Lukkarsi
23 Taava katersorsimasut tamarmik nikuipput Pilaatusimukaallugulu. 2 Imalu unnerluutigilerpaat: “Uuma angutip inuiaqatigut pikitsitseqqullugit kajumissaarpai, kaasarimut akileraartarnissaq inerteqqutigaa oqarlunilu nammineq Kristusiulluni kunngiusoq.” 3 Pilaatusip aperaa: “Juutit kunngigaatsit?” Akivoq: “Nammineq tamanna oqaatigaat.” 4 Taava Pilaatusip palasit nuimasut inuppassuillu oqarfigai: “Isumaqarpunga pillarnissaanut tunngavissaqanngitsoq.” 5 Oqaqattaarpulli: “Judiiami tamarmi, Galiliiamiit aallarteriarluni manna allaat angullugu, ilinniartitsinermigut inuit kamassaarpai.” 6 Pilaatusip tamanna tusaramiuk angut Galiliiamiuunersoq apeqqutigaa. 7 Jiisusi Herodasip naalakkersuiffianeersuusoq paasigamiuk Herodasimut, ulluni taakkunani aamma Jerusalemmimiittumut, ingerlateqqippaa.
8 Herodasip Jiisusi takugamiuk assut nuannaalerpoq. Jiisusimi pillugu tusagaqartuarami sivisujaamik takorusussimavaa neriuutigalugulu tupinnartuliortoq takujumaarlugu. 9 Taamaattumik apersoqattaalerpaa, Jiisusilli akineq ajorpaa. 10 Palasilli nuimasut allakkanillu ilisimasut nikuittaqattaarlutik kamallutik unnerluutigisarpaat. 11 Taava Herodasip sakkutuuisalu asissorpaat assukkersorneratigullu mitaatigeriarlugu Pilaatusimukarteqqillugu. 12 Herodasi Pilaatusilu siornatigut akerariissimagaluarlutik ulloq taanna ikinngutigiilerput.
13 Taava Pilaatusip palasit nuimasut, siulersortaasut inuppassuillu aggeqquai 14 oqarfigalugillu: “Angut una uannut sassartipparsi inuppassuarnik pikitsitseqqusisutut unnerluutigalugu. Maanna ilissi saassinni apersoreerlugu unnerluussutisi tunngavissaqarsorinngilakka. 15 Herodasip uagutsinnut utertinneratigut aamma pisuussuteqannginnerarpaa. Toqumik pillaataasinnaasumik iliuuseqarsimanngilaq. 16 Taamaattumik iperartorteriarlugu* iperagaatissavara.” 17 *—— 18 Inuppassuilli tamarmik suaartarput: “Toquguk, Baarabalu iperagaatiguk!” 19 (Angut taanna illoqarfimmi pikitsitsiniartutut inummillu toqutsisutut unnerluutigineqarluni parnaarussaasimavoq). 20 Pilaatusip Jiisusi iperagaatikkusukkamiuk oqaluuteqqilerpai. 21 Taava suaartalerput: “Qisummut naalliutsitsiviliamut* nivinngarneqarli! Qisummut naalliutsitsiviliamut nivinngarneqarli!” 22 Pingajussaanik oqarfigai: “Sooq? Qanoq ajortuliorami? Toqumik pillaataasinnaasumik iliuuseqarsimasorinngilara. Taamaattumik iperartorteriarlugu iperagaatissavara.” 23 Taamaalisorlu toqumik pillarneqarnissaa suli nipitunerusumik suaartaatigilerpaat. Suaartarnerallu nipitungaarmat 24 Pilaatusi aalajangerpoq piumasaat malinniarlugu. 25 Angut pikitsitsiniarneq inummillu toqutsineq pissutigalugit parnaarussaaqqasoq iperagaateqqusaat iperagaatippaa, piumasaalli naapertorlugu Jiisusi toqutassanngortillugu.
26 Maanna Jiisusi annikkamikku Siimuut Kyrenemiu illoqarfiup silataanit aggersoq tigusaraat Jiisusillu kingornani qisummik naalliutsitsiviliamik nammaaqqullugu. 27 Inuppassuit, aamma arnat aliasullutik imminnut tilluartut kappialasullu, malippaat. 28 Jiisusip arnat saappai oqarfigalugillu: “Jerusalemmip panii, qissatigeqinasinga. Immissinnulli qissatigalusilu qitornasi qissatiginiarsigit. 29 Ullummi nalliukkumaarput inuit ima oqarfissaat: ‘Pilluarput arnat meerartaarsinnaanngitsut, ernisimanngitsut milutsitsisimanngitsullu!’ 30 Taava qaqqanut oqassapput: ‘Nakkarfigitigut!’ qattunernullu: ‘Matoortigut!’ 31 Orpik naggoritsillugu taamaaliortarpata toquliorpat qanoq pisoqassava?”
