Angut sapiitsoq

NUNAMI inuit amerliartoramik amerlanersaat Kainitut ajortumik iliuuseqartarput. Angulli ataaseq allaavoq. Ateqarpoq Enok. Enok sapiitsuuvoq. Inooqatai tamarmik ajortuliortarput, Enokilli Guuti kiffartuuttuarpaa.

Nalunngiliuk suna pissutigalugu inuit taamani ajortuliortartut? Eqqaamaviuk kia Adam Evalu Guutimut naalanngitsunngortikkai paarnamillu Guutip nereqqunngisaanik nereqqugai? Inngilipiluup. Taanna Biibilimi Satanimik taaneqarpoq. Inuit tamaasa ajortunngortinniarpai.

Ullut ilaanni Jehova Guutip Enok tusarliisippaa inuit tusarumanngisaannik. Oqarpoq: ’Guutip inuit ajortut tamaasa piuneerukkumaarpai.’ Tamanna tusaramikku inuit kamassimassaqaat. Immaqalu Enok toqunniaraluarpaat. Taamaattumik Enok qunusuittariaqarpoq Guutip naammassiumaagaanik inuit tusarlissagunigit.

Guutip Enok inuit ajortut tamakkua akornanni sivisuumik inooqqunngilaa. Enok 365-iinnarnik ukioqarluni toquvoq. Suna pillugu oqarpugut „365-iinnarnik“? Taamanikkummi inuit ullumikkornit peqqinneroqalutillu inuunertunerujussuupput. Ilami, Enokip ernera Metusalem 969-inik ukioqarluni toqusimavoq!

Enok toqoreermat inuit ajorsiartuinnarput. Biibilimi allassimavoq ’inuit piumasaat pilersaarutaallu ajortuinnaasut’ aamma „nunami inuit ajussusiat annertusiartuinnartoq“.

Taamanikkut nunami taama ajortoqartigineranut pissutaasut ilaat nalunngiliuk? Satan inunnik ajortuliortitsiniarnerminut nutaamik periaaseqalersimavoq. Tamanna pillugu tulliani ilinniassaagut.