقسىلىقتى كورۋىنە ەش كەدەرگى بولمايدى؟ مىسال كەلتىر. ٵ) بويىمىزداعى جاقسى قاسيەتتەردى ەحوبا نە ىستەيدى جانە ول ٶزىنىڭ ادال قىزمەتشىلەرىنە قالاي قارايدى؟
14 ەحوبا كەمەلسىزدىگىمىزدەن ارىرەك قاراپ، بىزدەن نە كۇتۋگە بولاتىنىن كورەدى. مىسالى، بەينەلەۋ ونەرىن جاقسى كورەتىن ادامدار قاتتى بۇلىنگەن سۋرەتتەردى نە وزگە دە زاتتاردى قالپىنا كەلتىرۋ ٷشىن كوپ كۇش سالادى. بىردە لوندوننىڭ (انگليا) ۇلتتىق گالەرەياسىنداعى لەوناردو دا ٴۆينچيدىڭ قۇنى شامامەن 30 ميلليون دوللار بولاتىن سۋرەتىنە ٴبىر قاسكوي وق اتىپ جىبەرگەندە، ەشكىمنىڭ باسىنا «ەندى ٴبۇلىنىپ قالدى عوي، لاقتىرىپ جىبەرە سالايىق» دەگەن وي كەلگەن جوق. كىدىرمەستەن 500 گە جۋىق جىل بۇرىن جاسالعان سول شەدەۆردى قالپىنا كەلتىرۋ جۇمىسى باستالىپ كەتتى. نەگە؟ ويتكەنى سول ونەردى سۇيەتىن ادامداردىڭ كوزىندە ول — قۇندى زات. ال سەن بور جانە كۇيەمەن سالىنعان سۋرەتتەن الدەقايدا ارتىق ەمەسسىڭ بە؟ مۇرا ەتكەن كەمەلسىزدىك قانشالىقتى نۇقسان كەلتىرمەسىن، سەن ەحوبانىڭ كوزىندە، ٴسوزسىز، باعالىسىڭ (ٴزابۋر 72:12—14 [71:12—14]). ەحوبا قۇداي، ادامزات وتباسىنىڭ شەبەر جاراتۋشىسى، ٶزىنىڭ سۇيىسپەنشىلىگىنە لەبىزىن بىلدىرەتىندەردىڭ بارلىعىن قايتادان كەمەلدىلىككە جەتكىزۋگە قاجەتتىنىڭ ٴبارىن ىستەيدى (ەلشىلەردىڭ ىستەرى 3:21؛ ريمدىكتەرگە 8:20—22).
15 ٴيا، ەحوبا ٴبىزدىڭ بويىمىزدان ٴتىپتى ٶزىمىز كورە بەرمەيتىن جاقسىلىقتى كورەدى. ەگەر وعان قىزمەت ەتە بەرەر بولساق، كەمەلدىلىككە جەتكەنىمىزشە بويىمىزداعى جاقسىلىقتى وسىرە بەرەدى. شايتاننىڭ دۇنيەسى بىزگە قانداي باعا بەرمەسىن، ەحوبا ٶزىنىڭ ادال قىزمەتشىلەرىن قۇندى دەپ ەسەپتەيدى (ناعاي 2:7).