32 Angutit allat marluk pinerluttut toqutaaqatissai aamma ingerlanneqarput. 33 Sumiiffimmullu Niaqornamik taaneqartartumut pigamik pinerluttut akorngannut qisummut naalliutsitsiviliamut kikiattuuppaat. Aappaa talerpiatungaaniippoq aappaalu saamiatungaaniilluni. 34 Jiisusili oqarpoq: “Ataata, qanoq iliornertik nalugamikku isumakkeerfigikkit.” Sakkutuullu qallersaatai immeraannikkut agguaappaat. 35 Inuillu nikorfallutik isiginnaarput. Siulersortaasulli ima oqarlutik mitaatigaat: “Allat annaattarpai. Kristusiuguni Guutip toqqagaa imminut annaalli.” 36 Allaat sakkutuut illaruaatigaat, orneriarlugulu viinnimik seernartumik neqeroorfigigamikku 37 oqarfigaat: “Juutit kunngigippatsit imminut annaanniarit.” 38 Aamma qulaani ima allagartaliipput: “Tassa juutit kunngiat.”
39 Taava pinerluttut nivinngagaasut ilaata mitaatigalugu oqarfigaa: “Kristusiuvutit, ilaa? Taamaappat imminut annaateriarlutit annaatsigut!” 40 Aappaatali avoqqaaraa: “Illit taassumatut eqqartuunneqaraluarlutit Guuti mianerinngilluinnarpiuk? 41 Iliuutsitsinnut naapertuuttumik naalliuppugut, angulli una ajortuliunngilaq.” 42 Taava oqarpoq: “Jiisusi, Kunngeqarfinnut piguit eqqaaginga.” 43 Jiisusillu oqarfigaa: “Ullumi ilumut oqarfigaakkit: Paratiisimeeqatigiumaarparma.”
44 Maanna ullup-qeqqata* missaaniippoq, pingasulli* missaata tungaanut nuna tamarmi taarsivoq 45 seqineq qaamaneerummat. Guutisiorfiullu saagorsua qeqqatigut siippoq. 46 Jiisusi nipituumik suaarpoq: “Ataata, anersaara ilinnut isumagisassanngortippara.” Taama suaareerluni anerningerpoq. 47 Sakkutuut naalagaata pisut takugamigit Guuti ima unnersiutigilerpaa: “Ilumut angut taanna naapertuilluartuusimavoq.” 48 Inuppassuit pillakkanik toqutsinermik isiginnaariarsimasut tamarmik pisut takugamikkit sakissamikkut imminnut tilluarlutik angerlarput. 49 Jiisusillu nalunngisai tamarmik ungasiarlutik nikorfapput. Aamma arnat Galiliiamiit angalaqatigisimasai najuupput tamakkulu tamaasa takullugit.
50 Anguteqarpoq ajunngitsumik naapertuilluartumillu Juuserfimik atilimmik, taanna juutit eqqartuussiviisa qullersaannut ilaasortaavoq. 51 (Angutip taassuma taakkua pilersaarutaat iliuusiilu isumaqatiginagillu tapersersunngilai). Judiiamiut illoqarfiisa ilaannit Arimatiiameersuuvoq Guutillu kunngeqarfiata naalakkersuilernissaanik utaqqilluni. 52 Angut taanna Pilaatusimukarpoq aperalugulu Jiisusip timaa ilisinnaanerlugu. 53 Qisummik naalliutsitsiviliamit aqqariarlugu annoraassiamut pitsaasumut immuppaa qaarusummilu ilivissiamut, toqusumik ilisiffigineqarsimanngitsumut, ilillugu. 54 Maanna piareersarfiuvoq ullorlu qasuersaarfik aallartingajalerluni. 55 Jiisusilli arnat Galiliiamiit angalaqatigisimasai malinnaapput iliverlu ilineqarfia takullugu. 56 Taava tipigissaatit uuliallu tipigissut piareersariartorniarlugit uterput. Kisianni soorunami inassut naapertorlugu ullormi qasuersaarfimmi qasuersaarput.