-
«وزەن سۋى اققان جەردىڭ بارىندە تىرشىلىك پايدا بولادى»ەحوبا تازا عيباداتتى قالپىنا كەلتىردى!
-
-
19-تاراۋ
«وزەن سۋى اققان جەردىڭ بارىندە تىرشىلىك پايدا بولادى»
ويباعدار: عيباداتحانادان اعىپ جاتقان وزەن جايلى اياننىڭ ەجەلدەگى، قازىرگى جانە بولاشاقتاعى ورىندالۋى
1، 2. ەزەكيەل 47:1—12-تارماقتارعا ساي، ەزەكيەل اياندا نە كوردى جانە پەرىشتەدەن نە جايلى ٴبىلدى؟ (تاراۋدىڭ باسىنداعى سۋرەتتى قاراڭىز.)
ەزەكيەل عيباداتحانا جايلى اياندا تاعى ٴبىر تاڭعاجايىپ نارسە كوردى. بۇل — عيباداتحانادان اعىپ جاتقان وزەن! سۋى ٴموپ-ٴمولدىر وسى وزەندى بويلاي كەتىپ بارا جاتقان ەزەكيەلدى ەلەستەتىپ كورىڭىزشى (ەزەكيەل 47:1—12 وقىڭىز). وزەن عيباداتحانانىڭ بوساعاسىنان باستاۋ الىپ، شىعىس قاقپا عيماراتىنىڭ تۇسىنان سىزدىقتاپ اعىپ جاتتى. پەرىشتە ەزەكيەلدى عيباداتحانادان سىرتقا الىپ شىعىپ، جول-جونەكەي جۇرگەن جولدارىن ولشەپ وتىردى. توقتاعان جەرلەرىندە پەرىشتە قايتا-قايتا ەزەكيەلدى سۋدان وتكىزدى. سوندا پايعامبار سۋدىڭ بارعان سايىن تەرەڭدەپ جاتقانىن بايقادى. پەرىشتە سوڭعى رەت ولشەگەندە، ەكپىندەپ اققان سۋ تەك ٴجۇزىپ وتۋگە بولاتىن وزەنگە اينالدى!
2 پەرىشتە ەزەكيەلگە وزەننىڭ ٶلى تەڭىزگە بارىپ قۇياتىنىن ايتتى. وزەننىڭ سۋى اققان جەردىڭ بارىندە تەڭىزدىڭ تۇزدى سۋى تۇشىلانىپ، ٸشى بالىققا تولدى. ال وزەننىڭ جاعاسىن بويلاي ٵرتۇرلى ماۋەلى اعاشتار ٶسىپ تۇردى. ولار اي سايىن ٴنارلى جەمىس بەرەتىن، ال جاپىراقتارى ساۋىقتىراتىن. بۇل كورگەندەرىنىڭ ٴبارى ەزەكيەلدىڭ جۇرەگىندە ٷمىت وتىن جاعىپ، جانىن جايلاندىردى. عيباداتحانا جايلى اياننىڭ وزەن جايلى وسى تۇسى پايعامباردىڭ ٶزى ٷشىن جانە ونىڭ جەر اۋدارىلعان باسقا باۋىرلارى ٷشىن نەنى ٴبىلدىردى؟ ال ٴبىز ٷشىن ونىڭ ٴمانى قانداي؟
وزەن جايلى ايان جەر اۋدارىلعان ياھۋديلەر ٷشىن نەنى ٴبىلدىردى؟
3. ەجەلدەگى ياھۋديلەر ەزەكيەلدىڭ وزەن جايلى ايانىن تۋرا ماعىنادا تۇسىنگەن بە؟ ٴتۇسىندىرىڭىز.
3 وزەن جايلى وسى اياندى ەجەلدەگى ياھۋديلەر تۋرا ماعىنادا تۇسىنبەگەنى انىق. ولار بۇل اياندى ەستىگەندە، قالپىنا كەلۋ جايلى باسقا ٴبىر پايعامبارلىقتى — ەكى عاسىرداي ەرتەرەكتە جازىلىپ كەتكەن جوەل پايعامباردىڭ سوزدەرىن — ەستەرىنە السا كەرەك (جوەل 3:18 وقىڭىز). جەر اۋدارىلعان ياھۋديلەر جوەلدىڭ پايعامبارلىعىن تىكەلەي ٴتۇسىنىپ، تاۋلاردان تۋرا ماعىنادا «ٴتاتتى شاراپ تامشىلايدى»، «قىرلاردان ٴسۇت اعادى»، «ەحوبانىڭ ۇيىنەن بۇلاق اعىپ شىعادى» دەپ ويلاماعان. ولار ەزەكيەلدىڭ پايعامبارلىعىندا ايتىلعان وزەننىڭ دە تۋرا ماعىناداعى وزەن ەمەس ەكەنىن جاقسى تۇسىنسە كەرەكa. ەندەشە، بۇل ايان ارقىلى ەحوبا نە ايتقىسى كەلدى؟ وزەن جايلى وسى اياننىڭ كەيبىر تۇستارىن تۇسىنۋگە كيەلى جازبالار جاقسى كومەكتەسەدى. قازىر اياننىڭ ەحوبا قۇدايدىڭ سۇيىسپەنشىلىگىن پاش ەتەتىن ٷش تۇسىنا نازار اۋدارايىق.
4. ا) ەزەكيەلدىڭ وزەن جايلى ايانىنان ياھۋديلەر ەحوبانىڭ باتاسى جايىندا نەنى تۇسىنسە كەرەك؟ ٵ) كيەلى كىتاپتاعى «وزەن» جانە «سۋ» دەگەن سوزدەر ەحوبانىڭ ٶز حالقىنا باتاسىن توگەتىنىنە قالاي كوزىمىزدى جەتكىزەدى؟ («ەحوبانىڭ باتالارىنا تولى وزەندەر» دەگەن قورشاۋدى قاراڭىز.)
4 باتالارعا تولى وزەن. كيەلى كىتاپتا وزەندەر مەن سۋلار ٴجيى ەحوبانىڭ توگەتىن باتالارىن سيپاتتاۋ ٷشىن قولدانىلادى. ەزەكيەلدىڭ ايانىندا وسىنداي وزەن عيباداتحانادان اعىپ جاتتى. وسىعان قاراپ، قۇداي حالقى ولار تازا عيبادات ەتكەن جاعدايدا عانا ەحوبانىڭ باتالارى توگىلەتىنىن تۇسىنسە كەرەك. بۇل قانداي باتالار ەدى؟ بۇلار بۇرىنعىداي ٴدىني جەتەكشىلەردەن رۋحاني ٴتالىم الۋ جانە عيباداتحانادا قۇرباندىقتار ۇسىنىپ، كەشىرىمگە يە بولۋ ەدى (ەزەك. 44:15، 23؛ 45:17). وسى باتالاردىڭ ارقاسىندا حالىق عيباداتحانادان اعىپ جاتقان تازا سۋعا شومىلىپ شىققانداي قايتادان تازارماق-تىن.
5. باتالار ٵردايىم بارىنە جەتكىلىكتى مولشەردە توگىلە بەرەتىنى وزەن جايلى اياننان قالاي كورىنگەن؟
5 قۇدايدىڭ توگەتىن باتالارى بارىنە ٵردايىم جەتە مە؟ ەزەكيەلدىڭ ايانى مۇنداي ۋايىمداردىڭ كەز كەلگەنىن سەيىلتەدى. اياننان كورگەنىمىزدەي، سىزدىقتاپ اققان سۋ ەكى شاقىرىمعا جەتپەي-اق تەرەڭ وزەنگە اينالىپ، ارناسى بارعان سايىن كەڭەيگەن (ەزەك. 47:3—5). دەمەك، ياھۋديلەر وتاندارىنا ورالعان سوڭ، ولاردىڭ سانى قانشا وسپەسىن، ەحوبانىڭ باتالارى مولايىپ، ٴبارىنىڭ قاجەتتىلىگىن قاناعاتتاندىرماق ەدى. عيباداتحانادان اققان وزەن، ٴسوز جوق، مولشىلىقتىڭ بەلگىسى بولعان!
6. ا) اياننىڭ استارىندا قانداي ۋادە جاتتى؟ ٵ) اياننىڭ ەسكەرتۋ بولارلىق قانداي تۇسى بولدى؟ (سىلتەمەنى دە قاراڭىز.)
6 تىرشىلىك دارىتاتىن سۋ. ەزەكيەلدىڭ ايانىندا وزەن ٶلى تەڭىزگە قۇيىپ، ونىڭ كوپ بولىگىن قالپىنا كەلتىرگەن. سونىڭ ارقاسىندا بۇل تەڭىزدە ۇلى تەڭىزدەگىدەي، ياعني جەرورتا تەڭىزىندەگىدەي نەشە ٴتۇرلى بالىقتار پايدا بولعان. سول جەردە ٴتىپتى بالىق شارۋاشىلىعى دامىعان. بۇل شارۋاشىلىق ٶلى تەڭىزدىڭ جاعاسىنداعى ٴبىر-بىرىنەن ٴبىرشاما الشاق جاتقان ەكى قالانىڭ اراسىن الىپ جاتقان. اياندا پەرىشتە ەزەكيەلگە: «وزەن سۋى اققان جەردىڭ بارىندە تىرشىلىك پايدا بولادى»،— دەگەن. سوندا بۇل ەحوبانىڭ ۇيىنەن اققان سۋ ٶلى تەڭىزدىڭ بارلىق جەرىنە اعىپ باراتىنىن بىلدىرگەن بە؟ جوق. پەرىشتە تىرشىلىك دارىتاتىن وزەن تەڭىزدىڭ شالشىقتى جەرلەرىنە اقپايتىنىن ايتقان. ول جەرلەر «تۇزدى بولىپ جاتا بەرمەك» ەدىb (ەزەك. 47:8—11). سونىمەن، اياننىڭ استارىندا مىناداي ۋادە جاتتى: تازا عيبادات حالىقتى وركەندەتىپ، قالپىنا كەلتىرمەك ەدى. الايدا اياننىڭ ەسكەرتۋ بولارلىق تۇسى دا بولدى: ەحوبانىڭ باتاسىن ٴبارى بىردەي قابىلداپ، ٴبارى بىردەي ساۋىقپايدى.