ەحوبانىڭ سۇيىسپەنشىلىگى — بەلسەندى قاسيەت
16. ەحوبانىڭ بىزگە دەگەن سۇيىسپەنشىلىگىنىڭ ەڭ زور دالەلى قانداي جانە بۇل سيدىڭ جەكە ٴارقايسىمىزعا بەرىلگەنىن قايدان بىلەمىز؟
16 تورتىنشىدەن، بىزگە دەگەن سۇيىسپەنشىلىگىن دالەلدەۋ ٷشىن، ەحوبا كوپ نارسە ىستەۋدە. ٴماسىحتىڭ تولەم قۇرباندىعى شايتاننىڭ ٴبىزدى تۇككە تۇرعىسىز نەمەسە سۇيۋگە تۇرمايدى دەگەن جالعان سوزىنە بەرىلگەن ەڭ پارمەندى دالەل ەكەندىگىندە ٴسوز جوق. كەلەسى جايتتى ەشقاشان ۇمىتپاعانىمىز ٴجون: يسانىڭ ازاپ شەگۋ باعاناسىندا قاتتى قينالىپ ولگەنى جانە سۇيىكتى ۇلىنىڭ ولگەنىن كورگەندە، ەحوبانىڭ ودان بەتەر قينالعانى — ولاردىڭ بىزگە دەگەن سۇيىسپەنشىلىگىنىڭ زور دالەلى. وكىنىشكە وراي، كوپ ادامعا وسى سيدىڭ جەكە وزدەرى ٷشىن بەرىلگەنىنە سەنۋ قيىن. ولار وزدەرىن لايىقسىز سەزىنەدى. الايدا ەلشى پاۋىلدىڭ باستاپقىدا ٴماسىحتىڭ ٸزباسارلارىن قۋدالاعانىن ەسىڭە ٴتۇسىرشى. سوندا دا ول: «[قۇدايدىڭ ۇلى] مەنى سۇيگەندىكتەن ٶزىن مەن ٷشىن قۇربان ەتتى!»— دەگەن (عالاتتىقتارعا 1:13؛ 2:20).
17. قالاي ەحوبا ٴبىزدى وزىنە جانە ۇلىنا جاقىنداتىپ تارتتى؟
17 ەحوبا ٴماسىحتىڭ قۇرباندىعىنىڭ يگىلىگىن ٴارقايسىمىزدىڭ كورە الۋىمىزعا مۇمكىندىك بەرۋىمەن دە بىزگە دەگەن سۇيىسپەنشىلىگىن دالەلدەدى. يسا: «مەنى جىبەرگەن اكەم وزىمە جاقىنداتىپ تارتسا عانا، ادامدار ماعان كەلە الادى»،— دەگەن (جوحان 6:44). ٴيا، ەحوبانىڭ ٶزى ٴارقايسىمىزدى ۇلىنا جاقىنداتىپ تارتىپ، ماڭگىلىك ومىرگە دەگەن ٷمىت بەردى. قالايشا؟ ەحوبا ىزگى حاباردىڭ جەكە بىزگە ۋاعىزدالۋى جانە مۇمكىنشىلىكتەرىمىزدىڭ شەكتەۋلى ەكەنىنە، سونداي-اق كەمەلسىزدىگىمىزگە قاراماستان، رۋحاني شىندىقتى ٴتۇسىنىپ، قولدانا الۋىمىز ٷشىن كيەلى رۋحىمەن كومەكتەسۋى ارقىلى ٴبىزدى وزىنە جاقىنداتىپ تارتتى. سوندىقتان ەحوبا يسرايلگە ايتقان سوزدەرىن بىزگە دە ايتادى: «مەن سەنى ماڭگى وشپەس سۇيىسپەنشىلىگىممەن جاقسى كورىپ كەتتىم جانە سوندىقتان دا ساعان راقىمىمدى جاۋدىردىم» (ەرەميا 31:3).
18، 19. ا) ەحوبانىڭ وزىمىزگە دەگەن سۇيىسپەنشىلىگىن اسىرەسە قاي كەزدە سەزىنەمىز جانە دۇعالارىمىزدى ەحوبانىڭ ٶزى تىڭدايتىنى نەدەن كورىنەدى؟ ٵ) ەحوبانىڭ ٴبىزدى جاناشىرلىقپەن تىڭدايتىنى ونىڭ سوزىنەن قالاي كورىنەدى؟
18 سويتسە دە وزىمىزگە بەرىلگەن دۇعا ەتۋ مارتەبەسىن قولدانىپ، ەحوباعا كوڭىلىمىزدەگىنى اقتارعاندا، ونىڭ سۇيىسپەنشىلىگىن ەرەكشە سەزىنسەك كەرەك. كيەلى كىتاپ ٴارقايسىمىزدى ‹ۇزدىكسىز قۇدايعا سيىنۋعا› شاقىرادى (سالونيقالىقتارعا 1-حات 5:17). ول دۇعالارىمىزدى تىڭدايدى. ەحوبا ٴتىپتى «دۇعانى تىڭداۋشى» دەپ اتالادى (ٴزابۋر 65:2، جد؛ [64:3]). ول مۇنداي بيلىكتى ەشكىمگە، ٴتىپتى ٶزىنىڭ ۇلىنا دا، بەرمەگەن. ويلاپ كورشى، بۇكىل الەمدى جاراتقان قۇداي ٴبىزدى ەش تارتىنباستان وزىنە دۇعا ارقىلى جاقىنداۋعا شاقىرادى. ال ول قانداي تىڭداۋشى؟ سۋىق، سەلقوس، مەيىرىمسىز بە؟ البەتتە، جوق!
