Guutimik asannittunik ikinngutissarsiorit

IKINNGUT tassaavoq oqaloqatigalugu ilagalugulu nuannersoq. Eqqortunik ikinnguteqarnissaq pingaaruteqarpoq. Ikinngutigisinnaasaq pitsaanerpaaq kinaasoraajuk? — Jehova Guuti.

Jehova Guutimut ilumut ikinngutaalersinnaavugut? — Aap, Biibilimi allassimammat Aaperaat, angut itsarsuaq inuusimasoq, ‘Jehovamut ikinngutaasoq’. (Jaaku 2:23) Sooq Jehovamut ikinngutaasoraajuk? — Naalakkamiuk. Guutimut naalattuuvoq allaat sapernangaartunik ilioqquneqaraluarluni. Guutimut ikinngutaassagutta kissaatigisai malillugit iliortariaqarpugut. Aaperaat taamaaliorpoq, Ajoqersuisorsuaq aamma taamaaliorpoq. — 1 Mosesi 22:1-14; Johannesi 8:28, 29; Hebræerit 11:8, 17-19.

Jiisusip apustilini ima oqarfigai: “Inassutikka malillugit iliorussi tassaassaasi ikinngutikka.” (Johannesi 15:14) Jiisusip inunnut inassutai tamarmik Guutiminngaanneersuummata Jiisusip oqaasii ima paasisariaqarput — Guutip peqqussutaanik malinnittut Jiisusimut ikinngutaasut. Jiisusip ikinngutai tamarmik Guutimik asannittuupput.

Ajoqersuisorsuup ikinngutiginerpaasaasa ilaat tassaapput apustilii. Taakku atuakkami matumani quppernermi 75-imi takuneqarsinnaapput. Angalaqatigalugulu oqaluusseqatigisarpaat. Taakku Jiisusip ilaginerusarpai. Nereqatigisarpaat, Guuti pillugu oqaloqatigiittarlutik allarpassuarnillu sammisaqaqatigiittarlutik. Jiisusili aamma allarpassuarnik ikinnguteqarpoq. Ilaatigut pulaartarpai nuannisaqatigisarlugillu.

Ilaqutariit Jiisusip pulaarlugit nuannarisai nunaqarfimmi Betaniami, illoqarfissuup Jerusalemip avataani, najugaqarput. Eqqaamavigit kikkuunersut? — Tassa Maria, Martha qatanngutaallu, Lazarusi. Jiisusip Lazarusi ikinngumminik taavaa. (Johannesi 11:1, 5, 11) Jiisusip taakku pingasut nuannaralugillu pulaarusuttarnerannut pissutaavoq Jehova asammassuk kiffartorfigalugulu.

Jiisusip aamma inuit Guutimut kiffartortuunngitsut inussiarnerfigisarpai. Pulaartarpai nereqatigisarlugillu. Taamaattumik inuit ilaasa Jiisusi ‘ilanngaaserisunik ajortuliortunillu ikinnguteqarnerarpaat’. (Matthæusi 11:19) Jiisusilli inuit taakku inooriaasiat nuannarigamiuk pulaanngilai. Pulaarpaali Jehovamik oqaluttuunniarlugit. Ikiorusuppai inooriaasertik allanngortinniassammassuk Jehovalu kiffartorfigilerlugu.

Ullut ilaanni taama pisoqarpoq Jiisusi illoqarfimmi Jerikomiitsillugu. Jerusalemiliarluni illoqarfik aqqusaarpaa. Inuppassuit katersuupput, taakkulu ilagaat angut Zakæusimik atilik. Taassuma Jiisusi takorusoqaa. Angivallaannginnamili inuppassuillu assersimammanni takusinnaanngilaa. Siuarluni arpappoq orpimmullu qallorluni Jiisusi saneqquppat takuniassagamiuk.

Jiisusip orpik nalleramiuk qummut qiviarpoq oqarlunilu: ‘Tuaviorlutit aqqarasuarit, ullumi ilinnut pulaassagama.’ Zakæusili angutaavoq pisooq eqqunngitsorpassuarnik iliorsimasoq. Sooq Jiisusip angut taamaattoq pulaarusuppaa? —

Imaanngilaq Jiisusip angutip inooriaasia iluarigaa. Zakæusili Jehova pillugu oqaluttuukkusuppaa. Jiisusip malugaa Zakæusip takorusulluni qanoq iliuuseqartigisoq. Taamaattumik nalunngilaa angutip tusaarusussagaani. Tamanna periarfissaalluarpoq Guutip qanoq inooriaaseqartariaqarnitsinnik oqaasii pillugit taassuminnga oqaluttuussinissamut.

Taava qanoq pisoqarpa? — Zakæusip Jiisusip ilinniartitsissutai nuannarai. Peqqissimissutigaa inuit aningaasanik peqqusersusaarfigisimagamigit, neriorsuivorlu peqqusersusaarfigisimasani utertitsiffigiumallugit. Taava Jiisusimut ajoqersuganngorpoq. Aatsaat tamatuma kingorna Jiisusi Zakæusilu ikinngutigiilerput. — Lukasi 19:1-10.

Ajoqersuisorsuartut ikkusukkutta ikinngutiginngisavut pulaarusussagaluarpavut? — Aap, taamaalluarsinnaavoq. Imaanngilarli inooriaasiat nuannarigatsigu pulaarivut. Eqqunngitsulioqatigerusunngilluinnarpavullu. Guuti pillugu oqaluussiffiginiarlugit pulaartarpavut.

Ilagalugit nuannarisavut tassaapput ikinngutigilluakkavut. Pingaaruteqarpoq Guutip iluarisaanik ikinnguteqarnissarput. Inuit ilaasa immaqa suli Jehova kinaanersoq naluaat. Kinaanersorli paaserusuppassuk ikiorsinnaavavut. Kingornalu Jehova uagutsitut asalerpassuk ikinngutigillualersinnaavavut.

Aamma allamik iliuuseqarsinnaavugut paasiniarlugu inuk uagutsinnut ikinngutaallualersinnaanersoq. Qanoq iliortarnera maluginiarsinnaavarput. Allammi ajortumik pisarpagit kingornagullu illaatigiinnarlugit? Tamanna eqqunngilaq, ilaa? — Ajornartorsiuteqalertuaannarpa nammineq pisuussutigisaminik? Ajornartorsioqatigilerumanngilarput, ilaa? — Allaammi piaaraluni eqqunngitsuliortarpa paasineqannginninilu torragalugu? Nalunngilarput Guutip suut tamaasa isigigai aamma inuit takusinnaanngisaat. Isumaqarpit inuit taamaattut ikinngutigissallugit ajunngitsoq? —

Biibilit qupperiaruk. Atuassavarput qanoq ilagisartakkatsinnit sunnerneqartarnitsinnut tunngasoq. Taanna 1 Korinthimiut, kapitali 15, versi 33-mi allassimavoq. Qupperpiuk? — Allassimavoq: “Tammarnaveeritsi! Ikinngutipalaaqarneq ileqqorikkaluartunut aseruutissiisarpoq.” Tamanna ima paasisariaqarpoq: Ajortuliortartut ilagivallaartarutsigit taakkutut iliortalissaagut. Aammali inuit ajunngitsut ilagisarutsigit ileqqorississaagut.

Puiunngisaannartigu Jehova inuunitsinni pingaarnerpaasoq. Taasuminnga ikinnguteqarnerput sumilluunniit aserorneqartikkusunngilarput, ilaa? — Taamaattumik Guutimik asannittunik ikinngutissatsitut toqqaaneq pingaaruteqarpoq.