7. ايانداعى وزەندى جاعالاي وسكەن اعاشتار جەر اۋدارىلعان ياھۋديلەرگە قانداي سەنىمدىلىك بەردى؟
7 تاماق بولاتىن ٵرى ساۋىقتىراتىن اعاشتار. وزەندى جاعالاي وسكەن اعاشتار جايىندا نە دەۋگە بولادى؟ ولار اياننىڭ ٴسانىن كەلتىرىپ تۇر، سولاي ەمەس پە؟! بۇل اعاشتار سونىمەن قاتار اياننىڭ ٴمانىن دە كەلتىرەدى. ەزەكيەل مەن ونىڭ جەرلەستەرى وسى اعاشتاردىڭ اي سايىن اكەلەتىن ٴدامدى جەمىستەرىن ەلەستەتىپ، ٴبىر قۋانىپ قالعان شىعار. جۇرەك جىلىتار بۇل كورىنىس ەحوبا ولاردى رۋحاني تاماقپەن قامتاماسىز ەتەتىنىنە سەنىمدىلىك بەردى. اعاشتاردىڭ جاپىراقتارىنىڭ بولسا «ساۋىقتىراتىن» كۇشى بار ەدى (ەزەك. 47:12). ەحوبا ٶز ەلدەرىنە ورالعان ياھۋديلەر ەڭ الدىمەن رۋحاني ساۋىعۋعا مۇقتاج بولاتىنىن بىلگەن، سوندىقتان ولاردى رۋحاني جاعىنان ساۋىقتىراتىنىن ۋادە ەتتى. ەحوبانىڭ بۇل ۋادەسىن قالاي ورىنداعانى قالپىنا كەلتىرۋ شاراسى جايلى باسقا پايعامبارلىقتاردان كورىنەدى. ولار جايىندا وسى باسىلىمنىڭ 9-تاراۋىندا قاراستىرىلعان.
8. ەزەكيەلدىڭ ايانى كەڭ كولەمدە ورىندالماق بولعانى نەدەن كورىندى؟
8 ٴبىزدىڭ 9-تاراۋدان تاعى ٴبىر بىلگەنىمىز، وتاندارىنا ورالعان ياھۋديلەر سول پايعامبارلىقتاردىڭ تولىق ورىندالۋىن كورمەگەن. بۇلاي بولۋىنا حالىقتىڭ ٶزى كىنالى ەدى. ولار قايتا-قايتا جامان جولدارىنا ورالىپ، مويىنسۇنباي، تازا عيباداتتى اياقاستى ەتتى. مۇندايدا ەحوبا ولارعا باتاسىن قايدان تولىق توكسىن؟! الايدا بۇل قىڭىر حالىقتىڭ اراسىندا باۋىرلارىنىڭ تەرىس قىلىقتارىنا كۇيىنىپ، ازاپ شەككەن ادال جاندار دا بولدى. ولار ەحوبانىڭ ۋادەلەرى ەشقاشان ورىنداۋسىز قالمايتىنىنا سەنىمدى بولدى. ونىڭ ۋادەلەرى ٵرقاشان جۇزەگە اسادى (ەشۋا 23:14 وقىڭىز). كۇندەردىڭ كۇنىندە ەزەكيەلدىڭ كورگەن ايانى كەڭ كولەمدە ورىندالماق ەدى. ٴبىراق قاشان؟
وزەن قازىر دە اعىپ جاتىر!
9. ەزەكيەلدىڭ عيباداتحانا جايلى ايانى كەڭ كولەمدە قاشان ورىندالماق-تىن؟
9 وسى باسىلىمنىڭ 14-تاراۋىنان كورگەنىمىزدەي، ەزەكيەلدىڭ عيباداتحانا جايلى ايانى كەڭ كولەمدە «سوڭعى كۇندەردە»، ياعني تازا عيبادات بۇرىن-سوڭدى بولماعانداي اسقاقتاتىلعان كەزدە ورىندالماق-تىن (يشايا 2:2). عيباداتحانا جايلى سول اياننىڭ وزەن جايلى تۇسى بۇگىندە قالاي ورىندالىپ جاتىر؟
10، 11. ا) بۇگىندە بىزگە قانداي باتالار وزەندەي اعۋدا؟ ٵ) سوڭعى كۇندەردە رۋحاني شولدەگەن ادامداردىڭ قارقىنداپ كوبەيۋىنە وراي ەحوبانىڭ باتالارى قالاي مولايا ٴتۇستى؟
10 باتالارعا تولى وزەن. ەحوبانىڭ ۇيىنەن باستاۋ العان وزەن بۇگىندە رۋحاني دەنساۋلىعىمىزدى نىعايتىپ، مول يگىلىك اكەلىپ جاتقان باتالاردى ەسكە سالادى. ولاردىڭ ىشىندەگى ەڭ نەگىزگىسى — كۇنامىزدى جۋىپ تازارتاتىن ٴماسىحتىڭ تولەم قۇرباندىعى. قۇداي ٴسوزىنىڭ تازا شىندىقتارى دا تازارتاتىن ٵرى ٶمىر دارىتاتىن ٴمولدىر سۋ ٴتارىزدى (ەفەس. 5:25—27). وسىنداي باتالارعا تولى وزەن ٴبىزدىڭ كەزىمىزدە قالاي اعىپ جاتىر؟
11 1919-جىلى ەحوبانىڭ قىزمەتشىلەرىنىڭ سانى نەبارى بەس مىڭداي عانا بولاتىن. ولار قاجەتتى رۋحاني اس-سۋلارىن الىپ، كيەلى كىتاپتاعى شىندىقتاردى تۇسىنگەندە، قۋانىشتارىندا شەك بولمادى! قۇداي حالقى جىل وتكەن سايىن قارقىنداپ ٶسىپ، ولاردىڭ سانى بۇگىندە 8 000 000 نان اسىپ جىعىلادى. ال شىندىقتىڭ تازا سۋى شە، ول دا مولايدى ما؟ ٴيا! بىزگە قۇداي سوزىندەگى كوپ شىندىقتار اشىلا ٴتۇستى. وتكەن عاسىردا كيەلى جازبالار، كىتاپتار مەن كىتاپشالار، جۋرنالدار مەن بۋكلەتتەر قۇداي حالقىنا ميللياردتاعان دانامەن اعىلىپ كەلدى. جەر شارى بويىنشا سانى ەسەلەپ ارتىپ جاتقان ادامداردىڭ رۋحاني ٴشولىن قاندىرۋ ٷشىن، تازا شىندىقتار دا ەزەكيەلدىڭ ايانىنداعى وزەن سياقتى مولايا ٴتۇستى. كيەلى كىتاپقا نەگىزدەلگەن ادەبيەتتەر بۇرىننان باسپا جۇزىندە قولجەتىمدى بولىپ كەلدى. ال قازىر ونداي ادەبيەتتەردىڭ ەلەكتروندى نۇسقاسى jw.org تور بەكەتىندە 900 دەن استام تىلدە شىعادى! شىندىقتارى ارناسىنان اسىپ توگىلگەن بۇل وزەن اقجۇرەك ادامدارعا قالاي اسەر ەتىپ جاتىر؟
12. ا) شىندىق حابارى ادامدارعا قالاي اسەر ەتۋدە؟ ٵ) اياننىڭ قازىرگى ۋاقىتتا ٴبىز ٷشىن ەسكەرتۋ بولارلىق قانداي تۇسى بار؟ (سىلتەمەنى دە قاراڭىز.)
12 تىرشىلىك دارىتاتىن سۋ. اياندا پەرىشتە: «وزەن سۋى اققان جەردىڭ بارىندە تىرشىلىك پايدا بولادى»،— دەگەن. قالپىنا كەلگەن رۋحاني مەكەنىمىزگە قونىس تەپكەندەردىڭ بارىنە شىندىق حابارى قالاي اسەر ەتكەنى جايلى ويلاپ كورىڭىزشى. كيەلى كىتاپتاعى شىندىقتار ميلليونداعان اقجۇرەك جاندارعا ٶمىر دارىتتى ٵرى رۋحاني دەنساۋلىقتارىن نىعايتۋعا كومەكتەستى. الايدا اياننىڭ قازىرگى ۋاقىتتا ەسكەرتۋ بولارلىق تۇسى دا بار: ٶلى تەڭىزدىڭ باتپاقتى، شالشىقتى جەرلەرى بولعانىنداي، شىندىقتى باعالاماي كەتىپ، ونى ومىردە قولدانۋدان قالاتىن ادامدار دا بولادىc. سولاردىڭ اراسىندا ٴبىز دە بولىپ جۇرمەيىك! (مۇسانىڭ 5-جازباسى 10:16—18 وقىڭىز).
13. ەزەكيەلدىڭ ايانىنداعى اعاشتاردىڭ ٴبىز ٷشىن قانداي ٴمانى بار؟
13 تاماق بولاتىن ٵرى ساۋىقتىراتىن اعاشتار. ايانداعى وزەندى بويلاي وسكەن اعاشتاردىڭ ٴبىز ٷشىن جىگەر بولارلىق زور ٴمانى بار! ەسىمىزدە بولسا، بۇل اعاشتار اي سايىن ٴدامدى جەمىس بەرگەن، ال جاپىراقتارى ساۋىقتىرعان (ەزەك. 47:12). بۇل ٴبىزدى ەڭ ماڭىزدى جاعىنان، ياعني رۋحاني جاعىنان جومارتتىقپەن تاماقتاندىرىپ ٵرى ساۋىقتىرىپ جاتقان قۇدايعا قىزمەت ەتىپ جاتقانىمىزدى ەسكە سالادى. بۇگىنگى دۇنيە رۋحاني اۋرۋ، رۋحاني اش. ال ەحوبا ٴبىزدى مولىنان قامتاماسىز ەتىپ جاتىر. جۋرنالىمىزداعى ٴبىر ماقالانى وقىپ بىتكەننەن كەيىن، يا كونگرەستە سوڭعى ٵندى شىرقاپ بولعان سوڭ، نە بولماسا ۆيدەو يا برودكاستينگ باعدارلاماسىن كورىپ بولعاننان كەيىن، وسىنداي رۋحاني اس-سۋ ٷشىن بويىڭىزدى ريزاشىلىق كەرنەگەن بە؟ ٴبىز، راسىندا دا، توق ٴجۇرمىز! (يشايا 65:13، 14). قابىلداپ جاتقان اس-سۋىمىز سونداي-اق رۋحاني جاعىنان ساۋىقتىرادى. كيەلى كىتاپقا نەگىزدەلگەن پايدالى كەڭەستەر ٴبىزدى ازعىندىق، اشكوزدىك پەن سەنىمنىڭ جوقتىعى سياقتى رۋحاني اۋرۋلاردان قورعايدى. اۋىر كۇنا جاساپ، رۋحاني اۋرۋعا شالدىققان ماسىحشىلەرگە ساۋىعۋعا كومەكتەسۋ ٷشىن، ەحوبا ارنايى شارا ۇيىمداستىرعان (جاقىپ 5:14 وقىڭىز). ٴيا، ەزەكيەلدىڭ ايانىنداعى اعاشتاردان كورىنەتىندەي، ٴبىز ەحوبانىڭ باتاسىنا مولىنان كەنەلىپ ٴجۇرمىز.