19 ەحوبا جاناشىر. جاناشىرلىق دەگەن نە؟ ەگدە تارتقان ٴبىر ادال ٴماسىحشى بىلاي دەدى: «جاناشىرلىق دەگەن — سەنىڭ قاسىرەتىڭدى مەنىڭ جۇرەگىمنىڭ سەزۋى». ەحوبا سەنىڭ قاسىرەتىڭدى شىنىمەن سەزىنە مە؟ يسرايل حالقىنىڭ باسىنا تۇسكەن قاسىرەت جونىندە كەلەسى سوزدەردى وقيمىز: «ولار ازاپ شەككەن كەزدىڭ بارىندە جاراتقان يە بىرگە ازاپ شەكتى» (يشايا 63:9). ەحوبا ولاردىڭ ازاپ شەگىپ جاتقانىن كورىپ قانا قويعان جوق، حالقىنا جانى اشىدى. ونىڭ سەزىمىنىڭ قانشالىقتى تەرەڭ بولعانى قىزمەتشىلەرىنە ايتقان سوزدەرىنەن كورىنەدى: «كىم سەندەرگە تيسە، مەنىڭ كوزىمنىڭ قاراشىعىنا تيگەنى»b (زاكاريا 2:8، جد). كوزدىڭ قاراشىعىنا تييۋ — جانعا باتاتىن نارسە عوي! ٴيا، ەحوبانىڭ بىزگە قاتتى جانى اشيدى. ٴبىزدىڭ جانىمىز اۋىرسا، ونىڭ دا جانى اۋىرادى.
20. ريمدىكتەرگە 12:3 تەگى كەڭەسكە قۇلاق اسىپ، قانداي بۇرىس ويدان اۋلاق بولۋىمىز كەرەك؟
20 پاراساتتى ٴماسىحشى قۇدايدىڭ وسىلاي سۇيىسپەنشىلىك جانە مارتەبە كورسەتىپ وتىرعانىن ەشقاشان ٶزىنىڭ وركوكىرەكتىگى مەن مەنمەندىگىن اقتاۋدىڭ سەبەبى دەپ قاراستىرمايدى. ەلشى پاۋىل بىلاي دەپ جازعان: «ٴتاڭىرىمىز ماعان بەرگەن راقىمعا سۇيەنە وتىرىپ، اربىرەۋىڭە ايتامىن: وزدەرىڭ تۋرالى تيىستىسىنەن ارتىق ويلاماڭدار! قايتا، قۇداي ٴارقايسىڭا ۇلەستىرگەن سەنىمدەرىڭنىڭ مولشەرىنە ساي ويلاي وتىرىپ، وزدەرىڭدى سانالى تۇردە باعالاڭدار» (ريمدىكتەرگە 12:3، سىلتەمەنى قارا). كوكتەگى اكەمىزدىڭ سۇيىسپەنشىلىگىنىڭ جىلۋلىعىن سەزىنگەندە، پاراساتتى بولايىق، ٵرى قۇدايدىڭ سۇيىسپەنشىلىگى ەڭبەك ٴسىڭىرىپ لايىقتى بولا الاتىنداي نارسە ەمەس ەكەنىن ەستە ۇستالىق (لۇقا 17:10).
