Римдіктерге
11 Ал енді мынаны сұрайын: “Сонда Құдайдың өз халқынан бас тартқаны ма?”+ Жоқ, мүлдем олай емес! Өйткені мен де Ыбырайымның ұрпағымын, бениямин руынан шыққан исраилдікпін. 2 Құдай о баста назар салған өз халқынан бас тартқан жоқ+. Жазбаларда Ілияс пайғамбар жайында не делінгенін, расында да, білмейсіңдер ме? Ілияс Исраил жайында Құдайға былай деп шағымданды: 3 “Ехоба, олар сенің пайғамбарларыңды өлтірді, құрбандық орындарыңды қиратып тастады. Жалғыз мен ғана қалдым, олар менің де жанымды алмақшы”+. 4 Ал Құдай оған: “Менің Бағалға тізе бүгіп табынбаған әлі де 7000 адамым бар”+,— деді емес пе? 5 Сол сияқты, қазіргі уақытта да Құдай өз халқынан рақым етіп таңдап алған тамтық қалдырды+. 6 Ал рақым+ етіп таңдалған болса, онда олар істерінің арқасында таңдалған жоқ+, әйтпесе рақым нағыз рақым болмас еді.
7 Онда не демекпіз? Исраил иемденуге ұмтылып жүрген нәрсесін иемденген жоқ, бірақ оны таңдап алынғандар иемденді+. Ал қалғандарының жүректері қатуланып кетті+. 8 Бұл туралы былай деп жазылған: “Құдай оларды терең ұйқыға батырды+ және көрмейтін көз, естімейтін құлақ берді. Олар әлі күнге дейін осындай күйде+”. 9 Дәуіт пайғамбар да былай деген: “Олардың дастарқандары өздеріне тұзақ, тор, сүріндіретін тас, алатын сыбағасы болсын. 10 Көздері тұманданып, көрмей қалсын. Белдері жазылмай, өмір бақи бүкірейіп қалсын+”.
11 Сондықтан мен: “Олар сүрінгенде, біржола құлады ма?”— деп сұрайын. Жоқ, мүлдем олай емес! Бірақ олардың жасаған шалыс қадамы басқа ұлттардың құтқарылуына жол ашты. Осылайша бұл олардың қызғанышын оятты+. 12 Олардың шалыс қадамы осы дүниені, ал азаюы басқа ұлттарды батаға кенелтсе+, олардың толық саны одан да зор батаға кенелтпей ме?!
13 Басқа ұлт адамдары, ендігі сөзім сендерге арналады. Мен басқа ұлттарға жіберілген елші+ ретіндегі қызметімді дәріптеймін+. 14 Осылайша, қалай болмасын, өз халқымның қызғанышын оятып, олардың бірсыпырасын құтқарамын ба деген үміттемін. 15 Олардың аластатылуы+ бұл дүние үшін Құдаймен татуласуды білдірсе, онда Құдайдың оларды қайта қабылдауы өлімнен қайта тірілумен тең болмай ма? 16 Қамырдың алғашқы өнім ретінде ұсынылған бөлігі қасиетті болса, бүкіл қамыр да қасиетті ғой. Сондай-ақ тамыр қасиетті болса, онда бұтақтары да қасиетті.
17 Ал Құдай кейбір бұтақтарды сындырып тастап, жабайы зәйтүн ағашы болсаң да, сені қалған бұтақтардың арасына телісе, әрі енді сен де солармен бірге бақтағы зәйтүн ағашының шырынды тамырынан нәр алып жатсаң, 18 сындырылған бұтақтардан асқақтап шіренбе. Ал асқақтайтын болсаң+, мынаны ұмытпа: сен тамырды емес, тамыр сені ұстап тұр. 19 Сірә, сен: “Бұтақтар мен теліну үшін+ сындырылып тасталды”,— дерсің. 20 Бұл рас. Өйткені олар сенімі жоқ болғандықтан сындырылып тасталды+, ал сен сеніміңнің арқасында тұрсың+. Ендеше асқақтауды қой, қайта, сақ бол! 21 Себебі Құдай ағаштың өз бұтақтарын аямаса, сені де аямайды. 22 Құдайдың мейірімі+ жайлы ойлап көрші: ол құлағандарға қатаңдық+, ал саған мейірім танытты. Оның мейірімінен айырылып қалма, әйтпесе сен де кесіліп тасталасың. 23 Сол сияқты, олар да сене бастаса, қайтадан телінеді+. Өйткені оларды қайта телу Құдайдың қолынан келеді. 24 Егер сен жабайы зәйтүн ағашынан кесіліп, қалыптасқан дағдыға қайшы болса да, бақтағы зәйтүнге телінсең, онда оның өз бұтақтары оған сөзсіз телінеді ғой!
25 Бауырластар, өздеріңді ақылды санап кетпеулерің үшін мына қасиетті құпияны білгендеріңді қалаймын+: басқа ұлт адамдарының толық саны жиналғанға дейін исраилдіктердің кейбірінің жүректері қасарысқан күйі қала бермек. 26 Осылай бүкіл Исраил+ құтқарылмақ. Бұл туралы мына сөздер жазылған: “Сионнан құтқарушы келіп+, Жақыптың ұрпағын жаман жолдан қайтарады. 27 Күнәларын кешіргенімде+, менің олармен жасасатын келісімім осы болады+”. 28 Иә, олардың ізгі хабарды қабылдамай, Құдаймен қас болғанының пайдасы сендерге тиюде. Бірақ Құдай ата-бабаларына уәде бергендіктен кейбірін таңдап алды, әрі оларды сүйеді+. 29 Себебі Құдай сыйлар бергеніне және оларды шақырғанына өкінбейді. 30 Сендер кезінде Құдайға мойынсұнбайтын едіңдер+, бірақ олардың мойынсұнбағандығынан+ өздеріңе мейірім көрсетіліп отыр+. 31 Ал қазір олар мойынсұнбай жүр, бірақ Құдай сендерге мейірімін түсіру арқылы оларға да мейірім көрсетпек. 32 Сонымен, Құдай барлығына мейірім көрсету үшін+, барлығын мойынсұнбаушылықтың тұтқыны етті+.
33 О, неткен зор Құдайдың баталары! Неткен мол даналығы мен білімі! Шешімдеріне адам ақылы жетпес, жолдарын оның ешкім зерттеп бітпес! 34 “Ехобаның ой-санасын кім танып-білген немесе кім оған кеңесші болған?”+ 35 “Ол қайтарып беретіндей, кім оған алдымен бірдеңе берген?”+ 36 Себебі барлық нәрсе Құдайдан, барлығы сол арқылы және сол үшін пайда болған. Құдай мәңгі бақи даңқтала берсін! Аумин.