Pulateriaarsuusaliaq

PULATERIAARSUK qisummut napasumut nermussimasoq piviusorpalaarpa? Piviusuunngilaq. Pulateriaarsuk kanngussammit sanaajuvoq. Jehovap Moses oqarfigaa pulateriaarsuusaq qisummut napasumut iverteqqullugu inuit toqujumanatik qiviartarniassammassuk. Pulateriaarsuilli nunamiittut piviusuupput. Taakkua inuit kiisarpaat napparsimalersillugillu. Suna pissutaasoq nalunngiliuk?

Israelikkut Guuti Mosesilu assortormatigit. Naammagittaalliorput oqarlutik: ’Sooq Egyptenimit aallaruppisigut inoqajuitsumi maani toqoqqulluta? Tamaani nerisassaqarnanilu imeqanngilaq. Mannallu qatsutivippavut.’

Mannalli nerisassaapput peqqinnartut. Jehovap tupinnartuliorluni mannanik tunisarpai. Tupinnartuliorlunilu imissaqartittarpai. Inuilli Guutip imminnik isumassuinera qujamasuutiginngilaat. Taamaattumik Jehovap pulateriaarsuit toqunartullit taakku takkutsippai Israelikkut pillarniarlugit. Pulateriaarsuit kiisarpaat, inuillu ilarpassui toqupput.

Kiisami inuit Moses ornippaat oqarlutik: ’Ajortuliorpugut Jehova illillu assortoratsigit. Jehova qinnuigiuk pulateriaarsuit peerseqqullugit.’

Taava Mosesip inuit qinnuppai. Jehovallu Moses peqquaa kanngussammik pulateriaarsuusalioqqullugu. Qisummut napasumut iverteqquaa, kiineqartullu kikkulluunniit qiviartassavaat. Moses Guutip oqarneratut iliorpoq. Inuillu kiineqartut pulateriaarsuusaliaq qiviartarpaat ajorunnaarlutillu.

Tamanna ilinniarfigisinnaavarput. Israelikkut pulateriaarsunnit kiineqartut tamatta assigipajaarpavut. Tamatta toqujartorpugut. Inuit utoqqaliartorput, napparsimasarput toqusarlutillu. Taamaapput Adam Evalu Jehovamik tunussimmata, uagullu taakkua qitornaraatigut. Jehovali periarfissiorpoq naassaanngitsumik inuusinnaaqqulluta.

Jehovap ernini, Jesus Kristus, nunamut aallartissimavaa. Jesus qisummut napasumut paagunneqarsimavoq, inuppassuit isumaqarmata ajortuusoq. Jehovalli Jesus tunniuppaa uagut annaakkumalluta. Taanna qiviarutsigu, malikkutsigu, taava inuuneq naassaanngitsoq pissavarput. Tamanna kingorna tusarfigeqqikkumaarparput.