14، 15. ا) اياننىڭ ساۋىقپاعان شالشىقتى جەرلەر جايلى تۇسىنان ٴبىز قانداي ساباق الامىز؟ ٵ) ٴبىز ايانداعى وزەننىڭ بۇگىندە قانداي يگىلىگىن كورىپ ٴجۇرمىز؟
14 ال اياننىڭ ساۋىقپاعان شالشىقتى جەرلەر جايلى تۇسىنان ٴبىز ماڭىزدى ساباق الامىز. ٴبىز ەشقاشان دا ەحوبانىڭ باتالارىنا بوگەت بولىپ، ولاردىڭ ومىرىمىزگە توگىلۋىنە كەدەرگى بولعىمىز كەلمەس ەدى. رۋحاني اۋرۋ وسى دۇنيەدەگى كوپتەگەن ادامدار سياقتى ٴبىز دە ساۋىقپاي قالساق، قانداي وكىنىشتى بولار ەدى! (مات. 13:15). قايتا، ٴبىز باتالارعا تولى وزەننىڭ بارىنشا يگىلىگىن كورسەك دەيمىز. قۇداي سوزىندەگى شىندىقتىڭ تازا سۋىنان قانىپ ىشكەندە، ۋاعىزدا سول شىندىق جايلى باسقالارعا ايتقاندا، ادال دا اقىلدى قۇلدان ۇيرەنگەن اقساقالداردىڭ باعىت-باعدارىن، جۇبانىشى مەن كومەگىن قابىل العاندا، ەسىمىزگە ەزەكيەلدىڭ وزەن جايلى ايانى كەلەر. راسىندا دا، بۇل وزەن اققان جەرىنىڭ بارىندە تىرشىلىك دارىتادى ٵرى ساۋىقتىرادى!
15 وزەن جايلى بۇل ايان بولاشاقتا قالاي ورىندالادى؟ كەلەسى ابزاستاردان كورەتىنىمىزدەي، بۇل وزەن جۇماقتا بۇرىن-سوڭدى بولماعانداي دەڭگەيدە اعاتىن بولادى!
اياننىڭ جۇماقتاعى ورىندالۋى
16، 17. جۇماقتا باتالارعا تولى وزەننىڭ قانداي يگىلىگىن كورەمىز؟ مىسال كەلتىرىڭىز.
16 ٴسىز ٶزىڭىزدىڭ جۇماقتا وتباسىڭىزبەن جانە دوستارىڭىزبەن بىرگە ٶمىردىڭ بار قىزىعىن كورىپ جۇرگەن كەزىڭىزدى ەلەستەتەسىز بە؟ ەزەكيەلدىڭ وزەن جايلى ايانىن زەرتتەسەڭىز، جارقىن بولاشاعىڭىزدى ودان دا انىق ەلەستەتە الاسىز. قالايشا؟ قازىر ايانعا قايتا ٷڭىلىپ، ەحوبانىڭ سۇيىسپەنشىلىگىن پاش ەتەتىن ٷش تۇسىنا تاعى ٴبىر رەت نازار اۋدارايىق.
17 باتالارعا تولى وزەن. جۇماقتا بۇل وزەننىڭ ارناسى بۇرىن-سوڭدى بولماعانداي كەڭەيىپ، ول رۋحاني عانا ەمەس، تاندىك يگىلىكتەر دە اكەلەتىن بولادى. يسانىڭ مىڭجىلدىق بيلىگىنىڭ تۇسىندا ادال جاندار قۇداي پاتشالىعىنىڭ ارقاسىندا تولەمنىڭ الدەقايدا كوپ يگىلىگىن كورەدى. ولار بىرتە-بىرتە كەمەلدىلىككە جەتەدى. ىندەتتەر، دارىگەرلەر، اۋرۋحانالار مەن ەم-شارالار دەگەندى اتىمەن ۇمىتادى! ٶمىر دارىتاتىن وزەننىڭ سۋى ارماگەددوننان امان قالعان سان ميلليونداعان ادامعا — زور الاپاتتان وتكەن «ۇلى جاماعاتقا» — اعىپ بارادى (ايان 7:9، 14). ٴبىراق بۇل باتالار قانشالىقتى عالامات بولىپ كورىنبەسىن، ولار كەيىن بولاتىن جايتتارمەن سالىستىرعاندا سىزدىقتاپ اققان سۋ سياقتى بولىپ قالادى! باتالارعا تولى وزەن ادامداردىڭ كوبەيە تۇسەتىن قاجەتتىلىكتەرىنىڭ ٴبارىن قاناعاتتاندىرۋ ٷشىن ودان سايىن ۇلعاياتىن بولادى.
باتالارعا تولى وزەن جۇماقتا ٵر ادامدى ساۋىقتىرىپ، جاستىق شاققا قايتارادى (17-ابزاستى قاراڭىز)
18. قاي ماعىنادا «ٶمىر سۋىنىڭ وزەنى» مىڭجىلدىق بيلىك كەزىندە ەكپىندەپ اعاتىن بولادى؟
18 تىرشىلىك دارىتاتىن سۋ. مىڭجىلدىق بيلىك كەزىندە «ٶمىر سۋىنىڭ وزەنى» ەكپىندەپ اعاتىن بولادى (ايان 22:1). قايتىس بولعان ميلليونداعان، ٴتىپتى ميللياردتاعان ادام ٴتىرىلىپ، ولارعا جۇماقتا ماڭگى ٶمىر ٴسۇرۋ مۇمكىندىگى بەرىلەدى! ەحوبا پاتشالىق ارقىلى باتاسىن توگىپ، عاسىرلار بويى جەر قويناۋىندا جاتقان سانسىز كوپ ادامعا ٶمىر دارىتادى (يشايا 26:19). الايدا تىرىلگەن سول ادامداردىڭ ٴبارى ماڭگى ٶمىر سۇرە مە؟
19. ا) نەلىكتەن جۇماقتا شىندىقتاردىڭ ٴمولدىر تازا سۋى ٵرى قاراي دا اعا بەرەدى دەي الامىز؟ ٵ) بولاشاقتا كەيبىرەۋلەر قالايشا «تۇزدى بولىپ جاتا بەرەدى»؟
19 ادام ماڭگى ٶمىر سۇرە مە، جوق پا — بۇل ونىڭ وزىنە بايلانىستى بولادى. جۇماقتا ەحوبادان كەلەتىن شىندىقتاردىڭ ٴمولدىر تازا سۋى ٵرى قاراي دا اعا بەرەتىن بولادى. جاڭا شىندىقتار مەن نۇسقاۋلاردى قامتيتىن جاڭا شيىرشىقتار اشىلادى. بۇل ٴبىر كەرەمەت شاق بولماق، سولاي ەمەس پە؟! دەگەنمەن جاڭا نۇسقاۋلارعا قۇلاق اسقىسى كەلمەي، ەحوباعا مويىنسۇنباۋدى شەشەتىن ادامدار دا بولادى. كەيبىرەۋلەر مىڭجىلدىق بيلىكتىڭ كەزىندە بۇلىك شىعارۋى مۇمكىن. ٴبىراق جۇماقتىڭ شىرقىن ەشكىم بۇزا المايدى! (يشايا 65:20). مۇنداي ادامدار ەزەكيەلدىڭ ايانىنداعى «تۇزدى بولىپ جاتا بەرگەن» شالشىقتى، سورتاڭ جەرلەردى ەسىمىزگە سالار. ولاردىڭ توڭمويىندىق تانىتىپ، قۇن جەتپەس ٶمىر سۋىنان ىشپەي قوياتىندارى نەتكەن اقىماقتىق بولادى دەسەڭىزشى! ال كەيبىرەۋلەر مىڭ جىلدان كەيىن شايتاننىڭ جاعىنا شىعادى. اقىرىندا، ەحوبانىڭ ٵدىل بيلىگىن مويىندامايتىنداردىڭ ٴبارى ماڭگىلىككە جويىلادى (ايان 20:7—12).
20. مىڭجىلدىق بيلىك كەزىندە ٴبىزدىڭ يگىلىگىمىز ٷشىن جاسالاتىن قانداي شارا ەزەكيەل كورگەن اعاشتاردى ەسىمىزگە سالادى؟
20 تاماق بولاتىن ٵرى ساۋىقتىراتىن اعاشتار. ەحوبا جۇماقتا ٶمىر سۇرەتىندەردىڭ ەشقايسىسىنىڭ ماڭگىلىك ومىردەن قۇرالاقان قالعانىن قالامايدى. وسى تاماشا مۇمكىندىكتەن ايىرىلىپ قالماۋىمىز ٷشىن، ول مىڭجىلدىق بيلىكتىڭ كەزىندە ەزەكيەلدىڭ ايانىنداعى اعاشتار سياقتى شارا جاسالۋىن قامدايدى. ەحوبا جۇماقتا تاندىك باتالارمەن قاتار رۋحاني باتالارىن دا توگەدى. كوكتە يسا ٴماسىح پەن 144 000 بيلەۋشى مىڭ جىل بويى بىرگە پاتشالىق ەتەدى. ولار ٴدىني قىزمەتكەرلەر رەتىندە ٴماسىحتىڭ تولەم قۇرباندىعىنىڭ بار يگىلىگىن قولدانىپ، ادال جانداردى كەمەلدىلىككە جەتكىزەدى (ايان 20:6). تاندىك تە، رۋحاني دا ساۋىقتىراتىن بۇل شارا ەزەكيەلدىڭ ايانىنداعى وزەندى بويلاي وسكەن، جەمىستەرى ٴنار بەرەتىن، ال جاپىراقتارى ساۋىقتىراتىن اعاشتاردى ەسىمىزگە سالادى. بۇل ايان ەلشى جوحان كورگەن باسقا ٴبىر تاماشا ايانعا قاتتى ۇقسايدى (ايان 22:1، 2 وقىڭىز). جوحاننىڭ ايانىنداعى اعاشتاردىڭ جاپىراقتارى «حالىقتاردى ساۋىقتىرۋعا ارنالعان» ەدى. 144 000 ٴدىني قىزمەتكەردىڭ اتسالىسۋىمەن ميلليونداعان ادال ادام «ساۋىعىپ»، كۇنا مەن ولىمنەن ازات بولادى.