21. شايتاننىڭ قانداي جالعان سوزىنە ۇزدىكسىز قارسىلاسۋعا ٴتيىسپىز جانە كيەلى كىتاپتاعى قانداي شىندىقتى جۇرەگىمىزگە ۇيالاتا بەرۋىمىز كەرەك؟
21 شايتاننىڭ بىزگە قاتىستى تۇككە تۇرعىسىز ٵرى سۇيىسپەنشىلىككە لايىقسىز دەگەن جالعان سوزدەرىمەن قوسا، ونىڭ بار وتىرىگىن جوققا شىعارۋ ٷشىن ٴارقايسىمىز قولىمىزدان كەلگەننىڭ ٴبارىن ىستەي بەرەلىك. ەگەر ٶمىر وزىڭە ٴتىپتى قۇدايدىڭ شەكسىز سۇيىسپەنشىلىگى دە اسىپ وتە المايتىن الىپ تاۋ دەپ قاراۋعا ۇيرەتسە نەمەسە يگى ىستەرىڭنىڭ ماردىمسىز بولعانى سونداي، ونىڭ ٴبارىن كورەتىن كوزى دە بايقامايدى دەگەنگە، يا بولماسا كۇنالارىڭنىڭ اۋىر بولعانى سونداي، اياۋلى ۇلىنىڭ قانى دا جۋا المايدى دەگەنگە ۇيرەتسە، وندا الدانعانىڭ. جۇرەگىڭدى مۇنداي جالعان پىكىرلەردەن تازارت! قايتا، رۋحتىڭ قوزعاۋ سالۋىمەن پاۋىلدىڭ جازعان سوزدەرىن جۇرەگىمىزگە ۇيالاتا بەرەلىك: «مەن مىناعان نىق سەنەمىن: ٶلىم دە، ٶمىر دە، پەرىشتەلەر دە، جىن-پەرىلەر دە، بۇگىنگى كۇن دە، بولاشاق تا، تابيعاتتان تىس كۇشتەر دە، نە ۇستىمىزدەگى، نە استىمىزداعى ەشقانداي كۇش تە، ٴتىپتى جاراتىلىستىڭ باسقا ەشبىر نارسەسى دە ٴبىزدى قۇدايدىڭ يەمىز يسا ٴماسىح ارقىلى كورسەتىپ جۇرگەن سۇيىسپەنشىلىگىنەن ايىرا المايدى!» (ريمدىكتەرگە 8:38، 39)
a كيەلى كىتاپتا قايتا ٴتىرىلۋ ٷمىتى كوپ جاعدايدا ەحوبانىڭ ەستە ساقتاۋ قابىلەتىمەن بايلانىستىرىلادى. ادال كىسى ٵيۇپ ەحوباعا بىلاي دەگەن: «و، ...ماعان مەرزىم بەرىپ، سوسىن مەن جايىندا ەسىڭە الساڭ عوي!» (ٵيۇپ 14:13) يسا «ەستە ساقتاۋ قابىرىندەگىلەردىڭ ٴبارى» قايتا تىرىلەتىنىن ايتقان. بۇل ورىندى دا، ويتكەنى ەحوبا قايتا تىرىلتكىسى كەلەتىن ادامداردىڭ ٴبارىن ەسىندە ساقتايدى، ال ونىڭ ەستە ساقتاۋ قابىلەتى كەمەلدى (جوحان 5:28، جد؛ 29).
b كەيبىر اۋدارمالار بىرەۋدىڭ قۇداي حالقىنا تيگەنى قۇدايدىڭ ەمەس، ٴيسرايلدىڭ كوزىنە نەمەسە سول ادامنىڭ ٶز كوزىنە تيگەنىنە تەڭ ەكەنىنە نۇسقايدى. مۇنداي قاتەلىك كەيبىر كوشىرمەشىلەردىڭ اتالمىش تارماقتاعى ويدى ورەسكەل دەپ قاراستىرىپ، وزگەرتكەنىنىڭ ناتيجەسىندە پايدا بولعان. ولاردىڭ بۇرىس باعىتتا كۇش سالعاندارىنىڭ كەسىرىنەن ەحوبانىڭ جاناشىرلىق سەزىمىنىڭ قانشالىقتى تەرەڭ ەكەندىگى كومەسكىلەنىپ قالعان.