21. ا) ەزەكيەلدىڭ ايانىنداعى وزەن جايلى وي جۇگىرتكەنىڭىز سىزگە قالاي اسەر ەتتى؟ («سىزدىقتاپ اققان سۋدىڭ وزەنگە اينالۋى» دەگەن قورشاۋدى قاراڭىز.) ٵ) كەلەسى تاراۋدا نە جايىندا قاراستىرامىز؟
21 ەزەكيەلدىڭ ايانىنداعى وزەن جايلى وي جۇگىرتكەنىمىز ٷمىتىمىزدى جانداندىرىپ، جانىمىزعا جاي بەردى، سولاي ەمەس پە؟! ٴبىزدى نەتكەن كەرەمەت بولاشاق كۇتىپ تۇر! ەحوبا كوپتەگەن پايعامبارلىقتار جازدىرىپ، جەر بەتىندە ورنايتىن جۇماقتى تاماشا سۋرەتتەگەن. ايان رەتىندە جازىلعان سول پايعامبارلىقتاردىڭ كەڭ كولەمدە ورىندالۋىن ٶز كوزىمەن كورسىن دەپ، ەحوبا ادامزاتتى جۇماقتاعى ومىرگە مىڭداعان جىلدان بەرى شىدامدىلىقپەن شاقىرىپ كەلەدى. ٴسىز سول ٶمىردى كورەسىز بە؟ بالكىم، ٴسىز «جۇماقتا ماعان شىنىمەن ورىن بولا ما؟» دەپ ويلارسىز. ەزەكيەل ايتقان پايعامبارلىقتىڭ وسىعان قاتىستى بويىمىزعا سەنىمدىلىك ۇيالاتاتىن تاعى ٴبىر تۇسى بار. بۇل جايىندا كەلەسى تاراۋدا قاراستىرامىز.
a بۇعان قوسا، جەر اۋدارىلعان ياھۋديلەردىڭ ىشىندە ەلدەرىنىڭ جەر بەدەرىن جاقسى بىلەتىندەر يەرۋساليمنەن وزەن اعىپ، ٶلى تەڭىزگە قۇيۋى مۇمكىن ەمەس ەكەنىن تۇسىنسە كەرەك. ويتكەنى وزەن بيىك جوتالارعا قاراي ورلەي اعا الماس ەدى.
b كەيبىر زەرتتەۋشىلەر تارماقتاعى بۇل سوزدەر جاعىمدى ويعا نۇسقايدى دەپ جاتادى. ولار بۇزىلۋدان ساقتايتىن قاسيەتى بار تۇزدى جيناۋ ٶلى تەڭىز ايماعىندا بۇرىننان تابىستى كاسىپ بولىپ كەلە جاتقانىن العا تارتادى. دەسە دە تارماقتا «شالشىقتى جەرلەر تۇشىلانبايتىنى»، ياعني ساۋىقپايتىنى انىق ايتىلعان. ولاردىڭ ساۋىقپاي، ٶلى بولىپ جاتا بەرگەن سەبەبى — ەحوبانىڭ ۇيىنەن باستالعان تىرشىلىك دارىتاتىن سۋ ول جەرلەرگە بارماعان. سوندىقتان دا شالشىقتى جەرلەردىڭ تۇزدى بولىپ جاتا بەرۋى جاعىمسىز ويعا نۇسقاسا كەرەك (ٴزاب. 107:33، 34؛ ەرم. 17:6).
c يسانىڭ تەڭىزگە تاستالعان اۋ تۋرالى مىسالىنا دا نازار اۋدارايىق. اۋعا كوپ بالىق تۇسكەنمەن، بارلىعى بىردەي «جاقسى بالىق» بولماي شىعادى. ىشىندەگى جارامسىزدارى لاقتىرىپ تاستالادى. بۇل مىسالمەن يسا ەحوبانىڭ ۇيىمىنا ادامدار كوپتەپ كەلگەنمەن، ۋاقىت وتە كەيبىرى ادال بولماي شىعۋى مۇمكىن ەكەنىن ايتقان (مات. 13:47—50؛ ٴتىم. 2-ح. 2:20، 21).
-
-
«جەردى مۇرالى ۇلەستەرگە بولىڭدەر»ەحوبا تازا عيباداتتى قالپىنا كەلتىردى!
-
-
20-تاراۋ
«جەردى مۇرالى ۇلەستەرگە بولىڭدەر»
ويباعدار: جەردى مۇرالى ۇلەستەرگە ٴبولۋدىڭ ماعىناسى
1، 2. ا) ەزەكيەل ەحوبادان قانداي تاپسىرما الدى؟ ٵ) ٴبىز قانداي سۇراقتاردى قاراستىرامىز؟
ەزەكيەل بۇل اياندى كورگەندە، سوناۋ 900 جىلداي بۇرىنعى مۇسا مەن ەشۋانىڭ كەزىن ەسىنە السا كەرەك. سول ۋاقىتتا ەحوبا مۇساعا ۋادە ەتىلگەن جەردىڭ شەگارالارىن بەلگىلەپ بەرگەن ەدى. كەيىن ول ەشۋاعا سول جەردى يسرايل رۋلارىنا ٴبولىپ بەرۋدى تاپسىرعان بولاتىن (مۇس. 4-ج. 34:1—15؛ ەشۋا 13:7؛ 22:4، 9). ال ەندى، ب.ز.ب. 593-جىلى، ەحوبا ەزەكيەل مەن جەر اۋدارىلعان باسقا ياھۋديلەرگە ۋادە ەتىلگەن جەردى رۋلارعا ٴبولىپ بەرۋدى قايتادان تاپسىرىپ وتىر (ەزەك. 45:1؛ 47:14؛ 48:29).
2 بۇل اياننىڭ ەزەكيەل مەن ونىڭ جەر اۋدارىلعان باۋىرلارى ٷشىن قانداي ٴمانى بولدى؟ نەلىكتەن بۇل ايان قۇدايدىڭ بۇگىندەگى حالقى ٷشىن جىگەردىڭ كوزى بولىپ تابىلادى؟ ول بولاشاقتا كەڭ كولەمدە ورىندالا ما؟
ٴتورت ۋادەگە كەپىلدىك بولعان ايان
3، 4. ا) جەر اۋدارىلعان ياھۋديلەر ٷشىن ەزەكيەلدىڭ سوڭعى ايانى قانداي ٴتورت ۋادەگە كەپىلدىك بولدى؟ ٵ) وسى تاراۋدا ٴبىز قانداي ۋادە جايلى قاراستىرامىز؟
3 ەزەكيەلدىڭ كورگەن سوڭعى ايانى ونىڭ كىتابىنىڭ توعىز تاراۋىن قامتيدى (ەزەك. 40:1—48:35). جەر اۋدارىلعان ياھۋديلەر ٷشىن بۇل ايان قالپىنا كەلەتىن يسرايلمەن بايلانىستى ٴتورت ۋادەگە كەپىلدىك بولدى. ٴبىرىنشىسى — قۇدايدىڭ عيباداتحاناسىندا تازا عيباداتتىڭ قايتادان قالپىنا كەلۋى. ەكىنشىسى — وتانىنا ورالعان حالىققا ٵدىل ٴدىني قىزمەتكەرلەر مەن باعۋشىلاردىڭ جەتەكشىلىك ەتۋى. ٷشىنشىسى — يسرايلگە ورالعان بارلىق ادامنىڭ مۇرالى جەردەن ٶز ۇلەستەرىن الۋى. ٴتورتىنشىسى — ەحوبانىڭ قايتادان ولارمەن بىرگە تۇرىپ، ارالارىندا بولۋى.
4 تازا عيباداتتىڭ قالپىنا كەلۋى جانە حالىققا ٵدىل باعۋشىلاردىڭ جەتەكشىلىك ەتۋى جايلى العاشقى ەكى ۋادەنىڭ قالاي ورىندالعانىن وسى باسىلىمنىڭ 13، 14-تاراۋلارىندا قاراستىرعانبىز. ٷشىنشى ۋادە جايلى، ياعني مۇراعا بەرىلەتىن جەر جايىندا ٴبىز وسى تاراۋدا قاراستىرامىز. ال كەلەسى تاراۋدا ەحوبانىڭ ٶز حالقىنىڭ اراسىندا بولاتىنى جايلى ٴتورتىنشى ۋادەگە نازار اۋدارامىز (ەزەك. 47:13—21؛ 48:1—7، 23—29).
«ول مۇرا رەتىندە سەندەرگە ٴتيدى»
5، 6. ا) ەزەكيەلدىڭ ايانىنداعى مۇراعا بەرىلەتىن جەر قاي جەر ەدى؟ (تاراۋدىڭ باسىنداعى سۋرەتتى قاراڭىز.) ٵ) مۇراعا بەرىلەتىن جەر تۋرالى اياننىڭ ماقساتى نەدە ەدى؟
5 ەزەكيەل 47:14 وقىڭىز. اياندا ەحوبا ەزەكيەلگە جاقىندا «ەدەم باعىنداي» بولاتىن جەردى كورسەتتى (ەزەك. 36:35). سوسىن ول: «يسرايلدىڭ 12 رۋىنا مۇرا رەتىندە مىنا جەردى ٴبولىپ بەرىڭدەر»،— دەگەن نۇسقاۋ بەردى (ەزەك. 47:13). حالىقتىڭ ەنشىسىنە تيەتىن بۇل جەر قالپىنا كەلەتىن يسرايل جەرى ەدى. تۇتقىننان ازات بولعان سوڭ ياھۋديلەر سول جەرگە ورالماق-تىن. كەيىن ەحوبا وسى جەردىڭ سىرتقى شەگارالارى ناقتى قاي جەرلەردەن وتەتىنىن تاپتىشتەپ سيپاتتاپ بەردى. بۇل جايىندا ەزەكيەل كىتابىنىڭ 47:15—21-تارماقتارىنان وقيمىز.
6 مۇراعا بەرىلەتىن جەر تۋرالى بۇل اياننىڭ ماقساتى نەدە ەدى؟ ەزەكيەل مەن جەر اۋدارىلعان وزگە ياھۋديلەر جەردىڭ شەگارالارى ناقتى بەلگىلەنگەنىنە قاراپ، سۇيىكتى مەكەندەرىنىڭ مىندەتتى تۇردە قالپىنا كەلەتىنىنە سەنىمدى بولدى. سول جەردى ەحوبانىڭ ٶزى تاپتىشتەپ سيپاتتاپ بەرگەنى ولاردىڭ جۇرەكتەرىن زور قۋانىشقا تولتىرسا كەرەك! مۇراعا بەرىلگەن سول جەردى قۇدايدىڭ حالقى شىنىمەن يەمدەندى مە؟ ٴيا.
7. ا) ب.ز.ب. 537-جىلى قانداي وقيعالار ورىن الا باستادى جانە ولار نەنى ەسكە سالادى؟ ٵ) ٴبىز الدىمەن نە نارسەگە كوز جەتكىزەمىز؟
7 ەزەكيەل وسى اياندى العاننان كەيىن 56 جىل وتكەن سوڭ، ياعني ب.ز.ب. 537-جىلى تۇتقىنداعى ياھۋديلەر مىڭ-مىڭداپ يسرايل ەلىنە ورالىپ، ٶز جەرلەرىن يەمدەنە باستادى. ەجەلدە بولىپ كەتكەن وسىناۋ تاماشا وقيعالار ٴبىزدىڭ كەزىمىزدەگى جاعدايدى ەسكە سالادى. بۇگىندەگى قۇداي حالقى دا تۋرا سولاي مۇرالى جەردى يەمدەندى. قاي ماعىنادا؟ ەحوبا ٶز قىزمەتشىلەرىن رۋحاني جەرگە الىپ كىرىپ، سول جەردى ولاردىڭ يەلىگىنە بەردى. سوندىقتان دا ٴبىز ەجەلدە ۋادە ەتىلگەن جەردىڭ قالاي قالپىنا كەلگەنىنە قاراپ، بۇگىندەگى رۋحاني جەردىڭ قالپىنا كەلۋى جايلى كوپ نارسە بىلە الامىز. بۇل جايلى قاراستىرماس بۇرىن، الدىمەن رۋحاني جەردىڭ بۇگىندە شىنىمەن بار ەكەنىنە كوز جەتكىزىپ الايىق.
8. ا) ەحوبا كادىمگى يسرايل حالقىن قانداي حالىقپەن الماستىردى؟ ٵ) رۋحاني جەر يا رۋحاني جۇماق دەگەن نە؟ ب) بۇل جەر قاشان پايدا بولدى جانە وندا كىمدەر قونىس تەپتى؟
8 وسىعان دەيىنگى ايانداردىڭ بىرىندە ەحوبا يسرايلدىڭ قالپىنا كەلۋى جايلى پايعامبارلىقتار «قىزمەتشىسى ٴداۋىت» پاتشا بولعاننان كەيىن عانا كەڭ كولەمدە ورىندالاتىنىن ايتقان ەدى (ەزەك. 37:24). ال «قىزمەتشىسى ٴداۋىت»، ياعني يسا ٴماسىح 1914-جىلى پاتشا بولدى. بۇل كەزدە كادىمگى يسرايلدىكتەردىڭ ورنىن رۋحاني يسرايلدىكتەر، ياعني رۋحپەن مايلانعان ماسىحشىلەردەن تۇراتىن قۇداي حالقى باسقانىنا ٴبىراز ۋاقىت بولعان ەدى (ماتاي 21:43؛ پەتىردىڭ 1-حاتى 2:9 وقىڭىز). الايدا ەحوبا كادىمگى يسرايل حالقىن رۋحاني حالىقپەن الماستىرىپ قانا قويعان جوق، ول كادىمگى يسرايل جەرىن دە رۋحاني جەرمەن، ياعني رۋحاني جۇماقپەن الماستىردى (يشايا 66:8). وسى باسىلىمنىڭ 17-تاراۋىنان بىلگەنىمىزدەي، رۋحاني جۇماق دەپ مايلانعاندار تامتىعى 1919-جىلدان بەرى ەحوباعا عيبادات ەتەتىن قاۋىپسىز ٵرى رۋحاني كوركەيىپ جاتقان ورتانى ايتامىز («نەگە 1919-جىل؟» دەپ اتالاتىن ٵ9 قورشاۋىن قاراڭىز). ۋاقىت وتە رۋحاني جەرگە «باسقا دا قويلار»، ياعني جەردە ٶمىر سۇرۋگە ۇمىتتەنەتىن ادامدار دا قونىس تەبە باستادى (جوح. 10:16). بۇل رۋحاني جۇماق بۇگىندە بارعان سايىن كوركەيىپ، كەڭەيىپ جاتسا دا، ونىڭ اكەلەتىن باتالارىن تولىقتاي تەك ارماگەددوننان كەيىن عانا كورەتىن بولامىز.
جەردى تەڭدەي ٴبولۋ
9. ەحوبا جەردى بولۋگە قاتىستى ەگجەي-تەگجەيلى قانداي نۇسقاۋ بەردى؟
9 ەزەكيەل 48:1، 28 وقىڭىز. مۇرالى جەردىڭ سىرتقى شەگارالارىن بەلگىلەگەننەن كەيىن، ەحوبا ونى قالاي ٴبولۋ كەرەكتىگىن دە ەگجەي-تەگجەيلى ٴتۇسىندىردى. ول 12 رۋدىڭ مۇرالى جەرلەرىن سولتۇستىكتەن وڭتۇستىككە قاراي تەڭدەي ەتىپ ٴبولۋدى بۇيىردى. بۇل جەر سولتۇستىكتەگى دان رۋىنىڭ شەگاراسىنان باستالىپ، وڭتۇستىكتەگى عاد رۋىنىڭ شەگاراسىمەن اياقتالدى. 12 رۋدىڭ ۇلەسىنە تيگەن جەردىڭ ٵرقايسىسى شىعىستاعى سىرتقى شەگارادان باستاپ باتىستاعى ۇلى تەڭىزگە (جەرورتا تەڭىزىنە) دەيىن كولدەنەڭىنەن سوزىلىپ جاتتى (ەزەك. 47:20؛ «جەردى ۇلەستەرگە ٴبولۋ» دەگەن قورشاۋداعى كارتانى قاراڭىز).
10. اياننىڭ بۇل تۇسى جەر اۋدارىلعان ياھۋديلەرگە قانداي سەنىمدىلىك بەردى؟
10 اياننىڭ بۇل تۇسى جەر اۋدارىلعان ياھۋديلەرگە قانداي سەنىمدىلىك بەردى؟ ەزەكيەل جەردىڭ ۇلەستەرگە ٴبولىنۋىن ەگجەي-تەگجەيلى سۋرەتتەپ بەرگەندە، حالىق جەردىڭ ٴبولىنۋى بولاشاقتا اسقان تارتىپپەن ىسكە اساتىنىن تۇسىنسە كەرەك. 12 رۋدىڭ اراسىندا جەردىڭ ناقتى-ناقتى ٴبولىنۋى تاعى مىناعان نىق سەندىردى: تۇتقىندىقتان ورالعان ياھۋديلەردىڭ ٴبارى قايتا قالپىنا كەلگەن جەردەن ٶز ۇلەسىن الاتىن بولادى. ارالارىندا ٷيسىز-كۇيسىز جۇرەتىن ەشكىم بولمايدى.
11. جەردىڭ ۇلەستەرگە ٴبولىنۋى جايلى ايان ٴبىزدى قالاي جىگەرلەندىرەدى؟ («جەردى ۇلەستەرگە ٴبولۋ» دەگەن قورشاۋدى قاراڭىز.)
11 بۇل ايان بۇگىندە ٴبىزدى قالاي جىگەرلەندىرەدى؟ ەجەلدە ۋادە ەتىلگەن جەر قالپىنا كەلگەندە، تەك ٴدىني قىزمەتكەرلەر، لەۋىلىكتەر مەن باسشىلار عانا ەمەس، 12 رۋدىڭ ادامدارىنىڭ ٴبارى مۇرالى ۇلەس العان (ەزەك. 45:4، 5، 7، 8). سول سياقتى، بۇگىندە رۋحاني جۇماقتا تەك مايلانعان تامتىقتىڭ، سونداي-اق «ۇلى جاماعاتتىڭ» اراسىندا جەتەكشىلىكتى قولعا العانداردىڭ عانا ەمەس، ۇلى جاماعاتقا جاتاتىنداردىڭ ٴبارىنىڭ دە ٶز ۇلەسى بارa (ايان 7:9). ۇيىمداعى اتقارىپ جۇرگەن ٴرولىمىز قانشالىقتى قاراپايىم بولماسىن، ٴبارىمىزدىڭ دە رۋحاني جۇماقتا ٶزىمىزدىڭ الار ورنىمىز بەن اتقاراتىن باعالى تاپسىرمامىز بار. بۇل نەتكەن جۇرەك تولقىتارلىق شىندىق دەسەڭىزشى!
ۇيىمدا قانداي قىزمەت اتقارمايىق، ەحوبا تالپىنىسىمىزدى جوعارى باعالايدى (11-ابزاستى قاراڭىز)
ەكى ماڭىزدى وزگەشەلىكتىڭ ٴبىز ٷشىن قانداي ٴمانى بار؟
12، 13. جەردى رۋلارعا ٴبولىپ بەرۋگە قاتىستى ەحوبا قانداي ەرەكشە نۇسقاۋلار بەردى؟
12 ەحوبانىڭ جەردى بولۋگە قاتىستى بەرگەن كەيبىر نۇسقاۋلارى ەزەكيەلدى ويلاندىرىپ تاستاسا كەرەك. ويتكەنى ولار قۇدايدىڭ مۇساعا بەرگەن نۇسقاۋلارىنان وزگەشە ەدى. سول وزگەشەلىكتەردىڭ ٴبىرى جەردىڭ وزىنە قاتىستى بولسا، ەكىنشىسى ونىڭ تۇرعىندارىنا قاتىستى ەدى.
13 جەرگە قاتىستى وزگەشەلىك. مۇساعا بەرىلگەن نۇسقاۋ بويىنشا، ۇلكەن رۋلار كىشىرەك رۋلارعا قاراعاندا كوبىرەك جەر الۋ كەرەك-ٴتىن (مۇس. 4-ج. 26:52—54). ال ەزەكيەلدىڭ ايانىندا ەحوبا بارلىق رۋلارعا «بىردەي ۇلەس» بەرۋدى تاپسىرىپ، ەرەكشە نۇسقاۋ بەردى (ەزەك. 47:14). دەمەك، 12 رۋعا بولىنگەن جەردىڭ ٵرقايسىسىنىڭ سولتۇستىك شەگاراسى مەن وڭتۇستىك شەگاراسىنىڭ اراسى بىردەي بولۋ كەرەك بولعان. وسىلايشا، ۋادە ەتىلگەن جەردىڭ سۋلارى مەن ونىمدەرى، قاي رۋعا جاتسا دا، يسرايلدىكتەردىڭ بارىنە بىردەي تيمەك ەدى.
14. ەحوبانىڭ جاتجەرلىكتەرگە قاتىستى بەرگەن بۇيرىعى مۇسا زاڭىنداعى تالاپقا قاي جاعىنان كەرەعار بولدى؟
14 تۇرعىندارعا قاتىستى وزگەشەلىك. مۇسا زاڭى جاتجەرلىكتەردىڭ قۇقىعىن قورعاعان، ٵرى ولارعا ەحوباعا عيبادات ەتۋگە مۇمكىندىك بەرگەن. ٴبىراق جاتجەرلىكتەرگە جەردەن ەشقانداي ۇلەس بەرىلمەيتىن (مۇس. 3-ج. 19:33، 34). ال ەحوبانىڭ ەزەكيەلگە ايتقان سوزدەرى بۇل تالاپقا كەرەعار ەدى. ەحوبا وعان: «جاتجەرلىك كىسى قاي رۋدىڭ جەرىندە قونىستانعان بولسا، وعان سول جەردەن ۇلەس بەرىڭدەر»،— دەگەن بۇيرىق بەردى. وسىلايشا، ەحوبا «جەرگىلىكتى يسرايلدىكتەر» مەن جاتجەرلىكتەردىڭ اراسىندا بولعان ۇلكەن ەرەكشەلىكتى جويدى (ەزەك. 47:22، 23). ەزەكيەلدىڭ ايانىندا قايتا قالپىنا كەلگەن جەردە ەحوباعا عيبادات ەتەتىن تۇرعىنداردىڭ اراسىندا تولىق تەڭدىك پەن بىرلىك بولعان (مۇس. 3-ج. 25:23).
15. جەر مەن ونىڭ تۇرعىندارىنا قاتىستى نۇسقاۋلاردان ەحوبا جايلى قانداي وزگەرمەس شىندىق انىق كورىندى؟
15 جەر مەن ونىڭ تۇرعىندارى جايلى وسى ەكى نۇسقاۋ تۇتقىنداعى ياھۋديلەردىڭ بويىنا جىگەر قۇيىپ، سەنىمدىلىك دارىتسا كەرەك. ويتكەنى ولار جەردىڭ، جەرگىلىكتى يسرايلدىك بولسىن، ەحوباعا عيبادات ەتەتىن جاتجەرلىك بولسىن — بارىنە تەڭدەي بولىنەتىنىن ٴتۇسىندى (ەزرا 8:20؛ نەح. 3:26؛ 7:6، 25؛ يشايا 56:3، 8). سونىمەن قاتار بۇل نۇسقاۋلاردان قانات بىتىرەر ٵرى ەش وزگەرمەس ٴبىر شىندىق انىق كورىندى: ەحوبا ٷشىن قىزمەتشىلەرىنىڭ ٴبارى بىردەي باعالى (حاگەي 2:7 وقىڭىز). بۇگىندە كوكتە نە جەردە ٶمىر سۇرۋگە ۇمىتتەنبەيىك، ٴبارىمىز ٷشىن وسى شىندىق اسا قۇندى!
16، 17. ا) جەر مەن ونىڭ تۇرعىندارى جايلى بىلگەندەرىمىزدىڭ ٴبىز ٷشىن قانداي پايداسى بار؟ ٵ) كەلەسى تاراۋدا نە جايلى ٴسوز قوزعايمىز؟
16 جەر مەن ونىڭ تۇرعىندارى جايلى بىلگەندەرىمىزدىڭ ٴبىز ٷشىن قانداي پايداسى بار؟ ولار ٴبىزدىڭ دۇنيەجۇزىلىك باۋىرلاستىعىمىزدى بارىنەن بۇرىن تەڭدىك پەن بىرلىك ەرەكشەلەندىرۋ كەرەكتىگىن ەسىمىزگە سالادى. ەحوبا — ەشكىمدى الالامايتىن قۇداي. سوندىقتان بىلاي دەپ ويلانعانىمىز ٴجون: «مەن دە ەحوبا سياقتى، ادامداردى الالامايمىن با؟ باۋىرلاستاردى ۇلت-ٴناسىلى مەن ومىردەگى جاعدايىنا قاراماي، شىن جۇرەكتەن قۇرمەتتەيمىن بە؟» (ريم. 12:10). بۇگىندەگى رۋحاني جۇماقتىڭ يگىلىگىن ٴبارىمىز بىردەي كورە الاتىنىمىز ٷشىن ٴبىز قانشالىقتى ريزامىز دەسەڭىزشى! ول جەردە بارلىعىمىز دا جان-تانىمىزبەن كوكتەگى اكەمىز ەحوباعا قىزمەت ەتىپ، ونىڭ باتاسىنا كەنەلە الامىز (عال. 3:26—29؛ ايان 7:9).
ەحوبا سياقتى ٴبىز دە وزگەلەردى الالاماي، شىنايى قۇرمەت تانىتامىز با؟ (15، 16-ابزاستى قاراڭىز)
17 ال ەندى ەزەكيەلدىڭ وسى ايانىنىڭ سوڭعى بولىگىندە ايتىلعان ٴتورتىنشى ۋادەگە وتەيىك. ول ەحوبا ٶزىنىڭ تۇتقىنداعى حالقىنىڭ اراسىندا بولاتىندىعى جايلى ەدى. وسى ٴتورتىنشى ۋادەدەن ٴبىز نە تۇيەتىنىمىز جايلى كەلەسى تاراۋدا ٴسوز قوزعايمىز.
a ەحوبانىڭ رۋحاني جۇماقتاعى ٴدىني قىزمەتكەرلەر مەن باسشىعا قانداي ەرەكشە ورىن بەلگىلەپ، قانداي تاپسىرما بەرگەنى جايىندا وسى باسىلىمنىڭ 14-تاراۋىنان بىلە الاسىز.
-
-
«بۇل قالا «ەحوبا سول جەردە» دەپ اتالاتىن بولادى»ەحوبا تازا عيباداتتى قالپىنا كەلتىردى!
-
-
21-تاراۋ
«بۇل قالا «ەحوبا سول جەردە» دەپ اتالاتىن بولادى»
ويباعدار: قالا مەن تارتۋدىڭ ماعىناسى
1، 2. ا) اياندا جەر تەلىمى قانداي ماقساتپەن ٴبولىندى؟ (مۇقاباداعى سۋرەتتى قاراڭىز.) ٵ) بۇل ايان جەر اۋدارىلعان ياھۋديلەردى نە نارسەگە سەندىردى؟
ەزەكيەل سوڭعى ايانىندا ارنايى ٴبىر ماقسات ٷشىن بولىنگەن جەر تەلىمىن كوردى. بۇل جەر تەلىمى يسرايل رۋلارىنىڭ ۇلەسىنە بەرىلۋ ٷشىن ەمەس، ەحوباعا تارتۋ رەتىندە ۇسىنىلۋ ٷشىن بولىنگەن. تاعى بۇل اياندا ەزەكيەل اتى ەرەكشە ٴبىر كەرەمەت قالانى كوردى. اياننىڭ ٴدال وسى تۇسى جەر اۋدارىلعان ياھۋديلەردى ەڭ ماڭىزدى نارسەگە — سۇيىكتى اتامەكەندەرىنە ورالعاندا، ەحوبا ولارمەن بىرگە بولاتىنىنا — سەندىردى.
2 ەحوباعا تارتۋ ەتىلگەن جەر تەلىمىن ەزەكيەل ەگجەي-تەگجەيلى سۋرەتتەدى. وسى ٷزىندىنىڭ ەحوبانىڭ بۇگىندەگى شىنايى عيبادات ەتۋشىلەرى ٷشىن زور ٴمانى بار بولعاندىقتان، قازىر ونى جان-جاقتى قاراستىرىپ كورەيىك.
كيەلى تارتۋ جانە قالا
3. ەحوبا بولگەن ارنايى جەر تەلىمى قانداي بەس بولىكتەن تۇردى جانە ولار قانداي ماقساتپەن ٴبولىندى؟ («تارتۋ رەتىندە ٴبولىپ قويىڭدار» دەگەن قورشاۋدى قاراڭىز.)
3 ارنايى ماقسات ٷشىن بولىنگەن جەر تەلىمىنىڭ ورتاسىندا ەنى دە، ۇزىندىعى دا 25 000 شىنتاق (13 km) بولاتىن جەر بولدى. «تارتۋ» دەپ اتالاتىن بۇل ٴتورتبۇرىشتى جەر كولدەنەڭىنەن جاتقان ٷش بولىكتەن تۇردى. جوعارعى بولىگى لەۋىلىكتەرگە، ال ورتاڭعى بولىگى عيباداتحانا مەن ٴدىني قىزمەتكەرلەرگە ارنالدى. بۇل ەكى بولىك «كيەلى تارتۋ» دەپ اتالدى. ال تومەندەگى بولىك، ياعني «قالعان جەر» جالپى قولدانىسقا بەرىلدى. بۇل جەر قالا ٷشىن ٴبولىندى (ەزك 48:15، 20).
4. ەحوباعا تارتۋ ەتىلگەن جەر تەلىمى جايلى اياننان قانداي ٴتالىم الامىز؟
4 ەحوباعا تارتۋ ەتىلگەن جەر تەلىمى جايلى بۇل اياننان قانداي ٴتالىم الامىز؟ ەحوبا الدىمەن تارتۋ رەتىندە ۇسىنىلاتىن جەردى، سودان كەيىن عانا رۋلاردىڭ جەرىن بولگەن. بۇنىمەن ول وسى رۋحاني ورتالىق بارىنەن دە جوعارى تۇرۋ كەرەكتىگىن كورسەتتى (ەزەك. 45:1). جەردىڭ وسىنداي رەتپەن بولىنگەنىنە قاراپ، تۇتقىنداعى ياھۋديلەر ماڭىزدى ٴبىر نارسە تۇيسە كەرەك. ولار ەحوباعا عيبادات ەتۋدى ومىرلەرىندە باستى ورىنعا قويۋ كەرەك بولعان. بۇگىندە ٴبىز دە قۇداي ٴسوزىن زەرتتەۋ، قاۋىم كەزدەسۋلەرىنە بارۋ جانە ۋاعىز ىسىنە قاتىسۋ سياقتى رۋحاني ٸس-شارالاردى بارىنەن دە ماڭىزدى سانايمىز. ەگەر ەحوباعا ەلىكتەپ، ىستەردى دۇرىس رەتپەن اتقارساق، عيباداتىمىز كۇندەلىكتى ومىرىمىزدە باستى ورىندا تۇراتىن بولادى.
«قالا وسى جەردىڭ ورتاسىندا ورنالاسادى»
5، 6. ا) قالا كىمنىڭ مەنشىگى ەدى؟ ٵ) بۇل قالا نەنى بىلدىرمەيدى جانە نەگە؟
5 ەزەكيەل 48:15 وقىڭىز. ال قالا مەن ونىڭ اينالاسىنداعى جەر جايىندا اياندا نە ايتىلدى؟ (ەزەك. 48:16—18). «بۇل بۇكىل يسرايل ٷيىنىڭ مەنشىگى بولادى»،— دەدى ەحوبا (ەزەك. 45:6، 7). سوندىقتان بۇل قالا مەن ونىڭ اينالاسىنداعى جەر «ەحوباعا ارناپ ٴبولىنۋى ٴتيىس» «كيەلى تارتۋعا» كىرمەگەن (ەزەك. 48:9). وسى ەرەكشەلىكتى ەستە ۇستاي وتىرىپ، وسى قالادان نە بىلۋگە بولاتىنىن كورەيىك.
6 ٴبىراق الدىمەن بۇل قالا نەنى بىلدىرمەيتىنىن قاراستىرىپ كەتەيىك. بۇل قالا ىشىندە عيباداتحاناسى بار قايتا تۇرعىزىلعان يەرۋساليمدى بىلدىرمەيدى. ويتكەنى ەزەكيەلدىڭ ايانىنداعى بۇل قالادا عيباداتحانا بولماعان. سونداي-اق ول — قايتا قالپىنا كەلگەن يسرايلدەگى باسقا ٴبىر قالا دا ەمەس. ويتكەنى ەلدەرىنە ورالعان ياھۋديلەر دە، ولاردىڭ ٷرىم-بۇتاعى دا اياندا سيپاتتالعان وسى قالانى ەشقاشان سوقپاعان. ايانداعى قالا — كوكتەگى قالا دا ەمەس. ويتكەنى بۇل قالا «قاسيەتتى ەمەس جەردە»، ياعني جالپى قولدانىسقا بەرىلگەن جەردە تۇرعان. بۇل جەر قاسيەتتى عيباداتقا ارناپ بولىنگەن جەردەن قاتتى ەرەكشەلەنگەن (ەزەك. 42:20).
7. ەزەكيەلدىڭ كورگەنى قانداي قالا جانە ول نەنى بىلدىرسە كەرەك؟ (تاراۋدىڭ باسىنداعى سۋرەتتى قاراڭىز.)
7 سونىمەن، ەزەكيەلدىڭ كورگەنى نەندەي قالا؟ ەسىمىزدە بولسا، ول بۇل قالانى جەر جايلى ايانىندا كورگەن (ەزەك. 40:2؛ 45:1، 6). ال بۇل جەر، قۇداي سوزىنەن كورەتىنىمىزدەي، بەينەلى ماعىناداعى جەردى بىلدىرەدى. سوندىقتان بۇل قالا دا بەينەلى ماعىناداعى قالاعا نۇسقاسا كەرەك. ادەتتە ٴبىز قالا دەپ نەنى ايتامىز؟ بۇل ادامدار شوعىرلانعان ٵرى قانداي دا ٴبىر ٴتارتىپ پەن جۇيە ورناعان جەردى بىلدىرەدى. ەندەشە، ەزەكيەل كورگەن ٴتورت جاعى بىردەي ٴتورتبۇرىشتى قالا وتە جاقسى ۇيىمداستىرىلعان باسقارما جۇيەسىن بىلدىرەدى دەي الامىز.
8. بۇل باسقارما قاي جەردى باسقارادى جانە مۇنى قايدان بىلەمىز؟
8 بۇل باسقارما قاي جەردى باسقارادى؟ ەزەكيەلدىڭ ايانىنان كورۋگە بولاتىنداي، ول رۋحاني جەردى باسقارادى. بۇل باسقارما بۇگىندەگى قۇداي حالقىنىڭ ٸس-شارالارىنا باعىت-باعدار بەرەدى. ال قالانىڭ قاسيەتتى ەمەس جەردە، ياعني جالپى قولدانىسقا بەرىلگەن جەردە تۇرعانى نەگە نۇسقايدى؟ بۇل ونىڭ كوكتەگى ەمەس، جەردەگى باسقارماعا نۇسقايتىنىن كورسەتەدى. بۇل باسقارما رۋحاني جۇماقتىڭ بارلىق تۇرعىندارىنىڭ يگىلىگى ٷشىن قىزمەت ەتەدى.
9. ا) جەردەگى باسقارمانى كىمدەر قۇرايدى؟ ٵ) يسا مىڭجىلدىق بيلىگى كەزىندە نە ىستەيدى؟
9 جەردەگى بۇل باسقارمانى كىمدەر قۇرايدى؟ ەزەكيەلدىڭ ايانىندا قالانىڭ ىستەرىن باسقاراتىن «باسشى» تۋرالى ايتىلادى (ەزەك. 45:7). ول حالىققا جەتەكشىلىك ەتكەن. الايدا ول ٴدىني قىزمەتكەر دە، لەۋىلىك تە ەمەس ەدى. بۇل باسشى بۇگىندە قاۋىمداعى رۋحپەن مايلانباعان باقىلاۋشىلاردى ەسىمىزگە سالار. «باسقا قويلارعا» جاتاتىن جەردەگى بۇل قامقور باعۋشىلار ٴماسىحتىڭ كوكتەگى ۇكىمەتىنىڭ كىشىپەيىل قىزمەتشىلەرى بولىپ تابىلادى (جوح. 10:16). مىڭجىلدىق بيلىگى كەزىندە يسا ۇلگىلى اقساقالداردى، ياعني «بەكزادالاردى» تاڭداپ، ولاردى «بۇكىل جەرجۇزىنە» تاعايىندايدى (ٴزاب. 45:16). كوكتەگى پاتشالىقتىڭ جەتەكشىلىگىمەن ولار مىڭ جىل بويى قۇداي حالقىنىڭ قامى ٷشىن قىزمەت ەتەدى.
«ەحوبا سول جەردە»
10. قالا قالاي اتالعان جانە بۇل اتاۋ قانداي سەنىمدىلىك بەردى؟
10 ەزەكيەل 48:35 وقىڭىز. ايانداعى قالا «ەحوبا سول جەردە» دەپ اتالعان. بۇل اتاۋ مىناعان سەنىمدىلىك بەردى: قالادا ەحوبانىڭ بار ەكەنى سەزىلىپ تۇرماق ەدى. قالپىنا كەلگەن جەردىڭ ورتاسىندا ورنالاسقان بۇل قالانى اياندا كورسەتۋىمەن ەحوبا جەر اۋدارىلعان ياھۋديلەرگە: «مەن قايتادان سەندەرمەن بىرگە بولامىن!»— دەگەندەي بولدى. سەنىمدىلىك بەرەتىن بۇدان اسقان قانداي كەپىلدىك بولۋى مۇمكىن؟!
11. ەزەكيەلدىڭ قالا تۋرالى ايانىنان جانە قالانىڭ ماعىناعا تولى اتىنان نە تۇيەمىز؟
11 ەزەكيەلدىڭ پايعامبارلىعىنىڭ وسى تۇسىنان نە تۇيسەك بولادى؟ باسقارما جۇيەسىن بىلدىرەتىن بۇل قالانىڭ اتى بۇگىندەگى قۇداي قىزمەتشىلەرىن مىنا جايتقا نىق سەندىرەدى: ەحوبا قازىردىڭ وزىندە جەردەگى قىزمەتشىلەرىنىڭ اراسىندا، ٵرى ول ماڭگىلىك بويى دا ارالارىندا بولا بەرمەك. ماعىناعا تولى بۇل اتاۋ تاعى مىنا ٴبىر ماڭىزدى شىندىققا نازار اۋدارادى: باسقارما جۇيەسىن بىلدىرەتىن قالانىڭ سوعىلعان ماقساتى — ادامدارعا بيلىك بەرۋ ەمەس، ەحوبانىڭ سۇيىسپەنشىلىك پەن پاراساتتىلىققا تولى شارالارىن ىسكە اسىرۋ. مىسالى، ەحوبا قالاداعى باسقارماعا جەردى ٶز قالاعاندارىنشا بولۋگە بيلىك بەرمەگەن. قىزمەتشىلەرىنىڭ بارىنە، وتە قاراپايىم دەگەندەرىنە دە، رۋحاني جەردەن ورىن بەرەتىن — ونىڭ ٶزى. ەحوبا ولاردىڭ سول ورىندارىنا باسقارماداعىلار قۇرمەتپەن قارايدى دەپ كۇتەدى (ناق. س. 19:17؛ ەزەك. 46:18؛ 48:29).
12. ا) قالانىڭ تاعى قانداي ەرەكشە تۇسى بار جانە بۇل نەنى كورسەتەدى؟ ٵ) قالانىڭ وسى تۇسى ٴماسىحشى باقىلاۋشىلار ٷشىن قانداي ماڭىزدى ەسكەرتۋ بولىپ تابىلادى؟
12 «ەحوبا سول جەردە» دەپ اتالاتىن قالانىڭ تاعى قانداي ەرەكشە تۇسى بار؟ ەجەلگى قالالاردىڭ قورعانىس ٷشىن سوعىلعان دۋالدارىندا قاقپالار مۇمكىندىگىنشە از بولعان. ٴبىراق بۇل قالانىڭ 12 قاقپاسى بولدى! (ەزەك. 48:30—34). قاقپالاردىڭ وسىنشا كوپ بولعانى (ٴتورتبۇرىشتى قالانىڭ ٵر جاعىندا ٷش-ٷش قاقپادان بولعان) قۇدايدىڭ بارلىق قىزمەتشىسى باسقارماداعىلارعا كەز كەلگەن ۋاقىتتا ٵرى ەمىن-ەركىن بارا العانىن كورسەتەدى. ال قاقپانىڭ سانى 12 بولعانى قالانىڭ ەسىگى «بۇكىل يسرايل ۇيىنە»، ياعني ٵربىر ادامعا اشىق بولعانىن كورسەتەدى (ەزەك. 45:6). بۇل جايت ٴماسىحشى باقىلاۋشىلار ٷشىن ماڭىزدى ەسكەرتۋ بولىپ تابىلادى. ەحوبا رۋحاني جۇماقتا ٶمىر ٴسۇرىپ جاتقانداردىڭ ٴبارى ولارعا كەز كەلگەن ۋاقىتتا ٵرى ەمىن-ەركىن جاقىنداي العانىن قالايدى.
ٴبىز قاۋىمداعى باقىلاۋشىلارعا كەز كەلگەن ۋاقىتتا ٵرى ەمىن-ەركىن جاقىنداي الامىز (12-ابزاستى قاراڭىز)
حالىقتىڭ عيبادات ەتۋ ٷشىن جانە قالاعا قىزمەت كورسەتۋ ٷشىن كەلۋى
13. ەحوبا اياندا قانداي قىزمەتشىلەردى اتاپ ٶتتى؟
13 قازىر ەزەكيەلدىڭ زامانىنا ورالىپ، جەردى ٴبولۋ تۋرالى اياننىڭ باسقا دا تۇستارىنا كوڭىل بۇرايىق. اياندا ەحوبا ٴتۇرلى قىزمەت اتقارىپ جۇرگەن ادامداردى اتاپ وتكەن. ٴبىرىنشىسى — «عيباداتحانا قىزمەتشىلەرى». ولار قۇرباندىقتار شالىپ، «ەحوبانىڭ الدىندا قىزمەت ەتەتىن ٴدىني قىزمەتكەرلەر». ەكىنشىسى دە — «عيباداتحانا قىزمەتشىلەرى». ولار «عيباداتحاناداعى قىزمەت پەن اتقارىلۋى ٴتيىس كۇللى جۇمىستىڭ قامىن جەيتىن» لەۋىلىكتەر (ەزەك. 44:14—16؛ 45:4، 5). ٷشىنشى توپ — قالانىڭ اينالاسىندا قىزمەت ەتەتىن ادامدار. ولار كىمدەر؟
14. قالانىڭ اينالاسىنداعى قىزمەتشىلەر بۇگىندە نەنى ەسىمىزگە سالادى؟
14 قالانىڭ اينالاسىندا قىزمەت ەتىپ، قالاعا قولداۋ كورسەتەتىن ادامدار «يسرايلدىڭ كۇللى رۋلارىنان شىققان». ولارعا «قالا جۇمىسشىلارىن اس-سۋمەن قامتاماسىز ەتۋ ٷشىن» ەگىن ٶسىرۋ تاپسىرىلعان (ەزەك. 48:18، 19). بۇل شارا بۇگىندە رۋحاني جۇماقتىڭ بارلىق تۇرعىندارىندا بار ٴبىر مۇمكىندىكتى ەسىمىزگە سالادى. بۇل — ٴماسىحتىڭ مايلانعان باۋىرلارىنىڭ قىزمەتىنە جانە «ۇلى جاماعاتتىڭ» اراسىندا جەتەكشىلىك ەتۋگە تاعايىندالعان ەر ادامداردىڭ قىزمەتىنە قولداۋ كورسەتۋ مۇمكىندىگى (ايان 7:9، 10). ولارعا قولداۋ كورسەتۋدىڭ ەڭ باستى جولى — ادال دا اقىلدى قۇلدىڭ بەرگەن نۇسقاۋلارىن شىن جۇرەكتەن ۇستانۋ.
15، 16. ا) ەزەكيەلدىڭ ايانىنىڭ قىزمەتىمىزگە قاتىستى تاعى ٴبىر تۇسى قانداي؟ ٵ) ەزەكيەلدىڭ ايانىنداعى ادامدار سياقتى ٴبىزدىڭ دە قانداي شارالارعا اتسالىسۋعا مۇمكىندىگىمىز بار؟
15 ەزەكيەلدىڭ ايانىنىڭ قىزمەتىمىزگە قاتىستى تاعى ٴبىر تۇسى بار. قانداي؟ ەحوبا لەۋىلىكتەر اۋلەتىنە جاتپايتىن 12 رۋدىڭ ادامدارى عيباداتحانا اۋلاسىندا جانە قالانىڭ جايىلىمىندا جۇرەتىنىن ايتقان. ولار بۇل ەكى جەردە نە ىستەگەن؟ عيباداتحانانىڭ اۋلاسىنا بارلىق رۋدىڭ ادامدارى كەلىپ، ەحوباعا قۇرباندىقتار ۇسىنىپ، «عيبادات ەتكەن» (ەزەك. 46:9، 24). ال قالانىڭ جايىلىمىندا ولار جەر وڭدەپ، قالاعا قولداۋ كورسەتكەن. بۇل ادامداردان ٴبىز نە نارسەگە ۇيرەنە الامىز؟
16 بۇگىندە ۇلى جاماعاتقا جاتاتىندار دا ەزەكيەلدىڭ ايانىنداعى ادامدار سياقتى ەكى شاراعا اتسالىسادى. ولار ماداقتاۋ قۇرباندىقتارىن ۇسىنىپ، ەحوباعا «ونىڭ عيباداتحاناسىندا» عيبادات ەتەدى (ايان 7:9—15). ولار مۇنى ۋاعىز ىسىنە قاتىسۋ ارقىلى جانە قاۋىم كەزدەسۋلەرىندە تۇسىنىكتەمە بەرۋ، ماداق اندەرىن شىرقاۋ ارقىلى ىستەيدى. ەحوباعا وسىلاي عيبادات ەتۋدى ولار ەڭ باستى مىندەت دەپ سانايدى (شەج. 1-ج. 16:29). بۇدان بولەك، قۇداي قىزمەتشىلەرىنىڭ كوبىسى ٴتۇرلى جولدارمەن قۇداي ۇيىمىنا قولداۋ كورسەتەدى. مىسالى، ولار پاتشالىق سارايلارى مەن بەتەل عيماراتتارىن سوعۋعا جانە جوندەۋگە كومەكتەسەدى، سونداي-اق ەحوبانىڭ ۇيىمىنداعى ٴتۇرلى جوبالاردى ىسكە اسىرۋعا قولعابىس ەتەدى. باسقالارى بولسا، مۇنداي جوبالارعا ەرىكتى ساداقالارىمەن قولداۋ كورسەتەدى. جەردى وڭدەۋگە جاتاتىن بۇل ىستەردىڭ ٴبارىن ولار «قۇدايدى دارىپتەۋ» ٷشىن ىستەيدى (قور. 1-ح. 10:31). ولار وزدەرىنە جۇكتەلگەن ٸستى قۇلشىنا ٵرى قۋانىشپەن اتقارادى، ويتكەنى «مۇنداي قۇرباندىقتار قۇدايعا ۇنامدى» ەكەنىن بىلەدى (ەۆر. 13:16). ال ٴسىز وسى مۇمكىندىكتەردى بارىنشا پايدالانىپ ٴجۇرسىز بە؟
قالا قاقپالارىنىڭ اينالاسىندا اتقارىلىپ جاتقان ىستەردەن ٴبىز نە تۇيەمىز؟ (14—16-ابزاستاردى قاراڭىز)
«جاڭا اسپان مەن جاڭا جەردى كۇتۋدەمىز»
17. ا) ەحوباعا ارناپ بولىنگەن تارتۋ جايلى ايان كەڭ كولەمدە قالاي ورىندالادى؟ ٵ) مىڭجىلدىق بيلىك كەزىندە باسقارما جۇيەسىنىڭ يگىلىگىن كىمدەر كورەدى؟
17 ەحوباعا ارناپ بولىنگەن تارتۋ جايلى ايان بولاشاقتا كەڭ كولەمدە ورىندالا ما؟ ٴيا! ەسىمىزدە بولسا، ەزەكيەل «ەحوبانىڭ عيباداتحاناسى» ورنالاسقان «كيەلى تارتۋ» جەردىڭ ورتاسىندا ورنالاسقانىن كورگەن ەدى (ەزەك. 48:10). بۇل بىزگە ارماگەددوننان كەيىن، جەردىڭ قاي بۇرىشىندا جۇرسەك تە، ەحوبا ارامىزدا بولاتىنىنا سەنىمدىلىك بەرەدى (ايان 21:3). قالا رەتىندە بەينەلەنگەن باسقارما جۇيەسى، ياعني قۇداي حالقىنىڭ يگىلىگى ٷشىن جەر بەتىندە قىزمەت ەتۋگە تاعايىندالاتىندار يسانىڭ مىڭجىلدىق بيلىگى كەزىندە بۇكىل جەرجۇزىن باسقاراتىن بولادى. ولار «جاڭا جەرگە»، ياعني قۇدايدىڭ ىقىلاسىنا يە بولعان ادامداردىڭ بارىنە سۇيىسپەنشىلىكپەن جەتەكشىلىك ەتىپ، باعىت-باعدار بەرەدى (پەت. 2-ح. 3:13).
18. ا) جەردەگى باسقارما جۇيەسى قۇدايدىڭ بيلىگىمەن ۇيلەسىمدى تۇردە ارەكەت ەتەتىنىنە نەگە سەنىمدى بولا الامىز؟ ٵ) قالانىڭ اتى بىزگە قانداي سەنىمدىلىك ۇيالاتادى؟
18 قالا رەتىندە بەينەلەنگەن باسقارما جۇيەسى قۇدايدىڭ بيلىگىمەن ٵردايىم ۇيلەسىمدى تۇردە ارەكەت ەتەتىن بولادى. بۇعان نەگە سەنىمدى بولا الامىز؟ ويتكەنى 12 قاقپاسى بار جەردەگى بۇل قالا 12 قاقپاسى بار كوكتەگى قالانىڭ، ياعني ٴماسىح پاتشا مەن 144 000 بيلەۋشىدەن تۇراتىن جاڭا يەرۋساليمنىڭ كورىنىسى ەكەنىن كيەلى كىتاپ انىق كورسەتەدى (ايان 21:2، 12، 21—27). وسىعان قاراپ، جەردەگى باسقارما كوكتەگى قۇداي پاتشالىعى شىعارعان شەشىمدەردەن اسپاي، ولاردى مۇقيات جۇزەگە اسىراتىنىنا سەنىمدى بولا الامىز. ٴيا، قالانىڭ «ەحوبا سول جەردە» دەگەن اتى اربىرىمىزگە مىناداي سەنىمدىلىك ۇيالاتادى: تازا عيبادات مىزعىماي تۇرادى جانە جۇماقتا ول ماڭگىلىك بويى وركەندەي بەرەدى. ٴبىزدى نەتكەن تاماشا بولاشاق كۇتىپ تۇر!
-